Read Khoekhoegowab Genesis 8 Bible Online

Genesis 8 - Khoekhoegowab bible

Genesis 8

¹Tsî Elob ge Noaxi xa ge ǂâi tsî ǀgurun hoan xa, tsî ǀgoan ǁîb ǀkha arki ǃnâ hân hoan xa; tsî Elob ge ǂoaba ǃhūbaib ai ǃgom kaio, o gu ge ǁgamga ge ǁgôa-a-ai.

²O di ge ǀaudi ǃgamsib didi tsî ǀapidaodi ǀhommi dide ge ǂganamhe, ob ge kai ǀapiba ǀhomma xu ge ǀû kaihe.

³O gu ge ǁgamga ǃhūbaiba xu ǁkhawa ge ǁgôa dâuma raǃâ; tsî ǁgamgu ge ge ǁgôa ǀguikaidisi tsî korodisi tsēdi di ǀunis ai.

⁴Ob ge arka hûǁî ǁkhâb ǃnâ, disihûǀaǁî tsēs ǁkhâb dis ai Araratǃhomgu ai ge sī sâ.

⁵Tsî ǁgamgu ge ǃaruǀîǀgui ge ǁgôa disiǁî ǁkhâb kōse; disiǁî ǁkhâb ǃnâ, ǂguro tsēs ǁkhâb dis ai di ge ǃhomgu di ǂaode ge mûhe.

⁶Tsî i ge hakadisi tsēdi di ǀunis ai ge ī, ob ge Noaxa arki ǁîb ge dīb mûǂuidaosa ge ǁkhowa-am,

⁷tsîb ge goraba ge ǂoa kai ǃnuri ǃnāde ra doemaba, ǁgamgu ge ǃhūbaib ǂamǃnâba xu ǀaris kōse.

⁸ǁNās khaoǃgâb ge ǂnabusa ǁîba xu ge ǂoa kai, mûb, nîga, ise gu ǁgamga ǃhūb ǂamǃnâba xu ǀari hâ ǃkhaisa.

⁹Xawe ǂnabus ge ǂaiǃnāb âsa sâǃkhai-e hōba tama ge i amagas ge ǁkhawa ǁîb ǃoa ge oa arki ǁga, ǁgamgu ge ǃhūbaib hoaragab ai hâ i amaga. Ob ge ǃommi âba ǀhōǂui tsî ge ū si tsî ǁîb tawa arki ǃnâ ge ūǂgâxa si.

¹⁰Tsî ganupe ǀnî hû tsēde ǃâu tsîb ge ǂnabusa ǁkhawa arka xu ge ǂoa kai.

¹¹Os ge ǂnabusa ǃui-amǁaeb ai ǁîb tawa ge hā, tsî mû, khôaǁnâhesa ǀkheraǂgae-i ge amǃnâb âs ǃnâ ge hâ i; ob ge Noaxa ge hōǃâ ǁgamgu ǃhūbaib ǂamǃnâba xu bē hâ ǃkhaisa.

¹²ǃNubaib ge gorose ǀnî hû tsēde ge ǃâu; ob ge ǂnabusa ge ǂoa kai, xawes ge ǁîsa ǁîb tawa ǁkhawa hā tama ge i.

¹³Tsî i ge ge ī ǃnanikaidisi ǂguro kurib ǃnâ, ǂguro ǁkhâb ǃnâ, ǂguro tsēs ǁnā ǁkhâb dis ai, ǁgamgu ge ǃhūbaiba xu ǀaribē ǃkhaisa; ǃnubaib ge Noaxa arki di ǂamaisa ūǁnâ tsî ge kō, tsî mû, ǃhūb ge ǂnâsa ge i.

¹⁴Tsî ǀgamǁî ǁkhâb ǃnâ, ǀgamdisihûǀaǁî tsēs ǁkhâb dis aib ge ǃhūbaiba ge ǂnâ.

¹⁵ǃNubaib ge Eloba Noaxi ǀkha ǃhoa tsî ge mî:

¹⁶ǃGûǂoa arka xu sats, sa taras, sa ôagu tsî sa ôagu di taradi tsîn sa ǀkha.

¹⁷ǁNā ǀgurun sats ǀkha hân hoan, ǁgans hoas din, tsî anin, tsî ǀgoan tsî ǂhanaben hoan, ǃhūbaib ai ra ǂhanan hoan an sats ǀkha ǃgûǂoa, ǃnāǂamsase ôananôagu ǃhūbaib ai, în ǂûǂûxaǃnâ în ǂguiǂguisen ǃhūbaib ai.

¹⁸ǃNubaib ge Noaxa ge ǃgûǂoa tsî ǁîb di ôagu, ǁîb di taras tsî ǁîb ôagu di taradi tsîn ǁîb ǀkha.

¹⁹ǀGurun hoan tsî ǂhanaben hoan tsî anin hoan, ǃhūbaib ai ra gon xūn hoan ge ǃnôagu ân ai arka xu ge ǃgûǂoa.

²⁰Ob ge Noaxa ǃKhūba altar-e ge ǂnubiba; tsîb ge ǃanu ǀgoa-i hoa-i xa tsî ǃanu ani-i hoa-i xa ū tsî ǁnā altars ai khauǁguibade ge ǁguiba.

²¹Ob ge ǃKhūba ǁnā ǀnamǀnamsa ǁamaba ge ǃkhapa tsîb ge ǃKhūba ǂgaob âb ǃnâ ge mî: Tita ge ǃhūba ǃaruǀî ǁkhawa ǀâxarexū tide khoeb ǃaroma; ǂâidi khoeb ǂgaob didi a ǂkhaba ǂkhamsis âba xu xui-ao; o ta ge ǃaruǀî ûitsama-i hoa-e ǁkhawa ǂnau tide, tita go dī khami.

²²ǃAruǀî ǃhūbaib tsēdi kōsen ge ǀû tide: Tsoros tsî ǃgaos, ǃkhaib tsî ǀgammi, ǁkhunab tsî saob, tsēs tsî tsuxub tsîna.