Read Khoekhoegowab Genesis 4 Bible Online

Genesis 4 - Khoekhoegowab bible

Genesis 4

¹Tsî Adammi ge Evas taras âba ge ǂan, os ge ǀgamǀkhā tsî Kainna ǁora tsî ge mî: Tita ge ao-e go hō ǃKhūba xu.

²Tsîs ge ǃaruǀî ǃgâsab âb Abela ge ǁora; tsî Abeli ge ge gūǃûi-ao kai tsî Kainni ge ge ǃhanasîsenao kai.

³Tsî i ge ǁae-i khaoǃgâ ge ǃnae, ob ge Kainna ǃKhūba ǃhūb di ǂûn xa ǁguiba-e ge ǁguiba.

⁴Tsî Abeli on ge ǂgurosagu ǁîb gūn digu xa ge ūhā tsî kaub âgu xa. Tsî ǃKhūb ge Abeli tsî ǁguibas âba ge kōǀî,

⁵xawe Kainni tsî ǁguibas âbab ge kōǀî tama ge i. ǃNubaib ge Kainna kaise ge ǁaixa tsî ais âb di īsib ge ge ǀkhara.

⁶Ob ge ǃKhūba Kainni ǃoa ge mî: Tare xū-i ǃaromats kha go ǁaixa? Tsî tare xū-i ǃaromab kha sa ais di īsiba go ǀkhara?

⁷ǁNāti ī tama hâ; ǃgâidīts ka ots ra ǀgapiǀgapihe, xawe ǃgâidī tamats ga io, ob ge ǁoreba dao-ams aiǃâ ǁgoe. Turab âb sa ǃoa hâse ī, xawets ge ǁîba nî gaoǂam.

⁸Tsî Kainni ge ǃgâsab âb ǀkha ge ǃhoa; o i ge ge ī, ǁîkha ǃaub ǃnâ hâ hîab ge Kainna ǁîb di ǃgâsab Abeli ǃoagu khâi tsî ge ǂnauǃan bi.

⁹Ob ge ǃKhūba Kainni ǃoa ge mî: Mapab Abeli sa ǃgâsaba hâ? Ob ge ge mî: ǀŪ ta a; ti ǃgâsab di ǃûi-aota kha ǁnâi tita?

¹⁰Ob ge ǁîba ge mî: Tare-ets go dī? Sa ǃgâsab ǀaob di dommi ge ǃhūbaiba xu tita ǃoa ra ǂgaiba.

¹¹Tsî nēsi ǀâxarexūhe hâsets ge nîra hâ satsa ǃhūbaib, ǁîb di amsa khowa tsî go sa ǃgâsab di ǀaoba sa ǃomǁaeba xu ǃkhōǃoab ai.

¹²ǃHūbats kara sîseno, ob ge ǃaruǀî ǁîb di ǁkhāsiba mā tsi tide. ǀHâioǃnâ tsî ǁhapuma rasets ge satsa ǃhūbaib ai nîra hâ.

¹³Ob ge Kainna ǃKhūb ǃoa ge mî: Ti ǁoreb ge ǀûbahe bi ta nîs ǂamai a kai.

¹⁴Mû, sats ge nētsē nē ǃhūb di aisa xu ra ǃhaebē te, tsî ta ge sa aisa xu nî gaugausen, tsî ta ge ǀhâioǃnâ tsî ǁhapuma rase nî hâ ǃhūbaib ai; o i ge nîra ī hō te kara-i hoa-i nî ǂnauǃan te ǃkhaisa.

¹⁵Xaweb ge ǃKhūba ǁîb ǃoa ge mî: ǁNāti tama; Kainna kara ǃgam-i hoa-i ge hû ǃnādi kōse nîra ǀkhaohe. Ob ge ǃKhūba sao-e ge ǂnûi Kainni tawa, hō bi kara khoe-i hoa-i ǃgam bi tidega.

¹⁶Ob ge Kainna ǃKhūb di aisa xu ge ǃgûǂoa, tsîb ge Nodǃhūb ǃnâ sī ge ǁan Edens aiǂoas ǃnâ.

¹⁷Tsî Kainni ge taras âba ge ǂan, os ge ǀgamǀkhā tsî Henoxa ge ǁora; tsîb ge ǃāsa ǂnubi tsî ǁnā ǃāsa ǁîb ôab Henoxi di ǀons ǃoa ge ǂgai.

¹⁸Tsî Henoxi ge Irada ge ǁorabahe; tsî Iradi ge Mehujaela ge hō; tsî Mehujaeli ge Metusaela ge hō; tsî Metusaeli ge Lamexa ge hō.

¹⁹Tsî Lamexi ge ǀgam tarara ge ū. ǂGuros ge Adas ti ge ǀon hâ i tsî naus ge Silas ti ge ǀon hâ i.

²⁰Tsî Adas ge Jabala ge ǁora. Nēb ge tentomdi ǃnâ ǁan hân di îba tsî ǀgoaǂgari-aon diba.

²¹Tsî ǃgâsab âb ge Jubali ti ge ǀon hâ i. Nēb ge harps tsî ǂāǀkhōxūn ǀkha ra ǀkhōn hoan di îba.

²²Tsî Silas ge ǁkhāti Tubal-Kainna ge ǁora, ǂaib tsî ǂnūǀuriba ra sîsenūn hoan di ǁgauǃnâ-aoba; tsî ǃgâsas Tubal-Kainni dis ge Naamasa ge i.

²³Tsî Lamexi ge ǁîb di tarara ǃoa ge mî: Adas tsî Silas tsîro, ti domma ǁnâu re, saro Lamexi tararo, ǁnâu ro re ti mîsa! Amase ta ge tita khoeba nî ǃgam tita kara tsuiba tsî ǂkhamkhoeb tita kara tsûtsûba.

²⁴Kainni ge hû ǃnādi kōse nîra ǀkhaohe xui-ao, xawe Lamexa hûdisi ǃnādi di hû ǃnādi kōse.

²⁵Tsî Adammi ge taras âba ǁkhawa ge ǂan, os ge ǀgôaba ge ǁora, tsîs ge ǀons âba Set, ti ge ǂgai. Elob ge tita Abeli ǃās ǃnâ ǀnî ǃkhomma go mâiba tis ge ge mî, Kainni ge ǁîba ǂnauǃan xui-ao.

²⁶Tsî Seti ge ǁkhāti ǀgôaba ge ǁorabahe, tsîb ge ǀons âba Enob ti ge ǂgai. ǁNāǃnubain ge ǀons ǃKhūb disa ge ǂgaiǀîtsoatsoa.