Read Khoekhoegowab 2 Samueli 5 Bible Online

2 Samueli 5 - Khoekhoegowab bible

2 Samueli 5

¹ǃNubaib ge Israeli hoaba Davib ǀkha ge ǀhao Hebrons tawa, mî rase: Mû, sida ge sa ǂkhōda tsî sa ǁganda ti.

²ǁNās xōǀkhāts ge a ǁî, Sauli sida ǂama a gao-ao hîa Israela ǂgaeǂguiǂoa tsî ge ūǂgâxatsa; ǁkhātib ge ǃKhūba sa ǃoa ge mî: Sats ge ti ǁaes Israelsa nî ǃûi, tsîts ge nîra aiǃgû-ao Israeli ǂama.

³Nēti gu ge Israeli di kaigu hoaga gao-aob ǃoa Hebrons tawa ge sī; tsî gao-aob Davib ge ǁîgu ǀkha ǃgaeǀhao-e ge dī Hebrons tawa ǃKhūb di ais aiǃâ; tsî gu ge Daviba Israeli di gao-aose ge ǂkhauǀkhā.

⁴Davib ge ǃnonadisi kurixa ge i, gao-ao kaib ge ǃnubai; hakadisi kurigab ge ge gaosîsen.

⁵Hebrons tawab ge Judab ǂama hû kurigu tsî ǃnani ǁkhâgu kōse ge gaosîsen; tsî Jerusalems tawab ge ǃnonadisiǃnonaǀa kurigu kōse Israeli tsî Judab hoab ǂama ge gaosîsen.

⁶Tsî gao-aob ge khoegu âb ǀkha Jerusalems ǃoa ge ǃapa, Jebusǁîn ǃhūb ǃnâ ǁan hân ǃoagu. Tsîn ge Davib ǃoa ǃhoa tsî ge mî: Sats ge nēpa ǂgâxa tide, ǂgī hân tsî ǃhoran tsîn ge satsa nî doeǁgabē, ǁnās ge Davib ge nēpa ǂgâxa tide ti mîsa.

⁷Xawe Davib ge ǁaposa ǃkhais Sionsa ge ū: Davib di ǃās ge ǁîsa.

⁸Tsî Davib ge ǁnā tsēs ǁkhās ai ge mî: Jebusǁîna ga ǂnaub hoab, tsî ǁnā ǁgammi dâuǃkhais kōse ga sīb hoab, tsî ǁnā ǃhoran tsî ǂgī hân, Davib di ǀomsa ǁkhan hân kōse (ǁnāb ge dana tsî ǂamkhoese nî ī); ǁnā-amagan ra mî: ǂGī hâ-i tsî ǃhora-i ge ommi ǃnâ ǂgâxa tide.

⁹Nētib ge Daviba ǁaposa ǃkhais ǃnâ ge ǁan, tsîb ge Davib di ǃās ti ge ǂgai si. Tsî Davib ge Milosa xu ǃnāb kōse ǃāsa ge ǂnubi.

¹⁰Tsî Davib ge ǃaruǀîǀgui ǀom tsî ge kai, ǃKhūb ǂnubidi di Elob ge ǁîb ǀkha hâ i xui-ao.

¹¹Tsî Hirammi, Tires di gao-aob ge sîsabega ge sî Davib ǃoa, tsî sederhaigu, haikuru-aogu tsî ǂnubi-aogu tsîna; tsî gu ge Daviba omma ge ǂnubiba.

¹²Tsî Davib ge ge hōǃâ, ǃKhūb ǁîba Israeli ǂama gao-aose ge ǁapoǁapo tsî gaosis âbab ǁîba ge ǀgapiǀgapi ǃkhaisa, ǁîb di ǁaes Israels ǃaroma.

¹³Tsî Davib ge ǃnāsase ǂgui xōǀkhātarade ge ū, taradi Jerusalems didi xa, Hebronsa xub ge hās khaoǃgâ; tsî Davib ge ǁnās ǃgâ-ai ǂgui ǀgôagu tsî ǀgôadi tsîna ge ǁorabahe.

¹⁴Tsî nēdi ge ǀondi ǁnāgu, Jerusalems ǃnâb ge ǁorabahegu dide: Samuab, Sobab, Natanni, Salomob,

¹⁵Jibhari, Elisuab, Nefegi, Jafiab,

¹⁶Elisamab, Eljadab tsî Elifeleti tsîga.

¹⁷Tsî Filisteǁîn ge ǁnâuo, Daviban ge Israeli ǂama gao-aose ǂkhauǀkhā ǃkhaisa, on ge Filisteǁîn hoana ge ǃgû, Daviban nî ôase. Ob ge Daviba, ǁnâub geo ǁaposa ǃkhais ǃoa ge ǁgôa.

¹⁸Tsî Filisteǁîgu ge hā tsî ge khorasen Rafaims di ǃgoaǃnāb ǃnâ.

¹⁹Ob ge Daviba ǃKhūba dî tsî ge mî: ǃApa ta nî Filisteǁîn ǃoagu? Māts nî ǁîna ti ǃomǁae? Ob ge ǃKhūba Davib ǃoa ge mî: ǃApa re, Filisteǁîna ta ge tita sa ǃomǁae nîra mā xuige.

²⁰ǃNubaib ge Daviba Baal-Perasims tawa ge sī; tsî Davib ge ǁîna ǁnāpa ǂnau tsî ge mî: ǃKhūb ge ti khākhoena ti ais aiǃâ go ǃkhopaǃganu, ǁgammi ra ǃkhopa khami. ǁNā-amagab ge ǁnā ǃāsa Baal-Perasim ti ge ǂgai.

²¹Tsîn ge ǁîn di ǁgôa-eloga ǁnāpa ge ǁnāxū; tsî Davib tsî ǁîb di khoegu ge ǁîga ge ūsao.

²²ǁNās khaoǃgân ge Filisteǁîna ǁkhawa ge ǃapa, tsîn ge ǃgoaǃnāb Rafaimmi ǃnâ ge khorasen.

²³Tsî Davib ge ǃKhūba dî, tsî ge mîbahe: Sats ge ǃapa tide, îts ǃgâb ân ǃoa naru, îts ǁîn ǃoa-ai hā ǀgoede xu.

²⁴Tsî ī i kao, ǀgoedi di ǂaogu aits ga īgau ǀō-e ǁnâuo, ǃnubai gon, ǃKhūb go ǁnāǃnubai sa ais aiǃâ ǂoa xuige, Filisteǁîn di ǂnubideb nî ǂnause.

²⁵Ob ge Daviba ǁnāti ge dī, ǃKhūb ge mîmā bi xase; tsîb ge Filisteǁîna ge ǂnau Gebasa xu Gesers kōse.