Read Khoekhoegowab 2 Samueli 20 Bible Online

2 Samueli 20 - Khoekhoegowab bible

2 Samueli 20

¹Tsî i ge ge ī, Beliali khoeb ge ǁnāpa hâ isa, Seba ti ǀon hâb, Bixrib ôab, Benjaminni aoba: ǁÎb ge xâiǁnâsa xâi tsî ge mî: Sida ge amǃnâ-e ūhâ tama hâ Davib tawa, tsî sida ge ǀumi-e ūhâ tama hâ Isaib ôab tawa; mâ-i hoa-e ǁî-i di tentomdi ǃoa, Israeltse!

²Ob ge mâ aob Israeli dib hoaba ǃapa Daviba xu tsî Sebab, Bixrib ôaba ge saoǃgon; xawe Judab di aogu ge ǁîgu di gao-aoba ge ǂae-ai, Jordanna xu Jerusalems kōse.

³Tsî Davib ge oms âb ǃnâ Jerusalems tawa sīo, ob ge gao-aoba ǁnā disi taradi, ǀgamitaradi âb, hîab ge omsa di nî sâuga ǃgorode ū tsî ǁîde sâus di oms ǃnâ ge ǂgā tsî ǁnāpa ǁîde gere ǂûmā, xaweb ge ǁîdi tawa ǂgâ tama ge hâ i. Tsî di ge ǁnāpa ǂganamhe ge hâ i, ǁîdi di ǁōb kōse, ǃoatarase ra ûiǃâ.

⁴ǃAruǀîb ge gao-aoba Amasab ǃoa ge mî: Judab di aoga ǂgaiǀhaoba te re ǃnonaǁî tsēs kōse; tsî satsa nēpa hā mâ.

⁵Ob ge Amasaba ge ǃgû, Judabab nî ǂgaiǀhaose; xaweb ge mîmâisa ǁaeb, ǁîb ge mâiba biba ǃnā hâse ge ǀhawe.

⁶ǃNubaib ge Daviba Abisaib ǃoa ge mî: Nēsisab ge Sebab, Bixrib ôaba Absalommi ǃgâ-ai nî tsūdī; ǀhonkhoeb âts di ǃgāga ū îts ǁîba sauruǃgon, îb tā ǀnîsi ǁaposa ǃāde hōbasen, îb tā sage di mûde ǃhomǂui.

⁷ǃNubai gu ge Joab di aoga ǁîba ge ǂoasao tsî Keretǁîgu, Peletǁîgu tsî ǁē-aogu hoagu on. ǁÎgu ge Jerusalemsa xu ge ǂoa, Sebab, Bixrib ôaba gu nî sauruǃgonga.

⁸Tsî ǁîgu ǁnā kai ǀuis, Gibeons tawa hâs tawa hâ hîab ge Amasaba ǁîgu di ais aiǃâ ge hā. Tsî Joab ge sarab âb, hîab go ǂgaeǂgāsenna ge ǃgae, tsî ǁîb aib ge ǃgaesenna ge hâ i, gôab ǁîb ǀkha ǃgaehe hâba, kamanab âb tawa ǁhōs âb ǃnâ; tsî ǃgûb gau hîab ge ǁîba ge ǁnāǂoa.

⁹Tsî Joab ge Amasab ǃoa: ǃGâibahets a, ti ǃgâ? ti ge mî. Tsî Joab ge amǀkhāb ǃommi ǀkha Amasab di ǀhō-amma ge ǃkhō, ǁoa bib nîga.

¹⁰Tsî Amasab ge gôab, Joab ǃomǁae hâba ǃûisen tama ge i; ob ge ǁîb ǀkha koroǁî ǀarab ǃnâ ge ǃkhā, tsî ǃnāxūn âba ǃhūb ai ge tsoroǂui, tsîb ge ǀgam ǃnā-e ǃkhā bi tama hâ, tsîb ge ge ǁō. ǁNās khaoǃgâb ge Joab tsî ǃgâsab âb Abisaib tsîkha Sebab, Bixrib ôaba ge ǃgôaǃgon.

¹¹Tsî ǀgui khoeb Joab ǃgāgu dib ge ǁîb tawa sī ge mâ; tsîb ge ge mî: Joab xa ga ǃgâibahe-i hoa-i tsî Davibǀî ga ǂōsen-i hoa-e a-i Joaba sao!

¹²Tsî Amasab ge ǀaob âb ǃnâ gere ǃupupesen daob di ǁaegub ǃnâ. Tsî ǁnā khoeb ge mûo, ǁaes hoas ra mâ ǃkhaisa, ob ge Amasaba daoba xu ge dībē ǃaub ǃoa tsî sara-e ǁîb ai ge aoǁgui, mâ-i hoa-i, ǁîb tawa ra hā-i ra mâ ǃkhaisab ra mû amaga.

¹³Tsî daoba xub ge ūbēheo, ob ge mâ khoeb hoaba Joaba ge ǃgôaǃgon, Sebab, Bixrib ôaba gu nî sauruǃgonse.

¹⁴Tsî Sebab ge Israeli di ǃhaodi hoade ge ǃgûǃnâǃganu Abel-Bet-Maaxas kōse tsî Berimmi hoaba; tsî gu ge ǀhû tsî ǁkhāti ǁîba ge ǃgôaǃgon.

¹⁵Tsî gu ge hā tsî ǁîba Abel-Bet-Maaxas ǃnâ ge ǃnamiǂgā, tsî gu ge ǃās ǃoa-ai ǁkhuiba ge aokhâi, ǃauga ǂnubiǂgoab tawab ge sīs kōse; tsî ǁaes, Joab ǀkha hâs hoas ge ǂnubiǂgoaba ge hîǀhuru, ǁîba gu nî aoǁguise.

¹⁶ǁGoasis ge gā-ai tarasa ǃāsa xu ge ǂgai: ǃGâ re, Joaba mîba re: Nēpa ǀgū î ta ǃhoa-ū tsi, ti.

¹⁷Tsî ǀgūb ge ǁîsao, os ge tarasa: Joatsa, satsa? ti ge mî. Ob ge ǁîba: Tita ge a ǁî, ti ge mî. Os ge ǁîb ǃoa: ǃGâ re sa ǃgāta di mîde, ti ge mî. Ob ge ǁîba: ǃGâ ta ra, ti ge mî.

¹⁸ǃNubais ge ǃhoa tsî ge mî: Aibekam ǁaeb ain ge ǂkhoamîs ase ǃhoa tsî ge mî: Abels tawan ge ǂanǂansase nî dîǃā tsî ǁnātin ge ǁkhāti gere dīǀamǀam.

¹⁹Tita ge ǂkhîxan tsî îǂhôan di ta Israeli ǃnâ, tsî sats ra ôa-am, ǃās Israeli ǃnâ ǁgûse īsa ǃgamsa; tarexats kha ǁnâi ǃKhūb di ǀumisa nî hapu?

²⁰ǃNubaib ge Joaba ǃeream tsî ge mî: Tā ta ībahe, hapu ta nî ǃkhaisa, hîǀhuru ta nî ǃkhaisa!

²¹ǃKhais ge ǁnāti ī tama hâ; tsî khoeb Efraimmi ǃhommi dib, Seba ti ǀon hâb, Bixrib ôab, ǁîb ge ǃommi âba go ūkhâi gao-aob ǃoagu, Davib ǃoagu; ǁîb ǀguiba māǁnâ, o ta ge tita nē ǃāsa xu nî bē. ǁGoasis ge tarasa Joab ǃoa ge mî: Mû danas âbats ge ǂnubiǂgoaba-ū nî aoǁnâbahe.

²²Tsîs ge tarasa gā-aisib âs ǀkha ǁaes hoas tawa ge sî; on ge Sebab, Bixrib ôab danasa ǁhāǁnâ tsî Joaba ǁîsa ge aoǁnâba. ǃNubaib ge xâiǁnâba ge xâi, o gu ge ǃāsa xu ge ǀgaru, mâb hoaba ǁîb di tentoms ǃoa; ob ge Joaba Jerusalems ǁga gao-aob ǃoa ge oa.

²³Tsî Joab ge Israeli di ǂnubis hoas ǂama ge hâ i; tsî Benajab Jojadab ôab, Keretǁîgu tsî Peletǁîgu ǂama;

²⁴Tsî Adorammi ge ǁguibadi ǁuib ǂama ge hâ i; tsî Josafab, Ahiludi ôab ge ǂkhanisâu-ao ge i;

²⁵Tsî Sejab ge xoa-ao ge i; tsî Sadoki tsî Abjatari tsîkha ge prister ge i.

²⁶Tsî ǁkhātib ge Irab Jairǁîba, Davib di prister ge i.