Read Khoekhoegowab 2 Samueli 16 Bible Online

2 Samueli 16 - Khoekhoegowab bible

2 Samueli 16

¹Tsî Davib ge ǀgūse ǀgapiba xu aiǃâb ǃoa ǃgûo, mû, ob ge Sibab, Mefiboseti ǃgāba ǁîba ge ǃoa ǀnî ǃgaeǃgâhe hâ eseln ǀkha tsî ǁîn ai ǀgamkaidisi peregu, ǀguikaidisi ǂâun di peren tsî ǀguikaidisi ǁkhunaǂûn di narudi tsî ǁhōs ǂauxûib xa ǀoa hâs ǀkha.

²Ob ge gao-aoba Sibab ǃoa ge mî: Tarexūna nēna? Ob ge Sibaba ge mî: Eseln ge gao-aob ommi dina ǃgapi-aihe nîna, tsî pereb tsî ǁkhunaǂûn ge hâ, ǂkham khoegu xa nî ǂûhese; tsî ǂauxûib ge hâ ǃgaroǃhūb ǃnâ tsau hân xa nî āhese.

³ǃNubaib ge gao-aoba ge mî: ǀHonkhoeb âts di ôaba mapa hâ? Ob ge Sibaba gao-aob ǃoa ge mî: Mû, ǁîb ge Jerusalems tawa hâ: Nētsēb ge Israeli di omma ti îb di gaosisa ǁkhawa nî mā te, tib ra mî xui-ao.

⁴Ob ge gao-aoba Sibab ǃoa ge mî: Mû, Mefiboseti ūhân hoan ge nî sa. Ob ge Sibaba ge mî: Tita ge ra ǃhonǁgoa, î ta sa mûǁae ǀkhomma hō, ti ǀhonkhoe gao-aotse.

⁵Tsî gao-aob Davib ge Bahurims kōse sīo, mû, ob ge ǁnāpa xu khoeba ge ǀkhī Sauli ommi ǃhaos dib, Simi ti ǀon hâb, Gerab ôaba; ǁîb ge ǃgûgause gere ǀâxare.

⁶Tsîb ge Davib tsî gao-aob Davib di ǃgāgu hoaga ǀuidi ǀkha gere ǂnoa, ǁaes hoas tsî ǁē-aogu hoagu ge amǀkhāb âb tsî ǁareǀkhāb âb ai hâ i xawe,

⁷tsî nētib ge Simiba ǀâxares âb ǃnâ ge mî: ǃGûǂoa, ǃgûǂoa, sats ǀaob di khoets tsî Beliali aotsa!

⁸ǃKhūb ge sa ai go oa kai Sauli amǃnâs âb aits ge gao-ao kaib di ǀaob hoaba; tsî nēsib ge ǁîba gaosisa Absalommi, sa ôab di ǃomǁae go mā; tsî mû, sats ge nēsi sa tsūǃgâb ǃnâ hâ, ǀaob di khoets a amaga.

⁹ǃNubaib ge Abisaib, Serujab ôaba gao-aob ǃoa ge mî: Tarexab kha nē ǁō hâ ariba ti ǀhonkhoe gao-aotsa nî ǀâxare? A ta ǃgâu, î ta danas âba ūǁnâ.

¹⁰Xawe gao-aob ge ge mî: Tare-e ta sago ǀkha ǁae hâ, Serujab ôago? Ab ǀâxare; ǃKhūb ge ǁnāb, ǁîba: Daviba ǀâxare! ti ge mîǀîba; tari-e: Tarexats kha ǁnâi ǁnāti ra dī? ti nî mî.

¹¹Tsî Davib ge ǃaruǀî Abisaib tsî ǁîb di ǃgāgu hoagu ǃoa ge mî: Kō, ti ôab, ti sorosa xu ge ǀkhīb ge ti ǀomsa ra ôa; matikō ǃnāsaseb kha ǁnās ǃgâ-ai nē Benjaminni ôaba ǁnāti nî dī? Ab dī, ab ǀâxare, ǃKhūb ge ǁîsa go mîmā bi xuige.

¹²ǀNîsib ge ǃKhūba ti ǀkhomǀkhomsasiba nî kōǀî, ǃKhūb ge ǁîb di ǀâxares nētsēs dis di amǃnâs ai ǃgâiba nîra mādawa-am te.

¹³Nētib ge Daviba ǁîb khoegu ǀkha ge ǃgû daob ai; tsî Simib ge aiǃâb ǃoa ge ǃgû ǃhommi di xōǀkhāba-ū ǁîb ǃoa-ai tsî ge ǀâxare, tsîb ge ǁîba gere ǀuiǂnoa tsî tsarab ǀkha ge tsao bi.

¹⁴Tsî gao-aob ge ǁaes, ǁîb ǀkha hâs hoas ǀkha tsau hâse Jordanǃāb tawa hā tsî ǁnāpa ge khoakhoasen.

¹⁵Tsî Absalommi tsî ǁaes hoas Israeli di aogu dis ge Jerusalems tawa ge sī Ahitofeli ǀkha.

¹⁶Tsî i ge ge ī, Husaib, Arkiǁîb, Davib di ǀhōsab ge Absalommi tawa sīo, ob ge Husaiba Absalommi ǃoa ge mî: Ab gao-aoba ûi re, ab gao-aoba ûi re!

¹⁷Ob ge Absalomma Husaib ǃoa ge mî: Sa ǃgâidīsa nēsa, sa ǀhōsabats ra dī-ūsa? Tarexats kha sa ǀhōsab ǀkha ǃgû tama go i?

¹⁸Ob ge Husaiba Absalommi ǃoa ge mî: Hî-î, ǁnāb, ǃKhūb tsî nē ǁaes hoas tsî Israeli aogu hoagu nî ǃkhōǂuibasen hâb, ǁîb di kai ta ge nî, tsî ǁîb ǀkha ta ge nî hâ.

¹⁹Tsî nau ǃkhais: Tari-e ta ga ǃoaba? ǁÎb di ôa tamaba, ais âb aiǃâ ta ga ǃoababa? Sa îb di ais aiǃâ ta gere ǃoaba khami ta ge ǁkhāti sa ais aiǃâ nî ǃoaba.

²⁰ǃNubaib ge Absalomma Ahitofeli ǃoa ge mî: ǀApe go re sago ǁaegu, tare-e ge nî dī ǃkhaisa.

²¹Ob ge Ahitofela Absalommi ǃoa ge mî: ǂGâ ǀgamitaradi sa îb didi, omsa nî sâuseb go ǃgorodi tawa, ob ge Israeli hoaba nî ǁnâu, sa îb tawats go ǀōkaisen ǃkhaisa, o gu ge ǃomgu, sa ǀkha hâgu hoagu diga nî ǀgaiǀgaihe.

²²Nētin ge Absalomma tentomsa ge ǃgâumâiba ǂamais ai; tsî Absalommi ge ǁgûb di ǀgamitaradi tawa ge sī ǂgâ Israeli hoab di mûdi aiǃâ.

²³Tsî ǁnā tsēdi ǃnâs ge Ahitofeli di ǀapes, hîab ge ǀapemāsa, Elob mîsats ra dîs ǁkhās xase ge ge ī i, nētis ge ī i, Davib tawas kas, Absalommi tawas kas hoasa.