Read Khoekhoegowab Genesis 45 Bible Online

Genesis 45 - Khoekhoegowab bible

Genesis 45

¹ǃNubaib ge Joseba ǁkhaesen ǁoa ge i, ǁîb tawa mâ hân hoan aiǃâ, ob ge: Mâ khoe-i hoa-e ti xu ǂoa kai ti ge ǂgai. O i ge khoe-i xare-e ǁîb tawa mâ tama ge hâ i, Joseb ge ǃgâsagu âba ǂanǂansen ǃnubai.

²Ob ge ā rase dommi âba ge ǃhâkhâi, Egipteǁîgu ge ǁnâus kōse, tsî Faraob ommi din ge ǁnâus kōse.

³Tsîb ge Joseba ǃgâsagu âb ǃoa ge mî: Tita ge Joseta! Ti îba ganupeb a ûitsama? Xawe gu ge ǃgâsagu âba ǃeream bi ǁoa ge i, ǃhuri gu ge hâ i amaga, ais âb aiǃâ.

⁴Ob ge Joseba ǃgâsagu âb ǃoa: ǀGūǀgūsen go re tita ǁga! ti ge mî. O gu ge ge ǀgūǀgūsen. Ob ge ǁîba ge mî: Tita ge Joseta, sago ǃgâ ta, Egipteba ǃoa go ge ǁamaxū ta.

⁵Î go ǁnâi tā ǃhausen, îb ǁaiba tā khâi sago mûǁae, nēxopa go ge ǁamaxū te ǃkhais xa: Elob kom tita sago ais aiǃâ ge sîo, ûib ǃnâ du nî sâuhega.

⁶ǀGam kurikha ǃâtsūǀkhāb dikha kom nēsi hâ go io ǃhūb ǃnâ; o gu ge ganupe koro kuriga ǃgau hâ, ǁîgu ǃnâ ǃhūǃgao-i tsî ǃhoroǃgao-i xare-i hâ tidega.

⁷Ob ge Eloba tita sago aiǃâ ge sîhā, ǃgauro-e go nî ǂnûibahega ǃhūbaib ai, tsî ûib ǃnâ go nî sâuhega kai ores ǀkha.

⁸ǁNā-amaga, sa tama go ge tita ge nēpa a sîhāgo, tsî Elob ǂûb ge, ǁîb ge tita Faraoba ǁgûse ge mâiba, tsî ǃkhūkhoese ommi âb hoaragab ǂama, tsî gaosase Egipteǃhūb hoaragab ǂama.

⁹ǃHae î go ti îb ǃoa ǃgûǃapa î go ǁîb ǃoa mî: Nētib ra sa ôab Joseba mî: Elob ge tita ǃkhūkhoese ge mâi Egipteǃhūb hoaragab ǂama. Ti ǃoa ǁgôaxa îts tā ǀhawe!

¹⁰Tsîts ge Gosenǃhūb ǃnâ nîra ǁan, tsîts ge tita ǀgūse nîra hâ, sats tsî sa ôagu tsî sa ôagu di ôan tsî sa gūn tsî sa goman tsî ūts hân hoana.

¹¹Tsî tita ge satsa ǁnāpa nî ǂûmā, ganupe koro kurigu ǃâtsūǀkhāb digu nî hâ amaga, îts tā ǀgâ, sats tsî sa ommi din tsî ūts hân hoana.

¹²Tsî mû sago mûdi ge ra mû, tsî mûdi ti ǃgâsab Benjaminni didi on, ti ams ra sago ǃoa ǃhoa ǃkhaisa.

¹³Î go ti îba Egipteb ǃnâ ta ūhâ ǂkhaisib hoab tsî mû go ran hoana sī ǂhôa; ǃhae î go ti îba ūǁgôaxa re!

¹⁴Tsîb ge ǁîba Benjaminni ǃgâsab âba ǁnam tsî ge ā, tsî Benjaminni ge ǃaob âb tawa ge ā.

¹⁵Tsîb ge ǁîb di ǃgâsagu hoaga ǁoa tsî ge ā ǁîgu ǂama. Tsî ǁnās khaoǃgâ gu ge ǃgâsagu âba ǁîb ǀkha ge ǃhoa.

¹⁶Tsî nē gommi ge Faraob ommi ǃnâ ǁnâuheo, khoen ra: Joseb di ǃgâsagu go hā, ti mî ǃkhaisa, o i ge ǃgâi ge i Faraob mûǁae tsî ǃgāgu âb mûǁae.

¹⁷Ob ge Faraoba Joseb ǃoa ge mî: Sa ǃgâsaga mîba: Dī î go ǃgaexūga ǃgae î dāǁnâ, î go ǃgû Kanaanǃhūb ǃoa.

¹⁸Î go saoba ū tsî sago ommi din tsîna, î du ti tawa hā, o ta ge Egipteǃhūb di hoan xa ǃgâi xū-e sado nîra mā, tsî du ge ǃhūb di kaub xa nî ǂû.

¹⁹Sats ge mîmāhe hâtsa; dī î go Egipteǃhūba xu sago ôaron tsî sago taradi tsîna kunide ūba, î go saoba sī ǃnao î du hā!

²⁰Îs sago di mûsa ommi xūn âgo tā kōǀî; hoan xa ǃgâi-i Egipteǃhūb hoaragab di-i ge nî sago di xuige.

²¹O gu ge Israeli ôaga ǁnāti ge dī. ǁNātib ge Joseba ǁîga kunide ge mā Faraob di mîmās ai; tsîb ge ǁîga ǁkhāti daob di ǂûna ge mā.

²²ǁÎb ǂûb ge ǁîga mâb hoaba sâtsēsarana ge mā; xawe Benjaminnab ge ǃnonakaidisi ǀhaiǀurimarina ge mā tsî koro sâtsēsaran tsîna.

²³Tsî ǁgûbab ge ǁkhāti disi eselga ge sîba, Egipteb di hoan xa ǃgâina ra taniga, tsî disi eseldi, ǃhoroba ra tanidi, tsî pereb, tsî ǁgûb nî daob ai ǂhâba ǂûna.

²⁴Tsîb ge ǃgâsagu âba ge sîsī o gu ge ge dāǁnâ; ob ge ǁîgu ǃoa: Tā daob ai ǁaixaǀkhāgu re! ti ge mî.

²⁵O gu ge Egipteba xu ǃgûǃapa tsî ge sī Kanaanǃhūb ǃnâ, ǁîgu di îb Jakob tawa.

²⁶ǃNubai gu ge ǂhôa bi tsî: Joseb ge ganupe a ûitsama tsîb ge ǁkhāti a gaosabe Egipteǃhūb hoab ǃnâ, ti ge mî. Ob ge ǂgaob âba ge ǁō, ǁîgab ǂgom tama hâ amaga.

²⁷Xawe ǁnā mîdi Joseb didi, ǁîgu ǀkhab goro ǃhoadi hoade gu ge mîba bi toao, tsî ǁnā kunidi, Joseb ge ǃnari-ūheb nîse sîdeb ge mûo, os ge gagas Jakob, ǁîgu îb disa ge ûitsama.

²⁸Ob ge Israela ge mî: ǂÂuba te hâ, ti ôa Joseb ûi hâo; o ta ge ǃgû tsî nî sī mû bi, ǁō tama ta hâ hîa.