Read Khoekhoegowab 2 Samueli 18 Bible Online

2 Samueli 18 - Khoekhoegowab bible

2 Samueli 18

¹Tsî Davib ge ǁaes, ǁîb ǀkha hâsa ge ǃgôa; tsîb ge ǁîgu ǂama ge mâi danakhoega ǀoadisigu ǂama, tsî danakhoega kaidisigu ǂama.

²Tsî Davib ge ǁaesa ge sîǂui ǃnonaǁî ǃâsa Joab di ǂgaeǂguis ǃnaga, tsî ǃnonaǁî ǃâsa Abisaib, Serujab ôab, Joab ǃgâsab di ǂgaeǂguis ǃnaga, tsî ǃnonaǁî ǃâsa Itaib, Gatǁîb di ǂgaeǂguis ǃnaga. Tsî gao-aob ge ǁaes ǃoa: Tita on ge ǂanǂansase sago ǀkha nî ǂoa, ti ge mî.

³Xawe ǁaes ge: Sats ge ǂoa tide, ti ge mî; sige ga ǁhâ xawe gu ge sige ai ǂâi-aiǂnûi tide, tsî ǃkhareb sige dib ga ǁō xawe gu ge sige ai ǂâi-aiǂnûi tide; xawe sats ge sige di disiǀoadisise i; xui-ao i ge ga ǃgâi, ǃāsa xu ǀguits nî sige hui ǃkhaisa.

⁴Ob ge gao-aoba ǁîgu ǃoa ge mî: Tita ge sago mûǁae a ǃgâina nî dī. Tsî gao-aob ge dao-ams xōǀkhā sī ge mâ, tsî ǁaes hoas ge kaidisise tsî ǀoadisise gere ǂoa.

⁵Tsî gao-aob ge Joab, Abisaib tsî Itaib tsîga mîmā tsî: ǂAuse go sîsenū re ǂkham khoeb Absalomma, ti ge mî. Tsî ǁaes hoas ge ge ǁnâu matib ra gao-aoba ǂamkhoegu hoaga Absalommi xa mîmā ǃkhaisa.

⁶Nētis ge ǁaesa ǃgarob ai ge ǂoa, Israela nî ǃoase; tsî ǃkhamgus ge Efraimmi di ǀgomhaixa ǃkhais ǃnâ ge i.

⁷Tsî Israeli di ǂnubis ge ǁnāpa Davib di ǃgāgu di ais aiǃâ ge ǂnauhe, tsî ǁnāpa i ge ǁnātsē kai ǂnau-e ge i, disiǀgamdisiǀoadisigu kōse.

⁸ǃKhamgub ge ǁnāpa ǃhūb hoab ai ge khoraǃāsen xui-ao. Tsî ǀgomhain ge ǁnātsē ǁaes xa ǂguiga ge hapu, gôab ǃgâ-ai.

⁹Tsî Absalommi ge Davib di ǃgāga ge ǃoa; tsî Absalommi ge hā-eseli ai ge ǃgapi; tsî hā-eseli ge ǀgom ǁnâugu kai terpentinhaib digu ǃnaga sīo, os ge danas âba ge ǁapo terpentinhaib tawa, ob ge ǁnāti ǂgāmâisase ge mâ, ǀhommi tsî ǃhūbaib tsîkha ǁaegu, tsî hā-eseli ge ǁîb ǃnaga ge ǃkharu.

¹⁰Tsî khoeb ge mûo, ob ge Joaba ǂanǂan tsî: Mû, tita ge Absalomma go mû, terpentinhaib ai ǂgāmâisen hâse, ti ge mî.

¹¹Ob ge Joaba ǁnā khoeb, ǁî ǃkhaisa ra ǂanǂan bib ǃoa ge mî: Kō, sats ge ǁî ǃkhaisa go mû, tarexats kha ǁnâi ǁîba ǃhūb ai ǂnauǁgui tama go i? O ta ga tita disi ǀhaiǀurimarin tsî ǃgaesenni tsîna mā tsi hâ.

¹²Ob ge ǁnā khoeba Joab ǃoa ge mî: Matikōse ta ga ǀoadisi ǀhaiǀurimarina ti ǃomǃnāb ǃnâ tsorobahe xawe ta ga ti ǃomma gao-aob ôab tawa ǁgui tama i hâ; gao-aob ge sats tsî Abisaib tsî Itaib tsîgo sige ǂgaedi ǃnâ go mîmā tsî: Î go mâb hoab âgo ǂkham khoeb Absalomma ǃûiba te, ti ge mî xui-ao.

¹³Tsî ǂkhabase ta ga ti ǀomsa sîsenū xawe ǀgui xū-i xare-i ge gao-aob aiǃâ nabasa tama hâ; tsî sats on ga ti ǃoagu mâ.

¹⁴ǃNubaib ge Joaba: Sats ǀkha ta ge nēpa ǁnāti ǀhawe tide, ti mî, tsî ǃnona ǂāga ge ū, tsî ǁîga Absalommi di ǂgaob ǃnâ ge ǁhâiǂgā, ganupeb ûitsamase terpentinhais ǁaegu hâ hîa.

¹⁵Tsî disi ǂkham khoegu, Joab di ǀāxūn tani-aogu ge ǁîba ge xāǂgā; tsî gu ge Absalomma ǂnau tsî ge ǃgam.

¹⁶ǃNubaib ge Joaba ǀgapadasa ge xâi; os ge ǁaes hoasa Israela sauruǃgonsa xu ge oa, Joab ra ǁaesa ǁkhaedawa xui-ao.

¹⁷O gu ge Absalomma ū tsî ǁîba ǀgomhaixa ǃkhais ǃnâ, kai tsaus ǃnâ ge aoǂgā; tsî gu ge ǁîb ai kai ǀuiga ge ǂnûi, ob ge Israeli hoaba ge ǁhâ, mâb hoaba ǁîb di tentoms ǃoa.

¹⁸Tsî Absalommi ge ǂkhâhaiba ū tsî ǁîba ge ǂnûikhâibasen ganupeb a ûitsama hîa, gao-aob di ǃgoaǃnāb ǃnâ mâba: ǀGôaba ta ūhâ tama hâ, ti ǀons xab nî ǂâi kaise, tib ge ge mî xui-ao; ob ge ǁnā ǂkhâhaiba ǀons âb ǃoa ge ǂgai; ǁnā-amagab ge Absalommi di ǃom, ti ra ǂgaihe nētsēs kōse.

¹⁹ǁGoasib ge Ahimaab, Sadoki ôaba ge mî: A ta ǃkhoe, î ta gao-aoba sī ǂhôa, ǃKhūb ǁîba go ǂhanuǂhanuba ǃkhaisa khākhoen âb di ǃomma xu.

²⁰Xawe Joab ge ǁîb ǃoa ge mî: Sats ge nētsē ǂhôa-ao tide, tsîts ge ǀnîtsē nîra ǂhôa; nētsēts ge satsa ǂhôa tide, gao-aob ôab go ǁō amaga.

²¹Tsî Joab ge Kusib ǃoa ge mî: Satsa ǃgû, îts gao-aoba sī mîba, mûts go xūna. Ob ge Kusiba Joab aiǃâ ǃgamǃgâ tsî ge ǃkhoe.

²²Tsî Ahimaab, Sadoki ôab, ge ǃaruǀîǀgui Joab ǃoa: Mati i ga ī xawe i ta ǁkhāti Kusiba ǃkhoeǃgon, ti ge mî. Ob ge Joaba: Tarexats kha ǁnâi satsa nî ǃkhoe, ti ôa, ǃgâi ǂhôa-ets kom ūhâ tamao? ti ge mî.

²³Mati i ga īs hoasa tib ge ge mî, î ta ǃkhoe! Ob ge ǁîb ǃoa: ǃKhoe! ti ge mî. Tsî Ahimaab ge ǂgās di daoba-ū ǃkhoe tsî Kusiba ge ǃkhoedā.

²⁴Tsî Davib ge ǀgam ǁākha ǁaegu ge ǂnôa i; tsî ǃûi-aob ge ǂnubiǂgoaba ū ǁāb di ǂamais ai ge ǃapa, tsîb ge kōkhâi tsî ge mû, khoeb ǀguri ǃkhoeǃgoaxaba.

²⁵Ob ge ǃûi-aoba ǂgai tsî gao-aoba ge mîba. Ob ge gao-aoba ge mî: ǀGurib ga hâo, o i ge ǂhôa-e hâ ams âb ǃnâ. Tsîb ge ǃaruǀîǀgui ǃgû tsî ge ǀgū.

²⁶ǃNubaib ge ǃûi-aoba ǀnî khoeb ǃkhoeǃgoaxaba ge mû, ob ge ǃûi-aoba ǁāb ǃûi-aob ǃoa ǂgai tsî: Kō, ǀnî khoeb ge ǀguri ǃkhoeǃgoaxa, ti ge mî. Ob ge gao-aoba: ǁÎb on ge a ǂhôa-ao, ti ge mî.

²⁷Ob ge ǃûi-aoba ǃaruǀî: Tita ge ǂgurob di ǃkhoesa Ahimaab, Sadoki ôab di ǃkhoese ra mû, ti ge mî. ǃNubaib ge gao-aoba: ǃGâi khoeb ge a ǁî, ǁîb kom ǃgâi ǂhôa-i ǀkha nî hāo, ti ge mî.

²⁸Tsî Ahimaab ge ǂgai tsî gao-aob ǃoa: ǂKhîb! ti mî tsî gao-aob aiǃâ ais âb ai ǃhūb ai ǁnāǁgoe tsî ge mî: Ab ǃkhōǀkhāhe ǃKhūb, sa Elob, hîa ǁnā khoegu, ǃommi âga ti ǀhonkhoe gao-aots ǃoagu ge ūkhâiga go māǁnâba.

²⁹Ob ge gao-aoba ge mî: ǃGâi i kha a ǂkham khoeb Absalommi ǀkha? Ob ge Ahimaaba ge mî: Tita ge kai xūna go mû, Joab ge gao-aob ǃgāb tsî tita, sa ǃgāta sî ǃnubai, xawe ta ge xū-i xare-e ǂan tama hâ.

³⁰Ob ge gao-aoba ge mî: Naru îts nēpa mâ; ob ge naru tsî sī ge mâ.

³¹Tsî mû, Kusib ge ge hā; tsî Kusib ge: Ti ǀhonkhoe gao-aots ra ǂhôahe, ǃKhūb ge nētsē go ǂhanuǂhanuba tsi ǁnāgu, sa ǃoagu ge khâimagu hoagu di ǃomma xu, ti ge mî.

³²ǃNubaib ge gao-aoba Kusib ǃoa: ǃGâi i kha a ǂkham khoeb Absalommi ǀkha? ti ge mî. Ob ge Kusiba ge mî: Khākhoen ti ǀhonkhoe gao-aots din tsî ǂkhabase sa ǃoagu ga khâiman hoana an ǁnā ǀgôab khami ībahe.

³³Ob ge gao-aoba kaise ge gongonǃnâhe, tsîb ge ǁāb di ǂamoms ǃoa ǃapa tsî ge ā, tsîb ge ǃgûb gau hîa: Ti ôa Absalomtse, ti ôa, ti ôa Absalomtse, î ta ga tita satsa ǁōba hâ, Absalomtse, ti ôa, ti ôatse! ti ge mî.