Read Khoekhoegowab Genesis 41 Bible Online

Genesis 41 - Khoekhoegowab bible

Genesis 41

¹Tsî i ge ge ī, ǀgam ǀoa hâ kurikha nēs khaoǃgâ, Faraob ra ǁhapo ǃkhaisa, Nylǃāb tawab mâsa.

²Tsî mû ǃāba xu di ge hû gomade ge ǀkhī îsa īsiba ūhâ tsî kausade; tsî di ge ǀgâb ǃnâ gere ǃû.

³Tsî mû, ǁîdi khaoǃgâ di ge ǀnî hû gomade ǃāba xu ge ǀkhī ǁgaisi īsiba ūhâ tsî ǃgarasade; tsî di ge nau gomadi tawa ǃāb amǃgâ ge mâ i.

⁴Tsî nē gomadi ǁgaisi īsiba ūhâ tsî ǃgarasadi ge nau hû gomadi, îsa īsiba ūhâ tsî kausade ge hapu. ǃNubaib ge Faraoba ge ǃnoaǂkhai.

⁵ǁNās khaoǃgâb ge ǁom tsî ǀgamǁî ǃnās ai ge ǁhapo; tsî mû, hû ǃnurugu ge ǀgui ǁôab ai ge ǀkhī kausa tsî ǃgâiga.

⁶Tsî mû hû ǀui tsî aiǂoas di ǂoabi ǃū kaihe hâ ǃnurugu ge ǁîgu khaoǃgâ ge ǀkhī.

⁷Tsî ǀui ǃnurugu ge hû ǁau tsî kausa ǃnuruga ge hapu. ǃNubaib ge Faraoba ge ǃnoaǂkhai tsî mû ǁî-i ge ǁhapo ge i.

⁸Tsî i ge ǁgoaǁaeb ai ge ī, gagas âb ǃhurigâ hâ ǃkhaisa, ob ge sîǂoa tsî Egipteb di ǃgai-aogu tsî gā-aigu, ǁîb ǃnâ hâgu hoaga ge ǂgai kai; ob ge Faraoba ǁîga ǁhapora âba ge ǃhoaba; xawe ǀguib xareb ge ǀkhai ge i Faraoba ǁîra ǁguiǃāba ǁkhāba.

⁹ǃNubaib ge ǁhamaogu di ǂamsaba Faraob ǀkha ǃhoa tsî ge mî: Tita ge nētsē ti ǁoreb xa ra ǂâi.

¹⁰Faraob ge kaise ǁaixa ge i ǁîb di ǃgākhom ǂama, tsîb ge tita ǃkhē-aogu ǂamsab di ommi ǃnâ ge sâu kai, tita tsî ǁganaob tsîkhoma.

¹¹Tsî khom ge ǀgui tsuxub ǃnâ ǁhapo-e ge ǁhapo, tita tsî ǁîb tsîkhoma; ǁhapo khom ge mâb hoab âkhoma ǁhapos âb di ǁguiǃāsa ǃoa.

¹²Tsî ǁnāpab ge sikhom ǀkha Hebreǁî ǂkhamkhoeba ge hâ i, ǃkhē-aogu ǂamsab di ǃgāba; tsî khom ge ǁîra ge ǃhoaba bi, ob ge sikhom di ǁhapora ge ǁguiǃāba khom, mâb hoab âkhomab ge ge ǁguiǃāba ǁîb di ǁhapos ǃoa.

¹³Tsî ǁîb ge ǁguiǃāba khom khami i ge ge ī: Titab ge ti sîsenǃâs ǃnâ ǁkhawa ge ǂnûiǂgā tsî ǁîbab ge ge ǂgāmâi.

¹⁴ǃNubaib ge Faraoba sî tsî Joseba ge ǂgai; on ge ǁîba ǃhaese ǃkhō-omsa xu ge hā kai; on ge khoena ǂkhom bi tsî saran âba ge ǀkharaǀkhara; ob ge Faraob tawa ge hā.

¹⁵Ob ge Faraoba Joseb ǃoa ge mî: Tita ge ǁhapo-e go ǁhapo, tsî ǀguib ǁîsa ǁguiǃā ǁkhāb xareb ge a ǀkhai; o ta ge sats xan ra ǃhoa ǃkhaisa go ǁnâu: ǁHapo-ets ga ǁnâuo, ots ǁî-e a ǁguiǃā ǁkhāsa.

¹⁶Ob ge Joseba Faraoba ǃeream tsî ge mî: Ti ǃnâ hâ tamas ge ǁîsa, xawe Elob ge Faraoba ǃgâiǃgâba nîra mîba.

¹⁷ǃNubaib ge Faraoba Joseb ǃoa ge mî: Mû, ti ǁhapos ǃnâ ta ge Nylǃāb amǃgâ go mâ i;

¹⁸tsî mû, ǃāba xu di ge hû gomade ge ǀkhī, kausa tsî îsa īsiba ūhâde tsî di ge ǀgâb ǃnâ gere ǃû.

¹⁹Tsî mû ǀnî hû gomadi ge ǁîdi khaoǃgâ go ǀkhī, ǃgarasa tsî ǁgaisi īsiba ūhâde; tita ge ǁnāti ī ǁgaiside tātsē mû tama hâ Egipteǃhūb hoaragab ǃnâ.

²⁰Tsî nē ǃgarasa tsî ǁgaisi gomadi ge ǁnā ǂguro hû kausa gomade ge hapu.

²¹Tsî ǃnāb âdi ǃnâ di ge sī xawe i ge hōǃâhe tama ge hâ i, ǃnāb âdi ǃnâ di ge sī ǃkhaisa; īsib âdi ge ǁgaisi ge i, tsoatsoas ǃnâb ge ī i khami. ǃNubai ta ge go ǃnoaǂkhai.

²²ǁNās khaoǃgâ ta ge ti ǁhapos ǃnâ go mû, tsî kō, hû ǃnurugu ge ǀgui ǁôab ai go ǀkhī, kausa tsî ǃgâiga.

²³Tsî mû, hû ǂnâsa ǀui tsî aiǂoas di ǂoab xa ǃū kaihe hâ ǃnurugu ge ǁîgu khaoǃgâ go ǂoaxa;

²⁴tsî hû ǀui ǃnurugu ge ǁnā hû ǃgâi ǃnuruga go hapu. Tsî ta ge ǁîsa ǃgai-aoga go mîba, xawe ǀguib ǁîsa ǁguiǃāba te ǁkhāb xareb ge ǀkhai go i.

²⁵ǃNubaib ge Joseba Faraob ǃoa ge mî: Faraob di ǁhapora ge a ǀgui; Elob nî dī-eb ge Faraoba go ǂanǂan.

²⁶ǁNā îsa hû gomadi ge hû îsa kuri; ǁnā hû îsa ǃnurugu ge ǁkhāti hû kuriga; ǁhapora ge a ǀgui.

²⁷Tsî ǁnā hû ǃgarasa tsî ǁgaisi gomadi naudi khaoǃgâ go hādi, ǁîdi ge a hû kuri; tsî ǁnā hû ǀui tsî aiǂoas di ǂoab xa ǃū kaihe hâ ǃnurugu, ǁîgu ge hû kurigu ǃâtsūǀkhāb digu ase nîra ī.

²⁸Nēs ge ǁnā mîs Faraob ǃoa ta go mîsa: Elob nîra dī-eb ge Faraoba go ǂanǂan.

²⁹Mû, nē ǃgoaxa hû kurigu ǃnâb ge ǃnāǂamsiba nîra hâ Egipteǃhūb hoaragab ǃnâ.

³⁰Xawe ǁîgu khaoǃgâ gu ge hû kurigu ǃâtsūǀkhāb diga nîra khâi; ǁnāǃnubaib ge ǁnā ǃnāǂamsib hoaba nîra ǀuruhe Egipteǃhūb hoaragab ǃnâ; tsî ǃâtsūǀkhāb ge ǃhūba nîra hapu.

³¹ǁKhātib ge ǃnāǂamsiba ǃhūb ǃnâ hōǃâhe tide ǁnā ǃâtsūǀkhāb hîa ǁnās khaoǃgâ nîra hāb ǃaroma; kaiseb nîra ǃgom xui-ao.

³²Tsî ǁhapos ǀgamǁî ǃnās ai go ǃnaes ge nē ǃkhais Elob xa ǁaposase ǂâibasen hâsa tsî Elob nēsa nî dīse a ǃhaesa.

³³Ab ǁnâi Faraoba ǁnâuǃāxa tsî gā-ai khoeba mûǂuibasen, îb ǁîba Egipteǃhūb ǂamai mâi.

³⁴Îb Faraoba dī, îb mûǂamaoga mâi ǃhūb ǂama; îb koroǁî ǃâs ǃhūb disa ū ǃnāǂamsib di hû kurigu ǃnâ,

³⁵î gu nē ǃgoaxa ǃgâi kurigu di ǂûn hoana ǀhaoǀhao, î gu ǃhoroba ǁguiǀhû Faraob di ǃomǃnāb ǃnâ ǂûhe nîse ǃādi ǃnâ, î gu ǁîna sâu.

³⁶On ge ǂûna sâuxūse ǃhūba nî hâba ǃâtsūǀkhāb di hû kurigu, hîa Egipteǃhūb ǃnâ nî hâgu ǃnâ; ǃâtsūǀkhāb xab ǃhūba kā tidega.

³⁷Tsî nē mîs ge ǃgâi ge i Faraob mûǁae tsî ǁîb di ǃgāgu hoagu mûǁae.

³⁸Ob ge Faraoba ǃgāgu âb ǃoa ge mî: Xare ge sage nē khoeb khami ī khoeba nî hō, Elob Gagab ǁîb ǃnâ hâba?

³⁹ǁNās khaoǃgâb ge Faraoba Joseb ǃoa ge mî: Elob ge nēn hoana go ǂhaiǂhaiba tsi ǃkhais ǃaromab ge khoeb xareba ǁnâuǃāxa tsî gā-ai tama sats ī khami.

⁴⁰Sats ge ti ommi ǂama nîra hâ, tsî sa mîmās ais ge ti ǁaes hoasa ǃomma nî ǁoa, nē trons ǀguisa xu ta sats xa nî kai.

⁴¹ǃAruǀîb ge Faraoba Joseb ǃoa ge mî: Mû, tita ge satsa Egipteǃhūb hoaragab ǂama go mâi.

⁴²Ob ge Faraoba ǀkhunuǂnûidas âba ǁôab âba xu ǂgaeǁnâ tsî Joseb ǁôab ai ge ǂnûi si, tsîb ge ǀui linesarana ge ana kai bi, tsî ǃhuniǀuriǁkham-e ǃaob âb ai ge ǁgā.

⁴³Tsîb ge ǁîba ǀgamǁî kunis ūb hâs ai ge ǃnari kai, tsîn ge ǁîb di ais aiǃâ: ǃHonǁgoa du! ti ge ǂgai. Nētib ge ǁîba Egipteǃhūb hoaragab ǂama ge mâi.

⁴⁴Tsî Faraob ge Joseb ǃoa ge mî: Tita a Farao ǃkhais ao i ge khoe-i xare-e sa ose ǃommi â-i karao, ǂais â-i karao, ūkhâi tide Egipteǃhūb hoaragab ǃnâ.

⁴⁵Tsî Faraob ge Joseb di ǀonsa Safenat-Paneaxi ti ge ǂgai, tsîb ge Asenats, Potiferab, pristeri Ons dib di ôasa tarase ge mā bi; tsîb ge Joseba Egipteǃhūb hoaragaba ge ǃgûmaǃnâ.

⁴⁶Tsî Joseb ge ǃnonadisi kurixa ge i, Faraob, Egipteb gao-aob di ais aiǃâb ge mâ ǃnubai; tsî Joseb ge Faraob di ais aiǃâba xu ǂoa tsî Egipteǃhūb hoaragaba ge ǃgûmaǃnâ.

⁴⁷Tsî ǃhūb ge ǃnāǂamsib di hû kurigu ǃnâ ǀoasase ge ǂûtani.

⁴⁸Ob ge ǂû-ain ǁnā hû kurigu din Egipteǃhūb ǃnâ hân hoana ǀhaoǀhao tsîb ge ǂûna ǃādi ǃnâ ge dīǂgā, ǂûn mâ ǃās hoas di ǃhūb, ǁîs ǂnamipe hâb din, ǁînab ge ǁîs ǃnâ ge dīǂgā.

⁴⁹Nētib ge Joseba îbe ǀoasa ǃhoroba ge ǀhaoǀhao, hurib amǃgâ ǁgoe ǃhūb khami, ǃgôaǀûhe i ges kōse, ǀgau-i a ǀkhai xui-ao.

⁵⁰Tsî Joseb ge ǀgam ǀgôakha ge ǁorabahe, ǃâtsūǀkhāb di kurib ge hās aiǃâ, Asenats, Potiferi, Ons pristeri di ôas ge ǁoraba bi kha.

⁵¹Ob ge Joseba ǂguroǃnaesabeb di ǀonsa Manase ti ge ǂgai, Elob ge tita ti ǀhupub hoab tsî ti îb di ommi hoaba go ǀuru kai tib ge mî xui-ao.

⁵²Tsî ǀgamǁîb di ǀonsab ge Efraim ti ge ǂgai, Elob ge tita ti ǁgâiǀāb di ǃhūb ǃnâ go ǀom kai tib ge mî xui-ao.

⁵³ǃNubai gu ge ǃnāǂamsib di hû kurigu Egipteb ǃnâ ge hâ iga ge toa.

⁵⁴Tsî gu ge hû kurigu ǃâtsūǀkhāb diga ge hātsoatsoa, Joseb ge mî khami. Tsî ǃhūgu hoagu ǃnâb ge ǃâtsūǀkhāba hâ, xaweb ge Egipteb hoab ǃnâ pereba ge hâ i.

⁵⁵Tsî Egipteǃhūb hoab ge ǃâo, os ge ǁaesa Faraoba pereb ǃaroma ge ǂgaiǀî. Ob ge Faraoba Egipteǁîn hoan ǃoa: ǃGû î du Joseb nî mîba du xū-i hoa-e dī, ti ge mî.

⁵⁶Tsî ǃâtsūǀkhāb ge ǃhūb hoaragab ǃnâ hâ ǃnubaib ge Joseba ǃkhai-i, ǂûxū-i ǁî-i ǃnâ hâ-i hoa-e ge ǁkhowa-am tsî Egipteǁîna ge ǁamaxūba; ǃâtsūǀkhāb ge kaise ǀgaisa i Egipteǃhūb ǃnâ xui-ao.

⁵⁷O gu ge ǃhūgu hoaga Egipteb ǃnâ Joseb tawa ge hā, ǁama nîse; ǃâtsūǀkhāb ge ǃhūgu hoagu ǃnâ ǀgaisa xui-ao.