Read Khoekhoegowab Genesis 46 Bible Online

Genesis 46 - Khoekhoegowab bible

Genesis 46

¹Tsî Israeli ge ūb hân hoan ǀkha ge ǂnauǁnâ, tsîb ge Bersebas tawa ge sī, tsîb ge ǁguibade ge ǁguiba, ǁîb îb Isaki di Eloba.

²Ob ge Eloba tsuxuba aidi ǃnâ Israeli ǃoa ǃhoa tsî: Jakotse! Jakotse! ti ge mî. Ob ge ǁîba: Mû, nē ta a, ti ge mî.

³Ob ge ǁîba ge mî: Tita ge ǁnā Elota, sa îb di Elota; tā ǃao Egipteb ǃoa doeǁgôasa, tita ǁnāpa kai ǁaese nîra ǂnûi tsi xuige.

⁴Tita ge sa ǀkha nî doeǁgôa Egipteb ǃnâ, tsî tita ge ǁkhawa nîra doe kai tsi ǀhûpe ra doeǃapaǃâ; tsî Joseb ge ǃommi âba sa mûra ai nîra ǁgui.

⁵ǃNubaib ge Jakoba Bersebasa xu ge khâi, tsî Israeli ôagu ge ǁîgu îb Jakoba ge ūǃgû tsî ǁîgu di ôan tsî ǁîgu di taradi tsîna, ǁnā kunidi, Faraob ge ǁîb nî ǃnari-ūhega sîdi ai.

⁶On ge ge ū ǁîn di ǀgoan tsî ūn hâ xūn, Kanaanǃhūb ǃnân ge ǃoaǂuibasen hâ ina, tsîn ge Egipteb ǃnâ ge sī, Jakob tsî ǁîb di surib hoab ǁîb ǀkha,

⁷ǁîb di ôagu, tsî ǁîb ôagu di ôagu ǁîb ǀkha; ǁîb di ôadi tsî ǁîb ôagu di ôadi tsî ǁîb di surib hoabab ge ǁîb ǀkha Egipteb ǃoa ge ūsī.

⁸Tsî nēdi ge ǀondi Israeli ôagu, Egipteb ǃnâ ge sīgu dide, Jakob tsî ǁîb ôagu dide. ǂGuroǃnaesabeb Jakob dib: Rubenni,

⁹tsî Rubenni di ôagu: Henoxi, Palub, Hesronni tsî Karmib tsîga.

¹⁰Tsî Simeonni di ôagu: Jemueli, Jaminni, Ohadi, Jaxinni, Sohari tsî Sauli, Kanaanǁîtaras di ôab tsîga.

¹¹Tsî Levib di ôagu: Gersonni, Kehati tsî Merarib tsîga.

¹²Tsî Judab di ôagu: Eri, Onanni, Selab, Peresi tsî Serab tsîga. Xawe Eri tsî Onanni tsîkha ge Kanaanǃhūb ǃnâ ge ǁō hâ i, tsî Peresi di ôakha ge Hesronni tsî Hamuli tsîkha ge i.

¹³Tsî Isaskari di ôagu: Tolab, Puwab, Jasub tsî Simronni tsîga.

¹⁴Tsî Sebulonni di ôagu: Seredi, Elonni tsî Jahleeli tsîga.

¹⁵Nēgu ge ǀgôagu Leas digu, Jakobas ge ǁorabaga Padan-Aramǃhūǃâs ǃnâ, Dinas ǁîb di ôas ǀkha: ǀOmdi ǁîb ôagu tsî ǁîb ôadi didi ge ǃnonadisiǃnonaǀa ge i.

¹⁶Tsî Gadi di ôagu: Sifjonni, Hagib, Sunib, Esbonni, Erib, Arodi tsî Areli tsîga.

¹⁷Tsî Aseri di ôagu: Jimnab, Jisvab, Jisvib, Beriab tsî Seraxs, ǁîgu di ǃgâsas tsîna; tsî Beriab di ôakha: Heberi tsî Malkieli tsîkha.

¹⁸Nēgu ge Silpas Labanni ge ǁîb ôas Leasa mās di ôaga; tsîs ge ǁîsa Jakoba nē disiǃnaniǀa ǀomde ge ǁoraba.

¹⁹Raxels Jakob taras di ôakha: Joseb tsî Benjaminni tsîkha.

²⁰Tsîb ge Joseba Egipteb ǃnâ ge ǁorabahe Manaseb tsî Efraimmi tsîkha, Asenats, Potiferab, Ons ǂamkhoeb di ôas ge ǁorakha.

²¹Tsî Benjaminni di ôagu: Belab, Bexeri, Asbeli, Gerab, Naamanni, Ehib, Rob, Mupimmi, Hupimmi tsî Ardi tsîga.

²²Nēgu ge Raxels di ôagu Jakoba ǁorabahe hâga, hoatsama disihakaǀa ǀomde.

²³Tsî Danni di ôab Husimmi.

²⁴Tsî Naftalib di ôagu: Jahseeli, Gunib, Jeseri tsî Silemmi tsîga.

²⁵Nēgu ge Bilhas, Labanni ge ǁîb ôas Raxelsa mās di ôaga; tsîs ge ǁîga Jakoba ge ǁoraba; ǁîdi ge hoase hû ǀom ge i.

²⁶ǀOmdi hoadi, Jakob ǀkha Egipteb ǃnâ ge hādi, ǁîb di kamanaba xu ge ǀkhīdi ge Jakob ôagu di taradi ose, hoase ǃnanidisiǃnaniǀa ǀom ge i.

²⁷Tsî Joseb ôakha Egipteb ǃnâb ge ǁorabahekha ge ǀgam ǀom ge i. ǀOmdi Jakob ommi didi Egipteb ǃnâ ge hādi hoadi ge hûdisi ǀom ge i.

²⁸Tsîb ge ǁîba Judaba ais âb aiǃâ ge sî Joseb ǁga, ǁîb di ais aiǃâb nî ǁgau bise Gosenni ǃoa; on ge Gosenǃhūb ǃnâ ge sī.

²⁹ǃNubaib ge Joseba kunis âba ǂgāǃao tsî ge ǃnariǃapa, ǁîb di îb Israelab nî ǃoase Gosenni ǁga; tsî mû bib geo, ob ge ǃaob âb ai ǁnā tsî ǂomxase ge ā ǃaob âb ai.

³⁰Ob ge Israela Joseb ǃoa ge mî: Î ta ga nēsi ǁō, sa aisa ta go mûs khaoǃgâ, ganupets ûi hâ ǃkhais xa.

³¹ǁNās khaoǃgâb ge Joseba ǃgâsagu âb tsî ǁgûb ommi din ǃoa ge mî: Tita ge ǃgûǃapa tsî nî Faraoba sī ǂhôa tsî ǁîb ǃoa nî mî: Ti ǃgâsagu tsî ti îb ommi din, Kanaanǃhūb ǃnâ ge hâ in ge tita tawa go hā.

³²Tsî ǁnā aogu ge a gūǃûi-ao, aogu ǀgoan ǀkha ra sîsengu ge a ǁî xui-ao; tsî gu ge ǁîgu di gūn tsî ǁîgu di goman tsî ūn hân hoana ǀhûpe go ūhā.

³³ǁNâi i ga īo, Faraob ra sago ǂgai tsî: Mâ sîsenai-e go ūhâ? ti mîsa,

³⁴o go ge sago nî mî: Sa ǃgāge ge sige di ǂkhamsisa xu nēsis kōse ǀgoan ǀkha ra sîsen khoege, sige tsî sige îgu tsîge; î go Gosenǃhūb ǃnâ ǁan ǁkhā ti, mâ gūǃûi-ao-i hoa-i ge Egipteǁîn tawa a ǁgaisi amaga.