Read Khoekhoegowab 1 Gao-aogu 16 Bible Online

1 Gao-aogu 16 - Khoekhoegowab bible

1 Gao-aogu 16

¹ǃNubais ge ǃKhūb di mîsa ge hā Jehub, Hananib ôabǀî, Basab ǃoagu mî raǃâ:

²ǁNā-amaga, tita ge satsa tsaraba xu ǃkhōkhâi tsî ti ǁaes Israels ǂama aiǃgû-aose ge mâi, tsî sats ge Jerobeammi di daoba ge ǃgû tsî ti ǁaes Israelsa ge ǁore kai, titan ǁoren ân ǀkha ǁaibǀî nî ǂoeǂoes kōse:

³Mû, ǁnā-amaga ta ge tita Basab di surib tsî ǁîb ommi di suriba nîra ǀnapubē; tsî tita ge sa omma nîra dī, Jerobeammi, Nebati ôab di ommi khami.

⁴Basab din xa ga ǃās ǃnâ ǁō-i, ǁnā-en ge arina nîra ō, tsî ǁîb din xa ga ǃaub ai ǁō-i, ǁnā-en ge ǀhommi di anina nîra hapu.

⁵Tsî nau xūn Basab di ǃnaeǃkhaidi din tsî ǁîb ge dīn tsî ǀgaib âb tsîn, ǁîn ge ǃNaeǃkhaidi ǂkhanis Israeli di gao-aogu dis ǃnâ xoahe hâ.

⁶Tsî Basab ge ǁō tsî ge ǁkhōhe Tirsas tawa; tsî ǁîb di ôab Elab ge ǁîb di ǃās ǃnâ gere gaosîsen.

⁷Nētis ge ǃKhūb di mîsa ge ī kēbo-aob Jehub, Hananib ôab di ǃoabasa xu Basab tsî ǁîb di ommi ǃoagu; tsîs ge ge ī ǁnā ǂkhabab hoab hîab ǃKhūb mûǁae ge dīb ǂama, ǁîba ǃomkha âb di sîsenni ǀkha ǁaibǀî ra ǂoeǂoeǃâ, Jerobeammi ommi khamib ge ī tsî ǁîbab ge ǁkhāti ge ǂnaukākā amaga.

⁸ǀGamdisiǃnaniǀaǁî kurib Asab, Judab gao-aob dib ǃnâb ge Elab, Basab ôaba ge gao-ao kai Israeli ǂama Tirsas tawa, ǀgam kurikha ra gaoǃâ.

⁹Tsî Simrib, ǁîb di ǃgāb, ǃkhareb kunidi dib di ǂamsab ge ǃgaeǀhao-e ǁîb ǃoagu ge dī, Tirsas tawab hâ hîa, āǃansens kōseb ā hâ hîa, Arsab, gao-aob mûǂamaob di ommi ǃnâ Tirsas tawa.

¹⁰ǃNubaib ge Simriba ǂgâ tsî ge ǃgam bi ǀgamdisihûǀaǁî kurib Asab, Judab gao-aob dib ǃnâ; tsîb ge ǁîb di ǃās ǃnâ ge gao-ao kai.

¹¹Tsî i ge ge ī, ǁîb ra gaosîsen hîa, trons aib ǂnôa hîab ge Basab di ommi hoaba ǂnau ǃkhaisa; ǀgui-i, ǂnubiǂgoab ai ra ǀkham-i kas, ǁîb di ǀaokhoen kas, ǁîb di ǀhōsan kas hoasab ge ǁîba ǃgau tama ge i.

¹²Nētib ge Simriba Basab ommi hoaba ge hîkākā ǁnā mîs ǃKhūb dis, kēbo-aob Jehub di ǃoabasa xub ge Basab xa ǃhoas ǃoa,

¹³Basab di ǁoren hoan tsî Elab, ǁîb ôab on di ǁoren, ǁîn ǀkha kha ge Israela ǁore kain ǃaroma, ǃKhūb, Israeli Eloba ǁîkha di ǁau xūn ǀkha ǁaibǀî ra ǂoeǂoeǃâ.

¹⁴Tsî nau xūn, Elab di ǃnaeǃkhaidi din tsîb ge dīn hoan ge xoahe hâ Israeli gao-aogu di ǃNaeǃkhaidi ǂkhanis ǃnâ.

¹⁵ǀGamdisihûǀaǁî kurib Asab, Judab gao-aob dib ǃnâb ge Simriba hû tsēde ge gaosîsen Tirsas tawa; tsî ǁaes ge ge ǁgoe Gibetons, Filisteǁîn dis ǃoa-ai.

¹⁶Tsî ǁaes hîa ge ǁgoes ge: Simrib ge ǃgaeǀhao-e dī tsî gao-aob ona ge ǃgam, tin ra khoena mî ǃkhaisa ǁnâu, ob ge Israeli hoaba ǁnātsē Omrib, Israeli toroǂamkhoeba Israeli gao-aose ge dī, ǁgoeǃkhais ǃnâ.

¹⁷Tsî Omrib ge ge ǃapa tsî Israeli hoaba ǁîb ǀkha Gibetonsa xu tsî Tirsasa ge xāǂgā.

¹⁸Tsî i ge ge ī, Simrib ge ǃās go ūhe ǃkhaisa mûo, ob ge gao-aob ommi di î-oms ǃnâ ǂgâ tsî ǁîb ǂamǃnâ gao-aob omma ǀaes ǀkha ǂhubi tsî ge ǁō,

¹⁹ǁîb di ǁoren hîab ge ǁoren ǃaroma, ǃKhūb mûǁae a ǂkhabana ra dīse, Jerobeammi di daob ǃnâ tsî ǁîb di ǁoreb hîab ge ǁoreb ǃnâ ra ǃgûse, Israela ra ǁore kaiǃâ.

²⁰Tsî nau xūn Simrib di ǃnaeǃkhaidi din tsî ǃgaeǀhaos hîab ge dīs tsîn ge ǃNaeǃkhaidi ǂkhanis Israeli di gao-aogu dis ǃnâs xoahe hâ.

²¹ǃNubais ge Israeli ǁaesa ǀgam ǃâra ǃnâ ge ǀgorahe; ǀgui ǃâs ǁaes dis ge Tibnib, Ginati ôaba ge sao, ǁîban nî gao-aodīse; tsî nau ǃâs ge Omriba ge sao.

²²Xawe ǁnā ǁaes, Omriba ge saos ge Tibnib, Ginati ôaba ge sao ǁaes xa ǀgaisa ge i; tsî Tibnib ge ǁō, ob ge Omriba ge gaosîsen.

²³ǃNonadisiǀguiǀaǁî kurib Asab, Judab gao-aob dib ǃnâb ge Omriba Israeli ǂama ge gao-ao kai, disiǀgamǀa kuriga ra gaoǃâ; Tirsas tawab ge ǃnani kuriga gere gaosîsen.

²⁴Tsîb ge Samarias di ǃhomma ge ǁama Semeri tawa ǀgamkaidisi talendn ǀhaiǀurib din ama tsî ǃhomma ge ǂnubi; tsîb ge ǁnā ǃās hîab ge ǂnubisa Semeri ǃhommi di ǀhonkhoeb di ǀons ǃoa, Samaria ti ge ǂgai.

²⁵Tsî Omrib ge ǃKhūb mûǁae a ǂkhabana gere dī; ā, ǁîb aiǃâ ge hâ igu hoagu ǃgâ-ai tsūseb ge ǁîba gere dī.

²⁶Tsîb ge hoa daogu Jerobeammi, Nebati ôab digu ǃnâ tsî ǁîb di ǁoren, ǁîn ǀkhab ge Israela ǁore kain ǃnâ gere ǃgû, ǃKhūb, Israeli di Eloba ǁaibǀî ra ǂoeǂoeǃâ, ǁîgu di ǁau xūn ǀkha.

²⁷Tsî nau xūn, Omrib di ǃnaeǃkhaidi din hîab ge dīn tsî ǀgaib âb hîab ge sîsenūb tsîn ge xoahe hâ ǃNaeǃkhaidi ǂkhanis Israeli di gao-aogu dis ǃnâ.

²⁸Tsî Omrib ge ǁō tsî ge ǁkhōhe Samarias tawa; tsî ǁîb di ôab Axab ge ǃās âb ǃnâ gere gaosîsen.

²⁹Tsî Axab, Omrib ôab ge Israeli ǂama ge gao-ao kai ǃnonadisiǁkhaisaǀaǁî kurib Asab, Judab gao-aob dib ǃnâ; tsî Axab, Omrib ôab ge Israeli ǂama Samarias ǃnâ ǀgamdisiǀgamǀa kuriga gere gaosîsen.

³⁰Tsî Axab, Omrib ôab ge ǃKhūb mûǁae a ǂkhabana gere dī, ǁîb aiǃâ ge hâ igu hoagu ǂamai.

³¹Tsî i ge ge i (supu ǃkhai-e kha ge i, Jerobeammi, Nebati ôab di ǁoren ǃnâb gere ǃgû-e?) ob ge ganupe Isebels, Et-baali, Sidonǁîn gao-aob di ôasa tarase sī ge ū tsî Baala gere ǃoaba tsî ǁîb aiǃâ gere ǃhonǁgoa.

³²Tsîb ge Baala altar-e ge ǂnûikhâiba Baali di ommi ǃnâ, Samarias tawab ge ǂnubiba.

³³ǁKhātib ge Axaba ǃgaoǂuisa ī-e ge dī; ob ge Axaba Israeli di gao-aogu, ǁîb aiǃâ ge hâ igu hoagu ǃgâ-ai gere tsūdī, ǃKhūb, Israeli Elobab nî ǁaibǀî ǂoeǂoega.

³⁴ǁÎb di tsēdi ǃnâb ge Hieli, Bet-Elǁîba, Jerixosa gere ǂnubi: Abirammi, ǁîb di ǂguroǃnaesabeb aib ge ǁîsa ge ǃgaoǃgao tsî Segub, ǁîb ôab ǂkhammi aib ge ǁîs di ǁāga ge ǂnûi; ǁnā mîs ǃKhūb dis, Josuab, Nunni ôab di ǃoabasa xub ge ǃhoas ǃoa.