Read Khoekhoegowab Genesis 50 Bible Online

Genesis 50 - Khoekhoegowab bible

Genesis 50

¹ǃNubaib ge Joseba ǁgûb di ais ai ǁnā tsî ge āǂam bi tsî ge ǁoa bi.

²Tsî Joseb ge ǃgāgu âb, sōǀôadī-aoga ge mîmā, ǁîb îba gu nî ǂkhauǀkhā ǃkhaisa; o gu ge sōǀôadī-aoga Israela ge ǂkhauǀkhā.

³Tsî di ge hakadisi tsēde ǁîb tawa ge ǀoaǀoahe; nēti di ge tsēdi ǂkhauǀkhāhe ran dide gere ǀoaǀoahe xui-ao; tsî Egipteǁîn ge ǁîba hûdisi tsēde gere āba.

⁴Tsî ābaheb ra tsēdi ge toao, ob ge Joseba Faraob ommi din ǀkha ge ǃhoa, mî rase: ǀKhomma ta ga hō hâo sadu mûǁae, ǁnâi ǃhoaba te re Faraob ǂgaedi ǃnâ î du mî re,

⁵ti îb ge nū kai te mî rase: Mû tita ge ra ǁō; ǁnā ǀhobas, Kanaanǃhūb ǃnâ ta ge khaobasens, ǁîs ǃnâ ǁkhō te re. Îts ǁnâi ǃgûǃapa kai te, î ta ti îba sī ǁkhō, o ta ge ǁkhawa nîra hā.

⁶Ob ge Faraoba ge mî: ǃGûǃapa îts sa îba sī ǁkhō, ǁîb ge nū kai tsi khami.

⁷Ob ge Joseba ge ǃgûǃapa, ǁîb di îbab nî ǁkhōse, tsî ǁîb ǀkha gu ge Faraob di ǃgāgu hoagu tsî ǁîb ommi di kaigu tsî Egipteǃhūb di kaigu hoaga ge ǃgûǃapa;

⁸ǁîn tawa ǁkhāti Joseb di ommi hoab tsî ǁîb di ǃgâsagu tsî ǁgûb di ommi tsîna; ǁîn di ǂkhari ǀgôaron tsî ǁîn di goman tsî ǁîn di gūn tsîn ǀguinan ge ǃgoro Gosenǃhūb ǃnâ.

⁹Tsî ǁîb ǀkhan ge ge ǃapa kunidi tsî ǃgapi-aogu tsîna, tsî i ge ama kai ǂnubi ge i.

¹⁰Tsî ǂgāb ǁkhūs dib ain ge sīo, Jordanǃāb nauǃani ǁgoeba, on ge ǁnāpa kai tsî ama ǃgom ǃoab ǃgaesa ge dī; tsîb ge ǁîba ǁgûba hû tsēdi kōse ǃoab ǁae-e ge dība.

¹¹Tsî ǃhūb ǃnâ ǁan hân, Kanaanǁîn ge ǁnā ǃoab dī-ai-e mûo, ǁkhūs di ǂgāb ai, on ge ge mî: Nē-i ge ǃgom ǃoa-i Egipteǁîn di-e. ǁNā-amagan ge ǁnā ǃkhaisa Abel-Misrajims ti ge ǂgai, Jordanǃāb nauǃani ǁgoesa.

¹²Tsî gu ge ǁîb di ôaga ǁîb ǀkha ge dī, ǁîb ge ǁîga mîmā khami.

¹³ǁÎb di ôagu ge ǁîba Kanaanǃhūb ǃoa ūsī tsî ge ǁkhō bi ǁnā ǁhoaǃnās Maxpelas ǃhanab dis ǃnâ, Abrahammi ge ǃhanab ǀkha Efronni Hetiǁîb tawa ǀumiǁkhōǃkhais ase ǁamas, Mamres ǃoa-ai ǁgoesa.

¹⁴ǁNās khaoǃgâb ge Joseba ǁkhawa Egipteb ǃoa ge oa, ǁîb tsî ǃgâsagu âb tsî ǁgûba nî ǁkhōga ǃgûǃapa ge hâ in hoana, ǁgûbab ge ǁkhōtoas khaoǃgâ.

¹⁵Tsî Joseb ǃgâsagu ge mûo ǁgûb ǁō hâ ǃkhaisa, o gu ge ge mî: ǀNîsib ge Joseba sige nî ǁkhan, tsîb ge ǂanǂansase sige nî dīdawa-am ǁnā ǂkhabab sige ge ǁîba dī-ūb ǂama.

¹⁶ǁNā-amaga gu ge Joseba amsa sîba tsî ge mî: Sa îb ge koma ǁōb âb aiǃâ mîmā tsî ge mî:

¹⁷Nēti go ge Joseba nî mîba: Îts ǁnâi ǀûba re sa ǃgâsagu di ǃûǂamsa, tsî ǁîgu di ǁoreba, ǂkhabadī tsi gu gere xuige. Îts ǁnâi nēsi ǀûba re ǁnā ǃûǂams ǃgāgu sa îb Elob digu disa. Ob ge Joseba ge ā, ǁîb ǃoa gu ra ǃhoa hîa.

¹⁸ǁNās khaoǃgâ gu ge ǃgâsagu âb ona hā tsî ǁîb aiǃâ ǁnāǁgoe tsî ge mî: Kō, sige ge a sa ǃgā.

¹⁹Ob ge Joseba ǁîgu ǃoa ge mî: Tā ǃao go re; tita kha Elob khami ta ǁnâi ī?

²⁰Sago, ā sago ge ǂkhaba-e ti ǃoagu ǂâi ge hâ i, xaweb ge Eloba ǁî-e ǃgâi-i ase ge ǂâi; ǁîb nî dīse, nētsē i ī khami, kai ǁaesab nî ûib ǃnâ sâu ti.

²¹Nēsi ǁnâi tā ǃao go re, tita ge sago tsî sago di ǂkhari ǀgôarona nîra ûi kai. Nētib ge ǁîga ǁkhaeǂgao tsî ǂgaob âgu ǃoa ge ǃhoa.

²²Tsîb ge Joseba Egipteb ǃnâ ge ǁan, ǁîb tsî ǁgûb ommi din tsîna; tsî Joseb ge ǀguikaidisi tsî disi kuriga ge ûi.

²³Tsî Joseb ge Efraimmi di ôana ge mû, ǃnonaǁî ǃhaoǃnās kōse; ǁkhātin ge Maxiri, Manaseb ôab di ôana Joseb di ǁgoara ai ge ǃnae.

²⁴Tsî Joseb ge ǃgâsagu âb ǃoa ge mî: Tita ge ra ǁō, xawe Elob ge sado ǂanǂansase nî sari, tsîb ge sado nîra doeǃapa kai nē ǃhūba xu ǁnā ǃhūb, hîab ge Abrahammi, Isaki tsî Jakob tsîga nūbab ǃoa.

²⁵Tsî Joseb ge Israeli ôaga ge nū kai, mî raǃâ: Elob ge ǂanǂansase sado nîra sari, o du ge ti ǂkhōga nî ūǃapa nēpa xu.

²⁶Tsîb ge Joseba ge ǁō, ǀguikaidisi tsî disi kurixa hâǃâ; tsîn ge ǁîba ge ǂkhauǀkhā, tsî ǂgaes ǃnâ ge ǁgui bi Egipteb ǃnâ.