Read Khoekhoegowab Genesis 48 Bible Online

Genesis 48 - Khoekhoegowab bible

Genesis 48

¹Tsî i ge ge ī, nē xūn khaoǃgâ, ob ge Joseba ge mîbahe: Mû, sa îb ge ǀaesen hâ. Ob ge ǁîb di ǀgam ǀgôakha Manaseb tsî Efraimmi tsîkha ge ūǃgû.

²On ge khoena Jakoba ǂhôa tsî: Kō, sa ôab Joseb ra sa ǃoa hā, ti ge mî. Ob ge Israela ǃgariǃgarisen tsî ge ǂnûkhâi kharob ai.

³ǁNās khaoǃgâb ge Jakoba Joseb ǃoa ge mî: Elob Hoaǀgaixab ge ti tawa ge ǂhai Lus tawa Kanaanǃhūb ǃnâ tsîb ge ǁîba tita ge ǀkhae.

⁴Tsîb ge ǁîba tita ǃoa ge mî: Mû tita ge ǂûǂûxaǃnâ tsî nîra ǂguiǂgui tsi tsî ǁaedi di ǂguib ase nîra mâi tsi; tsî ta ge tita sa khaoǃgâ nē ǃhūba sa suriba nîra mā ǀamoseb nî ǁîn dise.

⁵Tsî nēsi ǁnâi sa ǀgam ǀgôakha, Egipteǃhūb ǃnâts ge ǁorabahekha tita ge sa tawa Egipteb ǃnâ hās aiǃâ, ǁîkha ge a ti: Efraimmi tsî Manaseb tsîkha ge nî ti, Rubenni tsî Simeonni tsîkha khami.

⁶Xawe ǁnā ǃhaos ǁîkha khaoǃgâts nî hōs ge nî sa; ǁîn ge ǁîn ǃgâsagu di ǀons ǃoa nîra ǂgaihe ǁîgu di ǀumi-amǃnâs ǃnâ.

⁷Tsî Padanǃhūba xu ta ge hā ǃnubais ge Raxelsa ti tawa Kanaanǃhūb ǃnâ daob ai ge ǁō, ǂkhari ǃgûdaoro-e Efratas nēxa ǀkhāb ai; o ta ge ǁnāpa ge ǁkhō si Efratas daob amǃgâ, ǁnās ge Betlehemsa.

⁸Tsî Israeli ge Joseb ôakha mû tsî: Tarib dikha nēkha? ti ge mî.

⁹Ob ge Joseba ǁgûb ǃoa ge mî: ǁÎkha ge a ti ôa, Elob ge tita mā kha. Ob ge: ǁÎkha ūhāba te î ta ǁîkha ǀkhae, ti ge mî.

¹⁰Xawe Israeli di mûra ge ǃkhae ge i kairasib xa; ob ge mû ǁoa ge i; ob ge ǁîba ǁîkha ge ǀgū kai ǃnubaib ge ǁîkha ǁoa tsî ge ǁnam.

¹¹Israeli ge Joseb ǃoa ge mî: Tita ge ǂâi tama ge hâ i, sa aisa ta nî ǁkhawa mû ǃkhaisa; xawe mû, Elob ge sa surib ona go mû kai te.

¹²ǃNubaib ge Joseba ǁîkha ǁgoara âba xu ge ǂoa kai; tsîb ge ais âb aiǃâ ǃhūb ai ge ǃgamǃgâ.

¹³Tsî Joseb ge ǁî ǀgamkha ge ū, Efraimma amǀkhāb ǁôab âb ǀkha Israeli di ǁareǀkhāb ǁôab ǃoa-ai, tsî Manaseba ǁareǀkhāb ǁôab âb ǀkha Israeli di amǀkhāb ǁôab ǃoa-ai, tsîb ge ǁîba ǁnāti ǁîkha ge ǀgūǀgūba.

¹⁴Ob ge Israela amǀkhāb ǃommi âba ǀhōǂui tsî ǁîba Efraimmi danas ai ge ǁgui, ǁîb ge ǂkham i xawe, tsî ǁareǀkhāb ǃommi âba Manaseb di danas ai; ǃomkha âbab ge ǁnāti ge ǁgui-unu, Manaseb ge ǂguroǃnaesabe i amaga.

¹⁵Tsîb ge ǁîba Joseba ǀkhae tsî ge mî: ǁNā Elob, ais âb aiǃâ kha ge ti îkha, Abrahammi tsî Isaki tsîkha gere ǃgûb, ǁnā Elob, tita ûiǁaeb hoaba nētsēs kōse ra ǂgaeǂguib,

¹⁶ǁnā ǀhomǃgāb tita ǂkhabab hoaba xu ge oreb: Ab ǀkhae re nē ǀgôakha, îs ti ǀonsa ǁîkha ǃnâ ǂgaihe re, tsî ti îkha di ǀonra Abrahammi tsî Isaki tsîkha dira, î kha ǂguiǂguisen ǁaun khami ǃhūb di ǁaegub ǃnâ.

¹⁷Tsî Joseb ge mûo, ǁgûb ra amǀkhāb ǃommi âba Efraimmi ai ǁgui ǃkhaisa, o i ge ǁîb mûǁae tsū ge i tsîb ge ǁgûb di ǃomma ge ǃkhō, Efraimmi di danasa xub nî ǁîba Manaseb di danas ai sī-ūse.

¹⁸Ob ge Joseba ǁgûb ǃoa ge mî: Tā ǁnāti dī, ti îtse, nēb kom ǂguroǃnaesabeo; ǁîb danas ai sa amǀkhāb ǃomma ǁgui re!

¹⁹Xaweb ge ǁgûba ǂkhā tsî ge mî: ǂAn ta a, ti ôa, ǂan ta a, ǁîb ge ǁkhāti nîra ǁae kai, tsîb ge ǁkhāti nîra kai; xawe ǃgâsab ǂkhammi âb ge ǁîb ǃgâ-ai nîra kai, tsî surib âb ge nîra kaise ǂgui ǁae kai.

²⁰Nētib ge ǁîkha ǁnātsē gere ǀkhae, mî raǃâ: Sa ǃnâb ge Israela nî ǀkhae: Ab Eloba ǂnûi tsi Efraimmi tsî Manaseb tsîkha khami! Ob ge nēti Efraimma Manaseb aiǃâ ge ǂnûi.

²¹ǁNās khaoǃgâb ge Israela Joseb ǃoa ge mî: Mû tita ge ra ǁō; xawe Elob ge sadu ǀkha nîra hâ, tsî ǁîb ge sado ǁkhawa sadu îgu di ǃhūb ǃnâ nîra ūǂgâ.

²²Tsî tita ge satsa sa ǃgâsagu dis xa ǃgâi ǃhūǃâsa go mā, ti gôab tsî ti khās tsîra ǀkha ta ge Amorǁîn di ǃomǁaeba xu ūsa.