Read Khoekhoegowab Genesis 49 Bible Online

Genesis 49 - Khoekhoegowab bible

Genesis 49

¹ǁNās khaoǃgâb ge Jakoba ǁîb di ôaga ǂgaiǀhû tsî ge mî: ǀHao go re, o ta ge sago nî ǂhôa, saoǃgoaxa tsēdi ǃnâ go nîra ǃoa xūna.

²ǀHû î go ǁnâu re, Jakob ôago, î go ǃgâ Israeli sago di îba.

³Rubentse, sats ge ti ǂguroǃnaesabetsa, ti ǀgaits tsî ti ǁkhāsib di ǂgurotsa; ǀgapisib ǃnâ ǃnā hâts tsî ǀgaib ǃnâ ǃnā hâtsa!

⁴ǁGamgu khami ǃhaese ra dâuǀûts: Sats ge ǃnā hâse ī tide, sa îb di ǁgoeǃkhais aits ge ǃapa xui-ao; ǃnubaits ge ǁîsa ge ǀuriǀuri, ti kharob aib ge ǁîba ge ǃapa.

⁵Simeonni tsî Levib tsîkha ge a khoeǃgâgu; ǁîkha di dīgu ge sîsenūxūgu ǁgaridīb diga.

⁶Ti ǀomsa as tā ǁîkha di ǂganǃgâsa ǀape-ais ǃnâ sī, ti ǃgôaba ab tā ǀgui ǁîkha di ǀhûs ǀkha; ǁîkha di ǁaib ǃnâ kha ge ǁnā aoga ge ǃgam, tsî ǁîkha di ǂanapega dīs ǃnâ kha ge gomaga ge tsububē.

⁷Ab ǀâxarexūhe hâse ī ǁaib âba, ǁîb a kai amaga; tsî ǁgôasib âba, ǁîb a karosa amaga. Tita ge ǁîkha Jakob ǃnâ nîra ǀgora tsî Israeli ǃnâ ǁîkha nîra ǀgaruǀgaru.

⁸Judatse, sats ge ǁîtsa, satsa gu ge ǃgâsagu âtsa nîra ǃkhōǀkhā; sa ǃommi ge sa khākhoen di ǃaob ai nîra hâ; sa aiǃâ gu ge sa îb di ôaga nîra ǃgamǃgâ.

⁹Judab ge ǂkham xamma! Sats ge ǁkhâuǁnâsa xu go khâi, ti ôa. ǁÎb ra ǃgamsen, ǁîb ra ǁgoe xammi khami tsî kaira xammi khami; tari-e nî khâi kai bi?

¹⁰Gaohais ge Judaba xu bē tide, tsî ǂhanumā-aob on ǁîb di ǂaira di ǁaeguba xu, Silob nîra hās kōse, tsî ǁîba di ge ǁaede nîra ǁnâuǀnam.

¹¹ǁÎb ge ǂkham eseli âba ǂauxûiǂûhais tawa ra ǃgaemâi tsî esels âb di ǂkhamro-e hoan xa ǃgâi ǂauxûiǂûhais tawa; ǁîb ge sarab âba ǂauxûib ǃnâ ra ǁā, tsî ǂamsarab âba ǂauxûiǂûn di ǀaob ǃnâ.

¹²ǁÎb ge a ǀapamûǃnâ ǂauxûib xa tsî a ǃuriǁgû daib xa.

¹³Sebulonni ge hurib amǃgâb tawa nîra ǁan, tsîb ge doe-omgu di mâ-ais tawa nîra hâ; tsî ǀkharib âb ge Sidons kōse nîra sī.

¹⁴Isaskari ge ǂkhōxa esela, ǀgam āǃorekha ǁaegu ǁgoeba.

¹⁵Tsî sâb xab ge mûo ǁîb a ǃgâi ǃkhaisa, tsî ǃhūb xa, ǁîb a ǀnamǀnamsa ǃkhaisa, ob ge ǃhōb âba ge ǃgamǃgam, tani nîse, tsîb ge ǃoaba rase ge ī.

¹⁶Danni ge ǁaes âba nîra ǂhanuǂhanu, Israeli ǃhaodi di ǀguis ase.

¹⁷Danni ge ǀaoba daob tawa, ǃgaiba ǃganni amǃgâ, hāb di ǃnôara ra nâba, ǃgapi-aob âb ra ǃgâbǀkhāb ai ǁnāse.

¹⁸Sa ǃgâiǃōba ta ge tita ra ǃâubasen, ǃKhūtse.

¹⁹Gadi xasa, ǂnubis ge ǁîba nîra ǃhabi, xaweb ge ǁîsa nîra ǁkhaebē ǀunis ai.

²⁰Aseri xasa, pereb âb ge nîra ǁnuixa; tsîb ge ǁîba gao-aosi ǃgâi xūna nîra ūǀkhī.

²¹Naftalib ge ǃhae ǁkhamaba, ǁîb ge îsa mîde ra ǃhoaba.

²²Joseb ge ǂûtanixa ǂgonaba, ǂûtanixa ǂgonab ǀau-i tawa; mâ ǂgona-i hoa-i ge ǂnubiǂgoaba ra īǂam.

²³ǁKhâu-aogu ge ǁîba au-au tsî ge ǁkhâu tsî ge ǁkhan bi;

²⁴xawe khās âb ge ǀkhamasase ge hâ i, tsî ǃomkha âb di ǁôakha ge ǀgaiǀgaihe ge hâ i Jakob di ǀGaisab di ǃomkha ǀkha; ǁnāb ge Israeli, ǀuis ǃÛi-ao ge iba;

²⁵sa îb di Eloba xus a, satsa nîra huib, tsî Hoaǀgaixab, satsa nîra ǀkhaeb, ǀkhaexūn ǀhommi dina ǀgapiseba xu, tsî ǀkhaexūn ǃgamsib dina, ǃnaga ǁgoeb dina, ǀkhaexūn samdi tsî ǁhādi dina.

²⁶ǀKhaedi sa îb didi ge ti kaikhoegu di ǀkhaede ra ǃnā ǀamo ǃhomgu di ǀams kōse; ǁîdi ge danas Joseb dis ai nîra hâ, danaǂkhōs ǃgâsagu âb ǃnâ khaihe hâb dis ai.

²⁷Benjaminni ge ǀkhauǃā ra ǂhiras khami ī; ǁgoaǁaeb aib ge ǃkhōb rana ra ǂû tsî ǃuiǁaeb aib ra ǃkhōb gena ǀgoraǂui.

²⁸ǃHaodi Israeli didi hoadi ge a disiǀgamǀa; tsî nēs ge ǁîsa, ǁgûb ge ǁîga mîbasa, ǁîgab ra ǀkhae hîa, ǁîb ge ǁîga gere ǀkhae, mâb hoaba ǁîb ǀkhaeb ǂûba.

²⁹ǁNās khaoǃgâb ge ǁîga mîmā tsî ge mî: Tita ge ra ǀhaoǀhaohe ti ǁaes tawa. ǁKhō te re ti îkha tawa ǁnā ǁhoaǃnāb, Efronni Hetiǁîb di ǃhanab ǃnâ hâb ǃnâ,

³⁰ǁnā ǁhoaǃnāb ǃhanab Maxpelab, Mamres ǃoa-ai ǁgoeb ǃnâ Kanaanǃhūb ǃnâ, Abrahammi ge Efronni Hetiǁîb tawa ǃhanab ǀkha ge ǁamaba ǀumiǁkhōǃkhais ase.

³¹ǁNāpan ge Abrahamma ge ǁkhō, tsî Saras taras âba; tsî ǁnāpan ge Isaka ge ǁkhō tsî Rebekas taras âba; tsî ǁnāpa ta ge Leas ona ge ǁkhō.

³²ǃHanab tsî ǁhoaǃnāb ǁîb ǃnâ hâb ge Hetiǁîgu tawa ge ǁamahe.

³³Tsî Jakob ge ǁîb di ôaga mîmāde mātoao, ob ge ǂaira âba kharob ai ǁgui-unu tsî ge ǀkhai, tsîb ge ge ǀhaoǀhaohe ǁaedi âb tawa.