Read Khoekhoegowab Genesis 6 Bible Online

Genesis 6 - Khoekhoegowab bible

Genesis 6

¹Tsî i ge ge ī, khoen ge ǃhūbaib ai ǂguiǂguisentsoatsoa tsî ǀgôaden ge ǁorabahe

²ǃnubai gu ge Elob ôaga khoen di ôade ge mû îsa di a ǃkhaisa tsî gu ge ǁîdi xa ǂgao gu hâdi hoade tarase ge ūbasen.

³Ob ge ǃKhūba ge mî: Khoen ge tātsē ti Gagab xa ǂgōǀaukaisen tide, ǁîn a ǁgan xui-ao; o ta ge tita ǁîn di tsēde nî ǀguikaidisi tsî ǀgamdisi kurigu kō kai.

⁴ǁNā tsēdi ai gu ge gaxu khoega ǃhūbaib ai ge hâ i, tsî ǁkhāti ǁnās khaoǃgâ gu ge Elob ôaga khoen di ôadi tawa ǂgâ tsî ǀgôana ge hō; nē gu ge ǁnā ǁē-aogu hugasa xu gere gomga.

⁵Tsî ǃKhūb ge mûo, khoen di ǂkhabasib ra ǃhūbaib ai ǂgui, tsî ǂgaob ân di ǂâibasende mâ tsēs hoas ai a ǂkhaba ǃkhaisa,

⁶ob ge ǃKhūba ge ǃhausen, khoebab ge ǃhūbaib ai dī ǃkhaisa, tsîb ge kaise ge tsûaǂgao.

⁷Ob ge ǃKhūba ge mî: Tita ge ǁnā khoeb ǂnubi ta geba ǃhūbaiba xu nîra hîkākā, khoeba xu ǀgoan kōse tsî ǂhanaben kōse, tsî ǀhommi di anin kōse; ǁîna ta ge dī ǃkhais xa ta ǃhausen hâ amaga.

⁸Xawe Noaxi ge ǀkhomma ge hō ǃKhūb mûǁae.

⁹Nēdi ge ǃnaeǃkhaidi Noaxi dide. Noaxi ge ǂhanu-ai tsî ǂhauǃnâ ao ge i, ǃhaodi âb ǃnâ. Noaxi ge eloǃaoǃgâxase gere tanisen.

¹⁰Tsî Noaxi ge ǃnona ǀgôaga ge hō: Semmi, Xammi tsî Jafeti tsîga.

¹¹Tsî ǃhūbaib ge ge ǁgao hâ i Elob mûǁae; tsî ǃhūbaib ge ǂkhabadīb xa ge ǀoa hâ i.

¹²ǃNubaib ge Eloba ǃhūbaiba ge kōǀî, tsî mû, ǁîb ge ge ǁgao hâ i; ǁgans hoas ge daob âsa ǁgaoǁgao ǃhūbaib ai xui-ao.

¹³ǁNā-amagab ge Eloba Noaxi ǃoa ge mî: ǁGans hoas di ǀams ge ti ais aiǃâ go hā; ǃhūbaib go ǁîna xu ǁgaidīb xa ǀoa xui-ao; tsî mû, tita ge ǁîna ǃhūbaib ǀkha nîra hîkākā.

¹⁴Arka ǁnâi dībasen goferhain ǀkha; hâǃnâǃkhaide ūhâse nē arka dī, tsîts ge ǁîba nî ǂkhau ǃnāb ǃnâ tsî ǃaugab ai ǂkhau-ūxū-i ǀkha.

¹⁵Tsîts ge ǁîba nēti nî dī: Ab arka ǃnonakaidisi ǂhâgu kōse gaxu, îb korodisi ǂhâgu kōse ǂhaba, îb ǃnonadisi ǂhâgu kōse ǀgapi.

¹⁶Îts mûǂuidao-e dī arki ai, tsîts ge ǁî-e ǀgui ǂhâb kōse ǀgapiba xu nî dītoa; tsî ǁāb arki dibats ge ǃnammi âb ai nî ǂnûi; tsîts ge ǁîba ǃnaga hâ tsî ǀgamǁî tsî ǃnonaǁî ǀgora-aidi ǀkha nî dī.

¹⁷Tita, mû, tita ge ǁgammi dâu-e ǃhūbaib ai nîra hā kai xuige, ǁgans hoas ûigaga-i hâǃnâsa ta nî ǀhommi ǃnagaba xu hîǀhuruse; ǃhūbaib ai hâ-i hoa-i ge nîra ǁō.

¹⁸Xawe sats ǀkha ta ge tita ti ǃgaeǀhaosa nîra dī; tsîts ge arki ǃnâ nîra ǂgâ, sats tsî sa ôagu tsî sa taras tsî sa ôagu di taradi tsîna sats ǀkha.

¹⁹Tsîts ge ûitsama xū-i hoa-i xa, ǁgans hoas xa, mâ xūǃnôa-i hoa-i xa ǀgamǀgammese arki ǃnâ nî ǂgâ kai, sa ǀkhan nî ûib ǃnâ sâuhega; aoreb tsî tarares tsîra ase.

²⁰Anin xa ǁîn di ǃnôaba ǃoa tsî ǀgoan xa ǁîn di ǃnôaba ǃoa, ǂhanaben ǃhūbaib din hoan xa ǁîn di ǃnôaba ǃoa, mân hoan xa a ra ǀgamǀgammese sa tawa sī, ûib ǃnân nî sâuhega.

²¹Îts satsa mâ ǂû-i ǂûhe ra-i hoa-i xa ūbasen, îts ǁîna sa tawa ǀhaoǀhao, în sats tsî ǁîn tsîna ǂûse ība.

²²Ob ge Noaxa ge dī; Elob ge ǁîba mîmās ǁkhās khami.