Read Khoekhoegowab 2 Samueli 10 Bible Online

2 Samueli 10 - Khoekhoegowab bible

2 Samueli 10

¹Tsî i ge ǁnās khaoǃgâ ge ī, Amonni ôan di gao-aob ge ǁō, tsî Hanunni, ǁîb di ôab ge ǁîb di ǃās ǃnâ gao-ao kai ǃkhaisa.

²ǃNubaib ge Daviba ge mî: Tita ge ǀkhomxaǂgaosiba Hanunni, Nahab ôaba nî dī-ū, ǁîb îb ge tita ǀkhomxaǂgaosiba dī-ūs ǁkhās xase. ǁNā-amagab ge Daviba sîsabega ge sî, ǁkhaeǂgao bib nîga ǁîb îb ǂama. Tsî Davib di ǃgāgu ge Amonni ôan di ǃhūb ǃnâ ge sī.

³ǃNubai gu ge Amonni ôan di gaosaga ǁîgu di ǀhonkhoeb Hanunni ǃoa ge mî: Xare ǃgôab hâ Daviba sa îba sa mûǁae, ǁkhaeǂgao-aogab go sa ǃoa sî amaga? Xare ǃgāgu âba sa ǃoa sî tamab hâ Daviba, nē ǃāsab nî ôaǃnâǃganuse tsî ǃkhēǃnâse tsî dawaǃkhapuse?

⁴ǃNubaib ge Hanunna Davib ǃgāga ū tsî mâb hoab di ǀhō-amma ǃkhareb âba ge ǂkhomǁnâ tsî saran âga ǃkharese ge ǃgaoǁnâ ǂnamira kōse tsî ǁnāti ǁîga ge ǃgû kai.

⁵Tsî Davib ge ǂhôaheo, ob ge ǁîga ge sîǃoa, nē khoegu ge kaise tao hâ i xui-ao. Ob ge gao-aoba: Jerixos tawa hâ ǀhō-amdi âgo nî ǁkhawa ǁhoas kōse, î go ǁnās khaoǃgâ oahā, ti ge mî.

⁶Tsî Amonni ôan ge mûo, Davib tawan ge ǀōkaisen ǃkhaisa, on ge Amonni ôana sî tsî Siriaǁîn, Bet-Rehobs din xa tsî Siriaǁîn, Sobas din xa ǀgamdisiǀoadisi ǀnūǃgûkhoega ge ǃgae tsî gao-aob Maaxas dib din xa ǀguiǀoadisi khoega tsî Tobi di khoen xa disiǀgamǀaǀoadisi khoega.

⁷Tsî Davib ge ǁnâuo, ob ge Joaba ge sî tsî ǂnubis hoasa ǁē-aogu ǀkha.

⁸Tsî Amonni ôan ge ǂnauǂui tsî toroǂnubisa sī ge mâi ǁāb ǂgâ-ams aiǃâ, xawe Siriaǁîgu Sobas digu tsî Rehobs digu tsî Tobi tsî Maaxas di khoegu ge ǀguri ge hâ i ǃgarob ǃnâ.

⁹Tsî Joab ge mûo, ǃkhammi aisǀkhāba xu tsî khaosǀkhāba xu ǁîb ǃoagu hâsa, ob ge ǀnîga Israeli ǃkhōǂuisabegu hoaga xu ūǂuibasen tsî ǁîga ǃkhammi ǃoa ge mâi Siriaǁîgu ǃoa-ai.

¹⁰Tsî nau ǃâs ǁaes disab ge ǁîb di ǃgâsab Abisaib di ǃomǁae ge mā, tsîb ge ǁîga ǃkhammi ǃoa ge mâi Amonni ôan ǃoa-ai.

¹¹Tsîb ge ge mî: Siriaǁîgu ga ǀgaidā teo, o go ge sago hā nî ore te; tsî Amonni ôan ga satsa ǀgaidāo, o ta ge tita satsa sī nî ore.

¹²ǃGariǃgarisen î ge sage ǁaesa ǀgaisase ība tsî sage Elob di ǃāde; îb ǃKhūba ǁîb mûǁae a ǃgâi khami dī.

¹³ǃNubaib ge Joab tsî ǁaes, ǁîb ǀkha hâsa ge ǀgū Siriaǁîn ǀkha nî ǃkhamse; on ge ǁîb di ais aiǃâba xu ge ǁhâ.

¹⁴Tsî Amonni ôan ge mûo, Siriaǁîn ra ǁhâ ǃkhaisa, on ge ǁkhāti ge ǁhâ Abisaib di ais aiǃâba xu, tsîn ge ǃās ǃnâ sī ge ǂgâ. Ob ge Joaba Amonǁîna xu dawasen tsî Jerusalems ǁga ge oa.

¹⁵Tsî Siriaǁîn ge mûo, Israeli di ais aiǃân ǂnauhe hâsa, on ge hoatsama ǁkhawa ge ǀhû.

¹⁶Tsî Hadad-Eseri ge sî tsî Siriaǁîn, ǃāb nauǃnani ǁan hâna ge ǀkhī kai, on ge Helams tawa ge hā; tsî Sobaxi, Hadad-Eseri di toroǂamkhoeb ge ǁîna ge ai-aiba.

¹⁷Tsî Davib ge mîbaheo, ob ge Israeli hoaba ǀhaoǀhao tsî Jordanna ǃgâu tsî Helams tawa ge sī; tsî Siriaǁîn ge toroǂnubise ge sī mâ Davib ǃoagu tsî ge ǃkhamū bi.

¹⁸Xawe Siriaǁîn ge Israeli di ais aiǃâ ge ǁhâ, tsî Davib ge Siriaǁîn xa hûkaidisi kunide ge hîkākā, tsî hakadisiǀoadisi ǃgapi-aoga; tsîb ge Sobaxi, ǁîn di toroǂamkhoeb ona ge ǂnau, ǁnāpab ge ǁōs kōse.

¹⁹Tsî ǁnā gao-aogu, Hadad-Eseri di ǃgā ge igu hoagu ge Israeli di ais aiǃâ gu ǂnauhe hâsa mûo, o gu ge Israeli ǀkha ǂkhîba ge dī tsî ǁîba gere ǃoaba. On ge Siriaǁîna ǃaruǀî Amonni ôana huisa ge ǃao.