Read Khoekhoegowab 1 Gao-aogu 10 Bible Online

1 Gao-aogu 10 - Khoekhoegowab bible

1 Gao-aogu 10

¹Tsî gao-aos Skebas dis ge Salomob di gomma ǁnâuo, ǃKhūb ǀons xasa, os ge ge hā ǁîbas nî ǀhaedi ǀkha ǃâitsâse.

²Tsîs ge Jerusalems tawa ge hā ama ǃgom ǂnubi-i ǀkha tsî ǃnain, ǃgâihamxūn tsî kaise kai ǃhuniǀurib tsî ǃgomǀgausa ǀuidi tsîna tani hân ǀkha, tsîs ge Salomob tawa hā, tsî ǁîb ǀkha ǂgaob ǃnâs ūhân hoan xa ge ǃhoa.

³Tsî Salomob ge ǁîsa ǁîs di mîdi hoade ge mîǃāba; ǀgui xū-i xare-i ge gao-aob Salomoba ǂganǃgâsaba tama ge hâ i, ǁîsab ge mîǃāba tama hâ i-e.

⁴Tsî gao-aos Skebas dis ge Salomob di gā-aisiba mû tsî ommi hîab ge ǂnubib,

⁵tsî tāb âb di ǂûb tsî ǃgāgu âb di ǂnûb tsî ǃoaba-aon di mâb tsî ǁîn di saran tsî ǁîb di ǁhamaogu tsî ǁîb di ǃapa-ūdaob, ǁîba-ūb gere ǃKhūb di ommi ǃoa ǃapab tsîna, os ge ge gagaoǃnâ.

⁶Tsîs ge gao-aob ǃoa ge mî: Amas ge a ǁnā mîs, ti ǃhūb ǃnâ ta ge sa ǃkhaidi xa tsî sa gā-aisib xa ǁnâusa.

⁷Tsî ta ge ǁnā mîde ǂgom tama ge hâ i, hā ta go tsî ti mûra ǁîna go mûs kōse; tsî mû, xūn di ǃkhareb tsîna ta ge mîbahe tama hâ; sa gā-aisib tsî xūn tsîn ge ǁnā gommi hîa ta ge ǁnâuba ǃnā hâ.

⁸ǃGâiǃō gu ge hâ sa aoga tsî ǃgâiǃō gu ge hâ sa ǃgāga, hugaǀgui ais âts aiǃâ ra mâga tsî sa gā-aisiba ra ǁnâuga.

⁹Ab koahe re ǃKhūb, sa Elob, sa ǃnâ ge ǃgâi ǂâisa ūhâ iba, Israeli di trons aib ge ǂnûi tsise. ǃKhūb ge Israela ǀamose ǀnam hâ amagab ge ǁîba satsa gao-aose ge mâi, ǂhanub tsî ǂhanu-aisib tsîkhats nî dīse.

¹⁰Tsîs ge gao-aoba ǀguikaidisi tsî ǀgamdisi talendi ǃhuniǀuriba ge mā tsî kaise ǂgui ǃgâihamxūn tsî ǃgomǀgausa ǀuidi tsîna. Gao-aos Skebas dis ge gao-aob Salomoba mā ǃgâihamxūn khami īn ge ǃaruǀî ǁnāti ǀoasase ge hâ tama hâ i.

¹¹ǃAruǀî gu ge ǁkhāti Hirammi di doe-omgu, ǃhuniǀuriba Ofira xu ge ūǃgûga kaise ǂgui ǃnaruhain tsî ǃgomǀgausa ǀuidi tsîna ge ūhā.

¹²Tsî gao-aob ge nē ǃnaruhain xa ǃKhūb di ommi tsî gao-aob di ommi tsîkha ǂkhâǃnâhaikha ge dī kaiba tsî harpdi tsî ǀō ra xūna ǁnae-aona. ǃNaruhain ge ǁnāti hā tama tsî ǁkhāti mûhe tama ge hâ i, nētsēs kōse.

¹³Tsî gao-aob Salomob ge gao-aos Skebas disa ǂgaos ran hoana ge mā; tsî nēn xōǀkhāb ge ǁîsa ǁkhāti gao-aob Salomob di ǁkhāsib ǃoa ge mā. Nētis ge ǁîsa ǃhūb âs ǃoa ge ǁaru ǁîs ǃgāgu ǀkha.

¹⁴Tsî ǃgommi ǁnā ǃhuniǀurib, Salomob ge ǀgui kurib ǃnâ gere ūhābaheb dib ge ǃnanikaidisiǃnanidisiǃnaniǀa talendi kō ge i.

¹⁵ǁNān, ǁama-aona xu tsî ǃgâihamxūn di ǁamaba xu tsî Arabiab di gao-aogu hoaga xu tsî ǀgaisagu ǃhūb diga xu ge hān ose.

¹⁶ǁKhātib ge gao-aob Salomoba ǀgamkaidisi khōsikhōga ge dī, ǂnauhe hâ ǃhuniǀurib ǀkha, ǃnanikaidisi sekeldeb ge ǃhuniǀurib xa mâ khōsikhōb hoaba ge ǀnē kaiba.

¹⁷ǁNās ǁkhās xase ǃnonakaidisi khōsikhōga, ǂnauhe hâ ǃhuniǀurib xa ǃnona pondeb ge ǃhuniǀurib xa mâ khōsikhōb hoaba ge ǀnē kaiba; tsî gao-aob ge ǁîga haiǀgoms Libanonni dis di ommi ǃnâ ge ǁgui.

¹⁸ǁKhātib ge gao-aoba kai ǂkhoaǁgûtronsa dī tsî ǁîsa ǀkhaesa ǃhuniǀurib ǀkha ge ǃkhûǀkhā.

¹⁹Nē trons ge ǃnani ǃapa-ūdade ge ūhâ i tsî danas trons dis ge khaos ai ǃgupu ǃnoros â-i ge i, tsî ǃnamkha hoakha-ū kha ge ǃgâsenhaikha ge hâ i ǂnûǃkhais kōse, tsî ǀgam xamkha ge ǁnā ǃgâsenhaikha tawa ge mâ i.

²⁰Tsî disiǀgamǀa xamgu ge ǁnāpa, ǃnani ǃapa-ūdadi ai hoa ǃnamkha ai ge mâ i. ǁNāti ī xū-i ge ǀnî gaosi-i xare-i ǃnâ dībahe tama ge hâ i.

²¹Tsî āǃnâxapan gao-aob Salomob din hoan ge ǃhuniǀuri ge i, tsî xapan haiǀgoms Libanonni dis di ommi din ge ǃgomǀgausa ǃhuniǀuri ge i; ǀhaiǀuri-i xare-i ge hâ tama ge hâ i, xūse-i ge Salomob di tsēdi ǃnâ ǃgôahe tama ge hâ i xui-ao.

²²Gao-aob ge Tarsis di doe-omga hurib ai ūhâ i xui-ao, Hirammi di doe-omgu ǀkha; nē Tarsis di doe-omgu ge ǃnona kurigu ǃnâ ǀgui ǃnās ǀguisa gere hā ǃhuniǀurib, ǀhaiǀurib, ǂkhoaǁgûgu, ǀneragu tsî ǃhuigu tsîna ra ūhāse.

²³Nētib ge gao-aob Salomoba ǃhūbaib di gao-aogu hoagu ǃgâ-ai ge kai ǃkhūsib ǃnâ tsî gā-aisib ǃnâ.

²⁴Tsî ǃhūbaib hoab ge Salomob di aisa ge ôa, ǁîb di gā-aisib, Elob ge ǂgaob âb ǃnâ māba gu nî ǁnâuga.

²⁵Tsîn ge mâ-i hoa-i âna ǁî-i di ǀkhaexū-e gere ūhā: ǀHaiǀurixapan, ǃhuniǀurixapan, saran, ǁâtanin, ǃgâihamxūn, hān tsî hā-eseln tsîna, mâ xū-i hoa-e kuriba xu kurib ǃoa.

²⁶ǁNān tawab ge Salomoba kunidi tsî ǃgapi-aogu tsîna ge ǀhaoǀhao, ǀguiǀoadisi tsî hakakaidisi kunidi tsî disiǀgamǀaǀoadisi ǃgapi-aogu tsîna ge ūhâ is kōse, tsîb ge ǁîga kuniǃādi ǃnâ ge mâi tsî gao-aob tawa Jerusalems ǃnâ.

²⁷Tsî gao-aob ge ǀhaiǀuriba Jerusalems ǃnâ ǀui-i ase ge dī, tsî sederhaideb ge ǀgowehaidi axase ge dī, ǃgoab ǃnâ ǀoasase hâde.

²⁸Tsî hānab ge Salomoba Egipteb tsî Kueb tsîkha xu gere ūhābahe; o gu ge gao-aob di ǁama-aoga ǁîna Kueba xu gere ǁamaǂgâxa.

²⁹Tsî kuni-i ge ūhāhe tsî Egipteba xu ge ǂoa ǃnanikaidisi sekeln ǀhaiǀurib ama tsî hā-e ǀguikaidisi tsî korodisin ama; tsî ǁnātin ge Hetiǁîn di gao-aogu hoagu tsî Siriab di gao-aogu tsîga ǁîna ge ūǀkhība.