Read Khoekhoegowab Genesis 40 Bible Online

Genesis 40 - Khoekhoegowab bible

Genesis 40

¹Tsî i ge nē xūn khaoǃgâ ge ī, ǁhamaob Egipteb gao-aob dib tsî ǁganaob tsîkha ge ǁîkha di ǀhonkhoeb Egipteb di gao-aob ǃoagu tsūdī ǃkhaisa.

²Ob ge Faraoba kaise ge ǁaixa ǁîb di ǀgam ommi dikha, ǁhamaogu di ǂamkhoeb tsî ǁganaogu di ǂamkhoeb tsîkha ǂama.

³Ob ge ǁîkha sâus ǃnâ ge mā ǃkhē-aogu ǂamkhoeb di ommi tawa, ǃkhō-oms ǃnâ, ǁnā ǃkhais Joseb ǁîs ǃnâ ǃkhōhe hâsa.

⁴Tsî ǃkhē-aogu di ǂamkhoeb ge Joseba ǁîkha ge ǂnûiba, ǁîkhab nî ǃoabaga; tsî kha ge ǀnî tsēde sâus ǃnâ ge hâ i.

⁵Tsî kha ge hoakha ǁhapo-e ge ǁhapo, mâb hoab ǁîb di ǁhaposa, ǀgui tsuxub ǃnâ, mâb hoab ǁîb ǁhapos di ǁguiǃāsa ǃoa, ǁhamaob tsî ǁganaob tsîkha, Egipteb di gao-aob dikha, ǃkhō-oms ǃnâ ǃkhōhe hâkha.

⁶Tsî Joseb ge ǁgoaga ǁîkha tawa sī tsî ǁîkha mû, kō o kha ge ǃoa hâse ge ī i.

⁷ǃNubaib ge Faraob ommi dikha ǁîb tawa ǃkhōsis ǃnâ hâkha ǀhonkhoeb âb di ommi ǃnâ dî tsî ge mî: Tare xū-i ǃaroma ra kha sakho di aira nētsē tsūse ī?

⁸O kha ge ǁîb ǃoa ge mî: ǁHapo-e khom go ǁhapo, tsî khoe-i ǁî-e nî ǁguiǃā-i ge a ǀkhai. Ob ge Joseba ǁîkha ǃoa ge mî: ǁGuiǃāde Elob di xū tamade? ǃHoaba te kho re!

⁹ǃNubaib ge ǁhamaogu di ǂamkhoeba Joseba ǁîb di ǁhaposa ǃhoaba tsî ǁîb ǃoa ge mî: Ti ǁhapos ǃnâ, mû, ǂauxûiǂûhai-i ge ti ais aiǃâ go hâ i.

¹⁰Tsî ǂauxûiǂûhais tawa gu ge ǃnona ǂgonaga go hâ i, tsîs ge go ǃam tsîs ge go ǃkhā tsî narudi âs ge ǁan hâ ǂauxûiǂûna go ūǀkhī.

¹¹Tsî Faraob di ǀgabis ge ti ǃomǁae go hâ i. O ta ge ǁnā ǂauxûiǂûn xa ū tsî Faraob di ǀgabis ǃnâ go ǀā, tsî ta ge ǀgabisa Faraob ǃomǁae go mā.

¹²Ob ge Joseba ǁîb ǃoa ge mî: Nēs ge ǁguiǃās âsa: ǃNona ǂgonagu ge a ǃnona tsē.

¹³ǃNona tsēdi ǃnâb ge Faraoba sa danasa nîra ǀgapiǀgapi tsî sa ǃkhais ǃnâ ǁkhawa nîra mâi tsi; ots ge Faraob di ǀgabisa ǁîb ǃomǁae ǁkhawa nîra mā, aibekam dommi ai, ǁhamaots ge i ǃnubai.

¹⁴Îts ǁnâi tita xa ǂâi re ǃgâibahets kao, îts ti tawa ǀkhomxaǂgaosiba dī re, îts Faraoba tita xa ǂâiǂâi re, îts dī re, î ta nē omma xu ǂoa, ti.

¹⁵ǃNaridommi ai ta ge Hebreǁîn di ǃhūba xu ge ǃnarihe xuige, tsî nēpa ta ǁkhāti xū-e dī tama hâ, nē ǃkhō-oms ǃnân nî ǂnûiba te-e.

¹⁶Tsî ǁganaogu di ǂamkhoeb ge mûo, ǃgâi ǁguiǃā-eb go mā ǃkhaisa, ob ge Joseb ǃoa ge mî: Tita ge ǁkhāti ti ǁhapos ǃnâ go mû, ǃnona pereǀharudi ge ti danas ai go hâ i.

¹⁷Tsî ǀgapise hâ ǀharus ǃnân ge ǂû-ain Faraob din, ǁganhe hân hoana go hâ i; tsî anin ge ǀharus ǃnâ hâna go ǂû ti danas ǂamaisa xu.

¹⁸ǃNubaib ge Joseba ǃeream tsî ge mî: Nēs ge ǁîs di ǁguiǃāsa: ǃNona ǀharudi ge a ǃnona tsē.

¹⁹ǃNona tsēdi ǃnâb ge Faraoba sa danasa satsa xu nîra ǀgapiǀgapi, tsîb ge hai-i ai nîra ǂgāmâi tsi, tsî anin ge sa ǁgansa sa ǂamaisa xu nîra ǂû.

²⁰Tsî i ge ǃnonaǁî tsēs ai ge ī, Faraob di ǃnaetsēs ai, ǁîb di ǃgāgu hoagab ge ǂûǁae-e a dība ǃkhaisa; tsîb ge ǂamkhoeb ǁhamaogu dib di danasa ge ǀgapiǀgapi tsî ǂamkhoeb ǁganaogu dib di danasa ǁîb di ǃgāgu ǁaegu.

²¹Tsîb ge ǂamkhoeb ǁhamaogu diba ǁîb di ǁhamsîsenǃâs ǃoa ǁkhawa ge oa kai, ob ge ǁîba Faraoba ǀgabisa ǃomǁae ge mā,

²²xawe ǂamkhoeb ǁganaogu dibab ge ge ǂgāmâi, Joseb ge ǁîkha ǁguiǃāba hâ i khami.

²³Tsî ǂamkhoeb ǁhamaogu dib ge Joseb xa ǂâi tama i tsî ge ǀuru bi.