Read Khoekhoegowab 2 Samueli 4 Bible Online

2 Samueli 4 - Khoekhoegowab bible

2 Samueli 4

¹Tsî Sauli ôab ge ǁnâuo, Abneri go ǁō ǃkhaisa, ob ge ǃomkha âba ge ǃopo, tsî Israeli hoab ge ge ǃhuri.

²Tsî Sauli ôab ge ǀgam aokha ge ūhâ i, ǂnubidi di ǂamsakha: ǀGuib ge Baana ti ge ǀon hâ i, tsî naub ge Rexa ti ge ǀon hâ i, Rimonni, Beerotǁîb, Benjaminni ôan di ôakha. Beerots ge ǁkhāti Benjaminni ǀkha ǃgôahe xui-ao.

³Tsî Beerotǁîn ge Gitajims ǃoa ǁhâ tsî ǁnāpa ǃhaokhoese ge hâ nētsēs kōse.

⁴Tsî Jonatanni, Sauli ôab ge ǀgôaba ge ūhâ i, ǂaira ai ǃhoraba. ǁÎb ge koro kurixa ge i, Sauli tsî Jonatanni tsîkha di gommi ge Jesreelsa xu hā ǃnubai; os ge ǃûi-aos âba ǁîba ūkhâi tsî ge ǃhū; tsî i ge ge ī, ǃhae tsîs ra ǃhū hîab ge ǁîba ǁnā tsî ǃhora ǃkhaisa; tsî Mefiboset tib ge ge ǀon hâ i.

⁵Tsî Rimonni, Beerotǁîb di ôakha, Rexab tsî Baanab tsîkha ge ǃgû tsî Isboseti ommi tawa ge sī, tsēs ra ǀgam hîa; tsîb ge kharob ai tsēǃgâǁgoe ge hâ i.

⁶Tsî kha ge ommi di ǁaegub kōse ge sī, ǃhoroba kha ra ū xū-i khami; tsî kha ge ǁîba koroǁî ǀarab ǃnâ ge ǃkhā; tsî Rexab tsî ǃgâsab âb Baanab tsîkha ge ge ûi.

⁷ǁÎkha ge ommi ǃnâ sī xui-ao, ǁomǃnâ-oms ǃnâb kharob âb ai ǁgoe hîa, tsî ge ǃkhā tsî ǃgam bi tsî danas âba ge ǁhāǁnâ; tsî kha ge danas âba ū tsî ge ǃgû, ǂgāsa-ū gau daob ai, ǁnā tsuxub hoaba.

⁸Tsî kha ge Isboseti di danasa Davib ǁga Hebrons tawa ūsī tsî gao-aob ǃoa ge mî: Kō, nēs ge danas Isboseti, Sauli sa khākhoeb, ǀoms âtsa ge ôab di ôab disa. Nētib ge ǃKhūba ti ǀhonkhoe gao-aotsa nētsē go ǀkhaoba Sauli tsî ǁîb di surib tawa.

⁹Ob ge Daviba Rexab tsî ǁîb di ǃgâsab Baanab, Rimonni, Beerotǁîb di ôakha ǃeream tsî ge mîǀî: ǃKhūb a ûitsama ǃkhais ao, ti ǀomsa ǂōǂōsib hoaba xu ge oreba:

¹⁰ǁNāb, tita ge ǂhôa tsî: Sauli ge ǁō hâ, ti mîb, ǁîb mûǁae ǃgâi ǂhôa-e ra ūhāb axase ge ī ib, xawe ta ge ǃkhō tsî Siklags tawa ge ǃgam bi, sîsabe-amǃnâsab nî hō, tib ǂâi hâ hîa.

¹¹Matikōse ǁnās ǃgâ-ai ta ǁnāti nî dī, eloxoresa khoekha ga ǂhanu-ai aoba ommi âb ǃnâ kharob âb ai ǃgamo? Tsî ta kha ǁîb di ǀaoba sakho ǃomǁaeba xu ǂgaoǀkhā tsî sakho ǃhūbaiba xu dībē tide?

¹²Ob ge Daviba ǂkham khoegu âba ge mîmā, tsî gu ge ǁîkha ǃgam tsî ǃomgu âkha tsî ǂaidi âkha ǁhāǁnâ tsî ǁîna Hebrons tawa hâ ǃkhubis amǃgâ ge ǂgāmâi, xawe Isboseti di danasa gu ge ū tsî Abneri ǀhobas ǃnâ ge ǁkhō, Hebrons tawa.