Read Khoekhoegowab 2 Samueli 21 Bible Online

2 Samueli 21 - Khoekhoegowab bible

2 Samueli 21

¹Tsî i ge ǃâtsūǀkhā-e ge hâ i Davib di tsēdi ǃnâ, ǃnona kurigu kōse kuriba xu kurib ǃoa; ob ge Daviba ǃKhūb di aisa ge ôa. Ob ge ǃKhūba ge mî: Sauli ǃaromas ge tsî ǀao-ommi âb ǃaromas ge, Gibeonǁînab ge ǃgam xui-ao.

²ǃNubaib ge gao-aoba Gibeonǁîna ǂgai tsî ǁîn ǃoa ge mî: (Tsî Gibeonǁîn ge Israelǁîn di tama ge hâ i, tsî ge ǁōǃgau ge Amorǁîn di i, tsî Israeli ôan ge ǁîna ge nūba, xawe Sauli ge ge ôa-am, ǁînab nî ǂnause ôasasib âb, Israeli ôan tsî Judab dinab ūba hâb ǃnâ).

³Ob ge Daviba Gibeonǁîn ǃoa ge mî: Tare-e ta kha sado nî dība? Tsî tare-i ǀkha ta kha sado nî ǂkhî kai, ǃKhūb di ǀumisa du nî ǀkhaega?

⁴ǃNubain ge Gibeonǁîna ǁîb ǃoa ge mî: Sida ge Saula xu tsî ǁîb di omma xu ǀhaiǀurib tsî ǃhuniǀurib tsîkha ǂgao tama hâ; tsî da ge ǁkhāti Israeli ǃnâ khoe-e ǃgamsa ǂgao tama hâ. Ob ge ǁîba: Mî du ka xū-i hoa-e ta ge tita nî dī, ti ge mî.

⁵On ge ǁîna gao-aob ǃoa ge mî: ǁNā khoeb, sida ge hîkākāb tsî: An hîǀhuruhe, în Israeli di ǀkharib hoab ǃnâ tā mâ, ti sida ǃoagu ge ǂâib xasa:

⁶A da ǁnâi ǁîb di ôagu xa hû khoega māhe, î da ǁîga ǃKhūba ǂgāmâiba Gibeons Sauli, ǃKhūb di ǃkhōǂuisabeb dis tawa. Ob ge gao-aoba: Tita ge ǁîga nî mā, ti ge mî.

⁷Tsî gao-aob ge Mefiboseti, Jonatanni ôaba ge sâu, ǁnā nūs ǃKhūb dis, ǁîkha ǁaegu hâs ǂama, Davib tsî Jonatanni, Sauli ôab tsîkha ǁaegu.

⁸Tsî gao-aob ge ǀgam ǀgôakha Rispas, Ajab ôas dikha, Saulas ge ǁorabakha, Armonib tsî Mefiboseti tsîkha ge ū; tsî ǁîkha tawa koro ǀgôagu Merabs, Sauli ôas di ǃgâsas digu, Adrieli, Barsilaib ôab, Meholaǁîbas ge ǁorabagu tsîga;

⁹tsîb ge ǁîga Gibeonǁîn di ǃomǁae ge mā, on ge ǁîga ǃhommi ai ǃKhūb di ais aiǃâ ge ǂgāmâi, tsî ǁnāti gu ge ǁî hûga ge ǀguiǁnā; tsî gu ge ǃgaos di tsēdi ǃnâ ge ǃgamhe, ǂguro tsēdi ǃnâ gerstǃgaos di tsoatsoas ǃnâ.

¹⁰ǃNubais ge Rispas, Ajab ôasa, ǀkhoa ǃkhaiba ū tsî ǁîba ge ǃābasen ǃhaob ai, ǃgaos di tsoatsoasa xu ǁgammi ge ǁîgu ai ǀhomma xu ǂnâs kōse; tsîs ge ǀhommi di anina tsēa ǁîgu ai sâ kai tama ge i, tsî ǃaub di ǀgurun ona tsuxuba.

¹¹Tsî Davib ge ge mîbahe Rispas, Ajab ôas, Sauli di ǀgamitaras ge dī ǃkhaisa.

¹²Ob ge Daviba ǃgû tsî ge ū Sauli di ǂkhōgu tsî Jonatanni, ǁîb ôab di ǂkhōgu tsîga, Jabes Gileadi dis di ǁgâuǁîga xu, ǁîgu hîa ǁîga Bet-Seans di daob, Filisteǁîn ge ǁîga ǁnāpa ǂgāmâiba xu ge ǃnariga, Gilboab ain ge Filisteǁîna Saula ǃgam ǃnubai.

¹³Tsîb ge ǁnāpa xu Sauli di ǂkhōgu tsî Jonatanni, ǁîb ôab di ǂkhōga ge ūǃapa; tsî gu ge ǁkhāti ǂgāmâihe hâgu di ǂkhōga ge ǀhaoǀhao.

¹⁴Tsî gu ge Sauli di ǂkhōgu tsî Jonatanni, ǁîb ôab di ǂkhōga ge ǁkhō Benjaminni di ǃhūb ǃnâ Selas tawa, ǁîb îb Kisi di ǀhobas ǃnâ, tsîn ge gao-aob ge mîmān hoana ge dī. Nētib ge Eloba ǃhūba ge ǂkhî kaibahe.

¹⁵ǃAruǀîn ge Filisteǁîna ǀnî toro-e Israeli ǀkha ge ūhâ i. Ob ge Daviba ge ǁgôa tsî ǃgāgu âba ǁîb ǀkha, tsî gu ge Filisteǁîna ge ǃkhamū, Davib ge ǀhupus kōse.

¹⁶Tsî Isbi-Benob, Rafab ôagu dib, ǃgommi ǁhâigôab âb dib ǃnonakaidisidi kō ge ib ǂaib xab, ge ǀasa gôaba ge ǃgaesen hâ i; ǁîb ge Daviba ge ǃgam ǂgao hâ i.

¹⁷Xawe Abisaib, Serujas ôab ge ǁîba hui tsî Filisteǁîba ǂnau tsî ge ǃgam. ǃNubai gu ge Davib di aoga ǁîba nūba tsî ge mî: Sats ge ǃaruǀî sige ǀkha ǃkhammi ǁgā ǂoa tide, îs Israeli di ǃamamǀaesa tā ǀari.

¹⁸Tsî i ge ǁnās khaoǃgâ ge ī, ǀnî torob ge ǁkhawa hâsa Filisteǁîn ǀkha Gobs tawa. ǃNubaib ge Sibegaib, Husaǁîba Sipaib Rafab ôan di ge iba ge ǃgam.

¹⁹ǁNās khaoǃgâb ge ǀnî toroba ge hâ i Gobs tawa Filisteǁîn ǀkha; tsî Elhananni Jaare-Oregimmi ôab, Betlehems dib ge Goliati, Gatǁîba ge ǃgam, ǁhâigôab âb kunis di ǂgae-ūhaib khami ge ī iba.

²⁰ǁNās khaoǃgâb ge ǀnî toroba Gats tawa ge hâ i; tsî ǁnāpab ge kaise gaxu khoeba ge hâ i, ǃnani ǀkhunuga mâ ǀkhāb hoab di ǃommi âb tawa ge ūhâ ib tsî ǃnani ǀkhunuga mâ ǂais hoas tawa, ǀgamdisihakaǀa ǀhaob aiga, tsî ǁîb on ge Rafaba ge ǁorabahe.

²¹Tsîb ge ǁîba Israela ge ǃhō; xawe Jonatanni, Simeab ôab, Davib ǃgâsab, ge ǁîba ge ǃgam.

²²Nē hakagu ge Rafaba ge ǁorabahe Gats tawa; tsî gu ge Davib di ǃomma xu ge ǁnā tsî ǁîb di ǃgāgu di ǃomma xu.