Read Khoekhoegowab 1 Gao-aogu 19 Bible Online

1 Gao-aogu 19 - Khoekhoegowab bible

1 Gao-aogu 19

¹Tsî Axab ge Isebelsa ge mîba Eliab ge dīn hoana tsî matib ge kēbo-aogu hoaga gôab ǀkha ǃgamsa.

²ǃNubais ge Isebelsa sîsabeba ge sî Eliab ǁgā, mîb nîse: A gu eloga nēti dī-ū te, î gu ǁnāti dīǀaro te, amase ta ge tita ǁari nē ǁaeb ǁkhāb ai sa ǀomsa mâb hoab âgu di ǀoms khami nîra dī.

³Tsî ǁnāsab ge mûo, ob ge khâi tsî ge ǃgû ǁîb di ûib ǃaroma tsî ge sī Bersebas, Judab ǃnâ hâs tawa; tsîb ge ǃgāb âba ǁnāpa ge ǁnāxū.

⁴Xawe ǁîb ǂûb ge ǃgaroǃhūb ǃnâ ǀgui tsēs di daob kōse ǂgâ tsî xaubehai-i ǃgao ge ǂnû; tsîb ge ge ǀgore, îb ǁō ti tsî ge mî: ǂÂu go nēsi, ǃKhūtse, îts ǁnâi ti ǀomsa ū, ti îgu ǃgâ-ai ta ǃgâi tama hâ xuige.

⁵Tsî ǁgoe tsîb ge xaubehai-i ǃgao ge ǁom; tsî mû, o i ge ǀhomǃgā-e ǁîba tsâǀkhā tsî ge mîǀî bi: Khâi îts ǂû.

⁶Tsî kōkhâib ge, mû, o i ge ampere-i, ǂnomdi ai ǁganhe hâ-i tsî ǁgam-i xa ǀoa hâ xapa-i tsîna ǁîb di danaǂam ge mâ i; ob ge ǂû tsî ā tsî ǁkhawa sī ge ǁgoe.

⁷Tsî ǀhomǃgāb ǃKhūb dib ge ǁkhawa ǀgamǁî ǃnās ai hā tsî tsâǀkhā bi tsî ge mî: Khâi îts ǂû, daob xats nî ǃnūbahe xuige.

⁸Ob ge khâi tsî ǂû tsî ge ā; tsîb ge ǁnā ǂûn di ǀgaib ǀkha hakadisi tsēdi tsî hakadisi tsuxugu kōse ge ǃgû ǃhommi Horeb kōse.

⁹Tsîb ge ǁnāpa ǁhoa-i ǃnâ ǂgâ tsî ǁnāpa sī ge hâǁgoa. Tsî mû, mîs ǃKhūb dis ge ǁîba hāba tsî: Tare-ets ra nēpa dī, Eliatse? ti ge mî.

¹⁰Ob ge ǁîba ge mî: Tita ge ǃKhūb, ǂnubidi di Eloba kaise goro tauba, Israeli ôan ge sa ǃgaeǀhaosa ǁnāxū tsî sa altarde ge khôaǁnâ tsî sa kēbo-aoga gôab ǀkha ǃgam ǃkhais ǃaroma; tsî tita ge ǀguri ǃgau hâ, tsîn ra ti ǀomsa ôa, ǁîsan nî ūbēga.

¹¹Ob ge ǁîba ge mî: ǂOaxa îts nē ǃhommi ai mâ ǃKhūb di ais aiǃâ. Tsî mû, ob ge ǃKhūba ge ǃgû-ī, tsî ǀgaisa ǂoab, ǃhomga ra ǀkhauǃāb tsî ǃhaoga ra khôaǂkhūǂkhūb ge ǃKhūb aiǃâ ge ī, xawe ǃKhūb ge ǂoab ǃnâ hâ tama ge hâ i; tsî ǂoab khaoǃgâb ge ǃhūǂgubiba ge hā; xawe ǃKhūb ge ǃhūǂgubib on ǃnâ hâ tama ge hâ i.

¹²Tsî ǃhūǂgubib khaoǃgâs ge ǀaesa ge hā, xawe ǃKhūb ge ǀaes on ǃnâ hâ tama ge hâ i; tsî ǀaes khaoǃgâ i ge ǀō-i ǂause ra karakara ǂoab di-e ge hā.

¹³Tsî i ge ge ī, Eliab ge ǁî-e ǁnâuo, ob ge ais âba ǁîb di anaǂamsarab ǀkha ǃgū-ai tsî ǂoa tsî ǁhoab di ams ǃnâ sī ge mâ. Tsî mû, ob ge domma ǁîb tawa ge hā: Tare-ets ra nēpa dī, Eliatse? ti ra mîba.

¹⁴Ob ge ge mî: Tita ge kaise ǃKhūb, ǂnubidi di Eloba goro tauba, Israeli ôan ge sa ǃgaeǀhaosa ge ǁnāxū tsî sa altarde ge khôaǁnâ tsî sa kēbo-aoga gôab ǀkha ǃgam ǃkhais xa; tsî tita ge ǀguri ge ǃgau, tsîn ra ti ǀomsa ôa, ǁîsan nî ūbēga.

¹⁵Ob ge ǃKhūba ǁîb ǃoa ge mî: ǃGû îts ǁkhawa sa daob, Damaskus di ǃgaroǃhūb ǃoa gaub ǃoa oa îts ǂgâ ǁîs ǃnâ, îts Hasaela gao-aose ǂkhauǀkhā Siriab ǂama;

¹⁶ǁnāb tawats ge Jehub, Nimsib ôaba gao-aose nî ǂkhauǀkhā Israeli ǂama; tsî Elisab, Safati ôab, Abel-Meholas dibats ge kēbo-aose nî ǂkhauǀkhā sa amǃnâs ai.

¹⁷Tsî i ge nîra ī, Jehub ǁnā-i, Hasaeli di gôaba xu ga ûi-e nî ǃgam ǃkhaisa; tsî Jehub di gôaba xu ga ûi-eb ge Elisaba nîra ǃgam.

¹⁸Tsî tita ge Israeli ǃnâ hûǀoadisina ge ǃgau, ǁgoadi hoadi, hîa Baali aiǃâ ǃhon tamadi tsî ams hoas, hîa ǁîba ǁoa tamasa.

¹⁹Ob ge ǁnāpa xu ǃgû tsî Elisaba ge sī hō, Safati ôab, hîa ra ǃhūǃgaoba disiǀgamǀa ǃnaogu di gomagu, ǁîb aiǃâ ra ǂgaegu ǀkha, tsî ǁîb ge disiǀgamǀaǁîkha tawa ge hâ i; ob ge Eliaba ǁîb ǃoa ǃgû tsî anaǂamxūb âba ǁîb ai ge ao.

²⁰Ob ge gomaga ǁnāxū tsî Eliaba ǃkhoeǃgon tsî ge mî: Î ta ti îb tsî ti îs tsîra ǁoa re, o ta ge satsa nî sao. Ob ge ǁîb ǃoa ge mî: ǃGû îts oa, tare-e ta go dī tsis xa ǂâi.

²¹Ob ge ǁîb khaoǃgâba xu oa tsî ǀgui ǃnaob di gomakha ū tsî ǁîkha ge ǂā tsî goman di sîsenūxūn ǀkhab ge ǁîkha ǁgan-e ge sâi tsî ǁî-e ǁaesa ge mā, on ge ge ǂû. ǁNās khaoǃgâb ge khâi tsî Eliaba sao tsî ǁîba gere ǃoaba.