Read Khoekhoegowab 2 Samueli 9 Bible Online

2 Samueli 9 - Khoekhoegowab bible

2 Samueli 9

¹Tsîb ge Daviba ge mî: Khoe-i, Sauli ommi ǃnâ ge ǃgau-e xare hâ-i a, ǃgâidī-e ta nî ǁî-e dī-ūse Jonatanni ǃaroma?

²Tsî Sauli di ommi ge ǃgāba ge ūhâ i, Siba ti ǀon hâba; on ge ǁîba Davib ǃoa ge ǂgai. Ob ge gao-aoba ǁîb ǃoa ge mî: Sibatsa satsa? Ob ge: Sa ǃgāta ge, ti ge mî.

³Ob ge gao-aoba ge mî: Xare hâ tama i hâ khoe-i Sauli ommi di-e, î ta Elob di ǃgâidība ǁî-e dī-ū? Ob ge Sibaba gao-aob ǃoa ge mî: ǀGui ǀgôab Jonatanni dib ǀguib ge ganupe hâ, ǃhora ǂaira â-iba.

⁴Ob ge gao-aoba ǁîb ǃoa ge mî: Mapab hâ? Ob ge Sibaba gao-aob ǃoa ge mî: Mû, ǁîb ge Maxiri, Amieli ôab di oms ǃnâ hâ, Lo-Dabars tawa.

⁵ǃNubaib ge gao-aob Daviba sî tsî ǁîba Maxiri, Amieli ôab di omma xu ge ǀkhī kai, Lo-Dabarsa xu.

⁶Tsî Mefiboseti, Jonatanni, Sauli ôab di ôab ge Davib tawa ǂgâxao, ob ge ais âb ai ǁnāǁgoe tsî ge ǃhonǁgoa. Ob ge Daviba: Mefibosetse, ti ge mî. Ob ge ǁîba: Mû, nē ta a, sa ǃgāta, ti ge mî.

⁷Ob ge Daviba ǁîb ǃoa ge mî: Tā ǃao, ǂanǂansase ta ge ǃgâidība nî dī-ū tsi xuige, Jonatanni sa îb ǃaroma; tsî ta ge Sauli, sa îb di ǃhanagu hoaga nîra mādawa tsi; tsî sats ge hugaǀgui nîra pereǂû ti tāb tawa.

⁸Ob ge ǃgamǃgâ tsî ge mî: Tareta sa ǃgāta, ots ra ǁō hâ ari-i, tita khami-e kōǃgâ?

⁹ǃNubaib ge gao-aoba Sibab, Sauli di ǃgāba ǂgai tsî ǁîb ǃoa ge mî: Sauli ge ūhâ in hoan tsî ommi âb hoaragaba ta ge sa ǀhonkhoeb di ôaba go mā.

¹⁰ǁNā-amaga go sats tsî sa ôagu tsî sa ǃgāgu tsîgo ǃhanaba ǁîba sîsenba, î go ǂûna ūǂgāba bi, îb sa ǀhonkhoeb di ôaba pere-i hîab nî ǂû-e ūhâ; tsî Mefiboseti, ǀhonkhoeb âts di ôab ge hugaǀgui nîra pereǂû ti tāb tawa. Tsî Sibab ge disikoroǀa ǀgôagu tsî ǀgamdisi ǃgāga ge ūhâ i.

¹¹Ob ge Sibaba gao-aob ǃoa ge mî: Ti ǀhonkhoe gao-aots ra sa ǃgāta mîmān hoan ǃoa ta ge sa ǃgāta nî dī. ǁKhātib ge Mefiboseta ti tāb tawa ra ǂûǃâ gao-aob ôagu di ǀguib xase nî ī.

¹²Tsî Mefiboseti ge ǂkham ǀgôaba ge ūhâ i, Mixa ti ǀon hâba; tsî Sibab di ommi ǃnâ ǁan hân hoan ge Mefiboseti di ǃgā ge i.

¹³Nētib ge Mefiboseta Jerusalems tawa ge ǁan, hugaǀguib ra gao-aob di tāb tawa ǂû xui-ao; tsîb ge ǃhora ǂaira ge ūhâ i.