Read Khoekhoegowab Genesis 47 Bible Online

Genesis 47 - Khoekhoegowab bible

Genesis 47

¹ǃNubaib ge Joseba sī tsî Faraoba ǂhôa tsî ge mî: Ti îb tsî ti ǃgâsagu tsîgu ge ǁîgu di gūn tsî ǁîgu goman tsî ū gu hân hoan ǀkha Kanaanǃhūba xu go hā; tsî mû, ǁîgu ge Gosenǃhūb ǃnâ hâ.

²Tsîb ge ǃâ-i ǁîb ǃgâsagu di-e ge ū, koro aoga, tsîb ge ǁîga Faraob di ais aiǃâ ge mâi.

³Ob ge Faraoba ǃgâsagu âb ǃoa: Mâ sîsen-e go ūhâ? ti ge mî. O gu ge Faraob ǃoa: Sa ǃgāge ge a gūǃûi-ao, sige tsî sige îgu tsîge, ti ge mî.

⁴ǃAruǀî gu ge Faraob ǃoa ge mî: Sige ge go hā, ǃhaokhoese nî nē ǃhūb ǃnâ ǁanse; ǃû-ai-i xare-i ge gūn sa ǃgāge ūhâna ǀkhaiba, ǃâtsūǀkhāb ge Kanaanǃhūb ǃnâ a ǃgom xui-ao; a ge sa ǃgāge ǁnâi Gosenǃhūb ǃnâ ǁan re!

⁵ǃNubaib ge Faraoba Joseb ǃoa ǃhoa tsî ge mî: Sa îb tsî sa ǃgâsagu tsîgu ge sa tawa go hā.

⁶Egipteǃhūb ge sa ais aiǃâ hâ, îts sa îb tsî sa ǃgâsagu tsîga ǃhūb di hoan xa ǃgâi ǃkhai-i ǃnâ ǁan kai; a gu Gosenǃhūb ǃnâ ǁan, tsî ǂants kao, ǁîgu ǃnâ gu gā-ai khoega hâsa, îts ǁîga ǂamǀgoaǃûi-aose mâi ū ta hân ǂama.

⁷Tsî Joseb ge ǁîb di îb Jakoba ǀhûpe ūǂgâ tsî Faraob di ais aiǃâ sī ge mâi bi; tsî Jakob ge Faraoba ge ǀkhae.

⁸Ob ge Faraoba Jakob ǃoa ge mî: Tsēdi sa ûib kurigu dide matikōde?

⁹Ob ge Jakoba Faraob ǃoa ge mî: Tsēdi ti ǃgûkhoesi kurigu didi ge a ǀguikaidisi tsî ǃnonadisi kuri; ǀoro tsî di ge tsū ge i ti ûib kurigu di tsēde, tsî di ge ti îgu ûib di tsēdi ǃnâ sī tama ge i, ǁîgu ǃgûkhoesis di tsēdi ǃnâ.

¹⁰Ob ge Jakoba Faraoba ǀkhae tsî Faraob di aisa xu ge ǃgûǂoa.

¹¹Tsî Joseb ge Jakob tsî ǃgâsagu âb tsîga ǁanǃkhaide ge mā kai, tsîb ge ǁîga ǁîsi-e ge mā Egipteǃhūb ǃnâ, ǃhūb di hoan xa ǃgâi ǃâs ǃnâ, Rameses ǃhūb ǃnâ, Faraob ge mîmā khami.

¹²Tsî Joseb ge ǁgûb tsî ǃgâsagu âb tsî ǁgûb ommi din hoana pereb ǀkha ge ǁâǁâ ǀgôaron di ams kōse.

¹³Tsî ǃhūb hoab ǃnâ i ge pere-i xare-e hâ tama ge hâ i; ǃâtsūǀkhāb ge kaise ǃgom i xui-ao; Egipteǃhūb tsî Kanaanǃhūb tsîkha ge ǁnā ǃâtsūǀkhāb xa ǃkhaus kōse.

¹⁴ǃNubaib ge Joseba marib, Egipteǃhūb tsî Kanaanǃhūb ǃnâ ge hōheb hoaba ge ǀhaoǀhao ǁnā ǃhorob, ǁîna gere ǁamab ama; tsî Joseb ge ǁnā mariba Faraob ommi ǃnâ ge ūhā.

¹⁵Tsî marib ge Egipteǃhūb tsî Kanaanǃhūb ǃnâ toao, on ge Egipteǁîn hoana Joseb tawa hā tsî ge mî: Pere-i xa mā da re, tare xū-i ǃaroma da kha ǁnâi sa aiǃâ nî ǁō, mari-i a ǀkhai amaga?

¹⁶Ob ge ǁîba ge mî: Sadu ǀgoana mā o ta ge ǀgoan ama nî mā du, marib ga tôasio.

¹⁷ǃNubain ge ǀgoan âna Joseba ge ūsība; ob ge ǁîba ǁîna pereba ge mā, hān ama tsî gūn ama, tsî goman ama tsî eseln ama, tsîb ge ǁîna ǁnā kurib hoaba pereb ǀkha ge ûi kai ǁîn di ǀgoan hoan ama.

¹⁸Tsî ǁnā kurib ge toao, on ge ǀgamǁî kurib ǃnâ ǁîb ǃoa hā tsî ǁîb ǃoa ge mî: Sida ge ǁîsa ti ǀhonkhoets aiǃâ gaugau ǁoa, marib ge toas, tsî ū da ge hâ i ǀgoan ge ti ǀhonkhoets di kais khaoǃgâ i ge ǀnî xū-e ti ǀhonkhoets di ais aiǃâ ǃgau tama hâ; sida soros tsî sida ǃhūb tsîra ǀguira.

¹⁹Tare xū-i ǃaroma da kha sa mûra aiǃâ nî ǁō, sida tsî sida ǃhūb on? ǁAma re sida tsî sida ǃhūba pereb ama; o da ge sida tsî sida ǃhūba Faraoba nî ǃoaba, îts ǃkhomma mā, î da ûi, î da tā ǁō, îb ǃhūba tā ǀkhaiǃnâ.

²⁰Nētib ge Joseba Egipteǃhūb hoaragaba Faraoba ge ǁamaba: Egipteǁîn xa i ge mâ-i hoa-e ǁî-i di ǃhanaba ge ǁamaxū, ǃâtsūǀkhāb xan ge dāhe hâ i amaga; nētib ge ǃhūba ge Faraob di kai.

²¹Tsî ǁaes xasa, ǁînab ge ge ǂnûiǃkhuni ǃādi ǃnâ, Egipteǀkharib di ǀgui ǀkhâuǀamsa xu naus ǁîb dis kōse.

²²ǃHūb pristergu dib ǀguibab ge ǁama tama; pristergu ge Faraoba xu ǁaposa hōǂgā-e ge ūhâ i amaga, tsî gu ge ǀgorabahe gu ra ǃâ-e ge ǂû, Faraob ge ǁîga gere mā-e; ǁnā-amaga gu ge ǁîgu di ǃhūba ǁamaxū tama ge i.

²³ǃNubaib ge Joseba ǁaes ǃoa ge mî: Kō, tita ge nētsē sadu tsî sadu ǃhūba Faraoba ge ǁamaba; mû nē hâ ǃkhomma ū î du ǃhūba tsoro.

²⁴O i ge nî ūǀkhī xūn xa, o du ge koroǁî ǃâsa Faraoba nî mā, tsî haka ǃâdi ge sadu dise nîra hâ, ǃhūb di ǃkhomse tsî sadu tsî sadu omgu ǃnâ hân di ǂûse, tsî sadu ǀgôaron nî ǂûga.

²⁵On ge ge mî: Sats ge ûiba go sâuba da; a da ǀkhomma hō re ti ǀhonkhoets mûǁae, o da nî Faraob di ǃgā kai.

²⁶Ob ge Joseba nēba ǂhanu-i ase ge ǂnûiǂgā nētsēs kōse Egipteǃhūb ǂama, Faraob nî koroǁî ǃâsa hō ǃkhaisa; nēs ǀguis ose: Pristergu Faraob digu di ǃhūb ǁamaxūhe tide ǃkhaisa.

²⁷Nētib ge Israela Egipteǃhūb ǃnâ ge ǁan, Gosenǃhūb ǃnâ; tsîn ge ǁîb ǃnâ ge xūxa tsîn ge ge ǂûǂûxaǃnâ tsî kaise gere ǂguiǂguisen.

²⁸Tsîb ge Jakoba Egipteǃhūb ǃnâ disihûǀa kuriga ge ûi; o di ge tsēdi Jakob ûib dide, kurigu ûib âb diga ǀguikaidisihakadisihûǀa kuri ge i.

²⁹Tsî tsēdi Israeli didi ge ǀgūo, ǁîdi aib nî ǁōde, ob ge ǁîb di ôab Joseba ǂgai tsî ǁîb ǃoa ge mî: Sa mûǁae ta ga ǀkhomma hō hâo, ǁnâi ǁgui sa ǃomma ti ǂnamib ǃnâ, îts ǀkhomxaǂgaosib tsî ǂgomǂgomsasiba dī-ū te, îts Egipteb ǃnâ tā ǁkhō te.

³⁰Î ta ti îkha tawa ǁgoe; ǁî ǃkhais ǃaromats ge tita Egipteba xu ūǃgû tsî ǁîkha di ǀhobas ǃnâ nî ǁkhō! Ob ge: Tita ge sa mîs ǃoa nî dī, ti ge mî.

³¹Ob ge ǁîba: Nūba te re! ti ge mî. Ob ge ǁîba ge nūba. ǃNubaib ge Israela kharob danasǀî ge ǃgamǃgâ.