Read Khoekhoegowab Genesis 44 Bible Online

Genesis 44 - Khoekhoegowab bible

Genesis 44

¹Tsîb ge Joseba ommûǂamaob âba mîmā tsî ge mî: Nē khoegu di ǁhōga ǂûn ǀkha ǀoaǀoa, tani ǁkhā gu as kōse, îts mâ khoeb hoab di mariba ǁhōb âb di ams ǃnâ ǂgā.

²Îts ti ǀgabis, ǀhaiǀuriǀgabisa, ǂkhammi di ǁhōb ǃnâ ǂgā ǁîb ǃhorob di marin ǀkha. Ob ge Joseb di mîs hîab ge ǃhoas ǃoa ge dī.

³ǃNauǁgoaga, ǃnâ i geo, on ge nē khoega ge ǃgû kai, ǁîgu tsî eseln âgu tsîna.

⁴Tsî ǃāsa xu ǂoa tsî gu ǃnūse sī tama hâ hîab ge Joseba ommûǂamaob âb ǃoa ge mî: Khâi îts ǁnā khoega ǃkhoeǃgon tsî ǁîgats ga saoǁaeo, ots ge ǁîgu ǁga: Tare xū-i ǃaromasa ǃgâib ama go ǂkhababa dīdawa-am hâsa? ti nîra mî.

⁵ǁÎsa kha ti ǀhonkhoeb ǁîs ǃnâ ra ā xū tamasa? Tsî ǁîs ǃnâb ra ama xūna hōǃâsa? Tsūse go go dī sago go dī dī-i ǀkha.

⁶Ob ge ǁîga saoǁae tsî nē mîdi ǁkhādi ǀkha ge ǃhoa-ū gu.

⁷O gu ge ǁîga ge ǃeream bi: Tare xū-i ǃaromats kha ti ǃkhūkhoetsa nēti ī mîde ra ǃhoa? Ī tide ǃkhais ge sa ǃgāge nî nēti ī xū-e dīsa.

⁸Mû, ǁnā marib, sige ǁhōgu di ams ǃnâ ge ge hōb, ǁîba ge ge Kanaanǃhūba xu sa ǃoa ǁkhawa go ūhā. Mati ge kha ǁnâi sa ǀhonkhoeb di omma xu ǀhaiǀurib kas, ǃhuniǀurib kas hoasa nî ǀâ?

⁹Tarib sa ǃgāge dib hoab tawas ga hōheo, ab ǁîba ǁō! O ge ge ǁkhāti ti ǀhonkhoeb di khobose nî ī.

¹⁰Ob ge ge mî: Ā, a-i ǁnāti ī, sago ra mî khami: ǁÎb tawas ga hōheb, ab ǁîba ti khobo; xawe go ge sago nî ǀhapio.

¹¹O gu ge ǃhae tsî mâb hoaba ǁhōb âba ǃhūb ai ǂnûi tsî ge ǁkhowa-am.

¹²Ob ge ge ôaǃnâ, kaib tawa ra tsoatsoa tsî ǂkhammi tawa ra ǀûǃâ; os ge ǁnā ǀgabisa Benjaminni di ǁhōb ǃnâ ge hōhe.

¹³O gu ge saran âga ge ǀkhau tsî mâ khoeb hoab ge eseli âba ge ǃgae tsî gu ge ǁkhawa ǃās ǃoa ge oa.

¹⁴Tsî Judab ge ǃgâsagu âb ǀkha Joseb ommi ǃnâ ge sī, goroseb ǁîb ǂûba ǁnāpa ge hâ i xui-ao; o gu ge ǁîb di ais aiǃâ ǃhūb ai ge ǁnāǁgoe.

¹⁵Ob ge Joseba ǁîgu ǃoa ge mî: Mâ dī-e kha nē-e, sago go dī-e? ǂAn tama go ǁnâi hâ, tita khami ī khoe-i ǂanǂansase nî hōǂui ǁkhā ǃkhaisa?

¹⁶ǃNubaib ge Judaba ge mî: Tare xū-e ge kha ti ǃkhūkhoets ǃoa nî mî? Tare-e ge kha nî ǃhoa? Tsî mati ge kha nî ǂhanu-aikaisen? Elob kom go hō sa ǃgāge di ǂhanuoǃnâsibao, kō, sige ge a ti ǃkhūkhoets di khobo; sige tsî ǁnāb, ǀgabis ǁîb ǃomǁae go hōheb tsîge.

¹⁷Xaweb ge ǁîba ge mî: Tātsē ta dī tide ǃkhais ge nēsa; ǁnā khoeb ǀgabis ǁîb ǃomǁae go hōheb, ǁîb ge nî ti khobo, xawe sago ǃgûsī go re ǂkhîb ǃnâ sago îb ǃoa.

¹⁸ǃNubaib ge Judaba ǁîba ǀgū tsî ge mî: Okha, ti ǃkhūkhoetse, sa ǃgāta a ta ǀgui mîro-e ti ǃkhūkhoets ǂgaera ǃnâ ǃhoa re, îb sa ǁaiba tā khau sa ǃgātaǀî: Sats ge Faraob ǁkhāb khami ī xuige.

¹⁹Ti ǃkhūkhoets ge sa ǃgāge dî tsî ge mî: ǁGûba ū go hâ tsî ǃgâsaba?

²⁰O ge ge sige ti ǃkhūkhoets ǃoa ge mî: Sige ge kaira ǁgûba ūhâ tsî ǂkhamkhoeb kairasib dib, ǁîb ǀgôab ǃgau hâb hîa ǃgâsab âba ǁō hâba, tsîb ge ǁîba ǀguri ge ǃgau, ǁgûs xa, tsî ǁgûb ge ǁîba ǀnam hâ.

²¹ǃNubaits ge satsa sa ǃgāge ǃoa ge mî: ǁÎba tita ūǁgôaxaba re îs ti mûsa ǁîba ǃgapa.

²²O ge ge sige ti ǀhonkhoets ǃoa ge mî: ǁNā ǀgôab ge ǁgûba nî ǁnāxū ǁoa; ǁgûbab ga ǁnāxūo, ob ge nîra ǁō.

²³ǃNubaits ge satsa sa ǃgāge ǃoa ge mî: Sago di ǃgâsab ǂkhammi ga sago ǀkha ǁgôaxa tama io, o go ge ti aisa ǁkhawa mû tide.

²⁴Tsî i ge ge ī, sa ǃgāb sige îb ǃoa ge ge ǃgûǃapa tsî mîdi ti ǀhonkhoets dide ge ge ǃhoaba bio,

²⁵tsî ǁgûb ge: ǁKhawa oa î go ǂûro-e sī ǁamaba da ti a mîo,

²⁶o ge ge sige ge mî: Sige ge a ǁgôa ǁoa; sige ǃgâsab ǂkhammi ga sige ǀkha hâo, o ge ge nî ǁgôa; ais ǁnā aob disa ge nî mû ǁoa, nē sige ǃgâsab ǂkhammi ga hâǀkhā ge tama io.

²⁷ǁGoasib ge sa ǃgāb, ti îba sige ǃoa ge mî: Sago ge a ǂan ti taras ge ǀgamkha tita ǁoraba ǃkhaisa.

²⁸Tsî ǀguib ge tita xu ge ǃgûǂoa tsî ta ge ge mî: Amaseb ge ǁîba ǂanǂansase ǀkhauǃāhe hâ, tsî ta ge ǁîba mû tama hâ nēs kōse.

²⁹Tsî nēb ona go ga ǁnâi ti aisa xu ūbēo, tsî tsūǃgâ-i xab ga hāǂamheo, o go ge ti ǀhai ǀûna ǃoab ǀkha ǀhobas ǃnâ nî ǁgôa kai.

³⁰Tsî nēsi ǁnâi sa ǃgāb ti îb tawa ta ga sīo, tsî ǀgôab ga sige ǀkha hâ tama io, ǀoms âb nēb di ǀoms ǀkha ǃgaeǀhaosen hâ amaga,

³¹o i ge nîra ī, mûb kao, ǀgôab sige ǀkha hâ tama ǃkhaisa, ob ge nîra ǁō, o ge ge sa ǃgāge ǀhai ǀûn sa ǃgāb, sige îb dina tsûaǂgaob ǀkha ǀhobas ǃnâ nî ǁgôa kai.

³²Sa ǃgāta ge nē ǀgôab di mâba-ao kai ǁgûb tawa xui-ao, mî raǃâ: ǁKhawa ta ga ǁîba ūhāba tsi tama io, o ta ge ti ûitsēdi hoade sa aiǃâ ǀhapixase nîra ī.

³³Tsî nēsi ǁnâi, a ta sa ǃgāta nē ǀgôab amǃnâs ai satsa khobose hâba, îb nē ǀgôaba ǃgâsagu âb ǀkha ǃgûǃapa.

³⁴Mati ta kha ǁnâi tita nî ǃapa ǁkhā ti îba ǃoa, ǀgôab ga ti ǀkha hâ tama io? Î ta ǁnā ǃoab, ti îb ǂama ga hāba tā mû ti.