Read Khoekhoegowab 2 Samueli 19 Bible Online

2 Samueli 19 - Khoekhoegowab bible

2 Samueli 19

¹Tsî Joab ge ge mîbahe: Kō, gao-aob ra ā, tsîb ra ǃoa Absalommi ǂama.

²ǃNubais ge oresa ǁnātsē ǁaes hoasa ge ǃoa kaiba; ǁaes ge ǁnātsē Gao-aob ra tsûaǂgao ǀgôab âb ǂama, tin ra mîsa ge ǁnâu xui-ao.

³Os ge ǁaesa ǁnātsē ge ǃnariǂgâxa ǃās ǃnâ, ǁaes ra ǃnariǂoa khami, ǃkhamma xun ra ǁhâ ǃnubai.

⁴Tsî gao-aob ge ais âba ge ǃgū-ai, tsî gao-aob ge ǃgari dommi ǀkha: Ti ôa Absalomtse, Absalomtse, ti ôa, ti ôatse! ti ge mî.

⁵ǃNubaib ge Joaba gao-aob ǃoa ommi ǃnâ ǂgâ tsî ge mî: Sats ge nētsē ais sa ǃgāgu hoagu disa go taotao, ǁîgu, hîa sa ǀoms tsî sa ôagu tsî sa ôadi di ǀomdi, tsî sa taradi di ǀomdi tsî sa ǀgamitaradi di ǀomde go orega,

⁶satsa ǁkhan hâna ra ǀnamǃâ tsî satsa ǀnam hâna ra ǁkhanǃâ; nētsēts ge go ǂan kai xui-ao, ǂamkhoegu tsî ǃgāgu sa tawa xū tama ǃkhaisa; nētsē ta kom ra hōǃâo, Absalommi ga ûitsama hâ tsî sige hoage ga ǁō hâo, o i ga ǃgâi hâ sa mûǁae ǃkhaisa.

⁷ǁNâi khâi îts ǂoa, îts ǃhoa sa ǃgāge di ǂgaob ǃoa; tita ge ǃKhūb tawa ra nūba tsi xuige, ǂoa tamats ka io, ob ge ǀgui aob xareba nē tsuxub ǁkhāb ǃnâ sa ǀkha hâǁgoa tide ǃkhaisa; tsî nē ǃkhais ge ǁnā ǂkhabab, sa ǂkhamsisa xu nēsis kōse sa ǂama ge hāb hoab ǃgâ-ai nî tsū ǃkhaisa.

⁸ǃNubaib ge gao-aoba khâi tsî ǁāb ǃnâ sī ge ǂnû. On ge ǁaes hoasa ge ǂanǂan: Mû, gao-aob ge ǁāb ǃnâ ǂnôa ti. ǃNubais ge ǁaes hoasa gao-aob di ais aiǃâ ge hā. Tsî Israeli ge ǁhâo, mâb hoab ǁîb di tentommi ǃoa,

⁹os ge ǁaes hoasa Israeli di ǃhaodi hoadi ǃnâ ǂnoagu tsî ge mî: Gao-aob ge ge ore da sada khākhoen di ǃomǁaeba xu, tsîb ge Filisteǁîn di ǃomǁaeba xu ge ore da, tsî nēsib ge Absalommi aiǃâ ǃhūba xu go ǃhū;

¹⁰tsî Absalommi, sada ǂama da ge ǂkhauǀkhāb ge ǃkhammi ǃnâ go ǁō. Tsî nēsi tare xū-i ǃaroma du ra ǃnō gao-aoba sī ǁkhawa ūs xa?

¹¹ǃNubaib ge gao-aob Daviba Sadoki tsî Abjatari tsîkha, pristerkha ǃoa sî tsî ge mî: ǃHoa kho re Judab di kaigu ǃoa î kho mî: Tare xū-i ǃaroma go kha sago ǀuni khoese nî ī, gao-aoba ǁkhawa ommi âb ǃoa nî ūhā khoen xa? Israeli hoab di mîs ge gao-aob tawa ommi âb ǃnâ go hā xui-ao.

¹²Sago ge a ti ǃgâsa, ti ǂkhō tsî ti ǁgan; tarexa go kha ǀuni khoese nî ī, gao-aoba ǁkhawa nî ūhān xa?

¹³Tsî Amasab ǃoa kho ge nî mî: Satsa ti ǂkhō tsî ti ǁgan tamatsa? Ab Eloba nēti dī îb ǁnāti dīǀāro te, sats ga ti ais aiǃâ toroǂamkhoe tama io hoa tsēde Joab di ǃās ǃnâ.

¹⁴Nētib ge Judab, aogu hoagu di ǂgaoba ǀgui khoeb dib axase ge ǂōsen. Tsî gu ge gao-aob ǃoa sî tsî ge mî: Oa re sats tsî ǃgāgu âts tsîgo hoago.

¹⁵Ob ge gao-aoba oa tsî Jordanǃāb tawa ge sī; tsî Judab ge Gilgals tawa ge sī, gao-aoba gu nî ǃgûǃoase, gao-aoba gu nî Jordanna ūǃgâuxase.

¹⁶Tsî Simib, Gerab ôab, Benjaminni ôab, Bahurims dib, ge ǃhaeǃhaesen tsî Judab di aogu ǀkha ge ǁgôa, gao-aob Davibab nî ǃgûǃoaga,

¹⁷tsî ǀguiǀoadisi khoegu Benjaminni digu ǁîb ǀkha; ǁkhāti Sibab, Sauli ommi di ǃgāb, disikoroǀa ǀgôagu âb tsî ǀgamdisi ǃgāgu âb ge ǁîb ǀkha ge hā; tsî gu ge ǃnoesase Jordanna ge ǃgâu gao-aob aiǃâ;

¹⁸tsî ǃgâu-ū-ommi ge ǃgâuo, gao-aob di ommab nî ūǃgâuxase tsî ǁîb mûǁae a ǃgâinab nî dīse. Ob ge Simib, Gerab ôaba gao-aob di ais aiǃâ ge ǁnāǁgoe, Jordannab ge ǃgâu ǃnubai.

¹⁹Tsîb ge gao-aob ǃoa ge mî: Tāts ti ǀhonkhoetsa dīsāsa ǃgôaba te re, îts tā ǂâi, sa ǃgāta ge Jerusalemsa xuts ge ti ǀhonkhoe gao-aotsa ǂoa tsēs ai ǂkhabase dīn xa, îts gao-aotsa tā ǁîna ǂgaob ǃnâ ūhâ re.

²⁰Sa ǃgāta ǁaposase a ǂan, ǁore ta ge ǃkhaisa xuige; tsî kō, tita ge nētsē go ǁgôaxa, ǂgurota ase Joseb ommi hoab din xa, ǀhonkhoe gao-aotsa ta nî ǃgûǃoase.

²¹Ob ge Abisaib, Serujas ôaba, ǃeream tsî ge mî: ǃGamheb kha tide Simiba, ǃKhūb di ǂkhauǀkhāsabebab ge ǀâxare ǃkhais ǃaroma?

²²Xawe Davib ge ge mî: Tare-e ta sakho ǀkha ǁae hā, Serujab ôakho, o kho nētsē tita nî ǁgâua kaiba? Nētsē kha khoe-e ǃgamhe i nî Israeli ǃnâ? ǂAn tama ta kha hâ, nētsē ta go Israeli di gao-ao kai ǃkhaisa?

²³Ob ge gao-aoba Simib ǃoa: ǁŌts ge tide, ti ge mî. Tsî gao-aob ge ǁîba ge nūba.

²⁴Tsî Mefiboseti, Sauli ôab on ge gao-aoba ge ǃgûǃoa; tsîb ge ǁānǂai tama tsî ǀhaub âba ǂkhom tama tsî saran âba ǁā tama ge hâ i, gao-aob ge ǃgûbē tsēsa xu, ǂkhîb ǀkhab ge ǁkhawa hā tsēs kōse.

²⁵Tsî i ge ge ī, Jerusalems tawab ge gao-aoba ǃoa ǃnubaib ge gao-aoba ǁîb ǃoa: Tarexats kha tita ǀkha ge ǃgû tama hâ i, Mefibosetse? ti mîsa.

²⁶Ob ge ge mî: Ti ǀhonkhoe gao-aotse, ti ǃgāb ge ge gā te; sa ǃgāta ge: Tita ge esela nî ǃgaeǃgâ kaibasen, tsî ǁîb ai nî ǃgapi tsî gao-aob ǃoa nî ǃgû, ti ge mî, sa ǃgāta a ǃhora xui-ao.

²⁷ǁNās tawab ge sa ǃgāta ti ǀhonkhoe gao-aots tawa ǂkhabase ge ǂgā-am; xawe ti ǀhonkhoe gao-aots ge Elob di ǀhomǃgā-i axase ī; dī ǁnâi sa mûǁae a ǃgâi xū-i hoa-e.

²⁸Ti îb di ommi dida kom ti ǀhonkhoe gao-aots aiǃâ ǁōb di khoeda ǀguidao, xawets kom sa ǃgāta ǁnān, sa tāb tawa ǂnôan ǁaegu ge ǂnûio. Mâ ǂhanu-aisi-i ǀnî-e ta ǁnâi ūhâ? Tsî tare-e ta ǃaruǀî gao-aotsa nî ǂgaoǀkhā?

²⁹Ob ge gao-aoba ǁîb ǃoa ge mî: Tarexats ra gorose sa ǃkhaidi xa ǃhoa? Tita ge: Sats tsî Sibab tsîkho ǀgoragu ǃhūba, ti ge mî.

³⁰Ob ge Mefiboseta gao-aob ǃoa ge mî: Ab ǁîba hoaragase ū, ti ǀhonkhoe gao-aots go ǂkhîb ǀkha hās khaoǃgâ.

³¹Tsî Barsilaib, Gileadǁîb ge ǁkhāti Roglimsa xu ge hā; tsîb ge gao-aob ǀkha Jordanna ge ǃgâu, Jordanna-ūb nî ǁîba ǁnūse.

³²Tsî Barsilaib ge kaira tsî ǁkhaisadisi kurixa ao ge i; tsîb ge ǁîba gao-aoba gere ǂûmā, Mahanaims tawab hâ hîa, kaise ǁkhā aob ge i xui-ao.

³³Tsî gao-aob ge Barsilaib ǃoa ge mî: Îts satsa tita ǀkha ǃgâu, o ta ge tita satsa Jerusalems tawa nî ǂûmā.

³⁴Xawe Barsilaib ge gao-aob ǃoa ge mî: Matikō di nî ī tsēdi ti ûikurigu dide, o ta kha gao-aots ǀkha Jerusalems ǃoa nî ǃapa?

³⁵Tita ge nētsē a ǁkhaisadisi kurixa, ǀgora ǁkhā ta nî xare ǃgâib tsî ǂkhabab tsîkha ǁaegu? Sa ǃgāta tsâtsâ ǁkhā ta nî xare, ǂû tsî ta ra ā xūna? ǃGâ ǁkhā ta nî xare ǁnae-aogu tsî ǁnae-aodi di domga? Tsî tarexa ta kha ti ǀhonkhoe gao-aotsa ǃaruǀî nî ǃkhanaǃkhana?

³⁶Sa ǃgāta ge ǂkharirose gao-aots ǀkha Jordanna nî ǃgâu; tarexats kha gao-aotsa mādawa-amsa nî dī te?

³⁷Sa ǃgāta a ta oa, î ta ti ǃās ǃnâ sī ǁō, ti îb tsî ti îs di ǀhobas tawa; xawe mû, nēb ge hâ sa ǃgāb Kimhamma, ab ǁîba ti ǀhonkhoe gao-aots ǀkha ǃgâu, îts ǁîba sa mûǁae a ǃgâi khami dī-ū.

³⁸ǃNubaib ge gao-aoba ge mî: Kimhammi ge nî ǃgûǃgâuǀkhā te, tsî ta ge ǁîba sa mûǁae a ǃgâi khami nî dī-ū; tsî titats ga ǂgaoǀkhān hoana ta ge nî dība tsi.

³⁹Tsî ǁaes hoas ge Jordanna ǃgâuo, tsî gao-aob on ge ǃgâuo, ob ge gao-aoba Barsilaiba ǁoa tsî ge ǀkhae bi; nētib ge ǃās âb ǃoa ge ǁaru.

⁴⁰Tsî gao-aob ge aiǃâb ǃoa Gilgals ǃoa ge ǃgû, tsî Kimhammi ge ǁîb ǀkha ge ǃgû; tsî Judab di ǁaes hoas ge gao-aoba ge ūǃgâu tsî ǁkhāti Israeli di ǃâsa.

⁴¹Tsî mû, Israeli aogu hoagu ge gao-aob ǃoa ge hā, tsî gu ge gao-aob ǃoa ge mî: Tare xū-i ǃaroma gu kha sige di ǃgâsagu, Judab aoga, satsa ge ǃnaribasen tsî sats gao-aots tsî ommi âtsa Jordanna ge ūǃgâu, tsî Davits di aogu hoaga?

⁴²ǃNubai gu ge Judab di aogu hoaga Israeli di aoga: Gao-aob a sige di ǀaokhoe ǃkhais xas ge, ti ge ǃeream; tsî, tarexa go kha ra ǁaixa ǁî ǃkhais ǃaroma? ǁNâi ǂû ge ge sige gao-aob di ǂû-i xa? ǁNâi ǀkhaexū-e ǃnarehe ge ge ǁîb xa?

⁴³O gu ge Israeli di aoga Judab di aoga ǃeream tsî ge mî: Sige ge disi ǃâde ūhâ gao-aob tawa, tsî ǁkhāti Davib tawa, sige sago ǃgâ-ai; tarexa go kha ǁnâi sige ge sora, os sige di mîsa ǃgû tama ge i, gao-aob âge nî ūhāse? Tsî Judab aogu mîs ge Israeli aogu mîs ǂamai karosa ge i.