Read Khoekhoegowab Genesis 43 Bible Online

Genesis 43 - Khoekhoegowab bible

Genesis 43

¹Tsî ǃâtsūǀkhāb ge ge ǃgom ǁnā ǃhūb ǃnâ.

²Tsî i ge ge ī, ǁnā ǂû-ain Egipteba xu gu ge ūhānan ge ǂûtoao, ob ge ǁgûba ǁîgu ǃoa ge mî: Oa ǁkhawa î go ǂûro-e ǁamaba da!

³ǃNubaib ge Judaba ǁîb ǃoa ǃhoa tsî ge mî: ǁNā aob ge îbe sige ǁgui-ai tsî ge mî: Ti aisa go mû tide, ǃgâsab âgo ga sago ǀkha hā tama io.

⁴Sige ǃgâsabats ga sige ǀkha sîo, o ge ge ǁgôa tsî ǂûna nî ǁama.

⁵Xawe ǁîbats ga sî tama io, o ge ge ǁgôa tide, ǁnā aob ge ti aisa go mû tide, ǃgâsab âgo ga sago ǀkha hâ tama io ti a mî amaga.

⁶Ob ge Israela ge mî: Tare xū-i ǃaroma go kha ti tawa tsūse ge dī tsî ǁnā aoba ge mîba ǀnî ǃgâsaba go ūhâ ǃkhaisa?

⁷O gu ge ge mî: ǁNā aob ge ama ǂōrisase sige xa tsî sige ǀaokhoesis xa dî tsî ge mî: Sago di îba ganupe ûitsamab a? ǀNî ǃgâsaba ū go hâ? O ge sige ǁnā mîdi ǁkhādi ǃoa ge ǃeream; ǁnâi ǂan ǁkhā ge ge i sige: ǃGâsab âgo ūǁgôaǀhao tib nî ǁîba mî ǃkhaisa?

⁸Ob ge Judaba Israeli, ǁîb di îb ǃoa ge mî: Tita ǀkha ǂkhamkhoeba sî re, o ge ge khâi tsî nî ǃgû, î da ûi î da tā ǁō, sige karao, sats karao, sige ôaron karao.

⁹Tita ge ǁîba nî mâba, ti ǃomǁaeba xuts ge ǁîba nî ǂgaoǀkhā; sa ǃoa ta ga ǁîba ūhā tama tsî sa ais aiǃâ ta ga mâi bi tama io, o ta ge ti ûitsēdi hoade sa ǃoagu tsūdī hâse nîra hâ.

¹⁰ǀHape tama ge ga hâ io, o ge ga amase ǀgam ǃnāra kōse oahā ga hâ.

¹¹ǃNubaib ge Israeli ǁîgu di îba ǁîgu ǃoa ge mî: ǁNāti i ga īo, o ǁnâi nēti dī: Nē ǃhūb din hoan xa ǃgâi ūǀkhīn xa ū sago di ǁhōgu ǃnâ, î go ǁnā aoba ǀkhaexū-e ūǁgôaba: Balsamro-i xa tsî daniro-i xa, ǃgâihamxūn tsî miren tsî terpentinoli-i tsî amandelǂûn ǃnaran khami īn tsîn xa.

¹²Î go ǃhonarisa mariba ū sago ǃomǁae, î go ǁkhāti ǁnā marib sago ǁhōgu di ams ǃnâ ǁkhawa ge hōheba ǃomǁae ū; ǀnîsi i ge a dīsā ǃkhai.

¹³Î go ǁkhāti sago ǃgâsaba ūǃgû î go khâi, î go ǁkhawa ǁnā aob tawa sī.

¹⁴Tsî Elob Hoaǀgaixaba ab sago ǀkhomxaǂgaosiba mā ǁnā aob di ais aiǃâ, îb sago di ǃgâsab naub tsî Benjaminni tsîkha sago ǀkha ǃgû kai. Tsî tita xasa, ǀgôana ta ga ūǀhanahe o ta ge ūǀhanahe hâ.

¹⁵O gu ge aoga ǁnā ǀkhaexūna ge ū tsî gu ge ǃhonarisa mariba ǃomǁae ge ū tsî Benjaminni ona; tsî gu ge khâi tsî Egipteb ǃoa ge ǁgôa, tsî gu ge Joseb di ais aiǃâ sī ge mâ.

¹⁶Tsî Joseb ge Benjaminna ǁîgu ǀkha mûo, ob ge ǁîb di ommûǂamaob ǃoa ge mî: Nē khoega ommi tawa ūsī î ǂāǀgoan xa ǂā î ǂhomi ǂûna, nē khoegu nî tita ǀkha tsēǃgâǂû xuige.

¹⁷Ob ge khoeba Joseb ge mî khami ge dī; tsîb ge khoeba ǁnā khoega Joseb ommi ǃnâ ge ūǂgâ.

¹⁸O gu ge ǁnā khoega ge ǃao, Joseb ommi ǃnâ gu ge ūǂgāhes ǃaroma, o gu ge ge mî: Marib, hîa aibe sage ǁhōgu ǃnâ ge hōheb ǃaromas kom, sage ra ūǂgâhesao, sage ǃhapi tsîb nî ǂapoga, tsîb nî sage khobose ūga sage eseln ǀkha.

¹⁹ǁNās khaoǃgâ gu ge ǁnā khoeb, Joseb ommi ǂama mâihe hâba ge ǀgū, tsî gu ge ommi di dao-ams tawa ǁîb ǀkha ǃhoa,

²⁰tsî ge mî: Ae, ǀnam ǃkhūkhoetse, sige ge aiga amase ge hā ǂûna ge nî ǁamase;

²¹o i ge ge ī, sâu-ommi ǃnâ sī tsî ge ge sige ǁhōga ǁkhowa-amo, mû, ob ge mâ khoeb hoab âge di mariba ǁhōb âb di ams ǃnâ hâ, sige marib ǃgommi âb ǃoa; o ge ge ǁîba sige ǃomǁae ǁkhawa go ūhā.

²²Tsî ge ge ǁkhāti ǀnî mariba sige di ǃomǁae go ūǁgôaxa, ǂûna ge nî ǁamase, ǀū ge a, tari-i sige mariba ǁhōgu âge ǃnâ ge ǂgā ǃkhaisa.

²³Ob ge ǁîba ge mî: Ab ǂkhîba hâǀkhā go î go tā ǃao! Sago Elob tsî sago îb di Elob ge sago ǁui-e ge mā, sago di ǁhōgu ǃnâ; sago di mariba ta ge go hō. Ob ge Simeonna ǁîgu tawa ge ūǂoaxa.

²⁴ǁNās khaoǃgâb ge khoeba nē khoega Joseb ommi ǃnâ ūǂgâ tsî ǁgam-e ge mā gu; o gu ge ge ǁānǂai; tsîb ge eseln âga ǁkhāti ge ǂûmā.

²⁵Tsî gu ge ǁîga ǃnarexūna ge ǂhomi, Joseb tsēǃgâǁaeb ai nî hās kōse, ǁnāpa gu nî pereǂû ti gu ge ǁnâu hâ i xui-ao.

²⁶Tsî Joseb ge ǁaruhāo, o gu ge ǃnarexūn ǁîgu ǃomǁae hâna ge ūsība bi ommi ǃnâ, tsî gu ge ǁîb aiǃâ ǃhūb ai ge ǃhon.

²⁷Ob ge ǃgâihâsib xa dî gu tsî: ǂGaub a sago îba, ǁnā kairab ǁîb xa go ge mîba teba? Ganupeb a ûitsama? ti ge mî.

²⁸O gu ge ge mî: ǂGaub ge a sa ǃgāb sige îba, ganupeb a ûitsama. Tsî gu ge danade ǃgam tsî ge ǃhonǁgoa.

²⁹Tsîb ge ǃgapakhâi tsî Benjaminni, ǁîb ǃgâsab, ǁîb îs di ôaba mû tsî ge mî: Sago ǃgâsab ǂkhamma nēba, ǁîb xa go ge mîba teba? ǁNās khaoǃgâb ge: Ab Eloba ǀkhom tsi, ti ôa, ti ge mî.

³⁰Ob ge Joseba ǃhaese ge bē, ǃnāb ǃnâb ta gongonhe amaga ǃgâsab âbǀî, tsîb ge ge ātsâ; ob ge ǃnā-oms ǃnâ ǂgâ tsî ǁnāpa ge ā.

³¹ǁNās khaoǃgâb ge ǁānai tsî ge ǂoaxa; tsîb ge ǃgariǃgarisen tsî: Pere-e mâi! ti ge mî.

³²On ge ǁîba ǀguri ge ǁāǁāba, tsî ǁîga ǀguri tsî Egipteǁîgu ǁîb ǀkha ra ǂûga ǀguri; Egipteǁîn ge Hebreǁîn ǀkha pereǂû ǁoa ge i, Egipteǁînas ge ǁîsa ǁgaisise ība i xui-ao.

³³Tsî gu ge ǁîb di ais aiǃâ ǂnôa ge i, ǁîb ge mîba gu khami, ǂguroǃnaesab ǂguroǃnaesis âb ǃoa tsî ǂkhammi ǂkhamsis âb ǃoa; o gu ge khoega ǁîgu ǃnâ ge buru.

³⁴Tsîb ge ǁîga ǁnā ǂû-ain ǁîb aiǃâ hân xa ge mā kai; tsîs ge Benjaminni di amǃnâsa koro ǃnādi kōse kai ge i naugu dis xa. Tsî gu ge ǁîb ǀkha ā tsî ǁîb ǀkha ge ākhanu.