Read Khoekhoegowab 1 Gao-aogu 13 Bible Online

1 Gao-aogu 13 - Khoekhoegowab bible

1 Gao-aogu 13

¹Tsî mû, ao-i ge Judaba xu ge hā Elob di mîsa xu Bet-Els tawa; tsî Jerobeammi ge altars tawa ge mâ i, ǀanǀan nîse.

²Tsîb ge ǃKhūb di mîsa xu altarsǀî ǂgai tsî ge mî: Altarse, altarse, nētib ra ǃKhūba mî: Mû, ǀgôab ge Davib omma nîra ǁorabahe, Josiab ti nî ǂgaiheba; ǁîb ge sa ai pristergu ǀgapigu diga, sa ai ra ǀanǀanga nîra ǁguiba, tsî khoeǂkhōn ge sa ai nîra khauǃkhūhe.

³Tsîb ge ǁnātsē sao-e mā tsî ge mî: Nēs ge ǁnā saos, ǃKhūb ge ǁîs xa ǃhoasa, mû, altars ge nîra ǂari kaihe, tsî tsaob ǁîs ai hâb ge nîra tsoroxusen.

⁴Tsî i ge ge ī, gao-aob ge ǁnā mîs, Elob aob ge Bet-Els tawa hâ altarsǀî ǃhoasa ǁnâuo, ob ge Jerobeamma ǃommi âba altarsa xu ǀhōǂui tsî: ǃKhō bi! ti ge mî; xawe ǁîb di ǃommi hîab ge ǁîbǀî ǀhōǂuib ge ge ǂnâ, ǁîbab ge ǂgaedawa ǁoa ise.

⁵Tsî altars ge ge ǂari kaihe, tsî tsaob, altars ai hâb, ge ge tsoroxusen, ǁnā saos, Elob aob ge ǃKhūb di mîsa xu māsa ǃoa.

⁶ǃNubaib ge gao-aoba ǃeream tsî ǁîb ǃoa ge mî ǃKhūb, sa Elob di aisa ǁkhōse ǀgoreǀî îts ǀgoreba te re, îb ti ǃomma ǁkhawa ti tawa hā re, ti. ǁGoasib ge Elob aoba ǃKhūb di aisa ǁkhōse ge ǀgoreǀî; ob ge ǃommi gao-aob diba ǁkhawa ǁîb tawa hā tsî nauti ge ī.

⁷Ob ge gao-aoba Elob aob ǃoa ge mî: Tita ǀkha sī ti ommi tawa, îts khoakhoasen, o ta ge tita ǀkhaexū-e nî mā tsi.

⁸Xawe Elob aob ge gao-aob ǃoa ge mî: Sa ommi di ǃkharebats ga mā te xawe ta ge ǃgûsao tsi tide, tsî ta ge nē ǃkhais tawa pere-i xa ǂû tide tsî ǁgam-i xa ā tide.

⁹Nētib ge ǃKhūba mîs âb ǀkha mîmā te tsî mî xui-ao: Pere-i xats ge ǂû tide, tsî ǁgam-i xats ge ā tide, tsîts ge ǁîba-ūts ge ǃgû daob ai oa tide.

¹⁰Ob ge ǀkhara daoba-ū ge ǃgû tsî ǁîba-ūb ge Bet-Els tawa hā daob ai oa tama ge i.

¹¹Tsî kaira kēbo-ao-i ge Bet-Els tawa ge ǁan hâ i, tsî ǀgôagu âb ge hā tsî ge ǃhoaba bi, Elob aob ǁnātsē Bet-Els ǃnâ goro dī sîsenni hoaba ǁnā mîdi, gao-aob ǃoab goro ǃhoadi ǀkha; tsî ǁîde gu ge ǁgûba ǃhoabao,

¹²ob ge ǁgûba ǁîgu ǃoa ge mî: Mâ daoba-ūb ǃgû hâ? Tsî ǀgôagu âb ge daoba ge mû, Elob aob Judaba xu ge hāb ge ǃgû-ūba.

¹³ǃNubaib ge ǀgôagu âb ǃoa ge mî: Esela ǃgaeǃgâba te re! O gu ge esela ge ǃgaeǃgâba bi, tsîb ge ǁîb ai ge ǃgapi.

¹⁴Tsîb ge Elob aoba ǃgapiǃgon tsî terpentinhai-i ǃgaob ǂnôase ge hō; tsîb ge ǁîb ǃoa ge mî: ǁNā Elob aotsa satsa, Judaba xu go hātsa? Ob ge: ǁÎ ta ge, ti ge mî.

¹⁵ǃNubaib ge ǁîb ǃoa ge mî: Tita ǀkha sī ti ommi tawa îts pere-i xa ǂû re.

¹⁶Xaweb ge ǁîba ge mî: Tita ge sa ǀkha oa ǁoa tsî sa ǀkha a ǂgâ ǁoa, tsî ta ge ǁkhāti pere-i xa ǂû tide tsî sa ǀkha ǁgam-e ā tide, nē ǃkhais tawa.

¹⁷Mî-i ge tita ge hāba ǃKhūb di mîs ǀkha: Sats ge ǁnāpa pere-i xa ǂû tide tsî ǁgam-i xa ā tide; tsîts ge ǁnā daob, ǁîba-ūts ge ǃgûb ai oa tide.

¹⁸Ob ge ǁîb ǃoa ge mî: Tita on ge sats khami a kēbo-ao, tsî ǀhomǃgā-i ge tita ǀkha ǃKhūb di mîsa xu ǃhoa tsî ge mî: ǁÎba sa ǀkha ǁkhawa ūhā sa ommi ǃoa îb pere-i xa ǂû îb ǁgam-e ā. Xaweb ge ge ǂhomiba bi.

¹⁹Ob ge ǁîb ǀkha oa tsî ommi âb ǃnâ pere-i xa ge ǂû tsî ǁgam-i xa ge ā.

²⁰Tsî i ge ge ī, tāb tawa gu ǂnôa hîas ǃKhūb di mîsa ǁnā kēbo-aob, ǁîba ge oa kaiba ge hāba ǃkhaisa.

²¹Ob ge ǁîba Elob aob, Judaba xu ge hāba ǂgaiǀî tsî ge mî: Nētib ge ǃKhūba ra mî: ǁNā-amaga, ǃKhūb di mîmāsats ǁnâuǀnam tama go i tsî ǁnā mîmās, ǃKhūb, sa Elob ge mā tsisats ǃkhōǀgaipe tama go i,

²²tsî oa tsîts go pere-i xa ǂû tsî ǁgam-i xa go ā ǁnā ǃkhais tawa, ǁîs xab ge ǁîba sa ǃoa: Pere-ets ge ǂû tide tsî ǁgam-ets ge ā tide, ti ge ǃhoasa, ǁnā-amagas ge ǁō hâ soros âtsa sa îgu di ǀhobas ǃnâ sī tide.

²³Tsî i ge ge ī, pereǂûtoab geo tsî ātoab geo, ob ge esela ǁîba ge ǃgaeǃgâba ǁnā kēbo-aob, ǁîba ge oa kaiba.

²⁴Nētib ge ge ǃgûbē, tsî xammi ge ǁîba daob ai hō tsî ge ǃgam bi, tsî ǁō hâ soros âb ge daob ai aoǁguihe hâse ge ǁgoe, tsî eseli ge ǁîb xōǀkhā ge mâ i, tsî xammi on ge ǁō hâ soros tawa ge mâ i.

²⁵Tsî mû, khoen ge ǃgû-ī tsî ǁō hâ soros daob ai aoǁguihe hâse tsî xamma ǁō hâ soros tawa mâse ge mû; on ge hā tsî ǁîsa kēbo-aob, ǁîs ǃnâ ǁan hâ ǃās ǃnâ ge sī mîba.

²⁶Tsî kēbo-aob, ǁîba daoba xu ge oa kaib ge ǁnâuo, ob ge ge mî: ǁÎb ge ǁnā Elob aob, ǃKhūb di mîmāsa mâǃoaxa go iba; ǁnā-amagab ge ǃKhūba ǁîba xammi, ǀkhauǃā tsî go ǃgam biba go māǁnâ, ǃKhūb di mîs, ǁîb ǃoab ge ǃhoasa ǃoa.

²⁷ǃAruǀîb ǁîb di ôagu ǃoa ge mî: Esela ǃgaeǃgâba te re. O gu ge ǁîba ge ǃgaeǃgâba bi.

²⁸ǃNubaib ge ǃgû tsî ǁō hâ soros âba daob ai aoǁguihe hâse tsî eseli tsî xammi ona ǁō hâ soros tawa mâse ge sī hō. Xammi ge ǁō hâ sorosa hapu tama tsî esela ǀkhauǃā tama ge hâ i.

²⁹ǃNubaib ge kēbo-aoba ǁō hâ soros Elob aob disa ūkhâi tsî ǁîsa eseli ai ge ǁgui tsî ge ū-oa si; nētib ge kaira kēbo-aoba ǃās ǃnâ ge sī, ǃoab ǃgae-e dība bi tsîb nî ǁkhō bise.

³⁰Tsîb ge ǁō hâ soros âba ǁîb di ǀhobas ǃnâ ge ǁgui; tsîn ge ǁîb ǂama ǃgae tsî: Ti ǃgâtse! ti ge mî.

³¹Tsî i ge ge ī, ǁîbab ge ǁkhō ǃnubaib ge ǁîb ôagu ǃoa ǃhoa tsî ge mî: ǁŌ ta kao, o go ǁnā ǀhobas, Elob aob ǁîs ǃnâ ǁkhōhe hâs ǃnâ ǁkhō te î go ti ǂkhōga ǁîb ǂkhōgu tawa ǁgui.

³²ǁNā ǃkhais ge ǂanǂansase nîra hā xuige, ǃKhūb di mîsa xub ge altars, Bet-Els tawa hâbǀî tsî ǀgapigu di omgu Samariab di ǃādi ǃnâ hâguǀîb ge ǂgaisa.

³³Nē ǃnaeǃkhais khaoǃgâb ge Jerobeamma oa tama ge i ǁîb di ǂkhaba daoba xu tsî ǁkhawa ǀgapigu di pristerga ge dī, ǁau khoen ǁaes dina xu; ǂgao geb hoabab ge ǃommi âba ge ǀoaǀoa, ob ge ge ǀgapigu di prister kai.

³⁴Tsî nē ǃkhais ge Jerobeammi di omma ge ǁore kaiba, ǃgaoǁnâhe tsîb nî hîkākāhese ǃhūbaiba xu.