Read Khoekhoegowab 2 Samueli 1 Bible Online

2 Samueli 1 - Khoekhoegowab bible

2 Samueli 1

¹ǃAruǀî i ge Sauli ǁōb khaoǃgâ ge ī, Davib ge Amalekǁîn di ǂnausa xu oa tsî ǀgam tsēra Siklags tawa hâ ǃkhaisa,

²o i ge ǃnonaǁî tsēs ai ge ī, mû, ob ge khoeba Sauli di ǂnubisa xu ge hā, saran âb ǀkhauhe hâb tsî danas âb aib ǃhūba hâba; tsî i ge ge ī, Davib tawab ge hāo, ob ge ǃhūb ai ǁnā tsî ge ǃgamǃgâ.

³Ob ge Daviba ǁîb ǃoa ge mî: Mapa xuts ra hā? Ob ge ǁîba: Israeli ǂnubisa xu ta ge go ûiǂoa, ti ge mî.

⁴ǃAruǀîb ge Daviba ǁîb ǃoa ge mî: Mati ī ǃkhaisa? ǃHoaba te re. Ob ge ge mî: ǁAes go ǃkhamma xu ǁhâ tsî ǂguigu ǁaes digu go ǁnā tsî ǁō, tsî Sauli tsî ǁîb ôab Jonatanni tsîkha go ǁkhāti ǁō.

⁵Ob ge Daviba ǁnā ǂkham khoeb, ǂhôasa ge ūhāba bib ǃoa ge mî: Matits a ǂan, Sauli go ǁō ǃkhaisa tsî ǁîb di ôab Jonatanni tsîna?

⁶Ob ge ǁnā ǂkham khoeb, ǂhôasa ge ǁîba ūhābaba ge mî: Tita ge ǁause Gilboaǃhommi ai go sī; tsî mû, Sauli ge ǁhâigôab âb ai go ǃgâsen hâ i; tsî mû, kunidi tsî ǃgapi-aogu tsîn ge ǁîba go ǃgôaǃgon.

⁷Ob ge kōnǃgâ tsî ge mû te; ob ge tita ge ǂgai, tsî tita ge: Nē ta a, ti ge mî.

⁸Ob ge tita ǃoa: Taritsa? ti ge mî. O ta ge tita ǁîb ǃoa: Tita ge, Amalekǁîta, ti ge mî.

⁹ǁGoasib ge tita ǁga ge mî: Dāǀgū îts ǃgam te, ǀhūb xa ta ra ǃkhōhe xuige; ti ǀoms ge ganupe ǀoasase ti ǃnâ hâ xui-ao.

¹⁰O ta ge dāǀgū tsî ge ǃgam bi, ǂan ta ge i xui-ao, ǁnās âb khaoǃgâb ûi tide ǃkhaisa; tsî ta ge krons, danas âb ai hâs, tsî ǃganus ǁôab âb ai hâsa ū tsî ǁîra nēpa ti ǀhonkhoets tawa ge ūhā.

¹¹ǃNubaib ge Daviba saran âba ū tsî ǁîna ge ǀkhauǃā; ǁnās ǁkhās xase gu ge ǁîb ǀkha hâ khoegu hoagu ona ge dī.

¹²Tsî gu ge ǃgae tsî ge ā tsî ǃuis kōse ǂûtama ge hâ, Sauli ǂama tsî Jonatanni, ǁîb ôab ǂama tsî ǃKhūb ǁaes hoas ǂama tsî Israeli ommi ǂama, gôaba xu gu go ǁnā ǃkhais ǃaroma.

¹³ǃAruǀîb ge Daviba ǁnā ǀgôab ǂhôasa ge ūhāba bib ǃoa: Mapa xuts hâ? ti ge mî. Ob ge: Tita ge ǃhao aob, Amalekǁîb di ôata, ti ge mî.

¹⁴Ob ge Daviba ǁîb ǃoa ge mî: Matits kha ǃao tama go hâ i, sa ǃomma ǀhōǂuisa, ǃKhūb ǂkhauǀkhāsabebats nî hîǀhuruse?

¹⁵Tsî Davib ge ǂkham khoegu di ǀguiba ǂgai tsî ge mîǀî bi: Dāǀgū îts ǁhâiǁgui bi. Ob ge ǁîba ge ǂnauǁgui, ǁōb nîse.

¹⁶Tsî Davib ge ǁîb ǁga ge mî: Sa ǀaoba ab sa danas ai hâ! Sa ams ge sa ǃoagu ǀhûǀguitimî tsî: Tita ge ǃKhūb ǂkhauǀkhāsabeba go ǃgam, ti go mî xuige.

¹⁷Tsî Davib ge nē ǃgae-amsa ge ǃgae Sauli tsî Jonatanni, ǁîb ôab tsîkha ǂama.

¹⁸Mîb ge, Judab ôan khāsa nî ǁkhāǁkhāhesa; mû, ǁîs ge xoahe hâ ǂkhanis ǂhanu-ain dis ǃnâ.

¹⁹Ae, Israeli di anixūtse, ǁîb ge sa ǀgapigu ai go ǃgamhe, ǁē-aoga mati gu go ǁnā?

²⁰Tā ǁîsa ǂhôa Gats tawa, tā ǁîsa aoǁnâ Askelons daogu ai, î di Filisteǁîn ôade tā ǃgâiaǂgao, î di ǃgaohe tama hân di ôade tā dâb xa urikhâi.

²¹Sa ǃhomgo Gilboas digo, ǀau-i tsî ǀapi-i tsîna an tā sa ai hâ tsî ǃaugu ūkhâiǁguibadi digu tsîna; ǁnāpab ge ǁē-aokha di khōsikhōba go ǀuriǀurihe, khōsikhōb Sauli dib, olib ǀkhab ǂkhauhe tama xū-i khami.

²²ǂNauǃanhe hân di ǀaoba xu, ǁē-aogu di gauba xus ge Jonatanni di khāsa khaosǀî ǂgō tama ge i; tsî Sauli di gôab ge ǀkhaiǀkhāse oa tama ge i.

²³Sauli tsî Jonatanni tsîkha, ǁnā ǀnamǀnamsabekha tsî ǃgâikha, ǁîkha di ûib ǃnâ tsî ǁîkha di ǁōb ǃnâ kha ge ǀgorahe tama ge hâ i; ǁîkha ge ǃariǃkhādi ǃgâ-ai ǃhae ge i, ǁîkha ge xamgu xa ǀgaisa ge i.

²⁴Israeli di ôaso, ā re Sauli ǂama, ǁîb hîa saso îǀapaba ge anaba ǃgomǀgausase; ǃhuniǀuri-anixūna ge saso tani kaiba, saso di saran ai.

²⁵Mati kha go ǁnā ǁē-aokha ǃkhammi ǁaegub ǃnâ! Jonatanni ge go ǃgamhe sa ǀgapigu ai.

²⁶ǃOa ta hâ sats ǂama, ti ǃgâ Jonatantse, sats ge ǀnamǀnamsase go ība te i; sa ǀnammi ge taradi di ǀnamma ǃnā hâse ge ība te i.

²⁷Okha! Mati kha ǁē-aokha ge ǁnā tsî torob di sîsenūxūkha ge kā!