Read Khoekhoegowab Genesis 37 Bible Online

Genesis 37 - Khoekhoegowab bible

Genesis 37

¹Tsî Jakob ge ǃhaokhoesis ǁîb îb dis di ǃhūb ǃnâ ge ǁan, Kanaanǃhūb ǃnâ.

²Tsî nēdi ge Jakob di ǃnaeǃkhaide. Joseb ge disihûǀa kurixa ǀgôase gūna gere ǃûsi, ǂkhamkhoeb a hîa, Bilhas di ôagu ǀkha tsî Silpas di ôagu ǀkha, ǁîb îb di tarara; tsî Joseb ge ǁîgu di tsū gomma ǁgûb tawa ge ūsī.

³Tsî Israeli ge Joseba ge ǀnam i, ǁîb ôagu hoagu ǃgâ-ai, kairasib âb di ôab ge i amaga; ob ge anxa sara-e ge dība bi.

⁴Tsî ǃgâsagu âb ge mûo ǁgûb ǁîba ǁîb di ǃgâsagu hoagu ǂamai ǀnam hâ ǃkhaisa, o gu ge ge ǁkhan bi, tsî gu ge khoexasise ǃhoa-ū bi ǁoa ge i.

⁵ǁKhātib ge Joseba ǁhapo-e ge ǁhapo, ǁî-eb ge ǃgâsagu âba ge ǃhoaba; ǁnā-amaga gu ge ǁnās ǃgâ-ai ge ǁkhan bi.

⁶Tsîb ge ǁîgu ǃoa ge mî: ǁNâu go re nē ǁhapo-i hîa ta go ǁhapo-e.

⁷Tsî mû, sage ge ǃgaeǀkhādade ge ǃgaeǀkhā ǃhanab ǁaegub ǃnâ; tsî mû, ti ǃgaeǀkhādas ge khâi tsî khâi hâse ǁkhāti mâhâhâ ge hâ i; tsî mû sago ǃgaeǀkhādadi ge hāǂnamipe si tsî ti ǃgaeǀkhādas aiǃâ ge ǃgamǃgâ.

⁸O gu ge ǃgâsagu âba ǁîb ǃoa ge mî: Hoaragasets kha ǁnâi satsa sige nî gaoǂam? Hoaragasets kha ǁnâi satsa sige nî gaoba? Nēti gu ge ǃaruǀîǀgui ge ǁkhan bi ǁhapodi âb tsî mîdi âb ǃaroma.

⁹Tsîb ge ganupe ǀnî ǁhapo-e ge ǁhapo, tsîb ge ǁî-e ǃgâsagu âba ǃhoaba tsî ge mî: Kō, tita ge ǀnî ǁhapo-e go ǁhapo, tsî mû, sores tsî ǁkhâb tsî disiǀguiǀa ǀgamirodi tsîn ge ti aiǃâ ge ǃgamǃgâ.

¹⁰Tsî ǁgûb tsî ǃgâsagu âbab ge ǃhoabao, ob ge ǁgûba ǃgabe tsî ge mîǀî bi: Mâ ǁhapo-ai-e kha nē-i, sats go ǁhapo-e? Sida hoada, tita tsî saos tsî sa ǃgâsagu tsîda kha ǁnâi hā tsî nî sa aiǃâ ǃgamǃgâ?

¹¹Tsî ǃgâsagu âb ge ǁîba ge suri; xawe ǁgûb ge nē ǃnaeǃkhaisa ge sâu.

¹²Tsî ǁîb di ǃgâsagu ge ge ǃgû, ǁgûb di gūna gu nî Sexems tawa ǃûsiga.

¹³ǃNubaib ge Israela Joseb ǃoa ge mî: Sa ǃgâsaga ǃûsi tama gu hâ Sexems tawa? Hā î ta satsa ǁîgu ǃoa sî. Ob ge ǁîb ǃoa: Mû, nē ta a! ti ge mî.

¹⁴Ob ge ǁîb ǃoa ge mî ǃGû îts sa ǃgâsagu di ǃgâihâsa kōǃgâ tsî gūn di ǃgâihâsa, îts am-e ǁkhawa ūhāba te re. Nētib ge ǁîba ǃgoaǃnāb Hebrons diba xu ge sî bi, tsîb ge Sexems tawa ge sī.

¹⁵Tsî aore khoe-i ge ge hō bi, ǃgarob aib ra ǁhapu hîa. Ob ge ǁnā khoeba dî bi tsî: Tare-ets ra ôa? ti ge mî.

¹⁶Ob ge ge mî: Tita ge ti ǃgâsaga ra ôa; ǂanǂan te re mapa gu ra ǃûi ǃkhaisa.

¹⁷Ob ge ǁnā khoeba ge mî: Nēpa xu gu ge go doe, ǁnâu ta kom go: A ge Dotans ǃoa doe! ti gu ra mî ǃkhaisa. Ob ge Joseba ǁîb ǃgâsaga ǃgûǃgon tsî Dotans tawa ge hō gu.

¹⁸Tsî gu ge ǃnūseba xu ge mû bi, tsî ǁîgab ǀgū tama hâ hîa gu ge gāxaǃnâ ǀape-ai-e ge ǀapeǀape, ǃgam bi gu nî ti.

¹⁹O gu ge nēba nauba ǃoa ge mî: Mû, ǁnāb ge ǃgoaxa ǁhapoǀhonkhoeba.

²⁰Hā ǁnâi, î ge ǁîba ǃgam, î ge ǁîba nē ǂgâgu di ǀguib ǃnâ aoǂgā, î ge mî: ǁAixa ǀguru-i ge go hapu bi; o ge nî mû, tare xūdi a ǁîb di ǁhapo ǃkhaisa.

²¹Tsî Rubenni ge ǁnāsa ǁnâuo, ob ge ǁîgu ǃomǁaeba xu xore bi tsî ge mî: A ge ǁîba tā ǃgam!

²²ǁKhātib ge Rubenna ǁîgu ǃoa ge mî: Tā ǀaoǂnâxū, î go ǁîba ǁnā tsaus, ǃgarob ai hâs ǃnâ aoǂgā re, î go ǃomma tā ǁguiǀkhā bi; ǁîgu ǃomǁaeba xub nî ore bise, ǁgûbab nî ǁkhawa ūsība biga.

²³Tsî i ge ge ī, Joseb ge ǃgâsagu âb tawa sīo, o gu ge ǁîba sarab âba ge ǂgaeǂuiǀkhā, ǁnā anxa sarab, hîab anasen hâba.

²⁴O gu ge ū tsî tsaus ǃnâ ge aoǂgā bi; tsî tsaus ge ǀkhaiǃnâ ge i.

²⁵ǁNās khaoǃgâ gu ge ge ǂnû, pereǂû gu nîse, tsî ǃgapakhâi tsî gu ge kō-o, mû, o gu ge ǃgûgau Ismaelǁîga Gileada xu ge hā; tsî ǁîgu di ǃnain ge ǃgâihamxūn tsî balsemmi tsî miren tsîna ǃgû rase ge tani, Egipteb ǃoan nî ūǁgôahese.

²⁶ǃNubaib ge Judaba ǁîb di ǃgâsagu ǃoa ge mî: Tare-e nî harebe, sage ǃgâsaba ge ga ǃgam tsî ǀaob âba ge ga gaugauo?

²⁷Hā î ge ǁîba nē Ismaelǁîgu tawa ǁamaxū, îb sage ǃomma tā ǁîb ai hâ. Sage ǃgâsab, sage ǁganni kom ǁîbao. O gu ge ǃgâsagu âba ge ǁnâuǀnam bi.

²⁸Tsî Midianǁî ǁama-aogu ge ǃnarao, o gu ge Joseba tsausa xu ǂgaeǂui tsî ūkhâi tsî ǁîba Ismaelǁîgu tawa ge ǁamaxū, ǀgamdisi ǀhaiǀurimarin ama; ǁîgu ge ǁîba Egipteb ǃoa ge ūsī.

²⁹Tsî Rubenni ge tsaus tawa oasīo, mû, ob ge Joseba tsaus ǃnâ ǀkhai ge i; ǃnubaib ge saran âba ge ǀkhau.

³⁰Tsîb ge ǃgâsagu âb tawa ǁkhawa hā tsî ge mî: ǀGôab ge a ǀkhai; o tita mâǀî ta ǁnâi nî ǃgû?

³¹O gu ge Joseb saraba ū tsî piri-e ǂā tsî saraba ǀaob ǃnâ ge ǂgobe.

³²Tsî gu ge anxa saraba ū tsî ǁgûb ǃoa ge ūsī kai bi tsî ge mî: ǁÎba ge ge go hō; mûǂan re, iseb ǁîba sa ôab di sara, iseb ǁî tama ǃkhaisa.

³³Ob ge mûǂan tsî ge mî: Ti ôab di sarab komo. ǁAixa ǀguru-i kom go hapu bio! Amaseb kom Joseba go ǀkhauǃāheo!

³⁴ǃNubaib ge Jakoba sarab âba ǀkhau tsî ǁhō-e kamanab âb ai ge ana; tsîb ge ǃhausensa ge hî ǁîb di ôab ǃaroma ǂgui tsēde.

³⁵Tsî ǁîb di ôagu hoagu tsî ǁîb di ôadi hoadi ge ge khâi, ǁkhaeǂgao bin nîse; xaweb ge ǁkhaeǂgaokaisen ǂgao tama i tsî ge mî: Tita kom ǃhausen hâse ti ôab tawa ǀhobas ǃnâ nî ǁgôao. Nētib ge ǁgûba ge āba bi.

³⁶Tsî Midiaǁîgu ge ǁîba Egipteb ǃnâ ge ǁamaxū, Potifari, Faraob ommi dib, ǃkhē-aogu ǂamkhoeb tawa.