Read Khoekhoegowab 2 Samueli 11 Bible Online

2 Samueli 11 - Khoekhoegowab bible

2 Samueli 11

¹Tsî i ge, kurib ra toa ǃnubai, gao-aogu torob ǃoa ra ǃgûǂoa ǁaeb ai ge ī, Davib ge Joab tsî ǃgāgu âba ǁîb ǀkha sî ǃkhaisa, Amonni ôana gu nî hîǀhuru tsî Rabasa gu nî xāǂgāse; xawe Davib ge Jerusalems tawa ge hâ.

²Tsî i ge ǃui-amǁaeb ai ge ī, Davib ǁgoeǃkhais âba xu khâi tsî gao-aob ommi di ǂamais aib ra ǃgûma hîa ǁnāpa xu taras hîa ra khōsensa mû ǃkhaisa; tsî nē taras ge kaise îsa īsib â-i tara ge i.

³Ob ge Daviba sî tsî ge dîǃā nē taras xa; on ge ge mî: Batseba tamasa, Eliammi ôas, Uriab, Hetiǁîb di tarasa?

⁴ǁGoasib ge Daviba sîsabega sî tsî ǁîsa ge ūhā kai. Tsî ǁîb tawas ge hāǂgâxa, ob ge ǁîs ǀkha ge ǁgoe; tsî ǃanuoǃnâsib âsa xus ge ǃanuǃanuseno, os ge oms âs ǃoa ge ǁaru.

⁵Tsî taras ge ge ǀgamǀkhā; os ge sî tsî Daviba ǂanǂan tsî: Tita ge go ǀgamǀkhā, ti ge mî.

⁶ǁGoasib ge Daviba Joab ǃoa sî tsî: Uriab, Hetiǁîba sî tita ǁga! ti ge mî. Ob ge Joaba Uriaba Davib ǃoa ge sî.

⁷Tsî Uriab ge ǁîb tawa hāo, ob ge Daviba ǁîba Joab di ǃgâihâsib xa, tsî ǁaes di ǃgâihâsib xa, tsî torob di ǃgâihâsib xa ge dî.

⁸ǁNās khaoǃgâb ge Daviba Uriab ǃoa ge mî: ǁGôa sa ommi ǃoa îts sa ǂaira ǁā. Tsî Uriab ge gao-aob di omma xu ǂoa ǃnubain ge ǂûǃnôana ǀkhaexūse ge saoǃgon.

⁹Xawe Uriab ge gao-aob oms di dao-ams aiǃâ ge sī ǁgoe ǀhonkhoeb âb di ǃgāgu ǀkha; tsîb ge oms âb ǃoa ǁgôa tama ge i.

¹⁰On ge Daviba ǁîsa ǂhôa tsî ge mî: Uriab ge oms âb ǃoa ǁgôa tama hâ. ǁGoasib ge Daviba Uriab ǃoa ge mî: Daoba xu kha hā tamats hâ? Tarexats kha ǁnâi oms âts ǃoa ǁgôa tama hâ?

¹¹Ob ge Uriaba Davib ǁga ge mî: ǂGaes tsî Israeli tsî Judab tsîn ge tentomdi ǃnâ hâ; tsî ti ǀhonkhoeb Joab tsî ti ǀhonkhoets di ǃgāgu ge ǂgāb ai ǁgoe, o ta kha tita ti oms ǃnâ ǂgâ tsî ǂû tsî ā tsî nî ǁgoe, ti taras tawa? Sats tsî sa ǀoms a ûitsama ǃkhais ao ta ge nē ǃkhaisa dī tide.

¹²ǃNubaib ge Daviba Uriab ǃoa ge mî: Nētsē nēpa hâ, o ta ge ǁari nî ǃgû kai tsi. Nētib ge Uriaba ǁnātsēs tsî sao ra tsēsa Jerusalems ǃnâ ge hâ.

¹³Tsî Davib ge ǁîba ge ǁkhau tsîb ge ǁîb aiǃâ ǂû tsî ge ā, tsîb ge ǁîba ge ǀhoroǀhoro. Tsîb ge ǁnā ǃuia ge ǂoa, ǁgoeǃkhais âb aib nî ǁgoega ǀhonkhoeb âb di ǃgāgu ǀkha, xaweb ge oms âb ǃoa ǁaru tama ge i.

¹⁴Tsî i ge ǁgoaga ge ī, Davib ge ǂkhani-e Joab ǃoa xoa tsî Uriab ǀkha ǁî-e sî ǃkhaisa.

¹⁵Tsîb ge ǁnā ǂkhanis ǃnâ xoa tsî ge mî: Uriaba ǃgom ǃkhamgus ǃnâ aimâi îts ǁîb khaoǃgâba xu oa, îb ǂnauhe îb ǁō.

¹⁶Tsî i ge ge ī, Joab ge ǃāsa ǃgaoǃgâo, ob ge Uriaba ǁnā ǃkhais, ǁîs ai gu ǃkham ǁkhā khoega hâsab a ǂans ai ge mâi.

¹⁷Tsî ǃās di khoegu ge ǂoaxa tsî Joab ǀkha ǃkhamo, o gu ge ǀnîgu ǁaes digu Davib ǃgāgu diga ge ǁnā, tsî Uriab, Hetiǁîb on ge ge ǁō.

¹⁸ǃNubaib ge Joaba sî tsî nē ǃkhamgus di ǃnaeǃkhais hoasa Daviba ge ǂanǂan.

¹⁹Tsîb ge sîsabeba mîmā tsî ge mî: Nē ǃkhamgus di ǃnaeǃkhais hoasats ga gao-aob ǃoa ǃhoatoao,

²⁰tsî i ka io gao-aob di ǁaib ga khâi, tsîb ga sa ǃoa mîo: Tarexa go kha ǃāsa nētikōse go ǀgū, ǃkhamū si go nîga? ǂAn tama go ge hâ i, ǂnubiǂgoaba xu gu nî ǁkhâu ǃkhaisa?

²¹Tari-e Abimelexi, Jerubeseti ôaba ge ǃgam? Tara tamasa ǁkhamiǀuis di ǃâsa ǂnubiǂgoaba xu ǁîb ai ge aoǁnâsa, Tebes tawab ge ǁōse? Tare xū-i ǃaroma go ǂnubiǂgoab kōse go ǀgū? Ots ge satsa nî mî: Sa ǃgāb Uriab Hetiǁîb on ge go ǁō.

²²Ob ge sîsabeba ǃgû tsî Daviba sī ge ǂanǂan, Joab ǁîn ǃaroma go sî bin hoana.

²³Tsî sîsabeb ge Davib ǃoa ge mî: ǁNā khoegu ge sige ǀgaidā tsî sige ǃoa ge ǂoaxa ǃgarob ai, tsî sige ge ǁîga ǁāb di ams kōse ǃgûǃoao,

²⁴o gu ge ǁkhâu-aoga ǂnubiǂgoaba xu sa ǃgāge ai ge ǁkhâu, ǀnîgu gao-aots ǃgāge digu ge ǁōs kōse, tsî sa ǃgāb Uriab, Hetiǁîb ge ǁkhāti ge ǁō.

²⁵ǃNubaib ge Daviba sîsabeb ǃoa ge mî: Nētits ge Joab ǃoa nî mî: As nē ǃkhaisa sa mûǁae tā tsūse i, gôab ra nē khoe-i kas, nau khoe-i kas hoasa hapu xuige; sa ǃkhamma ǀgaiǀgai ǃāsǀî, îts hîǀhuru si; îts ǁnāti ǀgaiǀgai bi.

²⁶Tsî Uriab di taras ge ǁnâuo, ǁîs di aob Uriab ǁō hâ ǃkhaisa, os ge ge ǃoaba ǁîs di ǀhonkhoeba.

²⁷Tsî ǃoas ge toao, ob ge Daviba sî tsî ǁîb di ommi ǃnâ ge ūǂgā si; tsîs ge ǁîb di tara kai tsî ǀgôaba ge ǁoraba bi. Xawes ge nē ǃkhais, Davib ge dīsa ǃKhūb mûǁae ǂkhaba ge i.