Read Khoekhoegowab Genesis 38 Bible Online

Genesis 38 - Khoekhoegowab bible

Genesis 38

¹Tsî i ge ǁnā ǁaeb ǁkhāb ai ge ī, Judab ge ǃgâsagu âba xu doeǂoa tsî sī hâ ǃkhaisa, Adulamǁîb, Hira ti ǀon hâb tawa.

²Tsî Judab ge ǁnāpa Kanaanǁî-aob, Sua ti ǀon hâb di ôasa ge mû; ob ge ǁîsa ū tsî ǁîs tawa ge ǂgâ.

³Os ge ǀgamǀkhā tsî ǀgôaba ge ǁora, tsîb ge ǀons âba Er ti ge ǂgai.

⁴ǁNās khaoǃgâs ge ǁkhawa ǀgamǀkhā tsî ǀgôaba ge ǁora, tsîs ge ǀons âba Onan ti ge ǂgai.

⁵Tsîs ge aiǃâb ǃoa ǀgôaba ge ǁora, tsîs ge ǀons âba Sela ti ge ǂgai; tsî ǁîb ge Kesibs tawa ge hâ i, ǁîbas ge ǁora ǃnubai.

⁶Tsî Judab ge Eri, ǁîb di ôab kaiba tara-e ge ūba; tsîs ge ǁîsa Tamar ti ge ǀon hâ i.

⁷Xawe Eri Judab di ǂguroǃnaesabeb ge ǂkhaba ge i ǃKhūb mûǁae; ǁnā-amagab ge ǃKhūba ge ǃgam bi.

⁸ǃNubaib ge Judaba Onanni ǃoa ge mî: ǂGâ re sa ǃgâsab di taras tawa îts ǃgame si re sa ǃgâsab di amǃnâs ǃnâ, îts sa ǃgâsaba suriba ǂkhaiǂkhaiba.

⁹Xawe Onanni ge ǂan ge i, surib nî ǁîb ǂûb di tama i ǃkhaisa, o i ge ge ī, ǁîb ǃgâsab di taras tawab ge ǂgâ ǃnubaib ge ǃhūb ai ge hîǀhuru bi, ǃgâsab âbab suriba mā tidese.

¹⁰Tsî nē ǃkhais hîab ge dīs ge ǃKhūb mûǁae ǂkhaba ge i; ǁnā-amagab ge ǁîba ǁkhāti ge ǃgam.

¹¹ǃNubaib ge Judaba Tamars ǁîb di ǀuiǀgôasa ǃoa ge mî: ǃOatarase hâ re sa îb di ommi ǃnâ, ti ôab Selab nî kais kōse, nētib ra mî xui-ao: Îb ǀnîsi nēba ǁkhāti tā ǁō ǁîb di ǃgâsakha khami. Os ge Tamarsa ǃgû tsî ǁgûb âs di ommi ǃnâ sī ge hâ.

¹²Tsî ǂgui tsēdi khaoǃgâs ge Suab ôas, Judab tarasa ge ǁō; ǁnās khaoǃgâb ge Judaba ǁkhaeǂgaosen tsî ge ǃgûǃapa ǁîb di gūǂkhomaogu ǃoa Timnas tawa, ǁîb tsî Hirab, ǁîb di ǀhōsab Adulamǁîb tsîkha.

¹³On ge Tamarsa ǂanǂan tsî ge mî: Mû, sa ǀuiǁgûb ge Timnas ǃoa ra ǃapa, gūna nî ǂkhomse.

¹⁴Os ge ǃoatarasis âs di sarana ǁhûǁnâ tsî ǃgū-aida-i ǀkha ge ǃgū-aisen tsî ge anaǃgūsen tsî Enaims di ǂgâǃkhai-i, Timnas daob ǃnâ hâ-i tawa ge sī ǂnû; mûs ra amaga Selab ge kai xawes ǁîba tarase māhe tama ge i ǃkhaisa.

¹⁵Tsî Judab ge ǁîsa mûo, ob ge ǁîsa ǀai-aose ge ū, ais âs ge ǃgū-aihe hâ i amaga.

¹⁶Ob ge ǁîsǀî daob ǃoa ǃgû tsî ge mî: Hā î ta sa tawa ǂgâ re, ǀūb ge i xui-ao ǁîb di ǀuiǀgôas a ǃkhaisa. Os ge ǁîb ǃoa ge mî: Tare xū-e mā te tsîts nî ti tawa ǂgâxa?

¹⁷Ob ge ge mî: Tita ge piriro-e nî sîba si pirina xu. Os ge ǁîsa: Mâiǁkhae-ets ga mā teo, ǁî-ets nî sîs kōse, ti ge mî.

¹⁸Ob ge ǁîba: Mâ mâiǁkhae-e mā si ta nî-e? ti ge mî. Os ge ǁîsa: Sa ǀkhunuǂnûidas tsî sa tsurib tsî sa ǀkharus hîats ǃomǁae ūhâs tsîna, ti ge mî; tsîb ge ǁîsa ǁîna mā tsî ǁîs tawa ge ǂgâ; tsîs ge ǁîba xu ge ǀgamǀkhā.

¹⁹Os ge khâi tsî ǃgû tsî ǃgū-aidas âsa ūǁnâ tsî ǃoatarasis âs di sarana ge ana.

²⁰Tsî Judab ge piriroba ge sî ǁîb horesab Adulamǁîb ǀkha, mâiǁkhaedeb nî taras di ǃomǁaeba xu ūga, xaweb ge hō si tama ge i.

²¹Ob ge ǁîs ǃās di khoena dî tsî ge mî: Mapas hâ ǁnā ǀai-aos nē Enaims tawa daob amǃgâ ge ǂnôa isa? On ge: ǀAi-ao-i ge nēpa hâ tama go hâ i, ti ge mî.

²²Ob ge Judab ǃoa ǁkhawa oa tsî ge mî: Tita ge hō si tama hâ; tsî khoen ǁnā ǃās din ge ǁkhāti: ǀAi-ao-i ge nēpa hâ tama go hâ i, ti ge mî.

²³Ob ge Judaba ge mî: As ǁîsa ūbasen î khom tā ǃharaxūhe, mû, tita ge nē piriba go sî, xawets ge mû si tama go hâ i.

²⁴Tsî i ge ǃnona nî ī ǁkhâgu khaoǃgâ ge ī, on ge Judaba ǂanǂan tsî ge mî: Tamars, sa ǀuiǀgôas ge ge ǀai, tsî mû, ǁkhātis ge ǀaiba xu ǀgamǀkhā hâ. Ob ge Judaba ge mî: Ūǀkhī si, îs khauǃkhūhe!

²⁵Tsî ūǀkhīhes ra hîas ge ǀuiǁgûb ǃoa ge sî, mîba kais nîse: ǁNā aob nē xūn â-iba xu ta ge a ǀgamǀkhā tsîs ge ge mî: ǂAnǃā re, tarib din a ǃkhaisa nē ǃgae-amǀkhunuǂnûidas tsî nē tsurigu tsî nē ǀkharus tsîna.

²⁶Ob ge Judaba ǁîna ǂan tsî ge mî: ǁÎs ge tita xa a ǂhanu-ai, ti ôab Selaba ta ǁîsa mā tama hâ amaga. Tsîb ge aiǃâb ǃoa ǂangu-ū si tama hâ ge i.

²⁷Tsî i ge ge ī ǁoras nî ǁaeb ai, mû, o kha ge ǀgēkha ǃnāb âs ǃnâ ge hâ i.

²⁸Tsî i ge ge ī, ǁoras ra hîab ge ǀguiba ǃomma a ūǂui ǃkhaisa; os ge ǁoraǃkhō-aosa ǁîba ū tsî ǀapa ǁapa-e ǃommi âb ai ǃgae tsî ge mî: Nēb ge ǂguro nîra ǀkhība.

²⁹Xawe i ge ge ī, ǃommi âbab ge ǁkhawa ūǂgāo, mû ob ge ǃgâsab âba ge ǀkhī; os ge: Matits kha ǁnâi go khôaǃganu, ti ge mî, tsîn ge Peres, ti ge ǂgai bi.

³⁰ǁNās khaoǃgâb ge ǃgâsaba ge ǀkhī, ǃommi âb ai ǀapa ǁapaba ūhâba; tsîn ge Serax, ti ge ǂgai bi.