Read Khoekhoegowab 1 Gao-aogu 1 Bible Online

1 Gao-aogu 1 - Khoekhoegowab bible

1 Gao-aogu 1

¹Tsî gao-aob Davib ge kaise kairao, on ge saran ǀkha ǁîba ge ǃgū, xaweb ge ǃnae tama ge hâ i.

²O gu ge ǃgāgu âba ǁîb ǃoa ge mî: An ti ǀhonkhoe gao-aotsa ǂkham khoes, oaxaesa ôaba, îs gao-aots aiǃâ hā îs satsa ǃoaba, îs sa tîǂams ǃnâ ǁom, îts ti ǀhonkhoe gao-aotsa ǃnae.

³On ge îsa ǂkhamkhoesa gere ôa Israeli di ǀkharigu hoagu ǃnâ; tsîn ge Abisags, Sunemǁîsa hō tsî ǁîsa gao-aob ǃoa ge ūhā.

⁴Tsî ǂkhamkhoes ge kaise îsa ge i, tsîs ge gao-aob di sâu-ao kai tsî ǁîba gere ǃoaba; xawe gao-aob ge ǁîsa ǁgoeǀkhā tama ge hâ i.

⁵Tsî Adoniab, Hagits ôab, ge ǀgapiǀgapisen tsî: Tita ge gao-ao kai ǂgao hâ, ti ge mî; ob ge kunidi tsî ǃgapi-aogu tsîna ge ǁāǁābasen tsî korodisi khoegu ǁîb aiǃâ nî ǃkhoega.

⁶Tsî ǁîb îb ge ǁîba tsēdi âb ǃnâ ǀau tsî: Tarexats ra ǁnāti dī? ti mî tama ge i. Tsîb ge ǁîb ǂûb ona kaise îsa īsib â-i ao ge i, tsî Hagits ge ǁîba Absalommi khaoǃgâ ge ǁora.

⁷Tsîb ge ǁîba Joab, Serujas ôab, tsî Abjatari, pristeri tsîkha ǀkha ge ǀapeǀape: ǁÎkha ge ǁîba ge hui, Adoniaba ra saoǃâ.

⁸Xawe Sadoki, pristeri, tsî Benajab, Jojadab ôab, tsî Natanni, kēbo-aob, tsî Simib tsî Reib tsî ǁnā ǁē-aogu, Davib ge ūhâ igu on ge Adoniab ǀkha hâ tama ge i.

⁹Tsî Adoniab ge gūn tsî goman tsî kausa ǀgoan tsîna ge ǂā Soheletǀuis, Rogelǀaus xōǀkhā hâs tawa; tsîb ge ǁîb di ǃgâsagu, gao-aob ôagu hoaga ge ǁkhau tsî Judab di aogu, gao-aob ǃgāga.

¹⁰Xawe Natanni, kēbo-aob, tsî Benajab tsî ǁnā ǁē-aogu tsî Salomob, ǁîb di ǃgâsab hâgab ge ǁkhau tama ge i.

¹¹ǃNubaib ge Natanna Batsebas, Salomob îs ǃoa ǃhoa tsî ge mî: Okha, ǁnâu tamas hâ, Adoniab, Hagits ôab go gao-ao kai ǃkhaisa? Tsî sam di ǀhonkhoeb Davib ge ǁîsa a ǀū.

¹²Hā î ta ǁnâi ǀapemā si, îs sa ǀoms tsî sa ôab Salomob di ǀomsa ore, ti.

¹³ǃGû îs gao-aob Davib tawa ǂgâ îs ǁîb ǃoa mî: Xare nūba tamats hâ sa ǃgāta, ti ǀhonkhoe gao-aotse, mî raǃâ: ǂAnǂansaseb ge sa ôab Salomoba ti khaoǃgâ nîra gao-ao, tsîb ge ti trons ai nîra ǂnû; tsî tare xū-i ǃaromab kha Adoniaba go gao-ao kai?

¹⁴Mû, goroses sasa gao-aob ǀkha ra ǃhoa hîa ta ge tita sa khaoǃgâ sī ǂgâ tsî sa mîde nî ǁapoǁapo.

¹⁵Os ge Batsebasa gao-aob ǃoa ǃnā-oms ǃnâ ge ǂgâ; tsî gao-aob ge kaise kaira ge hâ i, tsî Abisags, Sunemǁîs, ge ǁîba gere ǃoaba.

¹⁶Tsî Batsebas ge ǃgamǃgâ tsî gao-aob aiǃâ ge ǁnāǁgoe; ob ge gao-aoba: Tare-es ra ǂgao? ti ge mî.

¹⁷Os ge ǁîsa ǁîb ǃoa ge mî: Ti ǀhonkhoetse, sats ge sa ǃgāta ǃKhūb, sa Elob tawa ge nūba: ǂAnǂansaseb ge Salomob, sa ôaba tita khaoǃgâ nîra gao-ao kai, tsîb ge ti trons ai nîra ǂnû.

¹⁸Tsî nēsi, Adoniab ge go gao-ao kai; tsî sats, ti ǀhonkhoe gao-aots ge ǁîsa a ǀū.

¹⁹Tsîb ge gomagu tsî kausa ǀgoan tsî gūn tsîna ǀoasase ge ǂā, tsîb ge gao-aots di ôagu tsî Abjatari, pristeri, tsî Joab toroǂamkhoeb tsîga go ǁkhau, xawe sa ǃgāb Salomobab ge ǁkhau tama hâ.

²⁰Xawe sats, ti ǀhonkhoe gao-aots ai di ge mûdi Israeli didi hoade hâ, ǁînats nî ǂanǂanga, tarib nî sa khaoǃgâ ti ǀhonkhoe gao-aots di trons ai ǂnû ǃkhaisa.

²¹Ti i ga ī tama io, o i ge nîra ī, ti ǀhonkhoe gao-aots ga ǁō tsî ǁgûgu tawa ǁkhōhe ǃnubaim ge tita tsî ti ôab, Salomob tsîma ǁore-aose nîra ī.

²²Tsî mû, ganupes ra gao-aob ǀkha ǃhoa hîab ge kēbo-aob Natanna ge ǂgâxa.

²³On ge gao-aoba ǂanǂan tsî: Mû, kēbo-aob Natanni ge nē hâ, ti ge mî; tsî gao-aob di ais aiǃâb ge sīo, ob ge ais âb ǀkha gao-aob aiǃâ ǃhūb ai ge ǁnāǁgoe.

²⁴Tsî Natanni ge ge mî: Ti ǀhonkhoe gao-aotse, xare mîts ge satsa: Adoniab ge tita khaoǃgâ nîra gao-ao kai, tsîb ge ti trons ai nîra ǂnû?

²⁵Nētsē ǁgôa tsîb ge gomagu tsî kausa ǀgoan tsî gūn tsîna ǀoasase goro ǂā xui-ao, tsîb ge gao-aots di ôagu hoagu tsî ǂnubis di ǂamkhoegu tsî Abjatari, pristeri, ona go ǁkhau, tsî mû, ǁîgu ge ais âb aiǃâ ǂû tsî ra ā, tsî: Ab gao-aob Adoniaba ûi re! ti ra mî.

²⁶Xawe tita, sa ǃgāta, tsî Sadoki, pristeri, tsî Benajab, Jojadab ôab, tsî Salomob, sa ǃgāb tsîgeb ge ǁkhau tama hâ.

²⁷ǁNā ǃkhaisa xares kha sats, ti ǀhonkhoe gao-aotsa xu ge hā? Tsîts kha ǁnâi sa ǃgāta ǂanǂan tama hâ, tarib nî sa khaoǃgâ ti ǀhonkhoe gao-aots di trons ai ǂnûsa?

²⁸Ob ge gao-aob Daviba ǃeream tsî ge mî: Batsebasa ǂgaiba te re. Os ge gao-aob di ais aiǃâ sī tsî gao-aob di ais aiǃâ ge mâ.

²⁹ǃNubaib ge gao-aoba nū tsî ge mî: ǃKhūb, ti ǀomsa ǂōǂōsib hoaba xu ge oreb a ûitsama ǃkhais ao,

³⁰amase, ǃKhūb, Israeli Elob tawa ta ge nūba si tsî a mî khami: Amaseb ge sa ôab Salomoba tita khaoǃgâ nîra gao-ao kai tsî ti ǃās ǃnâ trons âtas ai nîra ǂnû, ǁnāti ta ge nētsēs ǁkhās ai ǂanǂansase nî dī.

³¹ǃNubais ge Batsebasa ais âs ǀkha ǃhūb ai ǃgamǃgâ tsî gao-aob aiǃâ ǁnāǁgoe tsî ge mî: Ti ǀhonkhoe gao-ao Davitse, ats ûi re, ǀamose!

³²Tsî gao-aob Davib ge ge mî: Sadoki, pristeri, tsî Natanni, kēbo-aob tsî Benajab, Jojadab ôab tsîga ǂgaiba te re! O gu ge gao-aob di ais aiǃâ ge hā.

³³Ob ge gao-aoba ǁîgu ǃoa ge mî: Sago ǀkha ū sago ǀhonkhoeta di ǃgāga, î go ti ôab Salomoba hā-esels, hîa ti aiǃâ hâs ai ǃgapi kai, î go ǁîba Gihons ǃoa ǂgaeǂguiǁgôa.

³⁴Î kha Sadoki, pristeri, tsî Natanni, kēbo-aob tsîkha ǁnāpa ǁîba gao-aose ǂkhauǀkhā Israeli ǂama. ǁNās khaoǃgâ go ge xâiǁnâsa xâi tsî: Gao-aob Salomoba ab ûi re! ti nî mî.

³⁵ǃNubai go ge ǁîba nî saoǃgon tsî ǁîb ge hā tsî ti trons ai nî ǂnû, tsî ǁîb ge nî gao-ao ti ǃās ǃnâ; tita ge Israeli tsî Judab tsîkha ǂamab nî aiǃgû-ao kai ǃkhaisa go mîmā xuige.

³⁶ǁGoasib ge Benajab, Jojadab ôaba ǃeream tsî ge mî: Amen, ǁnāti ab mî ǃKhūb, ti ǀhonkhoe gao-aots di Eloba!

³⁷ǃKhūb ge ti ǀhonkhoe gao-aots ǀkha hâ is ǁkhās xase ab Salomob ǀkha hâ; îb trons âba ti ǀhonkhoe gao-ao Davits di trons ǃgâ-ai kaikai.

³⁸ǃNubai gu ge Sadoki, pristeri, tsî Natanni, kēbo-aob, tsî Benajab, Jojadab ôab, tsî Keretǁîgu tsî Peletǁîgu ona ge ǁgôa, tsî gu ge Salomoba gao-aob Davib di hā-esels ai ǃgapi kai tsî ge ǁnū bi, Gihons ǁga.

³⁹Tsî Sadoki, pristeri ge tentomsa xu oliǁnâba ū tsî Salomoba ge ǂkhauǀkhā; tsî gu ge xâiǁnâsa ge xâi, tsî ǁaes hoas ge: Gao-aob Salomoba ab ûi re! ti ge mî.

⁴⁰Tsî ǁaes hoas ge ǁîba ge saoǃgon, tsî ǁaes ge ǂnunixūde gere ǂnuni tsî kai dâb ǀkha gere ǃgâiaǂgao ǃhūb, ǀōb ân xa ge ǀkhūs kōse.

⁴¹Tsî Adoniab tsî ǁkhauhesan hoan ǁîb ǀkha hân ge ǂûtoao, o gu ge ǁîsa ge ǁnâu. Tsî Joab on ge xâiǁnâdi di ǀōba ǁnâu tsî: Tarexas ra ǃāsa ǂkhupixase ǀō? ti ge mî.

⁴²Tsî ganupeb ra ǃhoa hîa, mû, ob ge Jonatanni, Abjatari, pristeri di ôaba ge hā; ob ge Adoniaba ge mî: ǂGâxa re, gā-ai khoets ge satsa, tsîts ǃgâi ǂhôa-e nî ūhā.

⁴³Ob ge Jonatanna ǃeream tsî Adoniab ǃoa ge mî: Hî-î, sada ǀhonkhoeb, gao-aob Davib ge Salomoba go gao-aodī;

⁴⁴tsî gao-aob ge ǁîb ǀkha ge sî Sadoki, pristeri, tsî Natanni, kēbo-aob, tsî Benajab, Jojadab ôab, tsî Keretǁîgu tsî Peletǁîgu tsîga; tsî gu ge ǁîba gao-aob di hā-esels ai go ǃgapi kai.

⁴⁵ǁNās tawa kha ge Sadoki, pristeri, tsî Natanni, kēbo-aob tsîkha ǁîba Gihons tawa gao-aose go ǂkhauǀkhā, tsîn ge ǁnāpa xu ǃgâiaǂgao hâse go hā, ǃās ra gons kōse; nēb ge ǃaub hîats go ǁnâuba.

⁴⁶Tsî Salomob ge ǁkhāti gaosis di trons ai ǂnôa.

⁴⁷Tsî gu ge ǁkhāti gao-aob di ǃgāga ge hā, sada ǀhonkhoeb, gao-aob Daviba gu nî ǀkhaese, mî raǃâ: Ab Eloba Salomob di ǀonsa sa ǀons xa ǃgâi kai, îb ǁîb di tronsa sa trons ǃgâ-ai kaikai. Tsî gao-aob ge ǁomǃkhais âb ai ǃgamǃgâ tsî ge ǀgoreǀî.

⁴⁸ǁKhātib ge gao-aoba nēti ge mî: Ab ǃkhōǀkhāhe ǃKhūb, Israeli Elob, nētsē go ǀguiba ti trons aib nî ǂnûse a māba, ti mûra ǁîsa ganupe ra mû hîa.

⁴⁹ǃNubain ge ǃhuri tsî ge khâi ǁkhauhesan, Adoniab ǀkha hân hoana, tsîn ge ge ǃgû, mâ-i hoa-e ǁî-i di daoba.

⁵⁰Tsî Adoniab ge Salomoba ǃao tsî khâi tsî ge ǃgû, tsî altars di ǁnâga sī ge ǃkhō.

⁵¹Tsîn ge Salomoba ǂanǂan tsî ge mî: Mû, Adoniab ge gao-aob Salomoba ra ǃao, tsî kō, altars di ǁnâga ǃkhō tsîb go mî: Ab gao-aob Salomoba nētsē nūba te, ǁîb di ǃgātab gôab ǀkha ǃgam tidesa.

⁵²Ob ge Salomoba ge mî: ǃAoǃgâxa khoeseb ga taniseno, o i ge ǀûn âb xa ǀgui-i xare-e ǃhūb ai ǁnā tide; xawe ǂkhaba-i ga ǁîb ǃnâ hōheo, ob ge nî ǁō.

⁵³Tsî gao-aob Salomob ge haisi tsî altarsa xu ge ǁgôa kai bi; ob ge hā tsî gao-aob Salomob aiǃâ ge ǁnāǁgoe. Ob ge Salomoba ǁîb ǃoa: ǃGû sa oms ǃoa, ti ge mî.