Read Khoekhoegowab 2 Samueli 6 Bible Online

2 Samueli 6 - Khoekhoegowab bible

2 Samueli 6

¹ǁNās khaoǃgâb ge Daviba ǁkhawa Israeli di ǃkhōǂuihesagu hoaga ge ǀhaoǀhao, ǃnonadisiǀoadisi khoega.

²Tsî Davib ge khâi tsî ge ǃgû ǁnā ǁaes, ǁîb tawa hâs hoas ǀkha Baale-Judas ǃnâ hâs ǁgā, ǁnāsa xub nî ūǃapase Elob di ǂgaes, ǁîs tawas ra ǀonsa ǂgaiǀîhesa, ǁnā ǃKhūb ǂnubidi dib, hîa ǁîs ai xerukha ǁaegu ǁan hâb di ǀonsa.

³Tsî gu ge Elob di ǂgaesa ǀasa kunis ai ǃnao tsî ǁîsa ge ūbē Abinadab di oms, ǃnoms ai hâsa xu; tsî Usab tsî Ahiob, Abinadab ôakha ge ǀasa kunisa ge doeǁga.

⁴Tsî ǁîsa kha Abinadab di oms, ǃnoms ai hâsa xu Elob di ǂgaes ǀkha ge doeǁgabēo, ob ge Ahioba ǂgaes aiǃâ ge ǃgûgau i.

⁵Tsî Davib tsî Israeli ommi hoaragab ge ǃKhūb di ais aiǃâ gere ǀkhō denehaiǀkhō-ūdan hoan ai, harpdi, ǀō ra xūn, ǃkhuwuǃkhuwudi, ǁkhāti sxeln tsî simbaln tsîn ǀkha.

⁶Tsî Naxonni di dāǃnâǃkhais tawa kha ge sīo, ob ge Usaba ǃommi âba ǂgaesǀî ǀhōǂui tsî ge ǂhē si, gomagu ge ǂgō xui-ao.

⁷ǃNubaib ge ǃKhūb di ǁaiba ge ǂhubi Usabǀî, tsî Elob ge ǁîba ǁnāpa ge ǂnau ǃkhōb ge ǃkhais ǃaroma; tsîb ge ǁnāpa ge ǁō Elob di ǂgaes tawa.

⁸Ob ge Daviba ge ǁaixa, ǃKhūb ge ǀkhau-e go ǀkhau Usab tawa xui-ao, tsîb ge ǁnā ǃāsa Peres-Usa ti ge ǂgai, nētsēs kōse.

⁹Tsî Davib ge ǁnātsē ǃKhūba ge ǃao, tsîb ge: Matis kha ǁnâi ǃKhūb di ǂgaesa tita ǃoa nî hā? ti ge mî.

¹⁰Tsî Davib ge ǃKhūb di ǂgaesa ǁîb ǃoa ūhā kai ǂgao tama ge i Davib di ǃās ǃnâ; ob ge ǁîsa Obed-Edommi, Gatǁîb di oms ǃnâ ge ūsī kai.

¹¹Tsî ǃKhūb di ǂgaes ge Obed-Edommi, Gatǁîb di oms ǃnâ ǃnona ǁkhâgu kōse ge hâ tsî ǃKhūb ge Obed-Edommi tsî ǁîb di ommi hoaragaba ge ǀkhae.

¹²ǁGoasin ge gao-aob Daviba ǂhôa tsî ge mî: ǃKhūb ge Obed-Edommi ommi tsî ūb hân hoana ge ǀkhae, Elob di ǂgaes ǃaroma. Ob ge Daviba ǃgû tsî Elob di ǂgaesa Obed-Edommi omsa xu ge ūǃapa Davib di ǃās ǃnâ ǃgâiaǂgaob ǀkha.

¹³Tsî i ge ge ī, ǁnāgu, ǃKhūb di ǂgaesa ra tanigu ge ǃnani dāǃharode ǃgû ǃnubaib ge ǁîba gomagu tsî kausa gūna ǁguiba ǃkhaisa.

¹⁴Tsî Davib ge ǀgaib hoab ǀkha ǃKhūb di ais aiǃâ ge ǂnā; tsî Davib ge lineǁkhaisaraba ge anasen hâ i.

¹⁵Nētin ge Davib tsî Israeli ommi din hoana ǂgaes ǃKhūb di ǃgaeǀhaos disa ge ūsī dâb ǀkha tsî ǀgapadas di ǀōb ǀkha.

¹⁶Tsî i ge ge ī, ǂgaes ǃKhūb di ǃgaeǀhaos dis ge Davib di ǃās ǃnâ sīo, os ge Mixals Sauli ôasa mûǂuidaosa-ū ge ǂui. Tsî gao-aob Davibas ge ǃKhūb di ais aiǃâ uri tsî ra ǂnāse mûo, os ge ǁîba ǂgaob âs ǃnâ ge ǃharaxū.

¹⁷Tsî ǃKhūb di ǂgaesa gu ge ūǂgāo, o gu ge ǁîsa ǁîs di ǃkhais ai ge mâi tentoms, Davib ǁîsa go ǂnaumâibas ǃnâ; tsî Davib ge khauǁguibadi tsî ganganǁguibadi tsîna ǃKhūb di ais aiǃâ ge ǁguiba.

¹⁸Tsî Davib ge khauǁguibadi tsî ganganǁguibadi tsîna ǁguibatoao, ob ge ǁaesa ǃKhūb ǂnubidi dib di ǀons ǃnâ ge ǀkhae.

¹⁹Tsîb ge ǁaes hoas tsî Israeli di ǂguib hoaba, aoga xu taradi kōse mâ-i hoa-i âna, amperedab tsî îsa ǁgan-i di ǃâ-i tsî ǃkhare ǃgapas di ǂauxûib tsîna ge ǂhûi. ǃNubais ge ǁaes hoasa ge ǃgû, mâ-i hoa-e ǁî-i di oms ǃoa.

²⁰Tsî Davib ge ǁkhawa oao, ommi âbab nî ǀkhaega, os ge Mixals Sauli ôasa, Daviba ǃgûǃoa tsî ge mî: Matits kha Israeli di gao-aotsa nētsē go ǂkhaiǂkhaisen, nētsē ǃgāgu âts tsî ǃgādi aiǃâ go ǀkhaiǀkhākaisentsa, ǁau khoen di ǀgui-i ra ǀkhaiǀkhākaisen khami?

²¹Xawe Davib ge Mixals ǃoa ge mî: ǃKhūb di ais aiǃâ, sa îs tsî sa îb di ommi hoab ǃgâ-ai tita ge ǃkhōǂuib, Israeli, ǃKhūb di ǁaes ǂama gao-aose ra ǂnûiǂgā teb aiǃâ, ā, ǃKhūb di ais aiǃâ ta ge nî ǀkhō.

²²Tsî tita ge nē ta īs ǃgâ-ai nî ǂkhari ti mûǁae tsî ǁnā ǃgādi, sas go ǁîdi xa mîdi, ǁîdi ǀkha ta ge nî ǂkhaiǂkhaihe.

²³Tsî Mixals, Sauli di ôas, ge ǀgôao ge i, ǁōs ge tsēs kōse.