Read Khoekhoegowab 1 Gao-aogu 12 Bible Online

1 Gao-aogu 12 - Khoekhoegowab bible

1 Gao-aogu 12

¹Tsî Rehabeammi ge Sexems ǃoa ge ǃgû, Israeli hoab ge Sexems tawa sī xui-ao, ǁîban nî gao-aodīse.

²Tsî i ge ge ī, Jerobeammi, Nebati ôab ge ǁnāsa ǁnâuo, Egipteb ǃnâb hâ hîa, gao-aob Salomob di ais aiǃâba xub ge ǁhâ hâ i xui-ao, ob ge Jerobeamma Egipteba xu ge oa.

³On ge sî tsî ge ǂgai kai bi; tsîn ge Jerobeammi tsî Israeli di ǀhaohâb hoaba hā tsî Rehabeammi ǃoa ge mî:

⁴Sa îb ge ǃnaoba ge ǃgomǃgomba da; xawe satsa ǁnâi sa îb di ǃgom ǃoabas tsî ǁîb di ǃgom ǃnaob, sidab ge ǁgui-aiba supusupuba da, o da ge nî ǃoaba tsi.

⁵Ob ge ǁîba ǁîn ǃoa ge mî: ǃGû ǃnonaǁî tsēs kōse, ī du ǁnās khaoǃgâ ǁkhawa tita ǁga hā. Os ge ǁaesa ge ǃgû.

⁶Tsî gao-aob Rehabeammi ge ǁnā kaigu, ǁîb îb Salomob di ais aiǃâ ganupeb a ûitsama hîa ge mâgu ǀkha ǀapeǀhao-e dī tsî ge mî: Mati go sago ra ǀapemā, ǁaes nî ǃereamhesa?

⁷O gu ge ǁîb ǃoa ge mî: Sats ga nētsē nē ǁaes di ǃgā tsîts ga ǁîna oe-am tsî ǁîna ǃgâi mîde ǃhoa-ūo, on ge hoaǁae sa ǃgāse nî ī.

⁸Xaweb ge ǁîba kaigu di ǀapes, ǁîgu ge ǀapemā bisa ǁnāxū tsî ǂkham khoegu, ǁîb ǀkha ge kaigu, ais âb aiǃâ mâgu ǀkha ǀapeǀhao-e ge dī.

⁹Tsîb ge ǁîgu ǃoa ge mî: Tare-e go sago ra ǀapemā, nē ǁaes, tita ǃoa ge ǃhoasa ge nî ǃereamse: ǁNā ǃnaob, sa îb ge sida ǁgui-aiba supusupuba da, ti ge mîsa?

¹⁰O gu ge ǂkham khoegu, ǁîb ǀkha ge kaiga ǁîb ǃoa ge mî: Nētits ge ǁnā ǁaes, sa ǃoa ge ǃhoa tsî: Sa îb ge sida di ǃnaoba ge ǃgomǃgomba da îts satsa ǁîba supusupuba da, ti ge mîs ǃoa nî mî: Ti ǂkharigeǂeneb ge ti îb di kamanab ǃgâ-ai nîra ǁau.

¹¹Tsî nēsi ti îb ga ǃgom ǃnao-e sado ǃnao-ai hâ io, o ta ge tita ganupe sadu di ǃnaoba ǃnāsase nî dīǀaro; ti îb ga sado ǃnabagu ǀkha ǂnau hâ io, o ta ge tita ǀhūn ǀkha sado nî ǂnau.

¹²Nētin ge Jerobeammi tsî ǁaes hoasa ǃnonaǁî tsēs ai Rehabeammi tawa ge hā, gao-aob ge ǃhoa tsî: ǃNonaǁî tsēs ai ǁkhawa tita ǁga hā, ti mî khami.

¹³Ob ge gao-aoba ǁaesa karosase ge ǃeream kaigu di ǀapes hîa gu ge ǀapemāsab ge ǁnāxū xui-ao.

¹⁴Tsîb ge ǁîn ǀkha ǂkham khoegu di ǀapemās ǃoa ǃhoa tsî ge mî: Ti îb ge sadu di ǃnaoba ge ǃgomǃgom, xawe ta ge tita ǁnās ǃgâ-ai nî dīǀāro. Ti îb ge sado ǃnabagu ǀkha gere ǂnau, xawe ta ge tita ǀhūn ǀkha nîra ǂnau du.

¹⁵Nētib ge gao-aoba ǁaesa ǁnâu ǂgao tama ge i; nē ǃnaeǃkhais ge ǃKhūba xu hâ i xui-ao, ǃKhūb nî mîs âba ǁapoǁapose, Ahiab, Silonǁîb di ǃoabasa xub Jerobeammi, Nebati ôab ǁga ge ǃhoasa.

¹⁶Tsî Israeli hoab ge mûo, gao-aob ǁîna ǁnâu ǂgao tama hâ ǃkhaisa, os ge ǁaesa gao-aoba ǃeream tsî ge mî: Mâ amǃnâ-e da ūhâ Davib tawa? Hî-î, ǀumi-i xare-e da ge Isaib ôab tawa ūhâ tama hâ, xuige sadu tentommi ǃoa ǁaru, Israeltse! Îts ǁnâi mûbasen sa omma, Davitse! Nētib ge Israela tentomdi âb ǃoa ge ǁaru.

¹⁷Xawe ǁnā Israeli ôan, Judab di ǃādi ǃnâ ǁan hân, ǂamab ge Rehabeamma ǁkhāti ge gao.

¹⁸ǃNubaib ge gao-aob Rehabeamma Adorammi, ǁgarisîsenni ǂama hâba ge sî, ob ge Israeli hoaba ǁîba ge ǀuiǁhomǃan. Xawe gao-aob Rehabeammi ge ǃhae tsî kuni-i ai ge ǃapa, Jerusalems ǃoab nî ǃhūse.

¹⁹Nētin ge Israelǁîna Davib omma xu ge ǁnāǁgôa, nētsēs kōse.

²⁰Tsî i ge ge ī, Israeli hoab ge ǁnâuo, Jerobeammi go ǁkhawa hā ǃkhaisa, on ge sîsī tsî ǀhûhâs ǃnâ ge ǂgai bi tsî Israeli hoab ǂama ge gao-aodī bi; ǀnî khoe-i xare-i ge Davib omma sao tama ge hâ i, Judab di ǃhaos ǀguis.

²¹Tsî Rehabeammi ge Jerusalems tawa sīo, ob ge Judab ǃhaos hoas tsî Benjaminni ǃhaos ona ge ǀhaoǀhao, ǀguikaidisi tsî ǁkhaisadisiǀoadisi ǁhûiǂuihesagu ǃkhamǁkhāsabegu, Israeli ommab nî ǃkhamūga, gaosibab nî ǁkhawa Rehabeammi, Salomob ôab ǃoa ūhāse.

²²Os ge ǃKhūb di mîsa ge hā Semajab, Elob aob ǃoa, mî rase:

²³Mîba Rehabeammi, Salomob ôab, Judab gao-aob tsî Judab tsî Benjaminni di ommi hoab tsî naun, ǁaes din hoana:

²⁴Nētib ra ǃKhūba mî: Sadu ge ǃapa tsî sadu di ǃgâsan, Israeli ôana ǃkhamū tide; mâ-i hoa-e a-i ǁkhawa ǁaru ǁî-i di ommi ǃoa, nē ǃkhais ge tita xu go īs xuige. Tsîn ge ǃKhūb di mîsa ǁnâu tsî ǁkhawa ge ǁaru, ǃKhūb di mîs ain ǃapa tidega.

²⁵Tsî Jerobeammi ge Sexemsa Efraimmi ǃhommi ai ǂnubi tsî ǁnāpa ge ǁan tsîb ge ǁnāpa xu ǂoa tsî Penuelsa ge ǂnubi.

²⁶Tsî Jerobeammi ge ǂgaob âb ǃnâ: Nēsis ge gaosisa ǁkhawa Davib ommi ǃoa nî oa, ti ge mî.

²⁷Nē ǁaes ga ǃapao, Jerusalems tawan nî ǃKhūb ommi ǃnâ ǁguibade ǁguibase, ob ge ǂgaob nē ǁaes diba ǁîn ǀhonkhoeb Rehabeammi, Judab gao-aob ǃoa nî oa, ā, tita ǃgam tsîn ge Rehabeammi, Judab di gao-aob ǃoa ǁkhawa nî oa.

²⁸ǁNā-amagab ge gao-aoba ǀapeǀape tsî ǀgam ǃhuniǀuritsâukha ge dī; tsîb ge ǁîn ǃoa ge mî: Jerusalems ǃoa ǃgûǃapas xa du ǃgomdāhe hâ, xuige kō sadu di elokha, Israeltse, Egipteba xu ge ūǃapa dukha!

²⁹Tsîb ge ǀguiba Bet-Els tawa mâi, tsî nauba Dans tawa ge mâi.

³⁰Tsî nē dīǃkhais ge ge ǁore kai; ǁaes ge ǀguib ǃaroma Dans kōse ǃgû xui-ao.

³¹Tsîb ge ǁkhāti ommi ǀgapigu diba ge dī; tsîb ge pristerga ge dī ǁau khoen ǁaes dina xu, Levib ôagu di tamaga.

³²Tsî Jerobeammi ge kaitsēsa ge tsēdī, ǁkhaisaǁî ǁkhâb ǃnâ, ǁnā ǁkhâb di disikoroǀaǁî tsēs ai, ǁnā kaitsēs, Judab ǃnâ ra dīhes khami, tsîb ge altars ai ge ǁguiba; ǁnās ǁkhās xaseb ge Bet-Els tawa ge dī, tsâukha hîab ge dīkha ra ǁguibaǃâ; tsîb ge ǁkhāti Bet-Els tawa ǀgapigu hîab ge dīgu di pristerga ge mâi.

³³Tsîb ge ǁnā altars, Bet-Els tawab ge dīs ai ge ǁguiba disikoroǀaǁî tsēs ǁkhaisaǁî ǁkhâb dis ai, ǂgaob âb ǃnâb ge ǂâiǂuibasen ǁkhâb ge a ǁî; ǁnātib ge Israeli ôana kaitsēsa ge dība, altars ai ǁguiba tsî ra ǀanǀanǃâ.