Read Khoekhoegowab 2 Samueli 13 Bible Online

2 Samueli 13 - Khoekhoegowab bible

2 Samueli 13

¹Tsî i ge ǁnās khaoǃgâ ge ī, Absalommi, Davib ôab ge îsa ǃgâsas, Tamar ti ǀon hâsa ūhâ i ǃkhaisa, ob ge Amnonni, Davib ôaba ǁîsa ge ǁâ.

²Tsî Amnonni ge ǀaesenni nîs kōse ge ǂōǂōhe ǁîb di ǃgâsas Tamars ǃaroma, ǂkhamkhoes a xui-ao; Amnonni mûǁae i ge ge ǃgom i, ǁîsa xū-e dī-ūsa.

³Tsî Amnonni ge ǀhōsab, Jonadab ti ǀon hâb, Simeab, Davib ǃgâsab di ôaba, ge ūhâ i; tsî Jonadab ge ge ama gā-ai khoe i.

⁴Tsî ǁîb ge ǁîb ǃoa ge mî: Tarexats kha nētikōse ra ǁkhoao ǁgoakorobe, sats gao-aob ôatsa? ǁÎsa kha ǂanǂan tets tide? Ob ge Amnonna ǁîb ǃoa ge mî: Tita ge Tamars, ti ǃgâsab Absalommi di ǃgâsasa ǁâ hâ.

⁵Ob ge Jonadaba ǁîb ǃoa ge mî: Kharob âts ai ǁgoe îts ǀaeǀaesen, tsî saob ga hā kō tsio, ots ge ǁîb ǃoa nî mî: As Tamars, ti ǃgâsasa hā re, îs pereb xa ǂû kai te, îs ǂûna ti mûra aiǃâ ǂhomi, î ta ǁîsa mû tsî ǃommi âsa xu ǂû re.

⁶Ob ge Amonna ǁgoe tsî ge ǀaeǀaesen. Tsî gao-aob ge hā kō bio, ob ge Amnonna gao-aob ǃoa ge mî: As ti ǃgâsas Tamarsa hā re, îs ǀgam amperedara ti mûra aiǃâ ǂhomi, î ta ǁîs di ǃomma xu ǂû re.

⁷ǃNubaib ge Daviba Tamars ǃoa oms ǃnâ sî tsî ge mî: ǃGû re sa ǃgâsab Amnonni oms ǃoa, îs ǂû-e ǂhomiba bi re.

⁸Os ge Tamarsa ǁîs ǃgâsab Amnonni oms ǃoa ge ǃgû; ǁîb ge kharob ai ge ǁgoe i, tsîs ge tsampereb xa ū tsî ǁîba ǀhomam tsî amperena ǁîb di mûra aiǃâ ge ǂhomi tsî ge ǁgan.

⁹Tsîs ge amǃnâ ǃoresa ū tsî ais âb aiǃâ ǁîna ge tsoroǂui, xaweb ge ǂûsa ge ǂkhā. Tsî Amnonni ge ge mî: Mâ-i hoa-e a-i tita xu ǂoa! O i ge mâ-i hoa-e ǁîba xu ge ǂoa.

¹⁰ǁGoasib ge Amnonna Tamars ǃoa ge mî: ǂÛna ǃnā-oms ǃnâ ūhā, î ta sa ǃomma xu ǂû re. Os ge Tamarsa amperen hîas goro dīna ū tsî ǁîna ǁîs di ǃgâsab Amnonna ǃnā-oms ǃnâ ge ūsība.

¹¹Tsî ǁînas ge ǀgūse ǁîba ūsībao, ǂûb nîga, ob ge ǁîsa ǃkhō tsî ǁîs ǃoa: Hā îs tita tawa ǁgoe re, ti ǃgâ! ti ge mî.

¹²Xawes ge ǁîb ǃoa ge mî: Hî-î, ti ǃgâ, tā ǀgaiǁgūǀkhā te re, ǁnātin ge khoena dī tama hâ Israeli ǃnâ xuige. Tā dī re nē gâresiba!

¹³O tita mâǀî ta ga ti taosiba ūsī? Tsî sats, ā, sats ge gâre khoegu di ǀguise ga i Israeli ǃnâ; îts ǁnâi gao-aob ǀkha ǃhoa, ǁîb ge tita satsa ǂkhā tide xuige.

¹⁴Xaweb ge ǁîsa ǃgâ ǂgao tama ge i, tsî ǁîs xab a ǀgaisa amagab ge ǁîsa ǀgaiǁgūǀkhā tsî ge ǁgoeǀkhā si.

¹⁵ǁNās khaoǃgâb ge Amnonna ǁîsa kaise kai ǁkhanni ǀkha ge ǁkhan; ǁnā ǁkhanni, ǁîb ǀkhab ǁîsa ge ǁkhanni ge ǁnā ǁâb, ǁîb ǀkhab ge ǁîsa ǁâ hâ ib ǃgâ-ai ge kai i; ob ge Amnonna ǁîs ǃoa ge mî: Khâi îs ǃgûbē!

¹⁶ǃNubais ge ǁîb ǃoa ge mî: Sats nî ǃhaeǂui te ǃkhai-i xare-i ge a ǀkhai; nē ǂkhabab ge naub, titats go dī-ūb ǃgâ-ai a kai. Xaweb ge ǁîsa ǃgâ ǂgao tama ge i.

¹⁷Ob ge ǃgāb âb, ǁîba ra ǃoababa ǂgai tsî ge mî: Nēsa tita xu ǃhaeǂui ǃaugab ǃoa îts dao-amsa ǁîs khaoǃgâ ǂganamǀgaiǀgai.

¹⁸Tsîs ge ǁîsa anxa saraba ge ana hâ i; nētimî di ge gao-aob ôadi, hîa ǂkhamkhoede, ǂamsaragu ǀkha gere anahe xui-ao; ob ge ǃgāb âba ǁîsa ǃaugaba ǃoa ūǂui tsî dao-amsa ǁîs khaoǃgâ ge ǂganamǀgaiǀgai.

¹⁹ǃNubais ge Tamarsa tsaoba ge tsoro ǁîs di danas ai, tsîs ge anxa sarab hîas anasen hâba ge ǀkhau; tsîs ge ǃommi âsa ǁîs di danas ai ǁgui tsî ǃgûs gau hîa ge ǃau.

²⁰Ob ge ǁîs di ǃgâsab Absalomma ǁîs ǃoa ge mî: Amnonni sa ǃgâsaba sa ǀkhab go hâ i? Nēsi, ti ǃgâ, ǃnō, ǃnō re, sa ǃgâsab komo; nē ǃkhaisa tā ǂgaob ǃnâ ūhâ! Nētis ge Tamarsa ǀguri ge hâ i ǁîs di ǃgâsab Absalommi di oms ǃnâ.

²¹Tsî gao-aob Davib ge nēn hoana ǁnâuo, ob ge kaise ge ǁaixa.

²²Tsî Absalommi ge Amnonni ǀkha ǃhoa tama ge i, ǃgâi-i xas kas, tsū-i xas kas hoasa; tsî Absalommi ge Amnonna ge ǁkhan, ǁîb di ǃgâsas Tamarsab ge ǀgaiǁgūkhā ǃkhais ǃaroma.

²³Tsî i ge ǀgam ǀoasa kurikha khaoǃgâ ge i, Absalommi ge gūǂkhom-aoga ūhâ ǃkhaisa Baal-Hasors, Efraims ǀgūse ǁgoes tawa; ob ge Absalomma gao-aob ôagu hoaga ge ǁkhau.

²⁴Tsî Absalommi ge gao-aob tawa hā tsî ge mî: Kō, sa ǃgāta ge gūǂkhom-aoga ūhâ; xuige a go gao-aots tsî ǃgāgu âtsa sa ǃgāta ǀkha ǃgû.

²⁵Xawe gao-aob ge Absalommi ǃoa ge mî: Hî-î ti ôatse, tā ge hoatsama ǃgû, î ge tā ǂguidā tsi. Ob ge ǁîba ge ǁgūhâhâ, xaweb ge ǃgû ǂgao tama ge i, tsîb ge ǁîba ge ǀkhae.

²⁶ǃNubaib ge Absalomma ge mî: Tsî ti i ga ī tama io, îts ǁnâi ti ǃgâsab Amnonna sida ǀkha ǃgû kai. Ob ge gao-aoba ǁîb ǃoa ge mî: Tare xū-i ǃaromab kha ǁîba sa ǀkha nî ǃgû?

²⁷Xawe Absalommi ge ǁgūǀkhā bio, ob ge Amnonni tsî gao-aob ôagu hoaga ǁîb ǀkha ge ǃgû kai.

²⁸Tsî Absalommi ge ǃgāgu âba mîmā tsî ge mî: ǃGaoǃgâ, Amnonni di ǂgaob ga ǂauxûib xa ǃgâiaǂgao-o tsî tita ga sago ǃoa: Amnonna ǂnau! ti mîo, o go ge nî ǃgam bi. Tā ǃao! Tita go mîmā go ǃkhaisa xu tamasa? ǀGaisa î go ǃgari!

²⁹O gu ge Absalommi di ǃgāga Amnonna ge dī-ū, Absalommi ge mî xase. ǁGoasi gu ge gao-aob ôagu hoaga khâi tsî ge ǃgapi, mâb hoaba ǁîb di eselhā-i ai tsî ge ǃhū.

³⁰Tsî i ge daob ai gu hâ hîa ge ī, Davib ge gomma ǁnâu ǃkhaisa, tsîn ge: Absalommi ge gao-aob di ôagu hoaga go ǃgam, ǀguib xareb âgu ge ǃgau tama hâ, ti ge mî.

³¹ǃNubaib ge gao-aoba khâi tsî saran âba ǀkhau tsî ǃhūb ai ge ǁgoe; ǁnās ǁkhās xase gu ge ǁîb di ǃgāgu hoaga ǀkhauhesa saran ǀkha ge mâ i.

³²Xawe Jonadab, Simeab, Davib ǃgâsab di ôab ge ǃeream tsî ge mî: Tāts ti ǀhonkhoetsa mî, ǂkhamkhoegu hoagu, gao-aots ôagu ǁō hâ ǃkhaisa; Amnonni ǀguib kom ǁō hâo. Absalommi ge ǁî ǃkhaisa ǂâibasen, ǁîb di ǃgâsas Tamarsab ge ǀgaiǁgūkhā tsēsa xu xui-ao.

³³Îts ǁnâi ti ǀhonkhoe gao-aotsa nē ǃkhaisa tā ǂgaob ǃnâ ūhâ, gao-aots ôagu hoagu ǁō hâ, ti ǂâi tsî; Amnonni ǀguib go ǁō xuige.

³⁴Tsî Absalommi ge ge ǃhū; tsî ǃgāb hîa ra ǃûib ge ǃgapakhâi tsî kō tsî ge mû, kai ǁaes ge ǁîb khaoǃgâ gau daoba xu ge hā ǃhommi xōǀkhāba-ū ǃkhaisa.

³⁵Ob ge Jonadaba gao-aob ǃoa ge mî: Mû re, gao-aob di ôagu ge ǃgoaxa; sa ǃgāta di mîs ǃoa, ǁnāti i ge go ī.

³⁶Tsî i ge ge ī, ǃhoatoab ge ǃnubai, mû, o gu ge gao-aob ôaga hā tsî dommi âga ūkhâi tsî ge ā; tsî gao-aob tsî ǁîb ǃgāgu hoagu on ge ama kai ā-i ǀkha ge ā.

³⁷Tsî Absalommi ge ǃhū tsî ge ǃgû Talmaib, Amihudi ôab, Gesurs di gao-aob ǃoa. Tsî Davib ge ge ǃoa hâ i ǁîb di ôab ǂama ǁnā tsēdi hoade.

³⁸Nētib ge Absalomma ǃhū tsî Gesurs ǃoa ge ǃgû; tsîb ge ǁnāpa ǃnona kurigu kōse ge hâ.

³⁹ǃNubais ge Davib, gao-aob di ǀomsa kaise ge ǁkhore, Absalommi ǃoab nî ǂoasa; Amnonni ǁō hâ ǃkhais xab ge ǁkhaeǂgaosen hâ i xui-ao.