Read Khoekhoegowab 2 Samueli 15 Bible Online

2 Samueli 15 - Khoekhoegowab bible

2 Samueli 15

¹Tsî i ge ǁnās khaoǃgâ ge ī, Absalommi ge kunidi tsî hān tsîna ǁāǁākaibasen ǃkhaisa, tsî korodisi khoegu, ais âb aiǃâ ra ǃkhoega.

²Tsî Absalommi ge ǁkhāti ǃnauǁgoaga khâi tsî daos ǁāb dis xōǀkhā sī ge mâ. Tsî i ge ge ī, Absalommi ge mâ khoeb, ǂnoagu-ai-e ūhâb, gao-aob ǃoa ǂhanuǂhanuhe nîse ra hāb hoaba ǁîb ǃoa ǂgai tsî: Mâ ǃās dits a? ti gere mî ǃkhaisa. Tsî mîb gereo: Sa ǃgāta ge Israeli ǃhaodi di ǀguis dita,

³ob ge Absalomma ǁîb ǃoa ge mî: Kō, sa ǃkhaidi ge a ǃgâi tsî a ǂhanu; xawets ge ǁnâuǃgâ-ao-e ūhâ tama hâ gao-aob tawa.

⁴ǃAruǀîb ge Absalomma ge mî: Ae, în ga tita ǂhanuǂhanu-aose mâi ǃhūb ǃnâ, îb ga mâ khoeb, ǂnoagu-ai-i kas, ǂhanuǃkhai-i kasa ūhâb hoaba ti tawa hā, o ta ge ga ǁîba ǂhanuǂhanuba.

⁵Tsî i ge ǁkhāti ge ī, khoe-i gere ǁîba ǀgūo, ǁîb aiǃâ nî ǁnāǁgoese, ob ge ǃommi âba ǀhōǂui tsî ǁî-e ǃkhō tsî gere ǁoa.

⁶Tsî nē dommi aib ge Absalomma Israelǁîn, gao-aob ǁga ǂhanuǂhanuhe nîse ra hān hoana gere sîsenū. Nētib ge Absalomma Israeli aogu di ǂgaoga ge ǃnaribasen.

⁷Tsî i ge hakadisi kurigu di ǀunis ai ge ī, ob ge Absalomma gao-aob ǃoa ge mî: A ta ǃgû re, î ta ti mîmâis, ǃKhūba ta ge mîmâibasa sī matare Hebrons tawa.

⁸Sa ǃgāta ge mîmâi-e ge mîmâi xui-ao, Gesurs Siriab dis tawa ta ǁan hâ hîa, mî rase: ǃKhūb ga tita amase ǁkhawa Jerusalems tawa ūsīo, o ta ge ǃKhūba nî ǃoaba.

⁹Ob ge gao-aoba ǁîb ǃoa: ǃGû ǂkhîb ǃnâ, ti ge mî. Nētib ge khâi tsî Hebrons ǃoa ge ǃgû.

¹⁰Tsî Absalommi ge ǃkhē-aoga ge sîǂui Israeli di ǃhaodi hoadi ǃnâ, mîba nîse: Xâiǁnâs di ǀōba du ga ǁnâuo, o du ge: Absalommi ge go gao-ao kai Hebrons tawa, ti nî mî.

¹¹Tsî gu ge Absalommi ǀkha ǀgamkaidisi khoega ge ǃgû, ǁkhauhe hâga, xawe gu ge ǀhapiosib âgu ǃnâ ge ǃgû, xū-i xare-i xa ǂan tamase.

¹²Tsî Absalommi ge ǁkhāti Ahitofeli, Giloǁîb, Davib di ǀapemā-aoba ge sî, ǁîb di ǃās Gilosa xub nî ūhāhese ǁguibadeb ra ǁguiba hîa. Tsî ǃgaeǁaes ge ge ǀgai, ǁaes ge Absalommi tawa ǃaruǀîǀgui hā tsî ǂgui xui-ao.

¹³ǃNubai i ge ǂhôa-ao-e Davib tawa hā tsî ge mî: Mâb hoab Israeli dib di ǂgaob ra Absalomma sao.

¹⁴Ob ge Daviba ǁîb di ǃgāgu, ǁîb ǀkha Jerusalems tawa hâgu hoagu ǃoa ge mî: Khâi î ge ǃhū, ûi-i xare-i Absalommi di ais aiǃâ hâba ge tide xuige; ǃhae, î ge ǃgûbē, îb tā ǀnîsi ǃnoesase saoǁae ge, îb tā tsūdī ge, îb tā nē ǃāsa ǂnau gôab di ǀāb ǀkha.

¹⁵ǃNubai gu ge ǃgāgu gao-aob diga gao-aob ǃoa ge mî: Ti ǀhonkhoe gao-aots ra ǃkhōǂuibasen khami, mû, ǁnās ǁkhās khami ge sa ǃgāge nî dī.

¹⁶Ob ge gao-aoba ommi âb hoab ǀkha ǀnūb ǀkha ge ǃgûǂoa; tsî gao-aob ge disi ǀgamitaradi ǀguide ge hâ kai, omma di nî ǃûiga.

¹⁷Tsî gao-aob ge ǁaes hoas ǀkha ǀnūb ǀkha ǂoao, on ge ǃnū ǃās tawa sī ge mâ.

¹⁸Tsî ǁîb ǃgāgu hoagu ge ǁîb xōǀkhā ge ǃgû tsî Keretǁîgu, Peletǁîgu hoagu tsî Gatǁîgu on; ǃnanikaidisi khoegu, Gatsa xu ge ǀnūǃgûhāgu ge gao-aob di ais aiǃâ ge ǃgû.

¹⁹Ob ge gao-aoba Itaib, Gatǁîb ǃoa ge mî: Tarexats kha sats ona sida ǀkha nî ǃgû? Oa, îts gao-aob ǀkha hâ, ǃhaokhoets kom, tsîts kom ǁkhawa sa ǃās ǃoa nî ǃgûo.

²⁰ǁArits ge go hā, o ta kha nētsē sida ǀkha nî ǁhapuma kai tsi, ǃgûts nîse? Tita ge ǃgû ǁkhā ta nî ǀkhā-i hoa-i ǃoa nî ǃgû; oa îts sa ǃgâsaga ū-oa; ǀkhommi tsî ǂgomǂgomsasib tsîkha a kha hâǀkhā tsi.

²¹Xawe Itaib ge gao-aoba ǃeream tsî ge mî: ǃKhūb a ûitsama ǃkhais ao, ti ǀhonkhoe gao-aots nî ǁōb ǁgas kas, ûib ǁgas kas hoasats ga satsa hâ ǃkhai-i hoa-i tawa ta ge sa ǃgāta ǂanǂansase ǁkhāti nîra hâ.

²²ǃNubaib ge Daviba Itaib ǃoa ge mî: Hā îts ǁnâi ǃgâu. Nētib ge Itaib Gatǁîba ge ǃgâu tsî ǁîb di aogu hoagu tsî ǁîb di ôan, ǁîb ǀkha hân hoana.

²³Tsî ǃhūb hoab ge ǃgari dommi ǀkha ge ā, ǁaes hoas ra ǃgâu hîa; tsî gao-aob on ge ǃārob Kidronna ge ǃgâu, tsî ǁaes hoas ge ge ǃgâu ǂhanuse ǃgaroǃhūb ǃoa gau daob ǀkha.

²⁴Tsî mû, Sadoki on ge ǁnāpa ge hâ i, tsî Leviǁîga ǁîb ǀkha, ǃgaeǀhaos Elob dis di ǂgaesa ra tanise, tsî gu ge Elob di ǂgaesa ge mâi; tsî Abjatari ge ge ǃapahā, ǁaes hoas ge ǃāsa xu ǃgâutoas kōse.

²⁵ǁGoasib ge gao-aoba Sadoki ǃoa ge mî: Elob di ǂgaesa ǁkhawa ǃās ǃnâ sī ūǂgā: ǀKhomma ta ga ǃKhūb mûǁae hō-o, ob ge ǁîba nîra ū-oa te, tsî ǁîsa ǁkhawa nîra mû kai te tsî ǁanǃkhais âb ona.

²⁶Tsî: Tita ge sats xa ǃgâibahe tama hâ, tib ga ǁîba mîo, mû, nē ta a, ab ǁîba dī-ū te, ǁîb mûǁae i a ǃgâi khami.

²⁷ǃAruǀîb ge gao-aoba prister Sadoki ǃoa ge mî: Mû-ao tamatsa? Oa re ǂkhîb ǀkha ǃās ǃnâ; î kha ǁkhāti sakho ôakha Ahimaab, sa ôab, tsî Jonatanni, Abjatari ôab tsîkha sa ǀkha ǃgû.

²⁸Mû, tita ge ǂgādi ǃgaroǃhūb didi ai nî ǀhawe, mî-i nî sakho xu hās kōse ǂanǂanhe ta nîse.

²⁹Nēti kha ge Sadoki tsî Abjatari tsîkha ǂgaes Elob disa ǁkhawa Jerusalems tawa ge ūsī; tsî kha ge ǁnāpa ge hâ.

³⁰Tsî Davib ge ǂkhâb ǀkherahaidi diba-ū ge ǃgûǃapa, ǃgûgause ra āse, tsî danas âba ǃgū-aihe hâse; tsîb ge ǀōǂai ge ǃgû; tsî ǁaes hoas, ǁîb ǀkha hâs on ge mâb hoab âga danas âba ǃgū-ai ge hâ i, tsî gu ge ge ǃgû, ǃgûgauǃâ ra āse.

³¹Ob ge Daviba ge ǂanǂanhe: Ahitofeli ge Absalommi ǀkha ǃgaeǁaesen hân ǁaegu hâ, ti. Ob ge Daviba ge mî: O, ǃKhūtse, Ahitofeli di ǀapeǀapesa gâre xū kai re!

³²Tsî i ge ge ī, Davib ge ǀgapib ais kōse sīo, ob ge ǁnāpa Eloba ge ǀgoreǀî; mû ob ge Husaib, Arkiǁîba ge ǃoa bi, saran âba ǀkhauhe hâb tsî ǃhūba danas âb ai ūhâba.

³³Ob ge Daviba ǁîb ǃoa ge mî: Tita ǀkhats ga aiǃâb ǃoa ǃgûo, ots ge nî ǀhapeǀhape te,

³⁴xawe ǃās ǃoa oa tsîts ga Absalommi ǃoa mîo: Sa ǃgāta ge gao-aots dise nî ī; sa îb di ǃgāta ge aibe ge i, xawe ta ge nēsi sa ǃgāse nî ī, nētits ge ga Ahitofeli ǀapeǀapesa ǁauǁauba te.

³⁵Tsî sa ǀkha ǁnāpa hâ tama kha hâ pristerkha Sadoki tsî Abjatari tsîkha? O i ge nîra ī, mâ xū-i hoa-i, gao-aob di omma xuts ga ǁnâu-ets pristerkha Sadoki tsî Abjatari tsîkha nî ǂanǂan ǃkhaisa.

³⁶Mû, ǁîkha di ǀgam ǀgôakha ge ǁnāpa hâ, Ahimaab, Sadoki ôab, tsî Jonatanni, Abjatari ôab tsîkha; î go ǁnâi ǁîkha di ǃomma xu tita ǁga sî mâ xū-i, ǁnâu go ka-i hoa-e.

³⁷Nētib ge Husaib, Davib di ǀhōsaba, ǃās ǃnâ ge sī; tsî Absalommi ge Jerusalems tawa ge sī.