Read Khoekhoegowab 2 Samueli 8 Bible Online

2 Samueli 8 - Khoekhoegowab bible

2 Samueli 8

¹Tsî i ge ǁnās khaoǃgâ ge ī, Davib ge Filisteǁîna ǂnau tsî ǁîna dā ǃkhaisa; tsî Davib ge gaoǂamsisa Filisteǁîn di ǃomǁaeba xu ge ūbē.

²ǁKhātib ge Moabǁîna ǂnau tsî ǀguiro-ūtsurib ǀkha ǁîna ge ǀguiro, ǃhūb ai ǁîna ǁgoe kai tsî; tsîb ge ǀgam ǀguirotsurikha ǀkha ge ǀguiro, ǃgamhe nîna, tsî ǀgui ǀoa hâ ǀguirotsurib ǀkha ûi kaihe nîna. Nētin ge Moabǁîna ge Davib di ǃgā kai, ǀkhaexūna ra ūhāǃâ.

³Tsî Davib ge Hadad-Eseri, Rehob ôab ona ge ǂnau, Sobas di gao-aoba, ǃgûb gau hîa, ǀgaib âbab nî ǁkhawa hōga ǃāb Eufrati tawa.

⁴Tsî Davib ge ǁîba xu ge ūbē ǀguiǀoadisi kunidi tsî hûkaidisi ǃgapi-aogu tsî ǀgamdisiǀoadisi ǀnūǃgû-aoga; tsî Davib ge kunihāgu hoaga ge ǃkhaiǃnôa tsî ǀguikaidisigu ǀguiga ge ǃgaubasen.

⁵Tsî Siriaǁîgu ge Damaskusa xu ge hā, Hadad-Eseri, Sobas di gao-aoba gu nî huiga; xawe Davib ge Siriaǁîgu xa ǀgamdisiǀgamǀaǀoadisi khoega ge ǂnau.

⁶Tsî Davib ge toroǂnubide Damaskus Siriab dis ǃnâ ge ǂnûi, tsî Siriaǁîn ge Daviba ge ǃgā kaiba, ǀkhaexūna ra ūhāse. Tsî ǃKhūb ge Daviba gere sâu ǃgûǂoab gere ǃkhai-i hoa-i tawa.

⁷Tsî Davib ge ǃhuniǀurikhōsikhōgu, Hadad-Eseri ǃgāgu di ge iga ū tsî ǁîga Jerusalems tawa ge ūsī.

⁸ǁNās tawab ge gao-aob Daviba kaise ǂgui ǂaiba ge ū Betaxsa xu tsî Berotaisa xu, Hadad-Eseri di ǃāra.

⁹Tsî Toib, Hamats di gao-aob ge ǁnâuo, Davib ge Hadad-Eseri di ǂnubis hoasa ǂnau ǃkhaisa,

¹⁰ob ge Toiba ǁîb di ôab Joramma gao-aob Davib ǃoa ge sî, ǃgâihâsib âb xab nî dî biga tsî ǁîbab nî ǀkhaega, Hadad-Esera ǃkhamū tsîb ge ǁîba ǂnau ǃkhais xa, Hadad-Eseri hugaǀgui gere torodī Toib ǀkha xui-ao, tsî ǃomǁaeb âb ǃnân ge ǀhaiǀurisoan, ǃhuniǀurisoan tsî ǂaisoan tsîna ge hâ i.

¹¹Nēn onab ge gao-aob Daviba ǁkhāti ǃKhūba ge khaiba, ǁnā ǀhaiǀurib tsî ǃhuniǀurib tsîkha ǀūben, hîab ge danna xub ge ūhākha ǀkha;

¹²Edomǁîna xu, Moabǁîn, Amonni ôana xu, Filisteǁîna xu, Amalekǁîna xu tsî Hadad-Eseri, Rehob ôab, Sobas gao-aob di ǁkhâuǁnâxūna xu.

¹³ǁKhātib ge Daviba ǀonsa ge dībasen, oab ge ǃnubai, Siriaǁînab ge ǂnaus khaoǃgâ, ǂōxa ǃgoaǃnāb ǃnâb disiǁkhaisaǀaǀoadisi khoegu kōse Edomǁîna ge ǂnaus ǀkha.

¹⁴Tsîb ge toroǂnubide Edommi ǃnâ, Edommi hoaragab ǃnâ ge ǂnûi; tsî Edomǁîn hoan ge ge Davib di ǃgā kai; tsî ǃKhūb ge Daviba ǃgûbab ge ǃkhai-i hoa-i ai ge sâu.

¹⁵Nētib ge Daviba Israeli hoab ǂama gere gao, tsî Davib ge ǁîb di ǁaes hoasa ǂhanub tsî ǂhanu-aisib tsîkha ǀkha gere sîsenū.

¹⁶Tsî Joab, Serujab ôab, ge ǂnubis ǂama ge hâ i; tsî Josafati, Ahiludi ôab, ge ǂkhanisâu-ao ge i.

¹⁷Tsî Sadoki, Ahitub ôab, tsî Ahimelexi, Abjatari ôab tsîkha ge prister ge i; tsî Serajab ge xoa-ao ge i.

¹⁸Tsî Benajab, Jojadab ôab on ge Keretǁîgu tsî Peletǁîgu ǂama ge hâ i; Davib di ôagu ge prister ge i.