Read Khoekhoegowab 2 Samueli 7 Bible Online

2 Samueli 7 - Khoekhoegowab bible

2 Samueli 7

¹Tsî i ge ge ī, gao-aob ge ommi âb ǃnâ ǂnûo tsî ǃKhūb ge ǁîba sâba māo ǁîb ǂnamipe hâ khākhoen hoana xu,

²ob ge gao-aoba kēbo-aob Natanni ǃoa ge mî: Kō re, tita ge sederommi ǃnâ ǁan hâ, tsî Elob di ǂgaes ge îǂgoagu ǃnâ ǁan hâ.

³Ob ge Natanna gao-aob ǃoa ge mî: ǃGû îts sa ǂgaob ǃnâ hân hoana dī, ǃKhūb sats ǀkha hâ xuige.

⁴Xawe i ge ǁnā tsuxub ǁkhāb ǃnâ ge ī, ǃKhūb mîs ge Natanni ǃoa hā ǃkhaisa, mî rase:

⁵ǃGû îts ti ǃgāb Daviba sī mîba: Nētib ra ǃKhūba mî: Satsa kha tita om-e nî ǂnubiba ti ǁanǃkhaise?

⁶Tita kom om-i xare-i ǃnâ ge ǁan tama hâ io, Israeli ôana ta ge Egipteba xu ǂgaeǂguiǂui tsēsa xu nētsēs kōse, tsî ta kom tita tentoms ǃnâ tsî tabernakeli ǃnâ gere ǃgûmao.

⁷Israeli ôan ǀkha ta gere ǃgûma ǃkhai-i hoa-i tawa, xare ǀgui mîsa xawe mî ta ge, ǁnā ǂhanuǂhanu-aogu Israeli digu, ti ǁaesa gu nî ǃûi, ti ta ge mîmā gu di ǀguib ǃoa: Tare xū-i ǃaroma du kha ǁnâi sederom-e ǂnubiba te tama hâ? ti.

⁸Tsî nēsits ge nēti ti ǃgāb Davib ǃoa nî mî: Nētib ra mî ǃKhūb ǂnubidi diba: Tita ge satsa gūn di ǃû-aisa xu, gūn khaoǃgâba xu ge ū, ti ǁaes Israels di aiǃgû-ao kaits nîga.

⁹Tsî tita ge sa ǀkha ge hâ i, ǃgûts gere ǃkhai-i hoa-i tawa, tsî ta ge sa khākhoen hoana ais âtsa xu ge hîkākā; tsî tita ge satsa kai ǀonsa ge dība ǁnā kaigu, ǃhūbaib ai hâgu di ǀons ǁkhās xase.

¹⁰Tsî tita ge ti ǁaes Israelsa ǃkhai-e ge ǁāǁāba tsî ǁîsa ge ǂgā, ǁîs di ǃkhais ais nî ǁanga tsî ǃaruǀîs doeǁgamahe tidega; tsî ǂkhabasib di ôan ǁîsa ǃaruǀî ǁgâiǀā tidega, ǂguro i ge ī i khami.

¹¹ǂHanuǂhanu-aogu nî ti ǁaes Israels ǂama hâsa ta ge mîmā tsēsa xu ta ge tita satsa ǁkhāti sâba ge mā sa khākhoen hoana xu. ǁKhātib ra ǃKhūba ǂanǂan tsi, ǃKhūb satsa omma nîra dība ǃkhaisa.

¹²Sa tsēdi ga ǀoao tsî sa îgu tawats ga ǁkhōheo, o ta ge tita surib âtsa sa khaoǃgâ nîra khâi kai, sa sorosa xu nî ǀkhība, tsî tita ge gaosisa ǁîba nîra ǁapoǁapoba.

¹³ǁÎb ge ti ǀonsa omma nîra ǂnubiba, tsî tita ge trons ǁîb di gaosis disa nîra ǁapoǁapo, ǀamosib kōse.

¹⁴Tita ge ǁîba ǁgûse nîra ība, tsî ǁîb ge tita ǀgôase nîra ība, tsî ta ge tita, dīsāb kao, khoe-i di hais ǀkha tsî khoen ôan di ǁnora-aigu ǀkha nîra ǁkhara bi.

¹⁵Xawe ti ǀkhomxasib ge ǁîba xu ǂgō tide, Sauli sa ais aiǃâba xu ta ge ūbēba xu ta ge ūbē khami.

¹⁶Tsî sa ommi ge nîra mâhō tsî gaosis ona ǀamosib kōse ti ais aiǃâ; sa trons ge nîra mâǁapo ǀamosib kōse.

¹⁷Nē mîdi hoadi ǃoa tsî nē ai-i hoa-i ǃoab ge Natanna Davib ǁga gere ǃhoa.

¹⁸ǃNubaib ge gao-aob Daviba ǂgâ tsî ǃKhūb di ais aiǃâ ǂnû tsî ge mî: Tari ta tita, ǃKhūtse, Elotse, tsî tareba ti omma, ots nētikōse go ūhā te?

¹⁹Tsî nēs ge sa mûǁae ganupe ǂkhari ge i, ǃKhūtse, Elotse, tsîts ge ǁkhāti sa ǃgāta di ommi xa ǃnūse ǃgoaxa xūn xa goro ǃhoa; tsîts ge ǁîsa khoen di dommi ai goro dī, ǃKhūtse, ǃKhūtse.

²⁰Tsî tare-e ta Davita ǃaruǀî nî ǃhoa sa ǃoa? Sats kom sa ǃgāta a ǂano, ǃKhūtse, ǃKhūtse.

²¹Sa mîs ǃaroma tsî sa ǂgaob ǃoats ge satsa nē kai xūn hoana goro dī, sa ǃgātats nî ǁîna ǂanǂanga.

²²ǁNā-amagats ge satsa a kai, ǃKhū Elotse, khoe-i xare-i ge sats khami ī tama hâ, tsî ǀnî Elo-i xare-i ge hâ tama hâ, sats ǀguits, sida ǂgaedi ǀkha da ge ǁnâu khami.

²³Tsî mâ ǁae-e kha sa ǁaes Israels khami ī ǃhūbaib ai, Elob ge ǃgû tsî orebasensa ǁîb di ǁaese, tsî ǀonsab nî dībasense tsî nē kai tsî ǃhuriǃhurisa xūnab nî dība duse, sadu di ǃhūb tawa ǁaes âts aiǃâ, Egipteba xuts ge orebasensa, ǀūben tsî elogu âna ra doeǁgaǂuiǃâ?

²⁴Tsîts ge sa ǁaes Israelsa ǁaese ge ǁapoǁapobasen ǀamosib kōse, tsî sats ǃKhūts ge ǁîna go Elo kaiba.

²⁵Tsî nēsi ǁnâi, ǃKhū Elotse, nē mîs sa ǃgāta ǂama tsî ommi âtab ǂamats goro ǃhoasa, as ǁîsa mâhō ǀamosib kōse îts sats goro ǃhoa xase dī.

²⁶Îs sa ǀonsa kaikaihe ǀamosib kōse; în khoena mî: ǃKhūb ǂnubidi dib ge a Elo Israeli ǂama, ob ge ommi sa ǃgāb Davib diba nîra mâhō sa ais aiǃâ.

²⁷Sats ǂnubidi di ǃKhūts, Israeli di Elotse, sats ge sa ǃgāta ǂgaera ǃnâ ǂhaiǂhai tsî: Tita ge satsa omma nîra ǂnubiba, ti ge mî. ǁNā-amaga ta ge sa ǃgāta ǁkhoaǂgaosiba go hō, nē ǀgoresa ta nî sa ǃoa ǀgorese.

²⁸Tsî nēsi, ǃKhūtse, ǃKhūtse, sats ge ǁnā Elotsa, tsî sa mîdi ge nîra ama, tsî sats ge nē ǃgâiba sa ǃgāta ǃoa goro ǃhoa,

²⁹îts ǁnâi nēsi ǃgâibahe re, sa ǃgāta di omma ǀkhaesa, îb ǀamosib kōse sa ais aiǃâ hâ: Sats, ǃKhūtse, ǃKhūtse, sats ǁîsa goro ǃhoa xui-ao, tsî sa ǀkhaeb ǀkhab ge sa ǃgāta di omma nîra ǀkhaehe, ǀamosib kōse.