Read Khoekhoegowab Genesis 7 Bible Online

Genesis 7 - Khoekhoegowab bible

Genesis 7

¹ǁNās khaoǃgâb ge ǃKhūba Noaxi ǃoa ge mî: ǂGâ satsa sa ommi hoaragab ǀkha arki ǃnâ; satsa ta ge tita ǂhanu-aise ti aiǃâ nē ǃhaos ǃnâ mû xuige.

²Mâ ǃanu ǀgoan hoan xats ge hûhûbese sa tawa nî ū, aoreb tsî tarares âb tsîra xa; xawe ǀgoan hîa ǃanu taman xa ǀgamse; aoreb tsî tarares âb tsîra.

³ǀHommi di anin on xa hûhûbese—aoreb tsî tarares tsîra, ǃkhommi nî ûitsamase ūhâhega ǃhūbaib hoaragab ai.

⁴Gorose hû tsēdi khaoǃgâ i nî ī, o ta ge tita ǃhūbaib ai nî ǀapi kai hakadisi tsēdi tsî hakadisi tsuxugu kōse; o ta ge tita ǃhūbaiba xu nîra hîkākā, hâ a xū-i tita ge dī-i hoa-e.

⁵Ob ge Noaxa ǃKhūb ge mîmā bin hoana ge dī.

⁶Tsî Noaxi ge ǃnanikaidisi kurixa ge i, ǁgamgu dâus ge ǃhūbaib ai hâ ǃnubai.

⁷Nētib ge Noaxa ǁîb di ôagu tsî ǁîb di taras tsî ǁîb ôagu di taradi tsîn ǀkha arki ǃnâ ge ǂgâ ǁgamgu dâus ǃaroma.

⁸ǃAnu ǀgoan xa tsî ǁnā ǀgoan hîa ǃanu taman xa, tsî anin xa, tsî ǃhūbaib ai ra ǂhanan hoan xa,

⁹ǁîna xun ge ǀgamǀgamese Noaxi tawa arki ǃnâ ge hā, aoreb tsî tarares tsîra, Elob ge Noaxa mîmā khami.

¹⁰Tsî i ge ǁnā hû tsēdi khaoǃgâ ge ī, ǁgamgu dâus ge ǃhūbaib ai hā ǃkhaisa.

¹¹ǃNanikaidisiǁî kurib Noaxi ûib dib ǃnâ, ǀgamǁî ǁkhâb ai disihûǀaǁî tsēs ǁkhâb dis ai, ǁnā tsēs ǁkhās ai di ge ǀaudi kai ǃgamsib didi hoade ge ǃkhopa, tsî ǀapib daodi ǀhommi didi ge ge ǁkhowa-amsen,

¹²tsî kai ǀapib ge ǃhūbaib ai ge ǀapi, hakadisi tsēdi tsî hakadisi tsuxuga.

¹³Tsî ǁnā tsēs ǁkhās ain ge Noaxi, Semmi, Xammi tsî Jafeti tsîgu, Noaxi di ôagu, tsî ǁkhāti Noaxi di taras tsî ǁîb ôagu di ǃnona taradi tsîna ǁîgu ǀkha arki ǃnâ ge ǂgâ.

¹⁴ǁÎn tsî ǀgurun hoana ǁîn di ǃnôaba ǃoa, tsî ǀgoan hoana ǁîn di ǃnôaba ǃoa, tsî ǂhanaben ǃhūb ai ra ǂhanan hoan ǁîn di ǃnôaba ǃoa, tsî anin hoan ǁîn di ǃnôaba ǃoa, mâ aniro-i ǁgaboǃnôa-e ūhâ-i hoa-e,

¹⁵tsî ǁgans hoas xa gagas ûib dis ǁîs ǃnâ hâs tsîn, ǁîn ge ǀgamǀgamese Noaxi tawa arki ǃnâ ge hâ i.

¹⁶Tsî hā geren ge aorese tsî tararese gere hā, ǁgans hoas xa, Elob ge mîmā khami. Tsî ǃKhūb ge ǁîb khaoǃgâ ge ǂganam.

¹⁷Tsî i ge ge ī, ǁnā dâus ge hakadisi tsēdi kōse hâ ǃkhaisa ǃhūbaib ai, o gu ge ǁgamga ǀoa tsî arka ge ūkhâi, ǃhūba xub ge khâis kōse.

¹⁸Tsî ǁgamgu ge ǃaruǀîǀgui ǀoa tsî ǃhūb ai kaise ge kai; ob ge arka ǁgamgu ai gere ǀnarema.

¹⁹Tsî ǁgamgu ge kaise ge ǀoa ǃhūbaib ai, ǀgapi ǃhomgu ǀhommi hoaragab ǃnaga hâgu hoagu ge ǃgū-aihes kōse.

²⁰Disikoroǀa ǂhâga ǃnā hâse gu ge ǁgamga ǀoa ǃnubai gu ge ǃhomga ge ǃgū-aihe.

²¹Os ge ǁgans ǃhūbaib ai ra gons hoasa ge ǀkhai, anin xa tsî ǀgurun xa tsî ǃkhausa ǀgurun xa, tsî ǂhanaben ǃhūbaib ai ra ǂhanan hoan xa, tsî khoe-i hoa-i xa;

²²ûitsama gagas di ǀom-e ǂgui-āra â-i ǃnâ ūhâ-i hoa-i xa, ǂnâsab ai hâ-i hoa-i xa, ǁî-i ge ge ǁō.

²³Nēti i ge mâ ûitsama xū-i ǃhūbaib ai hâ-i hoa-e ge hîkākāhe, khoeba xu ǀgoan kōse, tsî ǂhanaben kōse; tsî ǀhommi di anin kōse, tsîn ge ǃhūbaiba xu ge hîǀhuruhe; tsî Noaxi ǀguib ge ge ǃgau tsî ǁîb ǀkha arki ǃnâ hân tsîna.

²⁴Tsî ǁgamgu ge ǃnā hâse ge ǀoa ǃhūbaib ai, ǀguikaidisi tsî korodisi tsēdi kōse.