Read Khoekhoegowab 2 Samueli 23 Bible Online

2 Samueli 23 - Khoekhoegowab bible

2 Samueli 23

¹Tsî nēdi ge ǀuni mîdi Davib dide: Davita, Isaib ôata ge ra mî, ǁnā aota, ǀgapise ǂnûiǂgāhe hâ ta, Jakob Elob di ǂkhauǀkhāsabeta, tsî psalmdi ǀkha Israeli ǃnâ a ǀnamǀnamsa ta ge ra mî:

²Gagab ǃKhūb dib ge tita xu ge ǃhoa, tsî mîs âb ge ti nams ai ge hâ i.

³Elob Israeli dib ge ge mî, ǃgareǀuib Israeli dib ge tita ǃoa ge ǃhoa: Gaosab, khoen ǂama ra gaob, ge nîra hā, ǂhanu-aib, Elob di ǃaoǃgâb ǃnâ ra gaoba.

⁴Tsî ǁîb ge ǁgoas ǃnâb khami nîra ī, sores ra ǁhai ǃnubai, ǀnanuo ǁgoa-i khami, ǀgân ra ǀapib khaoǃgâ ǂkhaib ǀkha ǃhūba xu ǀkhī khami.

⁵Ti ommi ge Elob tawa ǁnāti ī tama, xaweb ge ǁîba tita ǀkha ǀamo ǃgaeǀhao-e ge dī, hoan ǃnâ ǃgâise dī-unuhe tsî sâuhe hâ-e; amase ti ǃgâiǃōb hūb, tsî ti turab hūb ge a ǁî, ganupeb ǁî ǃkhaisa ǀkhī kai tama hâ xawe.

⁶Xawe eloxoresan ge hoatsama ǁkhūdi hîa ra aoxūhedi khami ī, ǃommi ǀkha di a ǃkhōhe ǁoa amaga.

⁷Tsî mâ-i hoa-i, ǁîde ra tsâǀkhā-i, ǁî-i ge ǂnūǀuri-i ǀkhas kas, ǁhâigôab di hai-i ǀkhas kasa ǁîde ra ǁhāǁnâ; o di ge ǀaes ǀkha ra khauǃkhūhe ǁnā ǃkhais ǁkhās ai.

⁸Nēdi ge ǀondi ǁnā ǁē-aogu, Davib ge ūhâ igu dide: Joseb-Basebeti, Taxkemonǁîb, danakhoegu di ǂamsaba. Nēb ge Adinob Esniǁî ge i; ǁîb ge ǁkhaisakaidisiga ǀgui ǃnās ama ge ǃgam.

⁹Tsî ǁîb khaoǃgâb ge Eleasari, Dodob ôab, Ahohib ôaba ge hâ i; ǁîb ge ǁnā ǃnona ǁē-aogu ǃnâ Davib ǀkha ge hâ i, Filisteǁîn hîa ǁnāpa ǃkhams ǁgā ǀhao hâna gu gere ǃhō ǃnubai, tsî Israeli di aogu ge ge ǃapa.

¹⁰ǃNubaib ge nēba khâi tsî Filisteǁîga ge ǂnau, ǃommi âb ge ǁkhamas kōse, ā, ǃommi âb gôab tawa ge ǂaes kōse; tsî ǃKhūb ge ǁnā tsēs ǁkhās ai kai ǃgâiǃgâba ge sîsen; tsî ǁaes ge ǁîb khaoǃgâ ge oa, ǀâǀhanas ǀguisan nî hîga.

¹¹Tsî ǁîb khaoǃgâb ge Samab, Ageb ôab, Hararǁîba ge hâ i. Filisteǁîn ge Lehis tawa ge ǀhao hâ i, tsî ǁnāpa i ge ǃhanaǃâ-i, lensin xa ǀoa hâ-e ge hâ i, tsî Filisteǁîn ge ǃhūo,

¹²ob ge ǁîba ǁnā ǃâs ǁaegu sī mâ tsî ǁîsa ge ore tsî Filisteǁîna ge ǂnau; tsî ǃKhūb ge kai ǃgâiǃōba ge sîsen.

¹³ǁKhāti gu ge ǃnonagu ǁnā ǃnonadisi danakhoegu diga ǁgôa tsî ǃgaos ǃnâ Davib tawa ge sī, ǁhoab Adulammi ǃnâ; tsî ǂnubis Filisteǁîn dis ge ǃgoaǃnāb Rafaims dib ǃnâ ge ǁgoe.

¹⁴Tsî Davib ge ǁnāǃnubai ǁaposa ǃkhai-i ǃnâ ge hâ i; tsî Filisteǁîn di toroǂnubis ge ǁnāǃnubai Betlehems tawa ge hâ i.

¹⁵Tsî Davib ge tura tsî ge mî: Tari-e kha ǁgam-e nî ā kai te, Betlehems di tsaus, ǁāb tawa hâsa xu?

¹⁶ǃNubai gu ge ǁnā ǃnona ǁē-aoga Filisteǁîn di ǁgoeǃkhaisa ǃgûǃganu tsî ǁgam-e sī ge xuri, Betlehems di tsaus, ǁāb tawa hâs ǃnâ, tsî ǁî-e Davib tawa ge ūsī, xawe Davib ge ǁî-e ā ǂgao tama ge i tsîb ge ǁî-e ǃKhūb aiǃâ ge ǁhōǂui.

¹⁷Tsî ge mî: Tā ta ībahe, ǃKhūtse, nē xū-e ta nî dī ǃkhaisa. Nē aogu hîa ûib âga mā tsî go ǃgûgu di ûib ǀaoba ta kha nî ā? Tsîb ge ǁî-e ā ǂgao tama ge i. Nēsa gu ge ǁnā ǃnona ǁē-aoga ge dī.

¹⁸Tsî Abisaib, Joab di ǃgâsab, Serujas ôab, on ge ǃnonagu di dana ge i; tsîb ge ǁhâigôab âba ǃnona kaidisigu hîab ge ǃgamgu ǂama ge ǁhâi; tsîb ge ǁnā ǃnonagu ǃnâ ǀon-e ge ūhâ i.

¹⁹ǁNā ǃnonagu ǃnâb ge ǁîba nau ǀgamkha xa ǃgôasa ge i; ǁnā-amagab ge ge ǁîkha di ǂamsa kai; xaweb ge ǂguro ǃnonagu ǀkha ǀguitikō tama ge hâ i.

²⁰Tsî Benajab, Jojadab ôab, ǃgari-aob, dīxūxab, Kabseels dib; ǁîb ge ǀgam ǀgaisa ǁē-aokha Moab dikha ge ǂnau; tsîb ge ǁkhāti ǁgôa tsî xamma tsaus ǃnâ ge ǃgam, tsamaros di ǁaeb ai.

²¹ǁÎb ge ǁkhāti Egipteǁî khoeb hîa ge kaise gaxu iba ge ǃgam. Tsî Egipteǁîb ge ǁhâigôaba ǃomǁae ge ūhâ i, xaweb ge Benajaba ǁîb ǃoa haib ǀkha ǃkhoe tsî ǁhâigôaba Egipteǁîb di ǃomǁaeba xu tsubuǂui tsî ǁîb di gôab ǂhanib ǀkha ge ǃgam bi.

²²Nēnab ge Benajab, Jojadab ôaba ge dī, ǁnā-amagab ge ǀon-e ge ūhâ i ǁnā ǃnona ǁē-aogu ǃnâ.

²³ǁÎb ge ǃnonadisigu ǂamai ge ǂkhaisa i, xaweb ge ǃnonagu ǀkha ge ǀguitikō tama hâ i. Tsî Davib ge ǁîba ǀapemā-aogu âb ǂama ge ǂnûi.

²⁴Asaeli, Joab di ǃgâsab on ge ǃnonadisigu ǃnâ ge hâ i; Elhananni, Dodob ôab, Betlehems dib;

²⁵Samab, Harodǁîb; Elikab, Harodǁîb;

²⁶Heleb, Peletǁîb; Irab, Ikeb ôab, Tekoaǁîb;

²⁷Abieseri, Anatotǁîb; Mebunaib, Husaǁîb;

²⁸Salmonni, Ahohiǁîb; Maharaib, Netofaǁîb;

²⁹Heleb, Baanab ôab, Netofaǁîb, Itaib, Ribaib ôab, Gibeas Benjaminni ôan dis dib;

³⁰Benajab, Piratonǁîb; Hidaib, Gaas di ǃārogu dib;

³¹Abi-Albonni, Arbaǁîb; Asmaveti, Bahurimǁîb;

³²Eljaxbab, Saalbonǁîb; Jonatanni, Jasenni ôagu dib;

³³Samab, Hararǁîb; Ahiammi, Sarari ôab, Hararǁîb;

³⁴Elifeleti, Ahasbaib ôab, Maaxaǁîb di ôab; Eliammi, Ahitofeli ôab, Giloǁîb;

³⁵Hesrob, Karmelǁîb; Paaraib, Arabǁîb;

³⁶Jigali, Natanni ôab, Sobas dib; Banib, Gadǁîb;

³⁷Seleki, Amonǁîb; Naharaib, Beerotǁîb, Joab di ǀāxūn tani-aob, Serujas ôab,

³⁸Irab, Jitriǁîb, Gareb, Jitriǁîb.

³⁹Uriab, Hetiǁîb: Hoatsama gu ge ǃnonadisihûǀa ao ge i.