Read Khoekhoegowab 1 Gao-aogu 14 Bible Online

1 Gao-aogu 14 - Khoekhoegowab bible

1 Gao-aogu 14

¹ǁNā ǁaeb ǁkhāb aib ge Abiab, Jerobeammi di ôaba ge ǀaesen.

²Ob ge Jerobeamma taras âb ǃoa ge mî: Khâi îs ǀkharaǀkharasen, în tā hōǃâ, Jerobeammi di taras a ǃkhaisa îs ǃgû Silos ǃoa; mû, ǁnāpab ge kēbo-aob Ahiaba hâ, tita xa ge mîba, nē ǁaes ǂama ta nî gao-ao ǃkhaisa.

³Îs ǃomǁaeb âs ǃnâ ū disi perega tsî amperen tsî danib xa ǀoa hâ xapasa, îs ǁîb ǃoa ǃgû; ǁîb ge nîra ǂanǂan si, tare-i nē ǀgôab ǀkha nî ī ǃkhaisa.

⁴Os ge Jerobeammi di tarasa ǁnāti dī tsî khâi tsî Silos ǃoa ǃgû tsî Ahiab di ommi ǃnâ ge sī. Tsî Ahiab ge mû ǁoa ge i, mûra âb ge ǀkhâ hâ i kairasib âb xa xui-ao.

⁵Ob ge ǃKhūba Ahiab ǃoa ge mî: Mû, Jerobeammi di taras ra hā, ǃkhai-es nî sa tawa dîga ǁîs di ôab xa, ǀaesenni hâ xui-ao; nēti tsî nētits ge ǁîs ǃoa nî ǃhoa; tsî ǂgâxas ka, os ge nî ǀkharaǀkharasen.

⁶Tsî i ge ge ī, Ahiab ge ǂaira âs di ǀōba ǁnâuo, dao-amsa-ūs ra ǂgâxa hîa, ob ge ge mî: ǂGâxa re, Jerobeammi di tarase, tarexas ra ǀkharaǀkharasen? Tita ge karosa am-i ǀkha sa ǃoa go sîhe xuige.

⁷ǃGû îs Jerobeamma sī mîba: Nētib ra ǃKhūb, Israeli Eloba mî: ǁNā-amaga satsa ta ge ǁaes di ǁaeguba xu ǀgapiǀgapi, tsî satsa ta ge ti ǁaes Israels ǂama aiǃgû-aose mâi;

⁸tsî gaosisa ta ge Davib di omma xu ǀkhauǁnâ tsî satsa ǁîsa mā, tsî sats ge ti ǃgāb Davib khami ī tama ge i, ti mîmāde ge ǃkhōǀgaipeb tsî ǂgaob âb hoab ǀkha ge sao teba, ti mûǁae a ǂhanun ǀguinab nî dīse;

⁹tsîts ge ǂkhabana gere dī, sa aiǃâ ge hâ igu hoagu ǃgâ-ai ra dīǃâ, tsîts ge ǃgû tsî ǀkhara elogu tsî ǂnâhesa īga ge dībasen, ǁaibǀîts nî tita ǂoeǂoese, tsîts ge tita sa ǃgâbǀkhābǀî ge aoxū.

¹⁰ǁNā-amaga mû, tita ge Jerobeammi di ommi ǂama ǂkhababa nîra ūhā tsî nîra Jerobeammi din xa ǃhūǃnoma mâ aoreb hoaba, ǃkhōsab tsî ǃnorasaba Israeli ǃnâ; tsî tita ge Jerobeammi ommi di suriga nîra ǀnapubē, ǀapon ra ǀnapubēhe xase, kāǃarin nîs kōse.

¹¹Jerobeammi din xa ga ǃās ǃnâ ǁō-i, ǁî-en ge arina nî hapu, tsî ǃaub ai ga ǁō-i, ǁî-en ge anina nî hapu; ǃKhūb ge ǁîsa go mî xui-ao.

¹²Sasa ǁnâi khâi îs ommi âs ǃoa ǁaru; sa ǂaira ga ǃās ǃnâ ǂgâ ǃnubaib ge ǀgôaba nî ǁō.

¹³Tsî Israeli hoab ge ǁîb ǂama ǃgae tsî nî ǁkhō bi; nēb ǀguib ge Jerobeammi din xa ǀhobas ǃnâ nî sī xui-ao, ǃgâi xū-i ge Jerobeammi ommi din ǁaegu ǃKhūb, Israeli di Elob xa ǁîb ǃnâ go hōhe amaga.

¹⁴Tsî ǃKhūb ge Israeli ǂama gao-aoba nîra ǂkhaiǂkhaibasen, Jerobeammi di omma ǁnātsē nîra ǃhūǃnomaba, tsî tare-e nēsi ra ī-e?

¹⁵Tsî ǃKhūb ge Israeli ona nî ǂnau, ǂāb ra ǁgam-i ǃnâ doeǁgamahe xase, tsîb ge Israela nîra tsubuǂui ǁnā ǃgâi ǃhūb, ǁîb ge ǁîn îna māba xu, tsîb ge ǁîna nî ǀgaruǀgaru ǃāb nau ǃnanib kōse, ǁîn ge ǃgaoǂuisa īsiga dībasen amaga, ǃKhūba ǁaibǀî ra ǂoeǂoeǃâ.

¹⁶Tsîb ge Israela nîra māǁnâ Jerobeammi di ǁoren hîab ge ǁoren tsî Israelab ge ǁore kain ǃaroma.

¹⁷ǁGoasis ge Jerobeammi di tarasa khâi tsî ǃgû tsî Tirsas tawa ge sī; tsî dao-ams haib ommi dib tawas ge sī ǃnubaib ge ǀgôaba ge ǁō.

¹⁸Tsîn ge ge ǁkhō bi, tsî Israeli hoab ge ǁîb ǂama ge ǃgae ǃKhūb di mîs, ǁîb ǃgāb, kēbo-aob Ahiab di ǃoabasa xub ge ǃhoas ǃoa.

¹⁹Nau xūn Jerobeammi di ǃnaeǃkhaidi din, matib ǃkham tsî ge gao ǃkhaisa, mû, ǁîn ge xoahe hâ ǃNaeǃkhaidi ǂkhanis Israeli di gao-aogu dis ǃnâ.

²⁰Tsî tsēdi, Jerobeammi ge gaodi ge ǀgamdisiǀgamǀa kuri ge i; tsîb ge ǁîba ge ǁō, tsî Nadab, ǁîb ôab, ge amǃnâs âb ai ge gaosîsen.

²¹Tsî Rehabeammi, Salomob di ôab ge Judab ǃnâ gere gaosîsen; hakadisiǀguiǀa kurixab ge Rehabeamma ge i, gao-ao kaib ge ǃnubai, tsîb ge disihûǀa kuriga Jerusalems ǃnâ gere gaosîsen, ǁnā ǃās, ǃKhūb Israeli di ǃhaodi hoade xu ge ǃkhōǂuisa, ǀons âbab nî ǁnāpa ǂnûiga; tsî ǁîb îs ge Naamas, Amonǁîs, ti ge ǀon hâ i.

²²Tsî Judab ge ǃKhūb mûǁae a ǂkhabana ge dī, tsîn ge ǁîba ôasasibǀî ge ǂoeǂoe, ǁîn în hoan ge dīn ǃgâ-ai, ǁîn ǁoren hîan gere ǁoren ǀkha.

²³ǁÎn on ge ǀgapiga gere ǂnubibasen tsî ǃanu ǀuiǃkhaidi tsî ǃgaoǂuisa īga, mâ ǀgapi ǃnoms hoas ai tsî mâ ǃam hais hoas ǃgao.

²⁴Tsî gu ge ǁkhāti taotaosa ǀgôaga ǃhūb ǃnâ ge hâ i; ǁîgu ge ǁnā ǁgaidīgu, ǀūben, ǃKhūb ge Israeli ôan di ais aiǃâba xu ūn hâna xu ge ǃhaeǂuin digu hoagu ǃoa gere dī.

²⁵Tsî i ge koroǁî kurib gao-aob Rehabeammi dib ǃnâ ge ī, Sisaki, Egipteb gao-aob ge Jerusalems ǃoagu ǃapa ǃkhaisa.

²⁶Tsîb ge ǁuigu ǃKhūb ommi diga ge ūbē tsî ǁuigu gao-aob ommi diga; ā, xūn hoanab ge ge ūbē; tsîb ge ǁkhāti ǃhuniǀurikhōsikhōgu, Salomob ge dī kaigu hoaga ge ūbē.

²⁷Tsî gao-aob Rehabeammi ge ǁîgu amǃnâs ai ǂaikhōsikhōga ge kuru; tsîb ge ǁîga ǂamsagu ǃkhoe-aogu, gao-aob ommi di ǁāba ra ǃûigu di ǃomǁae ge mā.

²⁸Tsî i ge ge ī, gao-aob ge ǃKhūb di ommi ǃnâ ǂgâ ǃnubai gu ge ǃkhoe-aoga ǁîga tani tsî ǁîga ǁkhawa ǃkhoe-aogu di ǃûi-ommi ǃnâ ūsī ǃkhaisa.

²⁹Nau xūn, Rehabeammi di ǃnaeǃkhaidi din tsî dīb gen hoan ge ǃNaeǃkhaidi ǂkhanis Judab gao-aogu dis ǃnâ xoahe hâ.

³⁰Tsî i ge toro-e ge hâ i Rehabeammi tsî Jerobeammi tsîkha ǁaegu, mâ ǁaeb hoaba.

³¹Tsî Rehabeammi ge ǁō tsî ge ǁkhōhe ǁîb îgu tawa Davib di ǃās ǃnâ; tsî ǁîb îs ge Naama ti ge ǀon hâ i, Amonǁîsa; tsî ǁîb ôab Abiammi ge ǁîb di amǃnâs ai gere gaosîsen.