Read Khoekhoegowab Genesis 39 Bible Online

Genesis 39 - Khoekhoegowab bible

Genesis 39

¹Tsî Joseb ge Egipteb ǃoa ge ūǁgôahe; tsî Potifari, Faraob ommi dib, ǃkhē-aogu ǂamkhoeb, Egipteǁî aob ge ǁîba Ismaelǁîgu ǁnāpa ge ūǁgôa bi gu di ǃomǁaeba xu ge ǁama.

²Tsî ǃKhūb ge Joseb ǀkha ge hâ i, ob ge ge ǃgâiǃgâ khoe kai; tsîb ge ǀhonkhoeb âb Egipteǁîb di ommi ǃnâ ge hâ.

³Tsî ǀhonkhoeb âb ge mû ǃKhūb ǁîb ǀkha hâsa, tsî ǃKhūb ge dīb ra xū-i hoa-e ra ǃgâiǃgâ kai ǃkhaisa,

⁴ob ge Joseba ǀkhomma ge hō ǁîb di mûǁae tsî gere ǃoaba bi; tsîb ge ǁîb ommi ǂama ge mâi bi, tsî ūb hân hoanab ge ǁîb ǃomǁae ge mā.

⁵Tsî i ge ge ī, ǁnā ǁaeba xu ǁîb ommi ǂama tsî ūb hân hoan ǂamab ge mâi bisa xub ǃKhūba Egipteǁîb di omma ge ǀkhae ǃkhaisa Joseb ǃaroma; ā, ǃKhūb di ǀkhaeb ge dīb ta xūn hoan ǀkha ge hâ i ommi ǃnâs kao, ǃaub ais kao.

⁶Ob ge ūb hâ xūn hoana Joseb ǃomǁae ge ǁnā ǀnî xū-i xare-i xab ǂan tama ge hâ is kōse, ǂûb ra pereb ǀguib xa. Tsî Joseb ge îsa ǀkhās tsî îsa ais â-i khoe ge i.

⁷Tsî i ge nē xūn khaoǃgâ ge ī, ǀhonkhoeb âb di taras ge Joseba mûǁae ūhâ i ǃkhaisa; os ge: ǁGoeǀkhā te re, ti ge mî.

⁸Xaweb ge ǂkhā tsî ǀhonkhoeb âb di taras ǃoa ge mî: Mû, ti ǀhonkhoeb ge ti tawa ǂan-e ūhâ tama hâ ommi ǃnâ hâ-i hoa-i xa; tsî ūb hâ-i hoa-eb ge ti ǃomǁae ge mâ.

⁹Khoe-i xare-i ge nē ommi ǃnâ tita xa kai tama hâ, tsîb ge xū-i xare-e tita xu ūdawa tama hâ, sas ǀguis, ǁîb di taras a amaga; mati ta kha ǁnâi nēti ī kai ǂkhaba-e dī tsî nî Elob ǃoagu ǁore?

¹⁰Tsî i ge ge ī tsēsa xu tsēsa ǃoas ge Joseba ǃhoaǀîo, tsî ǁîb ge ǁnâu si tama io ǁîs ǀkha ǁgoe tsî ǁîs ǀkha hâsa,

¹¹o i ge ǁnāti ī tsē-i ai ge ī, ommi ǃnâb ra hā ǃkhaisa ǁîb sîsennab nî dīse; tsî khoe-i ommi di-i xare-i ge ommi ǃnâ ǀkhai ge i.

¹²Os ge sarab âb tawa ǃkhō bi tsî ge mî: ǁGoeǀkhā te re! Xaweb ge sarab âba ǁîs ǃomǁae xū tsî ge ǁhâ tsî ǃaugab ǃoa ge ǃgûǂoa.

¹³Tsî i ge ge ī, mûs geo sarab âbab ge ǁîs ǃomǁae ǁnā tsî ǁhâ ǃkhaisa ǃaugaba ǃoa,

¹⁴os ge ommi âs di khoena ǂgai tsî ǁîna ǃoa ge mî: Kō, ǁîb ge nē Hebreǁî khoeba ge ūǂgâxa, sada ǀkhab nî ǃhōkuse; ti tawab ge go hā ti ǀkhab nî ǁgoega, xawe ta ge ǃgari dommi ǀkha go ǂgai;

¹⁵o i ge go ī, ǁnâub go o ti domma ǃhâkhâi tsî ta ra ǂgai ǃkhaisa, ob ge sarab âba go ǁnāxū ti tawa tsî go ǁhâ tsî ǃaugaba ǃoa go ǃgû.

¹⁶Os ge sarab âba ǁîs tawa ge ǁgui, ǀhonkhoeb âb nî ǁaru hās kōse.

¹⁷ǃNubais ge ǁîb ǃoa ǁnā mîdi ǁkhāde ǃhoa tsî ge mî: ǁNā Hebreǁî ǃgāb, sats ge ūǂgâxab ge ti tawa go hā, titab nî ǃhōse.

¹⁸Tsî i ge ge ī, ti domma ǃhâkhâi tsî ta go ǂgaio, ob ge sarab âba ti tawa ǁnāxū tsî go ǁhâ ǃaugaba ǃoa.

¹⁹Tsî i ge ge ī, ǀhonkhoeb âb ge ǁîb taras di mîdi ǁîb ǃoas ra ǃhoade ǁnâuo, nēti ra mîse: Nē mîdi ǁkhādi ǃoab ge sa ǃgāba go dī te, ob ge kaise ge ǁaixa.

²⁰Ob ge Joseb ǀhonkhoeba ū bi tsî ǃkhō-omsa ge mā bi, ǁnā ǃkhais gao-aob di ǃkhōsan ǁîs ǃnâ hâs tawa; nētib ge ǁnāpa ǃkhō-oms ǃnâ ge hâ i.

²¹Xawe ǃKhūb ge Joseb ǀkha ge hâ i tsîb ge ǀkhomxaǂgaosib âba ǁîb ǃoa unu tsî ǀkhomma ge mā bi ǃkhō-oms di ǂamkhoeb mûǁae.

²²Ob ge ǃkhō-oms di ǂamkhoeba ǃkhōsan ǃkhō-oms ǃnâ hân hoana Joseb ǃomǁae ge mā; tsî ǁîn ra ǁnāpa dī xūn hoan ge ǁîb di ge i.

²³ǂAmkhoeb ǃkhō-oms dib ge ǁîb ǃomǁae hâ xū-i xare-e kōri tama ge i, ǃKhūb ǁîb ǀkha hâ xui-ao; tsî dīb ra xū-i hoa-eb ge ǃKhūba ge amǁnā kai.