Read Khoekhoegowab Genesis 42 Bible Online

Genesis 42 - Khoekhoegowab bible

Genesis 42

¹Tsî Jakob ge mû Egipteb ǃnâb ǃhoroba hâsa, ob ge Jakoba ǁîb ôagu ǃoa: Tarexa go kha ra kōǀîgu? ti ge mî.

²Ob ge ǃaruǀî ge mî: Mû, tita ge ge ǁnâu Egipteb ǃnâb ǃhoroba hâsa; ǃgûǁgôa î go ǁnāpa ǃhoroba ǁamaba da, î da ûi, î da tā ǁō.

³ǃNubai gu ge Joseb di disi ǃgâsaga ge ǁgôa, Egipteb ǃnâ gu nî ǃhoroba ǁamase.

⁴Xawe Benjaminni Joseb ǃgâsabab ge Jakoba ǃgâsagu âb ǀkha ǁgôa kai tama ge i, îb tā ǀnîsi tsū xū-i xa hāǂamhe, tib ra mî xui-ao.

⁵Nēti gu ge Israeli di ôaga ge sī, ǁnāpa ra sīgu ǃnâ, ǁama gu nîse; ǃâtsūǀkhāb ge Kanaanni ǃhūb ǃnâ hâ amaga.

⁶Tsî Joseb ge gaosa ge i ǁnā ǃhūb ǂama; ob ge ǃhūb hoab di ǁaesa ge ǁamaxūba; tsî Joseb di ǃgâsagu ge hā tsî aidi âgu ǀkha ǁîb aiǃâ ǃhūb kōse ge ǃhon.

⁷Tsî ǁîb ge ǃgâsagu âba mûo, ob ge ǁîga ge ǂan i; xaweb ge ǃhaokhoedīsen ǁîguǀî tsî ǁîgu ǀkha karosase ǃhoa tsî ge mîǀî gu: Mapa xu go ra hā? O gu ge: Kanaanǃhūba xu, ǂûna nî ǁamase, ti ge mî.

⁸Tsîb ge Joseba ǃgâsagu âba ǂan ge i, xawe gu ge ǁîga ǁîba ǂan tama ge hâ i.

⁹ǃNubaib ge ǁîba ǁnā ǁhapora, ǁîgu xab ge ǁhapora xa ge ǂâi; ob ge ǁîgu ǃoa: ǃKhē-aogo komo, tsî go kom go hāo, mûhō go nîse, mapab ǃhūba a ǁkhowa-amsa ǃkhaisa, ti ge mî.

¹⁰O gu ge ge mî: Hî-î, ǃkhūkhoetse, sa ǃgāge kom go hāo, ǂûna ge nî ǁamase.

¹¹Sige hoage kom ǀgui aob ǀguib di ôao, ǃaoǃgâxa khoege; ǃkhē-ao tama ge komo.

¹²Ob ge ǁîba ǁîgu ǃoa ge mî: Hî-î, sago kom go hāo, mûhō go nîse, mapab ǃhūba a ǁkhowa-amsa ǃkhaisa.

¹³O gu ge ge mî: Sige sa ǃgāge ge disiǀgamǀa khoeǃgâgu ge i, ǀgui aob ǀguib di ôa Kanaanǃhūb ǃnâ, tsî kō, ǂkhammi ge nētsē ǁgûb ǀkha hâ, tsî ǀguib ge a ǀkhai.

¹⁴ǃNubaib ge Joseba ǁîgu ǃoa ge mî: Nēs ge ǁîs sago ǃoa ta goro mîsa ǃkhē-aogo.

¹⁵Nēs ǃnâ go nî ǃâitsâhe, Faraob a ûitsama ǃkhais ao, nēpa xu go tātsē ǂoa tide, sago ǃgâsab ǂkhammi ga aibe hā hâ tama io!

¹⁶ǀGuib sago diba sîǂui, sago ǃgâsaba nî ūhāba; î go sago ǃkhōsase hâ, o di ge sago di mîde nî ǃâitsâhe, iseb amaba sago ǃnâ hâ ǃkhaisa; tsî ǁnā tamas ka io: Faraob ûi hâ ǃkhais ao, ǃkhē-aogo!

¹⁷Ob ge ǁîga ǀhûpe ǃnona tsēdi kōse sâus ǃnâ ge ǂnûi.

¹⁸Tsî ǃnonaǁî tsēs aib ge Joseba ǁîgu ǃoa ge mî: Nēsa dī î go ûi, tita ge Eloba ra ǃao xuige.

¹⁹ǃAoǃgâxa go kao, ab khoeǃgâgu go di ǀguiba ǃgaehe hâse hâ sago ra sâuǃnâhe ommi ǃnâ; î go naugo ǃgû, î go ǃhoroba sago omaridi ǃâtsūǀkhāb ǃaroma ūsī!

²⁰Î go sago ǃgâsab ǂkhamma ti tawa ūhā, o di ge sago mîde nîra ama; o go ge ǁō tide. O gu ge ǁnāti ge dī.

²¹ǃNubai gu ge nēba naub ǃoa ge mî: Amase ge a ǀhapixa sage ǃgâsab tawa, ǂōǂōsib ǁîb ǀoms diba ge ge mû, sageb ge ǀkhomabasen ǁaeb ai, xawe ge ge ǁnâu bi tama ge i; ǁnā-amagas kom nē ǂōǂōsib sage ǂama ra hāsao.

²²Ob ge Rubenna ǁîga ǃeream tsî ge mî: ǁNâi mîba go tama ta hâ: Tā ǁore-ū bi re nē ǂkhamkhoeba! ti ta ge mî ǃnubai, xawe go ge ǁnâu tama ge i; tsî kō, ǀaob âb xaweb ge nēsi ra ǂgaoǀkhāhe!

²³Tsî gu ge ǀū ge i, Joseb ǁîsa ra ǁnâu ǃkhaisa; ǂnûiǃkhuni-aob ge ǁîgu ǁaegu hâ i xui-ao.

²⁴ǃNubaib ge ǁîga xu ǂnan tsî ge ā; ǁîs khaoǃgâb ge ǁkhawa ǁîgu ǃoa unusen tsî ǁîgu ǀkha ge ǃhoa tsîb ge Simeonna ǁîga xu ū tsî ge ǃgae bi ǁîgu mûǁae.

²⁵Tsîb ge Joseba ge mîmā, ǁîgu di ǁhōgu nî ǃhorob ǀkha ǀoaǀoahe ǃkhaisa, tsî ǁîgu di marin nî dīdawahe ǃkhaisa, mâb hoab ǁhōb âb ǃnâ, tsî gu nî daob ǂûna māhe ǃkhaisa; tsîn ge ǁnāti ge dī.

²⁶Tsî gu ge ǁîgu di ǃhoroba eseln âgu ai ǃnao tsî ǁnāpa xu ge dāǁnâ.

²⁷Tsî ǀguib ge ǁhōb âba ǁkhowa-amo, eseli âbab nî ǂûmāse sâu-ommi ǃnâ, ob ge marib âba ge mû, ǁhōb ams ǃnâb hâ xui-ao.

²⁸Ob ge ǃgâsagu âb ǃoa ge mî: Ti marib ge ǁkhawa go hā te, tsî kō, ti ǁhōb ǃnâb kom ǁîba hâo. O gu ge ge ǂkhabuǂâi, tsî gu ge ge ǃhuri, nēb naub ǃoa ra mîǃâ: Tare-e kha nē-e, Elob go dī ge-e!

²⁹Tsî gu ge Kanaanǃhūb ǃnâ ge sī, Jakob ǁîgu îb tawa; tsî gu ge ǁîba xūn hoana ge ǂanǂan, mî raǃâ:

³⁰ǁNā aob, gaosab ǁnā ǃhūb dib ge sige ǀkha karosase gere ǃhoa; tsîb ge ǃhūb di ǃkhē-aose ge ū ge.

³¹O ge ge sige ǁîb ǃoa ge mî: Sige ge a ǃaoǃgâxa, sige ge ǃkhē-ao tamage.

³²Sige ge disiǀgamǀa khoeǃgâgu ge i, sige îb di ôage; ǀguib ge a ǀkhai tsî ǂkhammi ge nētsē ǁgûb ǀkha hâ Kanaanǃhūb ǃnâ.

³³Tsî ǁnā aob, gaosab ǁnā ǃhūb dib ge sige ǃoa ge mî: Nēs tawa ta ge nî mûǂan, ǃaoǃgâxa go asa. Ab ǀguib sa khoeǃgâgugo diba ti tawa hâ, î go sago omaridi ǃâtsūǀkhāb ǃaroma ū î go ǃgû.

³⁴Î go sago di ǃgâsab ǂkhamma ti tawa ūhā; o ta ge nî ǂan ǃkhē-ao tama go a ǃkhaisa tsî ǃaoǃgâxa go a ǃkhaisa; sago di ǃgâsaba ta sago ǁkhawa nî mā tsî go ge nē ǃhūb ǃnâ ǁamagusa nî dī.

³⁵Tsî i ge ge ī, ǁîgu ǁhōga gu ge ǀkhaiǀkhaiǃnâo, mû, ob ge mâb hoaba ǃgae-ams ǁîb marib disa ǁhōb âb ǃnâ ūhâ, tsî gu ge ǃgae-amdi ǁîgu marib dide ge mû; ǁîgu tsî ǁgûb tsîn, o gu ge ge ǃao.

³⁶ǃNubaib ge Jakob ǁîgu îba ǁîgu ǃoa ge mî: Sago ge ǀgôana ra ūǀhana te: Joseb ge a ǀkhai, Simeonni ge a kā o go ge Benjaminna ǁkhāti nî ūbē; nē xūn hoan ge ti ǃoagu hâ.

³⁷Ob ge Rubenna ǁgûb ǃoa ge mî: Ti ôagu xa ǀgamkha ǃgam re, ǁîba ta ga ǁkhawa ūhāba tsi tama io; ti ǃomǁae mā bi re, o ta ge tita ǁîba ǁkhawa nî ūhāba tsi.

³⁸Xaweb ge ǁîba ge mî: Ti ôab ge sago ǀkha ǁgôa tide; ǃgâsab âb ǁō hâ tsî ǁîb ǀguib go ǃgau xui-ao; tsūǃgâ-i xab ga daob sago nî ǃgûb ai hāǂamheo, o go ga ti ǃnoaǀûga ǃoab ǀkha ǀhobas ǃnâ ǁgôa kai.