Read Khoekhoegowab 2 Samueli 3 Bible Online

2 Samueli 3 - Khoekhoegowab bible

2 Samueli 3

¹Tsî torob ge ǂomxa toro ge i Sauli ommi tsî Davib ommi ǁaegu. Tsî Davib ge ǃaruǀîǀgui ge ǀgaisa, tsî Sauli ommi din ge ǃaruǀîǀgui ge ǂkhabu.

²Tsî Davib ge ǀgôaga ge ǁorabahe Hebrons tawa. Tsî ǂguroǃnaesabeb âb ge Amnon ge i, Ahinoams, Jesreelǁîs diba.

³Tsî ǀgamǁîb âb ge Kileab ge i, Abigails, Nabali, Karmelǁîb taras diba; tsî ǃnonaǁîb Absalommi, Maaxas, Talmaib, Gesuri gao-aob ôas diba.

⁴Tsî hakaǁîb Adoniab, Hagits di ôaba, tsî koroǁîb Sefatjab, Abitals di ôaba.

⁵Tsî ǃnaniǁîb Jitreammi, ǁîb taras Eglas diba. Nē ǃnanigab ge Daviba Hebrons tawa ge ǁorabahe.

⁶Tsî torob Sauli ommi tsî Davib ommi ǁaegu hâ hîa i ge ge ī, Abneri ge Sauli ommi di ǀgaise ǁgausen ǃkhaisa.

⁷Tsî Sauli ge ǀgamǁî tarasa ge ūhâ i, Rispa ti ǀon hâs, Ajab ôasa; tsî Isboseti ge Abneri ǃoa ge mî: Tarexats go ǂgâ ti îb di ǀgamǁî taras tawa?

⁸ǃNubaib ge Abnera Isboseti di mîdi ǂama kaise ǁaixa tsî ge mî: Aridanata kha ǁnâi tita, hîa Judab ǃoagu Sauli, sa îb ommi tsî sa ǃgâsan tsî sa ǀhōsado nētsē ǃgâidība ra dī ta, tsî Davib di ǃomǁaeb ǃnâ māǁnâ tsi tama hâ ta, ots ra nētsē ôaǃnâ te taras ǀkha ta go ǀhapixa ǃkhais ǃaroma?

⁹Ab Eloba Abnera nēti dī-ū, îb ǁnāti dīǀaro bi. Amase ǃKhūb ge Daviba nūba khami ta ge tita ǁîba nî dī-ū.

¹⁰Sauli di gaosisa ra ūǁnâǃâ tsî Davib di tronsa ra ǂnûikhâiǃâ Israeli ǂama tsî Judab ǂama, Dansa xu Bersebas kōse.

¹¹Tsîb ge ǁîba ǃaruǀî Abnera ǀgui mîro-i xare-e ǃeream ǁoa ge i, ǁîbab ra ǃao amaga.

¹²ǁGoasib ge Abnera sîsabega ǁîb aiǃâ sî Davib ǁga tsî ge mî: Tarib dib a ǃhūba? Tsî ǃaruǀî ra mîǃâ: Sa ǃgaeǀhao-e ǁnâi dī tita ǀkha, tsî kō, ti ǃommi ge sa ǀkha nîra hâ, Israeli hoaba ta nî sa ǃoa ǁkhaedawase.

¹³Ob ge ǁîba ge mî: Aio, tita ge ǃgaeǀhao-e sats ǀkha nî dī; xawe ǀgui xū-e ta ra ǂgaoǀkhā tsi: Tā ti aisa mû, Mixals, Sauli ôasats ga aibe ūhā tama io, hāts kao, ti aisats nî mûse.

¹⁴ǁKhātib ge Daviba sîsabega ge sî Isboseti, Sauli ôab ǁga, mî rase: Ti taras Mixalsa mā te re, ǀguikaidisi aikhōgu Filisteǁîgu digu ǀkha ta ge ǃgamesa.

¹⁵Ob ge Isboseta sî tsî ǁîsa ge ū aob Paltieli, Lajib ôaba xu.

¹⁶Tsî aob âs ge ǁîs ǀkha ge ǃgû, ǃgûgau tsî ra āǃâ ǁîs khaoǃgâ Bahurims kōse. ǁGoasib ge Abnera ǁîb ǃoa ge mî: ǃGû îts oa! Ob ge ge oa.

¹⁷Tsî Abneri ge Israeli di kaigu ǀkha ge ǃhoaǂharugu mî raǃâ: Sadu ge ǂomxa ǁaeba xu Daviba sadu ǂama gao-aose gere ǂgao.

¹⁸Î du ǁnâi nēsi ǁîsa dī. ǃKhūb ge Davib ǃoa ǃhoa tsî ge mî: Davib, ti ǃgāb di ǃommi ǀkha ta ge tita ti ǁaes Israelsa nîra ore, Filisteǁîn ǃomǁaeba xu tsî khākhoen ân hoan di ǃomǁaeba xu.

¹⁹Tsî Abneri ge ǁkhāti Benjaminni di ǂgaera ǃnâ ge ǃhoa. Tsî Abneri ge ǁkhāti ge ǃgû, Hebrons tawab nî Davib ǂgaera ǃnâ ǃhoase Israeli mûǁae tsî Benjaminni ommi hoab mûǁae a ǃgâin hoana.

²⁰Tsî Abneri ge Davib ǁga Hebrons tawa ge sī, tsî ǀgamdisi khoega ǁîb ǀkha. Tsî Davib ge Abneri tsî aogu, ǁîb ǀkha hâgu tsîga ǂûǁae-e ge dība.

²¹ǃNubaib ge Abnera Davib ǃoa ge mî: Tita ge khâi tsî nî ǃgû, tsî Israeli hoaba ti ǀhonkhoets, gao-aots tawa nî ǀhaoǀhao, ǃgaeǀhao-en nî sats ǀkha dīse îts satsa ǀoms âts hoas ra ǂgaon hoan ǂama gao. Nētib ge Daviba Abnera ge ǃgû kai, tsîb ge ǂkhîb ǃnâ ge ǃgû.

²²Tsî mû, Davib di ǃgāgu tsî Joab tsîgu ge toroǂnubisa xu ge hā, tsî gu ge kai ǁkhâuǁnâsa ǁîgu ǀkha ge ūhā. Tsî Abneri ge Davib ǀkha Hebrons tawa ge hâ tama hâ i, ǁîbab ge ǃgû kai amaga, tsîb ge ǂkhîb ǃnâ ge ǃgû hâ i.

²³Tsî Joab ge ǂnubis, ǁîb tawa hâs hoas ǀkha hāo, on ge Joaba ǂanǂan tsî ge mî: Abneri, Neri ôab, ge gao-aob tawa go hā, tsîb ge ǁîba go ǃgû kai, tsîb ge ǂkhîb ǃnâ go ǃgû.

²⁴ǃNubaib ge Joaba gao-aob tawa ǂgâ tsî ge mî: Tare-ets go dī? Mû, Abneri ge sa tawa go hā; tarexats kha ǁnâi ǁîba go xū, ob ǁnāti ǃnorasase go ǃgû?

²⁵Sats ge Abnera a ǂan, Neri ôaba, sa tawab go hā ǃkhaisa, satsab nî gāse tsî ǂoas âts tsî ǂgâs âtsab nî ǂanse, ā, dīts ran hoanab nî ǂanse.

²⁶Ob ge Joaba Daviba xu ǂoa tsî Abnera sîsabega ge sîǃgon, tsî gu ge ǁîba Siras di tsausa xu ge ūdawa; xawe Davib ge ǁîsa ǀū ge i.

²⁷Tsî Abneri ge ǁkhawa Hebrons tawa sīo, ob ge Joaba ǁîba ǀgui ǀkhāb ai ge ǂgaeǂgui, ǁāb ǁaegub kōse, ǁîb ǀkhab nî ǃnōsasib ǃnâ ǃhoase; tsîb ge ǁnāpa koroǁî ǀarab ǃnâ ge ǃkhā bi, ǁōb ges kōse, ǁîb di ǃgâsab Asaeli di ǀaob ǃaroma.

²⁸Tsî Davib ge ǁnâuo, ob ge ge mî: Tita ge a ǀhapio, tsî ti gaosis on ǃKhūb tawa, ǀamosib kōse Abneri, Neri ôab di ǀaob tawa.

²⁹Ab ǁîba Joab danas ai hā tsî ǁîb îb di ommi hoaragab ai; î-i Joab di omma xu tā ǃgaoǁnâhe ǁnā-i, ǂnâ-e ūhâ-e tsî ǃomamaxa-e tsî ǁgâibasenhaisa ra ǃkhō-e tsî gôaba xu ra ǁnā-e tsî pereba tôasi hâ-e.

³⁰Nēti kha ge Joab tsî Abisaib, ǁîb ǃgâsab tsîkha Abnera ge ǃgam, ǁîkha ǃgâsab Asaelab ge ǃkhammi ǃnâ Gibeons tawa ǃgam xui-ao.

³¹Tsî Davib ge Joab ǃoa tsî ǁaes, ǁîb tawa hâs ǃoa ge mî: ǀKhau sadu sarana î du ǁhōga ana î du Abneri aiǃâ ǃgae. Tsî gao-aob Davib ge tanixūsa ge sao.

³²Tsî Abneran ge Hebrons tawa ǁkhō-o, ob ge gao-aoba dommi âba ūkhâi tsî ge ā Abneri di ǀhobas tawa; ǁkhātis ge ǁaes hoasa ge ā.

³³Tsî gao-aob ge Abneri ǂama ǃgae-ai-e dī tsî ge mî: Abnera kha go ǁō, gâre khoe-i ra ǁō khami?

³⁴Sa ǃomkha ge ǃgaehe tama ge hâ i, tsî sa ǂaira ge ǂaiǃgae-ūdan ǃnâ ǁkhamhe tama ge hâ i, tsîts ge go ǁnā, khoe-i ǂkhabasib di ôan di ais aiǃâ ra ǁnā-i xase. ǁGoasis ge ǁaes hoasa ǁnās ǃgâ-ai ǁîb ǂama ge ā.

³⁵ǁNās khaoǃgâs ge ǁaes hoasa ge hā, Daviban nî pere-e ǂû kaise, ganupe i a ǃnâsa hîa; xawe Davib ge nū tsî ge mî: Eloba ab nēti dī-ū te îb ǁnāti dīǀaro te, sores ganupe ǂgâ tama hâ hîa ta ga pere-i kas, ǀnî xū-i kas hoasa tsâtsâo.

³⁶Tsî ǁaes hoas ge ǁnâuo, o i ge ge ǃgâi i ǁîn di mûǁae; gao-aob xa goro dīhen hoan ge ǁaes hoas di mûǁae ǃgâi ge i.

³⁷Tsî ǁaes hoas tsî Israeli hoab ge ǁnātsē ge hōǃâ, gao-aoba xu i hâ tamasa, Abneri, Neri ôab go ǃgamhe ǃkhaisa.

³⁸ǃAruǀîb ge gao-aoba ǃgāgu âb ǃoa ge mî: ǂAn tama go kha hâ, nētsēb gaosab, ā, kaikhoeba Israeli ǃnâ go ǁnā ǃkhaisa?

³⁹Tsî tita ge nētsē a tsaura tsî ǂkhauǀkhāhe hâ gao-ao, xawe nē aokha, Serujas ôakha ge tita ǃgâ-ai a karosa: Elob ge ǂkhabadī-aoba nîra mādawa-am ǁîb di ǂkhabasib ǃoa.