Read Khoekhoegowab 1 Gao-aogu 11 Bible Online

1 Gao-aogu 11 - Khoekhoegowab bible

1 Gao-aogu 11

¹Tsî gao-aob Salomob ge ǂgui ǃhao tarade ge ǁâ, tsîb ge ǁnāsa Faraob ôas xōǀkhā ge dī: Moabǁîdi, Amonǁîdi, Edomǁîdi, Sidonǁîdi tsî Hetiǁîde.

²ǁNā ǁaedi xa, ǃKhūb ge Israeli ôan ǃoa ǁîdi xa mîde: Sadu ge ǁîn tawa ǂgâ tide, tsî ǁîn ge sadu tawa ǂgâ tide; ǁîn ge ǂanǂansase ǂgaob âtsa ǁîn di eloguǀî nî ǂō kai xui-ao, ǁîdeb ge Salomoba ge ǁâ.

³Tsîb ge hûkaidisi taradi gaosade ge ūhâ i tsî ǃnonakaidisi ǀgamitarade; tsî taradi âb ge ǁîb di ǂgaoba ge ǂgaeǂhapu.

⁴Tsî i ge ge ī, Salomob kairasis di ǁaeb ai, taradi âb ǁîb di ǂgaoba ǀkhara eloguǀî ge ǂgaeǂhapu ǃkhaisa; ob ge ǂgaob âba ǀoasase ǃKhūb, ǁîb di Elob ǀkha hâ tama ge i, ǁîb îb Davib di ǂgaob ge ī xase.

⁵Salomob ge Astarots, Sidonǁîn di elos, tsî Milkommi, Amonǁîn di ǁgaiǁgaisaba gere saoǃgon xui-ao.

⁶Nētib ge Salomoba ǃKhūb mûǁae a ǂkhabana gere dī, tsîb ge ǃKhūba saoǃgonhâhâ tama ge i, ǁîb îb Davib khami.

⁷ǃNubaib ge Salomoba Kemob, Moabǁîn di ǁgaiǁgaisaba ǀgapi-e ge ǂnubiba ǁnā ǃhommi, Jerusalems aiǃâ hâb ai, tsî Moloxi, Amonǁîn di ǁgaiǁgaisaba.

⁸Tsî ǁnātib ge ge dī ǁîb di ǃhao taradi, ǁîdi di eloga ǀanǀan tsî ra ǁguibadi hoadi aiǃâ.

⁹ǁNā-amagab ge ǃKhūba Salomoba ge ǁaixaǂam, ǂgaob âb ge ǃKhūb, Israeli di Elob, ǁîb tawa ǀgam ǃnāra ge ǂhaiba xu ge ǂō amaga,

¹⁰tsî nē ǃkhais xab ge ǁîba mîmā xui-ao, ǀkhara elogab saoǃgon tide ǃkhaisa, xaweb ge ǃKhūb ge mîmā bina ǃkhōǀgaipe tama ge hâ i.

¹¹ǁNā-amagab ge ǃKhūba Salomob ǃoa ge mî: Nē ǃkhais ge sa ǀkha ge ī, ti ǃgaeǀhaos tsî ǂnûiǂgādi tsî mîmā tsi ta genats ǃkhōǀgaipe tama hâ ǃkhais ǃaroma ta ge tita nē gaosisa satsa xu ǀkhauǁnâ tsî ǁîsa sa ǃgāba nî mā.

¹²Xawe ta ge ǁîsa sa tsēdi ǃnâ dī tide sa îb Davib ǃaroma, sa ôab di ǃomǁaeba xu ta ge ǁîsa nîra ǀkhauǁnâ.

¹³Xawe gaosis hoasa ta ge ǀkhauǁnâ tide; ǀgui ǃhaosa ta ge sa ôaba nîra mā, ti ǃgāb Davib ǃaroma tsî Jerusalems hîa ta ge ǃkhōǂuibasens ǃaroma.

¹⁴Nētib ge ǃKhūba Salomoba mâǃoasabeba ge ǂkhaiǂkhaiba, Hadadi, Edomǁîba; ǁîb ge gao-aob surib di ge i Edommi ǃnâ.

¹⁵Ī i ge ge, Davib Edommi ǃnâ hâ hîa Joab, toroǂamkhoeb, ǃgamhe hânab nî ǁkhōga ge ǃapab ge aore-i hoa-e Edommi ǃnâ ǃgam ǃkhaisa.

¹⁶Joab ge Israeli hoab ǀkha ǁnāpa ǃnani ǁkhâgu kōse ge hâ xui-ao, Edommi ǃnâ hâ aore-i hoa-eb ge ǃgams kōse.

¹⁷ǁGoasib ge Hadada ge ǁhâ tsî ǀnî Edomǁî aogu ǁîb îb di ǃgāgu diga ǁîb ǀkha, Egipteb ǃnâ gu nî sīga; tsî Hadadi ge ǂkham ǀgôa ge i.

¹⁸Tsî gu ge Midianna xu khâi tsî Paranni tawa ge sī, tsî gu ge khoega ge ūǃgû Paranna xu tsî ge sī Egipteb ǃnâ Faraob, Egipteb gao-aob tawa; ǁîb ge omsa ge mā bi tsî ǂûna mîmâi tsî ǃhū-e ge mā bi.

¹⁹Tsî Hadadi ge Faraob mûǁae kai ǀkhomma ge hō, ǁîbab ge taras âb, Taxpenes gao-aos di ǃgâsasa tarase mās kōse.

²⁰Tsî Taxpenes di ǃgâsas ge ǁîba ǀgôab âb Genubati, Taxpenes ge Faraob ommi ǃnâ kaikaiba ge ǁoraba; ob ge Genubata Faraob ommi ǃnâ Faraob di ôagu ǁaegu ge hâ i.

²¹Tsî Hadadi ge Egipteb ǃnâ ǁnâuo, Davib ǁîb îgu ǀkha a ǀkhai ǃkhaisa tsî Joab, toroǂamkhoeb, ǁō hâ ǃkhaisa, ob ge Hadada Faraob ǃoa ge mî: A ta ǃgû î ta ti ǃhūb ǃoa doe.

²²Ob ge Faraoba ǁîb ǃoa ge mî: Tsî tare xū-ets kha ǁnâi ti tawa tôasi hâ, mû, ots ra sa ǃhūb ǃoa doesa ôa-am? Ob ge: Xū-i xare-e ta tôasi tama, xawe a ta doe! ti ge mî.

²³ǁKhātib ge Eloba ǁîba mâǃoasabeba ge ǂkhaiǂkhaiba, Resonni, Eljadab ôab, ǁîb ǀhonkhoeb Hadad-Eseri, Sobas gao-aoba xu ge ǁhâb,

²⁴ǁîb ǃoagu ǁkhāti khoega ge ǀhaoǀhaob tsî ǁîgu di ǂamkhoe kai geba, Davib ge ǁîga ǃgam ǃnubai; tsî Damaskus ǃoa doe tsî gu ge ǁnāpa ge ǁan tsî Damaskusa ge gaoǂam.

²⁵Tsîb ge Israeli di mâǃoasabe ge i Salomob di tsēdi hoade; tsî nēs ge nau ǂkhabab, Hadadi ge dīb xōǀkhā ge ī, Israeli xab ge ui-uisabahe i xui-ao, ob ge Siriaba ge gaoǂam.

²⁶Tsî ǃaruǀîb ge Jerobeammi, Nebati ôab, Efraimǁîb, Seredas dib, Salomob ǃgāb (ǁgûs âb di ǀons ge Seruas, ǃoatara ge isa); ǁîb on ge ǃomma ge ūkhâi gao-aob ǃoagu.

²⁷Tsî nēs ge ǃkhais, ǁîs ǃaromab ge ǃomma gao-aob ǃoagu ūkhâisa: Salomob ge Milosa ǂnubi tsî ge ǂganam ǂkhôasa ǃkhaidi Davib, ǁîb îb di ǃās dide.

²⁸Tsî ǁnā aob Jerobeammi ge ǃgari ǁē-ao ge i. Tsî Salomob ge ǂkham khoeba mû, sîsenxab a ǃkhaisa, ob ge ǁîba Joseb ommi hoab di ǃgommi ǂama ge mâi bi.

²⁹Tsî i ge ǁnā ǁaeb ai ge ī, Jerobeammi ge Jerusalemsa xu ǂoa ǃnubai, ob ge kēbo-aob Ahiab, Silonǁîba, daob ai ge ǃoa bi, tsî Ahiab ge ǀasa ǂamsara-e ge ana hâ i, tsî ǁî ǀgamkha ge ǃaub ai ǀguri ge hâ i.

³⁰ǃNubaib ge Ahiaba ǀasa ǂamsarab, hîab ana hâba ū tsî ǁîba disiǀgamǀa ǃâdi ǃnâ ge ǀkhauǃā.

³¹Ob ge Jerobeammi ǃoa ge mî: Disi ǃâde satsa ūbasen, nētib ra ǃKhūb, Israeli Eloba mî xuige: Mû, tita ge gaosisa Salomob di ǃomǁaeba xu ū tsî nî satsa disi ǃhaode mā;

³²tsî ǀgui ǃhaosab ge ǁîba nî ūhâ ti ǃgāb Davib ǃaroma tsî Jerusalems, ǁnā ǃās, tita ge Israeli di ǃhaodi hoade xu ǁhûiǂuibasens ǃaroma.

³³Tita ǁnāxū tsîn ge Astarots, Sidonǁîn di elos, tsî Kemob, Moabǁîn di elob, tsî Milkommi, Amonni ôan di elob aiǃâ ge ǃhonǁgoa amaga, tsî ti daogu ǃnân ge ǃgû tama i amaga, ti mûǁae a ǂhanunan nî dīse, ti ǂnûiǂgādi tsî ti ǂhanugu tsîna, ǁîn îb Davib ge dī xase.

³⁴Xawe ta ge tita gaosis hoaragasa ǁîb ǃomǁaeba xu ū tide, tsî ta ge ǁîba gaosase nîra mâi ǁîb ûitsēdi hoade, Davib, ti ǃgāb ǃaroma, tita ge ǃkhōǂuibasenna, ti mîmādi tsî ti ǂnûiǂgāde ge ǃkhōǀgaipeba.

³⁵Xawe ta ge ǁîb ôab di ǃomǁaeba xu gaosisa nî ū, tsî ta ge satsa disi ǃhaode nîra mā.

³⁶Tsî ǁîb di ôaba ta ge tita ǀgui ǃhaosa nîra mā, ti ǃgāb Davib nî hugaǀgui ti ais aiǃâ ǃamamǀae-e ūhâga, Jerusalems ǃnâ, ǁnā ǃās, ǃkhōǂuibasen ta gesa, ti ǀonsa ta ǁnāpa nî ǂnûise.

³⁷O ta ge tita satsa nî ū, tsîts ge satsa sa ǀoms ra ǂgaon hoan ǂama nîra gao, tsîts gao-aose nîra ī Israeli ǂama.

³⁸Tsî i ge nîra ī, tita nî mîmā tsina ǁnâu, tsîts ga ti daogu ǃnâ ǃgûo tsî ti mûǁae a ǂhanuna a dīo, ti ǂnûiǂgādi tsî ti mîmāde ra ǃkhōǀgaipeǃâ, ti ǃgāb Davib ge dī xase, o ta ge tita sa ǀkha nîra hâ tsî hâhâ ra omma nîra ǂnubiba tsi, Daviba ta ge ǂnubiba khami, tsî ta ge Israela nîra mā tsi.

³⁹Tsî tita ge ǁî ǃkhais ǃaroma Davib di suriba nîra ǃgamǃgam; xawe mâ ǁaeb hoab kōse tama.

⁴⁰ǁNā-amagab ge Salomoba Jerobeammab nî ǃgamsa ge ôa-am; xawe Jerobeammi ge khâi tsî Egipteb ǃoa ge ǃhū Sisaki, Egipteb di gao-aob ǁga, tsîb ge Egipteb ǃnâ ge hâ, Salomob ge ǁōs kōse.

⁴¹Tsî naun, Salomob ǃnaeǃkhaidi din tsî ǁîb ge dīn hoan, tsî gā-aisib âb tsîn, ǁîn ge xoahe hâ ǂkhanis Salomob di ǃnaeǃkhaidi dis ǃnâ.

⁴²Tsî ǁaeb Salomob Jerusalems tawa Israeli hoab ǂama ge gaob ge hakadisi kuri ge i.

⁴³Tsî Salomoba ge ge ǁō, tsîb ge ǁîb îb Davib di ǃās ǃnâ ge ǁkhōhe, tsî ǁîb ôab Rehabeammi ge ǁîb ǃās ǃnâ ge gao-ao kai.