Read Khoekhoegowab 1 Gao-aogu 18 Bible Online

1 Gao-aogu 18 - Khoekhoegowab bible

1 Gao-aogu 18

¹Tsî i ge ǂomxa ǁaeba ǁnās khaoǃgâ ge ī, ǃKhūb di mîs ge Eliaba hāba ǃkhaisa ǃnonaǁî kurib ǃnâ, mî rase: ǃGû, îts Axaba sī ǁgausen. Tita ge ǀapiba ǃhūbaib ai nîra mā xuige.

²Ob ge Eliaba ǃgû tsî Axaba sī ge ǁgausen. Tsî ǃâtsūǀkhāb ge kaise ǀgaisa ge i Samarias ǃnâ.

³Ob ge Axaba Obadjab, mûǂamaoba ge ǂgai, tsî Obadjab ge ǃKhūba kaise gere ǃao.

⁴Tsî Isebels ge ǃKhūb di kēbo-aoga ǃhūǃnoma ǃnubai i ge ge ī, Obadjab ge ǀguikaidisi kēbo-aoga ū tsî ǁîga korodisi korodisise ǀgui ǁhoab ǃnâ sâu tsî ǁîga pere-i tsî ǁgam-i tsîn ǀkha ge ǂhansenba ǃkhaisa.

⁵Tsî Axab ge Obadjab ǃoa ge mî: ǃHūba ǃgûǃnâǃganu ǀaudi hoadi kōse tsî ǃāgu hoagu kōse; ǀnîsi khom ǀgâna nî hō, î khom hān tsî hā-eseln tsîna ûib ǃnâ sâu, î khom tā xū-i xare-e ǀgoan xa ǂoaǃnâ.

⁶Tsî kha ge ǃhūba ǁîkha ǃnâ ge ǀgora, ǁîba kha nî ǃgûǃnâse; Axab ge ǀgui daoba ǀguri ge ǃgû, tsî Obadjab ge ǀgui daoba ǀguri ge ǃgû.

⁷Tsî Obadjab daob ai hâ hîa, mû, ob ge Eliaba ǁîba ge ǃoa; tsî ǁîba ǂan tsîb ge ais âb ai ǁnā tsî: Ti ǀhonkhoe Eliatsa satsa? ti ge mî.

⁸Ob ge: ǁÎ ta ge, ti ge mî; ǃgû îts sa ǀhonkhoeba: Mû, Eliab ge nēpa hâ, ti mîba.

⁹Xaweb ge ǁîba ge mî: Tare-e ta ǁore hâ, ots ra sa ǃgāta Axab ǃomǁae mā, ǃgam teb nîga?

¹⁰ǃKhūb, sa Elob a ûitsama ǃkhais ao: ǁAe-i xare-i kas, gaosi-i xare-i kas hoas ge a ǀkhai, ǁî-i ǃnâb ti ǀhonkhoeba sī tama hâ-e, ôa tsi nîse; tsî: Nēpab a ǀkhai, tin ge mîo, ob ge ǁnā gaosis kas, ǁnā ǁaes kas hoasa ge nū kai, ǁîn ǃnâts hōhe tama hâsa.

¹¹Tsî nēsits ge satsa: ǃGû îts sa ǀhonkhoeba sī mîba: Mû, Eliab ge nēpa hâ, ti ra mî.

¹²Tsî ī i kao, ǃKhūb di Gagab ga satsa, tita ga ǃgûxū tsio, ūbēo, tita a ǀū ǃkhai-i ǃoa, tsî sī tsî ta ga ǁîsa Axaba mîbao, tsîb ga hō tsi tama io, ob ge nî ǃgam te; tsî tita, sa ǃgāta, ge ǃKhūba ra ǃao ti ǂkhamsisa xu.

¹³Mîbahe tamats kha hâ, ti ǀhonkhoetsa, tita ge dīna, Isebels ge ǃKhūb di kēbo-aoga ǃgam ǃnubai? Mati ta ge ǃKhūb di kēbo-aogu xa ǀguikaidisi aoga sâu ǃkhaisa, mâ korodisi aogu hoagu ǀgui ǁhoab ǃnâ, tsî mati ta ǁîga pere-i tsî ǁgam-i tsîna ge ǂhomibasa?

¹⁴Tsî nēsits ra mî: ǃGû îts sa ǀhonkhoeba sī mîba: Mû, Eliab ge nēpa hâ. Ob ge ǁîba nî ǃgam te.

¹⁵Ob ge Eliaba ge mî: ǃKhūb ǂnubidi dib, ǁîb aiǃâ ta mâb a ûitsama ǃkhais ao ta ge tita nētsē ǁîb tawa nî ǁgausen.

¹⁶ǃNubaib ge Obadjaba Axaba ǃgûǃoa tsî ǁî ǃkhaisa ge mîba bi; ob ge Axaba Eliaba ge ǃgûǃoa.

¹⁷Tsî i ge ge ī, Axab ge Eliaba mûo, ob ge Axaba ǁîb ǃoa ge mî: Satsa Israela ra gongonǃnâtsa?

¹⁸ǃNubaib ge ǁîba ge mî: Tita ge ǁî tama ta, Israela ra gongonǃnâ ta, tsî sats tsî sa îb di ommi di du tsîdu ge a ǁî, ǃKhūb di mîmāde ǁnāxū tsî du Baalga gere sao ǃkhais ǀkha.

¹⁹Sî ǁnâi nēsi îts Israeli hoaba Karmelǃhommi ai ǀhaoǀhaoba te tsî ǁnā hakakaidisi tsî korodisi kēbo-aogu Baali digu tsî ǁnā hakakaidisi kēbo-aogu ǀhomas digu, Isebels di tāb ai ra ǂûga.

²⁰Nētib ge Axaba Israeli ôan hoan ǃnâ sî tsî kēbo-aoga ge ǀhaoǀhao Karmelǃhommi ai.

²¹ǃNubaib ge Eliaba ǁaes hoasa ǀgū tsî ge mî: Matikōse du kha ǀgam ǂaira ai ra ǀī? ǃKhūb ga Elo io, ǁnâi ǁîba sao, tsî Baali ga ǁî io, ǁnâi ǁîba sao. Xawe ǁaes ge ǀgui mî-i xare-e ǃeream bi tama ge i.

²²ǃNubaib ge Eliaba ǁaes ǃoa ge mî: Tita ge ǀguri ǃKhūb di kēbo-aose ge ǃgau, tsî Baali di kēbo-aogu ge hakakaidisi tsî korodisi aose hâ.

²³Î ge ǁnâi ǀgam ǁgōkha māhe, î gu ǁîga ǀgui ǁgōba ǁhûiǂuibasen, î gu ǁîba ǃâdi ǃnâ ǁhāǃā tsî ǀaen ai ǁgui bi, xawe a gu tā ǀae-e ǁîb ǃnaga khau; o ta ge tita nau ǁgōba ǁāǁā tsî nî ǀaen ai ǁgui bi tsî ǀae-e ǁîb ǃnaga khau tide.

²⁴ǁNāǃnubai go sago sadu di eloba ǂgaiǀî, î ta tita ǃKhūb di ǀonsa ǂgaiǀî; tsî ǁnā Elob, ǀae-i ǀkha ga ǃereammi, ǁîb ge nî Elo. Os ge ǁaes hoasa ǃeream tsî: Nē mîs ge a ǃgâi, ti ge mî.

²⁵Ob ge Eliaba Baali di kēbo-aogu ǃoa ge mî: Sago ǀgui ǁgōba ǃkhōǂuibasen, î go ǁîba aibe ǁāǁā, sago ge a ǂgui xuige; î go ǀons sago elob disa ǂgaiǀî, î go ǁîb ǃnaga tā ǀae-e khau.

²⁶O gu ge ǁnā ǁgōb, ǁîb xa gu ge māheba ū tsî ǁîba ge ǁāǁā tsî Baali di ǀonsa ge ǂgaiǀî, ǁgoasa xu tsēǃgâǁaeb kōse, mî raǃâ: O Baaltse, ǃeream ge re! Xawe dom-i tsî ǃereamao-i xare-i ge ǀkhai ge i; o gu ge altars hîa gu ge dīsǀî ge uri.

²⁷Tsî i ge tsēǃgâǁaeb ai ge ī, Eliab ǁîna ǃhō tsî ra mîsa: ǃGari dommi ǀkha ǂgai, elob kom xaweo; ǀnîsib ra ǂâiǂâisen, ǀnîsib ge dīxū-e ūhâ, ǀnîsib ge daob ai hâ, ǀnîsib ge ǁom hâ; îb ǃnoaǂkhai.

²⁸O gu ge ǃgari dommi ǀkha ǂgai tsî ǁîgu di ǁnaetiba ǃoa, gôadi tsî ǁhâigôadi tsîdi ǀkha gere ǃgaosen, ǀaoǂnâ gu ges kōse.

²⁹Tsî i ge ge ī, tsēǃgâǁaeb ge ǃgôa-īo, o gu ge ge kēbo, ǂûǁguibas ra ǁguibahes kōse; xawe dom-i xare-i tsî ǃereamao-i xare-i tsî ǃgaoǃgâ-i xare-i ge ǀkhai ge i.

³⁰ǃNubaib ge Eliaba ǁaes hoasa ǃoa: Î du tita ǀgū, ti ge mî. Os ge ǁaes hoasa ǁîba ge ǀgū; ob ge ǃKhūb di altars khôakākāhe hâsa ge ǂuruǂuru.

³¹Tsî Eliab ge disiǀgamǀa ǀuide ge ū Jakob (ǃKhūb di mîs ge ǃnaebab tsî: Israel tits ge nî ǀon, ti ge mîbaheba) di ǃhaodi di ǀgausa ǃoa.

³²Tsîb ge ǁnā ǀuidi ǀkha altarsa ǃKhūb di ǀons ǃnâ ge ǂnubi; ǁnās khaoǃgâb ge altars ǂnamipe ā-e ge khao, ǀgam ǀguirora ǃkhom-i dira kōse hara-e.

³³Tsîb ge ǀaena ge ǁāǁā tsî ǁgōba ǃâdi ǃnâ ǁhāǃā tsî ǀaen ai ge ǁgui bi.

³⁴Tsîb ge ge mî: Haka soade ǁgam-i ǀkha ǀoaǀoa î du khauǁguibas ai tsî ǀaen ai ǁhō. Tsîb ge: ǀGamǁî ǃnās ai ǁîsa dī! ti ge mî. On ge ǀgamǁî ǃnās ai ge dī. Tsîb ge: ǃNonaǁî ǃnās ai ǁîsa dī! ti ge mî. On ge ǃnonaǁî ǃnās ai ge dī.

³⁵ǁGam-i ge altarsa dâuǂnamipes kōse; tsî āb onab ge ǁgam-i ǀkha ge ǀoaǀoa.

³⁶Tsî i ge ge ī, ǂûǁguibas ra ǁguibahe hîab ge kēbo-aob Eliaba ǀgū tsî mîsa: ǃKhūtse, Abrahammi, Isaki tsî Israeli di Elotse, as nētsē ǂansa, sats Israeli ǃnâ a Elo tsî tita a sa ǃgā tsî nēn hoana ta sa mîs ǃoa goro dī ǃkhaisa.

³⁷ǃEream te re, ǃKhūtse, ǃeream te re, îs nē ǁaesa ǂanǃā, sats ǃKhūts a ǁnā Elo ǃkhaisa tsî sats go ǁîn di ǂgaoba ǁkhaedawa ǃkhaisa.

³⁸ǃNubais ge ǃKhūb di ǀaesa ǁnā tsî khauǁguibas tsî ǀaen tsî ǀuidi tsî ǃhūb tsîna ge ǂhubi, tsî ǁgam-i, āb ǃnâ hâ-i onas ge ge tsākhâi.

³⁹Tsî ǁaes hoas ge ǁnāsa mûo, on ge aidi ân ai ǁnā tsî: ǃKhūb a Elo, ǃKhūb a Elo, ti ge mî.

⁴⁰Ob ge Eliaba ǁîn ǃoa ge mî: Baali di kēbo-aoga ǃkhō, ǀguib xareb âgu ge ǂoa tide. On ge ǁîga ge ǃkhō; tsî Eliab ge ǁîga ǃārob Kisonni ǃoa ǂgaeǂguiǁgôa tsî ǁnāpa ǁîga ge ǂā.

⁴¹ǁNās khaoǃgâb ge Eliaba Axab ǃoa ge mî: ǃApa, ǂû îts ā, ǀō-i ge hâ, ama kai ǀapib di khami tsâ-e.

⁴²Tsî Axab ra ǂû tsîb nî āse ǃapa hîab ge Eliaba Karmelǃhommi di ǂaob ai ǃapa tsî ǃhūb ai ǃgamǃgâ tsî ǁîb di aisa ǁgoara âb ǁaega ǂgā,

⁴³tsî ǃgāb âb ǃoa: ǃGûǃapa îts huribǀî ǂui, ti ge mî. ǃNubaib ge ǃgûǃapa tsî ǂui tsî: Xū-i ge a ǀkhai, ti ge mî. ǁGoasib ge: ǁKhawa ǃgûsī re hû ǃnādi kōse, ti ge mî.

⁴⁴Tsî i ge hûǁî ǃnās ai ge ī, ob ge: Mû, ǂkhari ǀnanuro-i, khoeb ǃommi khami kōro-i ra ǂoaxa huriba xu, ti ge mî. Ob ge ǁîba ge mî: ǃGûǃapa îts Axaba sī mîba: ǂGāǃao îts ǁgôaxa, îts tā ǀapib xa ǀhapeǀhapehe.

⁴⁵Tsî i ge ǁnāsan ra dī hîa ge ī, ǀhommi ge ǀnanudi tsî ǂoab xa ǂnū ǃkhaisa, tsî kai ǀapi-i ge ge hā; tsî Axab ge ǃnaribē tsî Jesreels ǃoa ge ǃnari.

⁴⁶Tsî ǃKhūb di ǃommi ge Eliab ǂama ge hâ i, ob ge kamanab âba ǃgae tsî Axab di ais aiǃâ ge ǃkhoe, Jesreels tawab ge sīs kōse.