Read Khoekhoegowab 1 Gao-aogu 15 Bible Online

1 Gao-aogu 15 - Khoekhoegowab bible

1 Gao-aogu 15

¹Disiǁkhaisaǀaǁî kurib gao-aob Jerobeammi, Nebati ôab dib aib ge Abiamma ge gao-ao kai, Judab ǂama.

²Tsîb ge ǁîba ǃnona kuriga gere gaosîsen Jerusalems ǃnâ; tsî ǁîb îs ge Maaxa ti ge ǀon hâ i, Absalommi ôasa.

³Tsîb ge ǁîb îb di ǁoren, ǁîb aiǃâb ge dīn hoan ǃnâ gere tanisen, tsî ǁîb di ǂgaob ge ǀoasase ǃKhūb, ǁîb di Elob ǀkha hâ tama ge i, ǁîb îb Davib di ǂgaob ge ī i xase.

⁴Xawe Davib ǃaromab ge ǁîba ǃamamǀae-e ge mā Jerusalems ǃnâ, ǀgôab âba ǁîb khaoǃgâ ra ǂkhaiǂkhaiǃâ, tsî Jerusalemsa ra ǁapoǁapoǃâ,

⁵Davib ge ǃKhūb mûǁae a ǂhanuna gere dī, tsî ǁîb ge mîmā bin hoana xub ge ǁîb di ûitsēdi hoade ǂgō tama ge i amaga, Uriab, Hetiǁîb di ǃkhais ǀguis ose.

⁶Tsî i ge toro-e ge ī Rehabeammi tsî Jerobeammi tsîkha ǁaegu, ǁîb di ûitsēdi hoade.

⁷Tsî nau xūn, Abiammi ǃnaeǃkhaidi din tsî dīb gen hoan ge xoahe hâ ǃNaeǃkhaidi ǂkhanis Judab gao-aogu dis ǃnâ. Tsî i ge ǁkhāti toro-e ge ī Abiammi tsî Jerobeammi tsîkha ǁaegu.

⁸Tsî Abiammi ge ge ǁō, tsîn ge ǁîba Davib ǃās ǃnâ ge ǁkhō, tsî Asab, ǁîb ôab ge ǁîb ǃās ǃnâ gere gaosîsen.

⁹ǀGamdisiǁî kurib Jerobeammi, Israeli gao-aob dib ǃnâb ge Asaba ge gao-ao kai, Judab ǂama.

¹⁰Tsîb ge hakadisiǀguiǀa kuriga gere gaosîsen Jerusalems tawa, tsî ǁîb îs ge Maaxas ti ge ǀon hâ i, Absalommi ôasa.

¹¹Tsî Asab ge ǃKhūb mûǁae a ǂhanuna gere dī, ǁîb îb Davib khami.

¹²Taotaosa ǀgôagab ge ǃhūba xu ge ūbē tsî ǁgôa-elogu, ǁîb îgu ge dīgab ge sîsenbē xui-ao.

¹³Ā, ǁîb îs Maaxas ǂûsab ge ǁkhāti gao-aosisa xu ge ūǁnâ, ǁgaiǁgaisa ǁgôa-elo-i īsibas ge dī amaga, tsî ǃārob Kidronni tawab ge Asaba ge khauǃkhū bi.

¹⁴ǀGapigu ge ūbēhe tama ge hâ i, xaweb ge Asab di ǂgaoba ǀoasase ǃKhūb ǀkha ge hâ i, ǁîb di tsēdi hoade.

¹⁵Tsîb ge ǃKhūb di ommi ǃnâ khaihe hâ xūn ǁîb îb din tsî ǁîb di khaihe hâ xūn: ǀHaiǀurib, ǃhuniǀurib tsî xapan tsîna ge ūǂgâ.

¹⁶Tsî i ge toro-e ge i Asab tsî Basab, Israeli gao-aob tsîkha ǁaegu, ǁîkha di tsēdi hoade.

¹⁷Tsî Basab, Israeli di gao-aob ge Judab ǃoagu ǃapa tsî Ramasa ge ǂnubi, khoe-i xare-eb mā-am tidega, Asab, Judab gao-aob tawa ǂoa tsî ǂgâsa.

¹⁸ǃNubaib ge Asaba ǀhaiǀurib tsî ǃhuniǀurib ǃKhūb ommi di ǁuigu xa tsî gao-aob ommi di ǁuigu xa ge ǃgauba ū tsî ǁîb di ǃgāgu ǃomǁae ǁîga ge mā; tsî gao-aob Asab ge Benhadadi, Tabrimonni ôab, Hesjonni ôab, Siriab di gao-aob, Damaskus tawa ǁan hâb ǃoa sî tsî ge mî:

¹⁹ǃGaeǀhao-i ge hâ, tita tsî sats tsîkhom ǁaegu tsî ti îb tsî sa îb tsîkha ǁaegu; mû, tita ge satsa ǀhaiǀurib tsî ǃhuniǀurib tsîkha ra sîba, ǃgû îts sa ǃgaeǀhaos, Basab, Israeli di gao-aob ǀkhats ūhâsa ǁauǁau, îb tita ǃoa hāsa ǀû.

²⁰Ob ge Benhadaba gao-aob Asaba ǁnâu tsî ǁnā ǂnubidi hîab ūhâdi di ǂamsaga Israeli di ǃādi ǃoagu ge sî, o gu ge Ijons, Dans, Abel-Bet-Maaxas tsî Kineroti hoaba ge ǂnau Naftaliǃhūb hoab ǀkha.

²¹Tsî i ge ge i, Basab ge ǁnâuo, ob ge Ramasa ǂnubisa ǀû tsî Tirsas tawa ge hâ.

²²ǃNubaib ge gao-aob Asaba Judab hoab ǃnâ ge ǂgaiǂui kai (khoe-i xare-i ge ǃnorasa tama ge i), Ramas di ǀuidi tsî ǁîs di hain, Basab ge ǁîn ǀkha ǂnubinan ge nî tanibē, ti; tsî gao-aob Asab ge ǁîn ǀkha Geba-Benjamins tsî Mispas tsîra ge ǂnubi.

²³Naun, Asab di ǃnaeǃkhaidi hoadi din tsî ǁîb di ǀgaib hoab din tsî dīb gen hoan tsî ǃādi hîab ge ǂnubidi din, ǁîn ge xoahe hâ ǁaeb ǃNaeǃkhaidi ǂkhanis Judab gao-aogu dis ǃnâ; xawe kairasis âb di ǁaeb aib ge ǂaira âb ǃnâ ge ǀaesen.

²⁴Tsî Asab ge ǁō tsî ǁîb di îgu ǀkha ge ǁkhōhe ǁîb îb Davib di ǃâs ǃnâ; tsî Josafati, ǁîb ôab ge ǃās âb ǃnâ ge gao-ao kai.

²⁵Tsî Nadab, Jerobeammi di ôab, ge Israeli ǂama ge gao-ao kai ǀgamǁî kurib Asab, Judab gao-aob dib ǃnâ; tsîb ge ǀgam kurikha ge gaosîsen.

²⁶Tsîb ge ǃKhūb mûǁae a ǂkhabana gere dī tsî ǁîb îb di daob ai gere ǃgû, tsî ǁîb di ǁoreb, Israelab ge ǁîb ǀkha ǁore kaib ǃnâ.

²⁷Tsî Basab, Ahiab ôab, Isaskari ommi dib, ge ǃgaeǀhao-e ǁîb ǃoagu ge dī, tsî Basab ge ǁîba Gibetons, Filisteǁîn dis tawa ge ǂnau Nadab tsî Israeli hoab ge Gibetonsa ǃnamiǂgā ǃnubai.

²⁸Tsî Basab ge ǁîba ge ǃgam ǃnonaǁî kurib Asab, Judab gao-aob dib ǃnâ, tsîb ge ǁîb di ǃās ǃnâ ge gao-ao kai.

²⁹Tsî i ge ge ī, ǁîb ge gao-ao kai ǃnubaib ge Jerobeammi di ommi hoaba ǂnau ǃkhaisa; Jerobeammi din xa ǀomsa ūhâ-i xare-eb ge ǃgau tama, ǁîb dinab ge hîkākās kōse, ǃKhūb di mîs ǁîb ǃgāb Ahiab, Silonǁîb di ǃoabasa xub ge ǃhoas ǃoa,

³⁰Jerobeammi di ǁoren, ǁîb gere ǁoren tsî Israelab ge ǁore kain ǃaroma tsî ǁîb di ǂoeǂoes, ǃKhūb Israeli di Elobab ge ǂoeǂoes ǃaroma.

³¹Tsî naun, Nadab di ǃnaeǃkhaidi din tsîb ge dīn hoan, ǁîn ge xoahe hâ ǃNaeǃkhaidi ǂkhanis Israeli di gao-aogu dis ǃnâ.

³²Tsî i ge toro-e ge ī Asab tsî Basab, Israeli di gao-aob tsîkha ǁaegu ǁîkha di tsēdi hoadi ǃnâ.

³³ǃNonaǁî kurib Asab, Judab di gao-aob dib ǃnâb ge Basab, Ahiab ôaba ge gao-ao kai Israeli hoab ǂama Tirsas tawa ǀgamdisihakaǀa kurigu kōse ra gaoǃâ.

³⁴Tsîb ge ǃKhūb di mûǁae a ǂkhabana gere dī tsî Jerobeammi di daob ǃnâ gere ǃgû tsî ǁîb di ǁoreb, ǁîb ǀkhab ge Israela ǁore kaib ǃnâ.