Read Khoekhoegowab 1 Gao-aogu 17 Bible Online

1 Gao-aogu 17 - Khoekhoegowab bible

1 Gao-aogu 17

¹Tsî Eliab, Tisbeǁîb, Gileadǁî ǁansaben dib, ge Axab ǃoa ge mî: ǃKhūb Israeli Elob, ǁîb aiǃâ ta mâb a ûitsama ǃkhais ao i ge nē kurigu ǃnâ ǀau-i kas, ǀapi-i kas hoasa hâ tide, ti mîs ai i ga ī tama io.

²ǁNās khaoǃgâs ge ǃKhūb mîsa ǁîba ge hāba, mî rase:

³ǃGûbē nēpa xu îts aiǂoasǀî unusen îts gaugausen ǃārob Keriti, Jordanǃāb nau ǃnanib ai ra dâub tawa.

⁴Tsî i ge nîra ī, ǃārob ǃnâts nîra ā ǃkhaisa; tsî tita ge goraga go mîmā, î gu ǁnāpa ǂhansenba tsi, ti.

⁵Ob ge ǃgû tsî ǃKhūb di mîs ǃoa sī ge dī: ǃGû tsîb ge ǃārob Keriti, Jordanǃāb nau ǃnanib ai hâb tawa sī ge ǁan.

⁶O gu ge goraga ǁgoaga pereb tsî ǁgan-i tsîna gere ūhāba bi, ǁnās ǁkhās xase ǃuia pere-i tsî ǁgan-i tsîna; tsîb ge ǃārob ǃnâ ge ā.

⁷Tsî i ge ǂgui tsēdi ǀunis ai ge ī, ǃārob ra ǂnâ ǃkhaisa, ǀapi-i ge ǃhūb ǃnâ hâ tama i xui-ao.

⁸ǃNubais ge ǃKhūb di mîsa ǁîba ge hāba, mî raǃâ:

⁹Khâi îts Sarefats, Sidons tawa hâs ǃoa ǃgû îts ǁnāpa sī ǁan; mû, tita ge ǁnāpa ǃoatara-e go mîmā, îs ǂhansenba tsi, ti.

¹⁰ǁGoasib ge khâi tsî Sarefats ǃoa ge ǃgû. Tsî ǃās di ǁābab ge ǀgūo, mû, o i ge ǃoatara-e hâ, ǀaena ra sā-ai-e; ob ge ǁîsa ǂgai tsî ge mî: ǁGamro-i xa ūhāba te re nē soas ǃnâ, î ta ā re!

¹¹Tsî ūhā nîses ge ǃgûo, ob ge ǁîsa ǂgaiǀî tsî: Îs ǁkhāti perero-i xa ūhāba te re sa ǃommi ǃnâ, ti ge mî.

¹²Xawes ge ǁîsa ge mî: ǃKhūb, sa Elob a ûitsama ǃkhais ao ta ge ampere-i xare-e ūhâ tama hâ, ǃomǃnāb ǀoaro-i tsampereb di-i ǀgui-e ta ūhâ soas ǃnâ tsî oliro-e ǂkhenas ǃnâ; tsî kō, ǀaerona ta ge goro sā-ai, o ta ge ǃgû tsî nî ǁîna tita tsî ti ôab tsîma ǁāǁāba, îm ǂû îm ǁō, ti.

¹³Ob ge Eliaba ǁîs ǃoa ge mî: Tā ǃao, ǃgû îs sa mîs ǃoa dī, xawe aibe ǁîn xa amperero-e dī îs ǁî-e ūǂoaxaba te, îs sas tsî sa ôab tsîro ǁnās khaoǃgâ xū-e dība.

¹⁴Nētib ra ǃKhūb, Israeli Eloba mî xui-ao: Tsampereb, soas ǃnâ hâb ge toa tide tsî olib, ǂkhenas ǃnâ hâb ge tôasi tide ǁnā tsēs, ǃKhūb nî ǁîs ai ǀapiba ǃhūbaib ai mās kōse.

¹⁵Os ge ǃgû tsî Eliab di mîs ǃoa ge dī; nētis ge ǁîsa ge ǂû tsî ǁîb tsî ǁîs di ommi tsîna ǂomxa ǁaeb kōse.

¹⁶Xawe tsampereb, soas ǃnâ hâb, ge toa tama tsî olib ge ǂkhenas ǃnâ tôasi tama ge hâ i, ǃKhūb di mîs hîab ge Eliab di ǃoabasa xu ǃhoas ǃoa.

¹⁷Tsî i ge nē xūn khaoǃgâ ge ī, ǀgôab nē taras, ommi ǀhonkhoes dib ge ǀaesen ǃkhaisa, tsî ǀaesenni âb ge nētikōse ǀgaisa, ǀoms ge ǁîb ǃnâ ǃgau tama is kōse.

¹⁸Os ge Eliab ǃoa ge mî: Tare-e ta sats ǀkha ǁae hâ, sats Elob aotsa? Ti tawats ge go ǂgâxa, ti ǂhanuoǃnâsibats nî ǂâiǂâisenga tsî ti ôabats nî ǃgamga.

¹⁹Ob ge ǁîsa ge mîǀî: Sa ôaba mā te. Tsî tîǂams âsa xu ū tsîb ge ǁîba ǂamoms, ǁîs ǃnâb ǁan hâs ǃoa taniǃapa tsî ǁîb di kharob ai ge ǁgui bi.

²⁰Tsîb ge ǃKhūba ǂgaiǀî tsî ge mî: ǃKhū, ti Elotse, nē ǃoataras, ǁîs tawa ta hâsats kha tsūdī tsî ǁîs ôaba go ǃgam?

²¹Tsîb ge ǃnona ǃnādi kōse ǀgôab ǂama khowasen tsî ǃKhūba ǂgaiǀî tsî ge mî: ǃKhū, ti Elotse, as ǀoms nē ǀgôab disa ǁîb ǃnâ oahā re!

²²Tsî ǃKhūb ge Eliab di domma ge ǁnâu-am; os ge ǀoms ǀgôab disa ǁîb ǃnâ ǁkhawa ge oa, tsîb ge ǁkhawa ge ûi.

²³Ob ge Eliaba ǀgôaba ū tsî ommi di ǂamomsa xu ūǁgôa tsî ǁgûsa ge mā bi; tsî Eliab ge: Mû, sa ôab ge a ûitsama, ti ge mî.

²⁴Os ge ǁnā tarasa Eliab ǃoa ge mî: Nēsi ta ge a ǂan Elob aots a ǃkhaisa tsî ǃKhūb mîs, sa ams ǃnâ hâs a ama ǃkhaisa.