Read Khoekhoegowab 2 Samueli 17 Bible Online

2 Samueli 17 - Khoekhoegowab bible

2 Samueli 17

¹ǃAruǀîb ge Ahitofela Absalommi ǃoa ge mî: A ta disiǀgamǀaǀoadisi khoega ǁhûiǂuibasen, î ta khâi tsî Daviba nē tsuxub ǁkhāb ǃnâ sauruǃgon.

²O ta ge ǁîba nî sīǂam, tsaub hâ tsî ǃomkha âb ǃopo hâ hîa, o ta ge nî ǃhuriǃhuri bi, ǁaes, ǁîb ǀkha hâs hoas nî ǃhūs kōse; ǃnubai ta ge gao-aoba ǀguri nî ǂnau.

³O ta ge ǁaes hoasa sa ǃoa nî ǃhoba kai, os ge oas ǁnā aob, sats ra ôab disa hoatsama gu ra oa khami nî ī; os ge ǁaes hoasa nî ǂkhî.

⁴Tsî nē mîs ge Absalommi mûǁae ǃgâi ge i tsî Israeli aogu hoagu mûǁae.

⁵Ob ge Absalomma ge mî: Husaib, Arkiǁîb ona ǂgai, î ge ǁnâu, tare-eb ǁîb ona nî mîsa.

⁶Tsî Husaib ge Absalommi tawa sī ǂgâo, ob ge Absalomma ǁîb ǃoa ge mî: Nētib ge Ahitofela goro ǃhoa; ǁîb di mîsa dī ge nî? ǁKhāts kao, îts ǁnâi satsa ǃhoa.

⁷Ob ge Husaiba Absalommi ǃoa ge mî: ǁNā ǀapes, Ahitofeli go nē ǃnās ai mās ge ǃgâi tama hâ.

⁸Tsî Husaib ge ǃaruǀî ge mî: Sats ge sa îb tsî aogu âb tsîga a ǂan, ǁē-aogu a ǃkhaisa, tsî ǁaixa ǂâis â-igu a ǃkhaisa, bērs hîa ǃgaroǃhūb ai ǂkhamrona ūǀhanahe hâs ǁkhās xase; ǁnās xōǀkhāb ge sa îba a toro-ao, tsîb ge ǁaes ǀkha hâǁgoa tide.

⁹Kō, ǀnaib ge ǁhāgu di ǀguib ǃnâs kas, sâsa ǃkhaidi di ǀguis ǃnâs kas hoasa go gau. Tsî ī i kao, ǀnîgu âgu ǁîgu ǁaegu ga ǁnā ǃkhaisa, ob ge ǁîsa ga ǁnâub hoaba: ǂNau-i ge go ǂnauhe Absalomma ra sao ǁaes ǃnâ, ti nî mî.

¹⁰Ob ge ǁkhāti ǁnāb hîa ǃgari-aob, xamǂgaoba ūhâba nî tsuniǃari. Israeli hoab a ǂan xui-ao, sa îb a ǁē-ao ǃkhaisa tsî ǁnā aogu, ǁîb ǀkha hâgu a ǃgari-ao ǃkhaisa.

¹¹O ta ge tita ra ǀapeǀape, ǃnoesase ab Israeli hoaba ǀhaoǀhaohe Dansa xu Bersebas kōse, ǃhūb, hurib amǃgâ ǁgoeb a ǂgui khami; îts sats ǂûts ona ǃgû ǃkhammi ǁga.

¹²O ge ge ǁîb tawa nî sī ǁnā ǃkhaidi di ǀguis, ǁîs ǃnâb nî hâs tawa, o ge ge supuse ǁîba nî sīǂam, ǀaub ra ǃhūb ai ǁnā khami; ob ge ǀguib, ǁîb tsî ǁnā aogu, ǁîb ǀkha hâgu dib xareba ǃgau tide.

¹³Tsî ǃā-i ǃnâb ga ǂgâo, ob ge Israeli hoaba tsuriga ǁnā ǃās tawa nî ǁgui, tsî ge ge ǁîsa ǃārob kōse nî ǂgaeǁgui, ǀgui ǀuiro-i ǁnāpa hōhe ǁoa nî is kōse.

¹⁴ǃNubaib ge Absalommi tsî mâ khoeb Israeli dib hoaba ge mî: ǀApes Husaib, Arkiǁîb dis ge Ahitofeli di ǀapes xa a ǃgâi. ǃKhūb ge ǁnāti ge mîmā xui-ao, Ahitofeli di ǃgâi ǀapesab nî ǁauǁauga, ǃKhūb nî Absalommi ǂama ǂkhababa ūhāse.

¹⁵Tsî Husaib ge Sadoki tsî Abjatari tsîkha, pristerkha ǃoa ge mî: Nēti tsî nētib ge Ahitofela Absalommi tsî Israeli di kaiga go ǀapemā, xawe tita ge nēti tsî nēti go ǀapemā.

¹⁶Î kho ǁnâi ǃnoesase sî, î kho Daviba ǂhôa, mî raǃâ: Tā nē tsuxub ǃnâ hâǁgoa ǃgaroǃhūb di ǂgādi ai, tsî ǃhaese ǃgâu, îts gao-aotsa tā harahe tsî ǁaes, sa ǀkha hâs hoasa.

¹⁷Tsî Jonatanni tsî Ahimaab tsîkha ge ǀaus Rogels tawa ge mâ i; os ge ǃgāsa ǃgû tsî ǁîsa ǁîkha sī ge mîba; o kha ge ǃgû tsî gao-aob Daviba sī ge mîba; ǁîkha ge mûkaisen ǁoa ge i xui-ao, ǃās ǃnâ kha ge sī ǃkhaisa.

¹⁸Xawe ǀgôab ge ǁîkha mû tsî Absalomma sī ge mîba; o kha ge ǁî ǀgamkha ǃhaese ǃgû tsî ao-i di oms ǃnâ ge sī Bahurims tawa, ǁîb ge ai-oms âb ǃnâ tsau-e ge ūhâ i, tsî kha ge ǁî-i ǃnâ ge ǁgôa.

¹⁹Tsî taras ge ǃkhaiba ū tsî ge ǃgū tsaus di ams ai, tsîs ge ǃhoroba ǁîb ai ge tsoro. Nētis ge ǃkhaisa ǂansa tama ge i.

²⁰Tsî Absalommi di ǃgāgu ge taras tawa oms ǃnâ sīo, o gu ge ge mî: Mapa kha hâ Ahimaab tsî Jonatanni tsîkha? Os ge tarasa ǁîgu ǃoa ge mî: Nē ǃāroba-ū kha ge go ǃgû. Tsî ôa tsî gu ge ǁîkha hō tama io, o gu ge ǁkhawa Jerusalems ǃoa ge oa.

²¹Tsî i ge ge ī, ǁîgu ge bē ǃnubai kha ge tsausa xu ǂoaxa tsî ǃgû tsî gao-aob Daviba ǁîsa ge sī ǂhôa; tsî kha ge Davib ǃoa ge mî: Khâi î go ǃhaese ǁgamma ǃgâu, nētib ge Ahitofela sago go ǀapeǃgâ xuige.

²²ǃNubaib ge Daviba ge khâi tsî ǁaes, ǁîb ǀkha hâsa, tsî gu ge Jordanna ge ǃgâu. ǁGoaǂnobos di ǁaeb aib ge ǀguib xareba hâ tama ge i hîa Jordanna ǃgâu tama ge iba.

²³Tsî Ahitofeli ge mû, ǀapes âb ge ǁauǁauhe ǃkhaisa, ob ge esels âba ǃgaeǃgâ tsî khâi tsî ǁîb di oms ǃoa ge ǁaru ǃās âb ǃnâ, tsîb ge oms âba dī-unu tsî ge ǂgāmâisen. Nētib ge ǁō tsî ge ǁkhōhe ǁgûb di ǀhobas ǃnâ.

²⁴Tsî Davib ge Mahanaims tawa ge sī; tsî Absalommi ge Jordanna ge ǃgâu, ǁîb tsî Israeli di aogu hoaga ǁîb ǀkha.

²⁵Tsî Absalommi ge Amasaba Joab di ǃās ǃnâ ǂnubis ǂama ge mâi. Tsî Amasab ge aob hîa Jitra ti ǀon hâb, Israelǁîb, Abigails, Nahab ôas, Serujab ǃgâsas, Joab îs di ôa ge i.

²⁶Tsî Israeli tsî Absalommi tsîn ge Gileadi ǃhūb ǃnâ ge ǁgoe.

²⁷Tsî i ge ge ī, Davib ge Mahanaims tawa sīo, o gu ge Sobib, Nahab ôab, Rabas Amonni ôan dis dib tsî Maxiri, Amieli ôab, Lodebars dib, tsî Barsilaib, Gileadǁîb, Roglims dib tsîga,

²⁸kharo-aixūn, xapan, ǃhūsoadi, ǃhorob, gerstǃhorob, tsampereb, ǁnaruǀkhāhe hâ ǃhorob, bonkin, lensin, ǁkhāti ǁnaruǀkhāhe hâdi,

²⁹danib, ora ǁnuib, gūn tsî gomadain tsîna, Davib ǃoa ge ūhā tsî ǁaes, ǁîb ǀkha hâs ǃoa, ǂû gu nîse: ǁAes ge ǃâ hâ tsî ǁgâ hâ ǃgaroǃhūb ǃnâ, ti gu ra mî xui-ao.