Read Khoekhoegowab Genesis 9 Bible Online

Genesis 9 - Khoekhoegowab bible

Genesis 9

¹Tsî Elob ge Noaxi tsî ǁîb di ôagu tsîna ge ǀkhae, tsîb ge ǁîgu ǃoa ge mî: ǂÛǂûxaǃnâ î du ǂguiǂguisen î du ǃhūbaiba ǀoaǀoa.

²Tsî sado ǃaob tsî sado ǃhuribab tsîn ge nî ǀgurun ǃhūbaib din tsî anin ǀhommi din hoan ǃnâ nîra hâ; ǃhūbaib ai ra gon xū-i hoa-i ǃnâ, tsî ǁaun hurib din hoan ǃnâ; ǁîn ge sadu ǃomǁae māhe hâ.

³Gon ra xū-i ûitsama-i hoa-e a-i ǂûse ība du! Tita ge ǁî-i hoa-e go mā du, ǃam ǁhaon ǁkhān khami.

⁴Xawe ǁgans hîa ǀoms âs xa hâǃnâhes ǀaob âs ǃnâ, ǁîsa du ge ǂû tide.

⁵Tsî amase ta ge tita ǀaob sadu ǀoms diba nîra ǂgaoǀkhā; ǀgurun hoan di ǃomǁaeba xu ta ge ǁîba nîra ǂgaoǀkhā; ǁkhāti khoeb di ǃomǁaeba xu, mâb hoab ǃgâsab âb di ǃomǁaeba xu ta ge khoe-i di ǀomsa nîra ǂgaoǀkhā.

⁶Khoe-i di ǀaoba ga ǂnâxū-i, ǁnā-i di ǀaob ge ǁkhāti khoeb xa nîra ǂnâxūhe; Elob ge khoeba ǁîb di īb ǃoa kuru amaga.

⁷Xawe sado ǂûǂûxaǃnâ î du ǂguiǂguisen, î du ǃnāǂamsase ôananôagu ǃhūbaib ai, î du ǁîb ai ǂgui.

⁸Tsî Elob ge Noaxi tsî ǁîb di ôagu, ǁîb ǀkha hâgu ǃoa ǃhoa tsî ge mî:

⁹Mû, tita ge ti ǃgaeǀhaosa sadu ǀkha ra dī tsî sadu di surib ǀkha sadu khaoǃgâ,

¹⁰tsî mâ ûitsama ǀoms hoas sadu tawa hân hoan dis xas karao, ǁnā arka xus xas karao, tsî ǀgurun ǃhūbaib din sadu tawa hân hoan xas karao, ǁnā arka xu ge ǂoaxan hoana xu ǀgurun ǃhūbaib din hoan kōse.

¹¹Tsî ta ge tita ti ǃgaeǀhaosa sadu ǀkha ra dī, ǃaruǀîs ǁgans hoasa ǁgamgu dâus ǀkha hîkākāhe tidesa, tsî ǃaruǀî i dâu-i xare-e hâ tidesa, ǃhūbaiba nî hîǀhuru-e.

¹²Tsî Elob ge ge mî: Nēs ge saos ǁnā ǃgaeǀhaos dis, tita ra dīsa tita tsî sadu tsîn ǁaegu, tsî ûitsama ǀoms sadu ǀkha hâs hoas ǁaegu, ǀamo ǃhaodi kōse.

¹³Ti tsawiruba ta ge tita ǀnanudi ǃnâ go mā; ǁîb ge saos ǃgaeǀhaos, tita tsî ǃhūbaib tsîkhom ǁaegu hâs dis ase nîra hâ.

¹⁴Tsî i ge nîra ī, ǀnanude ta kara ǃhūbaib ai ūhāo, ob ge tsawiruba ǃâudi ǃnâ nîra mûhe;

¹⁵ǃnubai ta ge tita nîra ǂâi ti ǃgaeǀhaos, tita tsî sadu ǁaegu tsî mâ ûitsama ǀoms hoas, ǁgans hoas ǁaegu hâs xa; o gu ge ǁgamga ǃaruǀî dâus ase hâ tide, ǁgans hoasa ra hîǀhurusa.

¹⁶Nē tsawirub ga ǀnanudi ǃnâ hâo, o ta ge ǁîba nîra ǃgapaǀî, ǂâihō ta nîse ǀamo ǃgaeǀhaos, Elob tsî mâ ûitsama ǀoms ǃhūbaib ai hâ ǁganǃnôas hoas dis ǁaegu hâs xa.

¹⁷Tsîb ge Eloba Noaxi ǃoa ge mî: Nēs ge saos ǁnā ǃgaeǀhaos dī ta gos disa, tita tsî ǁgans hoas ǃhūbaib ai hâs ǁaegu.

¹⁸Tsî ǀgôagu Noaxi digu, arka xu ge ǂoagu ge Semmi, Xammi tsî Jafeti tsîga ge i; tsî Xammi ge Kanaanni di îba.

¹⁹Nē ǃnonagu ge Noaxi di ôa ge i; ǁîga xun ge ǃhūbaib hoaragab di khoena ge khora.

²⁰Tsî Noaxi ge ge ǃhanasîsenao kai tsoatsoa, tsîb ge ǂauxûiǂûǃhanaba ge ǂgā.

²¹Tsî ǂauxûib xab ge āo, ob ge ge āǁō, ob ge ǀōǀkhāse tentoms âb ǃnâ ge ǁgoe.

²²Tsî Xammi Kanaanni îb ge ǁgûb di ǀōǀkhāsiba mûo, ob ge ǃgâsakha âb ǃauga hâkha ǁîsa ge sī ǂanǂan.

²³ǃNubai kha ge Semmi tsî Jafeti tsîkha sara-e ū tsî ǁîkha di ǃhōgu ai ǁî-e ǁgui tsî ǃgâǃgâbē tsî ǁgûb di ǀōǀkhāsiba ge ǃgū-ai; tsî ǁîkha di aira ge ǃgâbǀî unuhe ge hâ i, ǁgûb di ǀōǀkhāsiba kha mû tidese.

²⁴Tsî Noaxi ge ǂauxûib âba xu ǃnoaǂkhaio, ob ge ge hōǃâ, tare-eb ǀgôab ǂkhamma go dī ǃkhaisa.

²⁵Ob ge ge mî: Ab Kanaanna ǀâxarehe hâse ī, îb ǃgāgu di ǃgāse ība ǃgâsakha âba!

²⁶ǃAruǀîb ge ge mî: Ab ǃkhōǀkhāhe re ǃKhūb Semmi di Eloba; îb Kanaanna ǁîba ǃgāse ība!

²⁷Ab Eloba Jafeta khoraǂui, îb ǁan Semmi di tentomdi ǃnâ, îb Kanaanna ǁîba ǃgāse ība!

²⁸Tsî Noaxi ge kai dâus khaoǃgâ ǃnonakaidisi tsî korodisi kuriga ge ûi.

²⁹O di ge tsēdi Noaxi didi hoade khoesekaidisi tsî korodisi kuri ge i, tsîb ge ge ǁō.