Read Khoekhoegowab 1 Gao-aogu 2 Bible Online

1 Gao-aogu 2 - Khoekhoegowab bible

1 Gao-aogu 2

¹Tsî Davib di ǁōtsēdi ge ǀgūo, ob ge ǁîb di ôab Salomoba ge mîmā:

²Tita ge ǃhūbaib hoab di daoba ra ǃgû, xuige ǀgaisa îts aose i.

³Îts ǃKhūb, sa Elob di ǃûisa ǂan îts ǃgû ǁîb di daogu ǃnâ, îts ǃkhōǀgaipe ǁîb di ǂnûiǂgādi, tsî ǁîb di mîmādi, tsî ǁîb di ǂhanugu, tsî ǁîb di ǀhûǀguitimîde, Moseb di ǂkhanis ǃnâ xoahe hâ khami; ǁnâuǃāxasets nî sîsen ga tsî dīts nîn hoan ǃnâ tsî ǂnanǀîts kan hoan ǃnâ.

⁴ǃKhūb nî mîs âb, tita ǂamab ge ǃhoasa ǁapoǁapose, mî raǃâ: Sa ôagu ga ǁîgu di daoba sâuo, tsî gu ga ti ais aiǃâ îǂhôase ǁîgu di ǂgaob hoab ǀkha, tsî ǁîgu di ǀoms hoas ǀkha taniseno, ob ge ǀgui khoeb xareba ǃgaoǁnâhe tide Israeli di tronsa xu.

⁵Tsîts ge ǁkhāti a ǂan Joab Serujas ôab ge tita dī-ū xū-e, tsî ǀgam toroǂamkhoekha Israelǁîn dikhab ge dī-ū xū-e: Abneri, Neri ôab tsî Amasab, Jeteri ôab tsîkha, ǁîb ge ǃgamkha, tsîb ge toroǀaoba ǂkhîb ǃnâ ge ǂnâxū; tsîb ge toroǀaoba ǃgaesenni âb, kamanab âb ai hâb tawa ge dī, tsî ǁharora, ǂaira âb ai hâra tawa.

⁶Dī ǁnâi sa gā-aisib ǃoa îts ǁîb di ǀhai ǀûna tā ǂkhîb ǀkha ǀhobas ǃnâ ǁgôa kai.

⁷Xawe Barsilaib, Gileadǁîb di ôagats ge ǀkhomxasiba nî sîsenū, tsî gu ge ǁnāgu, sa tāb tawa ra ǂûgu ǁaegu nî hâ: ǁNās ǁkhās xase gu ge tita ge ǃoa xui-ao, sa ǃgâsab Absalommi di ais aiǃâ ta gere ǃhū ǃnubai.

⁸Tsî kō, sa ǀkhab ge Simib, Gerab ôab, Benjaminni ôab Bahurims diba hâ, ǁîb, Mahanaims ǃoa ta ra ǃgû tsēs ai ama ǀgaisa ǀâxareb ǀkha tita ge ǀâxareba; xaweb ge Jordanǃāb amǃgâ tita ge ǃoa, tsî tita ge ǁîba ǃKhūb tawa nūba tsî: Tita ge ǃgam tsi tide gôab ǀkha, ti ge mî.

⁹Xawe nēsi satsa ǁîba tā ǀhapiose ūhâ, gā-ai aots a xuige; tsîts ge nî ǂan, tare xū-ets nî dī bi ǃkhaisa, ǀhai ǀûgu âbats ǀaob ǀkha ǀhobas ǃnâ nî ǁgôa kaise.

¹⁰Tsî Davib ge ǁō tsî ǁgûgu tawa ge ǁkhōhe Davib di ǃâs ǃnâ.

¹¹Tsî tsēdi, Davib ge Israela gaoǂamdi ge ge hakadisi kuri i; hû kurigab ge Hebrons ǃnâ gere gaosîsen, tsî Jerusalems ǃnâb ge ǃnonadisiǃnonaǀa kuriga gere gaosîsen.

¹²Tsî Salomob ge ǁîb îb Davib di trons ai ge ǂnû tsî gaosis âb ge kaise ge ǁapo.

¹³ǃNubaib ge Adoniab, Hagits ôaba Batsebas, Salomob îs tawa ge hā, tsîs ge ǁîsa: Sa hāsa ǂkhîs a? ti ge mî. Ob ge ǁîba: ǂKhî a, ti ge mî.

¹⁴ǁNās khaoǃgâb ge ǁîba: Mîxū-e ta ge sasa ūba hâ, ti ge mî. Os ge ǁîsa: ǃHoa re, ti ge mî.

¹⁵Ob ge ǁîba ge mî: Sas ge a ǂan, gaosis ge ti i ǃkhaisa, tsî Israeli hoab ge ais âba ti ai ǂnûi hâ isa, gao-ao kai nîse; gaosis ge unusen tsî ti ǃgâsab di kai xawe; ǃKhūba xus a, ǁîb di kais ge ǃkhaisa xui-ao.

¹⁶O ta ge sasa ǀgui ǃkhais ǀguisa ra ǂgaoǀkhā, tā tita ǂkhā si. Os ge ǁîsa: ǃHoa re, ti ge mî.

¹⁷Ob ge ǁîba ge mî: Gao-aob Salomob ǀkha ǃhoa re; sasab ge ǂkhā tide xuige, îb Abisags, Sunemǁîsa, tarase mā te re ti.

¹⁸Os ge Batsebasa ge mî: Ā, gao-aoba ta ge nî ǃhoa-ūba tsî.

¹⁹Nētis ge Batsebasa gao-aob Salomob tawa ge sī, ǁîbas nî Adoniaba ǃhoa-ūbase. Ob ge gao-aoba khâi tsî ǁîsa ǃgûǃoa tsî ǁîs aiǃâ ge ǃgamǃgâ. ǁNās khaoǃgâb ge trons âb ai ǂnû tsî ǂnû-aiǃnao-e gao-aob îsa ge mâi kaiba; os ge amǀkhāb âb ai ge ǂnû.

²⁰Os ge ǁîsa ge mî: ǂKhari xūro-e ta ge ra ǂgaoǀkhā tsi, tā ǁî-e ǂkhā te re. Ob ge gao-aoba ǁîs ǃoa: ǂGaoǀkhā te re, ti îse, sasa ta ǂkhā tide xuige, ti ge mî.

²¹Os ge: As Abisags, Sunemǁîsa Adoniab, sa ǃgâsaba tarase māhe re, ti ge mî.

²²ǃNubaib ge gao-aob Salomoba ǃeream tsî ǁîb di îs ǃoa ge mî: Tare xū-i ǃaromas ra Abisags, Sunemǁîsa, Adoniaba tarase ǂgaoba? Îs ǁnâi gaosis ona ǁîba ǂgaoba (ti ǃgâsab tita xa a kaib a xui-ao), ā ǁîb tsî Abjatari, pristeri, tsî Joab, Serujas ôaba.

²³Tsî gao-aob Salomob ge ǃKhūb tawa nū tsî: Ab Eloba nēti dī-ū te, îb ǁnāti dīǀaro te, Adoniab ge ǂanǂansase nē mîsa ǁîb ûib ǃoagu nî mî hâ, ti ge mî.

²⁴Tsî nēsi, ǃKhūb, tita ge ǁapoǁapob tsî ti îb Davib di trons ai ge ǂnû kai teb tsî tita, mîb ge xase omma ge dībab a ûitsama ǃkhais ao, ǂanǂansaseb ge Adoniaba nētsē nî ǃgamhe.

²⁵Tsî gao-aob Salomob ge Benajab, Jojadab ôaba ge sî; ǁîb ge ǁîba ge ǃkhā tsîb ge ge ǁō.

²⁶Tsî Abjatari, pristeri ǃoab ge gao-aoba ge mî: ǃGû Anatots ǁga, ǃhanagu âts ai, ǁōb di aots a xuige; xawe nētsēs ai ta ge ǃgam tsi tide, ǃKhūb, ā ǃKhūb di ǂgaesats ge ti îb Davib di ais aiǃâ tani xui-ao, tsî ti îb ge ǁîn ǃnâ ǁgâiǀāhe hâ in hoan ǃnâts ge ǁgâiǀāhe hâ i xui-ao.

²⁷Nētib ge Salomoba Abjatara ge ǂhāxu, ǃKhūb di pristerseb ī tidega; ǃKhūb di mîsab nî ǀoaǀoase, ǁîb ge Elib di ommi ǂama, Silos tawa ǃhoasa.

²⁸Tsî gommi ge Joab tawa sīo, (Joab ge Adoniaba ge sao xui-ao, Absalommab ge sao tama ge hâ i xui-ao), ob ge Joaba ǃKhūb di tentoms ǃoa ǁhâ tsî altars di ǁnâga ge ǃkhō.

²⁹Ob ge gao-aob Salomoba ge mîbahe Joab go ǃKhūb di tentoms ǃoa ǁhâ ǃkhaisa tsî mû, ǁîb ge altars tawa hâ. ǃNubaib ge Salomoba Benajab, Jojadab ôaba sî tsî: ǃGû îts sī ǃkhāǃan bi, ti ge mî.

³⁰Ob ge Benajaba ǃKhūb di tentoms ǃoa sī tsî ǁîb ǃoa ge mî: ǂOaxa, tib ra gao-aoba mî. Ob ge: Hî-î, a ta nēpa ǁō! ti ge mî. Ob ge Benajaba ǃereamsa gao-aoba ūsība tsî: Nētib ge Joaba go ǃhoa, tsî nētib ge go oe-am te, ti ge mî.

³¹Ob ge gao-aoba ǁîb ǃoa ge mî: Dī, ǁîb go mî xase, îts ǃkhāǃan bi sī, îts ǁkhō bi, îts tita tsî ti îb di omma xu dībē ǁnā ǀaob, Joab ge ǁause ǂnâxūba.

³²Ob ge ǃKhūba ǀaob âba ǁîb di danas ai nî oa kai, ǀgam aokha, ǁîb ǃgâ-ai a ǂhanu-ai tsî ǃgâikhab ge ǁhâiǁgui tsî gôab ǀkha ǃgam xui-ao, ti îb Davib a ǀū hîa: Abneri, Neri ôab, toroǂamkhoeb Israeli dib, tsî Amasab, Jeteri ôab, Judab di toroǂamkhoeb tsîkha.

³³Nētib ge ǀaob âkha Joab di danas ai tsî surib âb di danas ai nîra oa ǀamosib kōse; xawe Davib tsî ǁîb surib tsî ǁîb ommi tsî ǁîb trons ge ǃKhūba xu ǂkhîba nî ūhâ, ǀamosib kōse.

³⁴Ob ge Benajab, Jojadab ôaba ǃgû tsî ǁhâiǁgui tsî ge ǃgam bi, tsîb ge ommi âb ǃnâ ge ǁkhōhe, ǃgaroǃhūb ǃnâ.

³⁵Tsî gao-aob ge Benajab, Jojadab ôaba, Joab di amǃnâs ai ǂnubisa ge mâiba, tsî Sadoki, pristerab ge gao-aoba Abjatari di amǃnâs ai ge ǂnûi.

³⁶ǁNās khaoǃgâb ge gao-aoba sî tsî Simiba ǂgai tsî ǁîb ǃoa ge mî: Omsa ǂnubibasen Jerusalems ǃnâ, îts ǁnāpa xu tā ǂoa nēǀîs kas, nauǀîs kas hoasa.

³⁷Ī i ge nîra xui-ao, ǂoats ka tsēs ai Kidronnats ga ǃgâu ǃnubai, ǁaposase ǂan, ǁōts nî ǃkhaisa; ǀaob âtsa ab sa danas ai hâ.

³⁸Ob ge Simiba gao-aob ǃoa ge mî: ǃGâi mîs ge nēsa; ti ǀhonkhoe gao-aots ge ǃhoa khami ta ge sa ǃgāta nî dī. Tsî Simib ge ǂgui tsēde Jerusalems tawa ge ǁan.

³⁹Xawe ǃnona kurigu di ǀunis ai i ge ge ī, ǀgam ǃgākha Simib dikha ge ǃkhoebē ǃkhaisa Axib, Maaxab ôab, Gats di gao-aob ǃoa; tsîb ge Simiba ge mîbahe: Mû, sa ǃgākha ge Gats tawa hâ ti.

⁴⁰Ob ge Simiba khâi tsî esels âba ǃgaeǃgâ tsî ge ǃgapi Gats ǁga, Axib ǃoa, ǃgākha âbab nî ôase; nētib ge Simiba ǃgû tsî ǃgākha âba Gatsa xu ge ūhā.

⁴¹Tsî Salomob ge ge ǂanǂanhe, Simib ge Jerusalemsa xu Gats ǃoa ǃgû tsî ǁkhawa hā ǃkhaisa.

⁴²ǃNubaib ge gao-aoba sî tsî Simiba ǂgai tsî ǁîb ǃoa ge mî: Nūba tsi tama ta hâ ǃKhūb tawa, tsî ǃkhō-am tsî mîba tsi tama ta hâ: ǂOats ka tsēs ai nēǀîs kas, nauǀîs kas hoasats ga ǃgû ǃnubai, ǁaposase ǂan, ǁōts nîra ǃkhaisa? Tsî sats ge: Nē mîs ge a ǃgâi, ǁnâu ta gosa, ti ge mî, tita ǁga.

⁴³Tarexats kha ǁnâi nūs ǃKhūb disa ǃkhōǀgaipe tama hâ tsî ǁnā mîmās, tita ge mîmā tsisa?

⁴⁴ǃAruǀîb ge gao-aoba Simib ǃoa ge mî: Sats ge ǁnā ǂkhabasib hoab, ǂgaob âts a ǂanni, ti îb Davibats ge dī-ūb hoaba a ǂan; ǁnā-amagab ra ǃKhūba ǂkhabasib âtsa sa danas ai oahā kai,

⁴⁵xawe gao-aota Salomota ge ǀkhaehe hâ; tsîs ge trons Davib disa ǃKhūb di ais aiǃâ nî ǁapoǁapohe ǀamosib kōse.

⁴⁶Tsî gao-aob ge Benajab, Jojadab ôaba ge mîmā; ob ge ǂoa tsî ge ǁhâiǁgui bi, ǁōb ges kōse. Nētis ge gaosisa Salomob ǃomǁae ge ǁapoǁapohe.